Mipui Aw 16.12.2012

MIPUI AW

Vol. XVIII Issue No. 51 Kristian Thalai  Pawl  Saikhamakawn Branch  Pathianni Dt.16.12.2012

VAWIIN CHANG VAWN

            Tin, Marin, “Ngai teh, Lalpa bawinu ka ni, i thu ang zelin ka chungah thleng rawh se,” a ti a.

                                    Luka 1 : 38

               

16.12. 2012 (Pathianni)

Chawhma Suday School

Tantu          : Pi C.Lalparmawii

Chawhnu

Thuhriltu   : Upa Lallawmchhunga

Zan Inkhawm

Thuhriltu   : Upa Lalzamas

KTP PROGRAMME

 Dt. 17.12. 12 (Thawhtan zan)

Hruaitu         : Pu.Lalduhkima

Tantu             : Nl Lalrinhlui

Thuhriltu      : Upa Zonunmawia

Hla hruaitu   : Pu Lalremruata

turte                 Tv Lalhmangaiha

Musician       : Pu Lalchhandama

                          Tv Malsawmzuala

VAWIIN  TLAI   FELLOWSHIP

A hmun   : S.S Hall

Hruaitu : Upa Lallawmchhunga

Tantu : Tv Lalrinpuia

           

KOHHRAN  HMEICHHIA

PROGRAMME (Ni 18.12.2012)

Kum 2013 chhung atana Kohhran Hmeichhe hruaitu thlanna huna hman tur a ni a, Member ten ngai pawimawh a, kal theuh tur a ni.

           

SERMON

HNAWNG TAWH LUL LOVE

                Lal Isua Krista min chhandam tura he khawvelah a lokalna champha hmang turin nasa takin kan inbuatsaih leh tan ta mup mup mai. Zoram Kristiante tan chuan hei aia uar zawka hman hi kan nei lova. Kan hunpui neih zingah chuan kan ngaih ropui ber pawh ti ila, kan tisual tampui awm lo ve. He ni kan hman thin hi kan hman chhante ngun taka han ngaihtuah chuan uar tak leh ropui taka hman pawh hi a phu ve reng a ni. Min chhandam tura Lal Isua Krista he khawvela a pianna ni champha a ni miau a.

                Heti taka kan ngaih ropui leh kan ngaih hlut nachhan hi kawng hrang hrang a awm thei awm e. Nasa takin mihring lamah chuan inbuatsaih thin mah ila, chhandamtu Lal Isua Krista hi keimahniah a piang tawh em tih hi a pawimawh ber chu a ni. A pawimawh ber hlamchhiah a, keimahni mihring nuam tihna leh kan duh zawng anga hman kan tum anih chuan he hun kan hman chhan hi kan thelh chiang viau awm e. He hun hi khawvel chhandamtu lo pianna champha a ni a. A pianna champha lawma ropui taka hmangtu kan nih chuan, he chhandamna ropuina leh hlutna hi keimahniah a taka changtute kan ni dawn a, chutiang ni lova, a phawvuakah kan tal vel mai mai a, kan hman chhan pawh ngaihtuah chang lova, khawvel dan ang ringawta kan lo inbuatsaih ve a nih chuan Christmas hmang kan ni thei dawn em ni le?

                Lal Isua Krista kan tana a inpekna hlutzia leh ropuizia hmuchhiang taktaktu tan chuan he Christmas hlutna leh ropuina pawh hi atakin an hmu thin. A chhan chu an tan chhandamna famkim rawn thlentu pianna hi ngaihthah thei an ni tlat tawh lo. Vawiina Christmas kan  hmalawka lo thleng tur hman tuma kan inbuatsaih mup mup lai hian kan hman chhan hi kan thinlung hian hre reng sela ava duhawm em. Kan hman chhan ber ngaihtuah reng reng lo leh keimahni duhdan ringawt kan kalpui a nih chuan Christmas hmang ve miah lo hian kan tiak leh mai ang tih a hlauhawm alawm le.

                Kan hmaa Christmas kan hman turah hian amah ber Lal Isua Krista hi keimahniah hian a hnawng viau dawn nge? Hmanah a pian dawn lai khan khualbukah khan a hnawng tawh a. Vawinah nang leh kei hian chhandamna famkim kan chan theih nan a, khualbuk pawh chang zo lova khan, i thinlung chhungah khan pianna tur hmun a duh a sin. Khualbuka a hnawng ang khan hmun a awm love i ti dawn nge? Hnawng tawh lul love, “Isu, vawiinah kan thinlung bawnginah lo piang thar leh la nang, kan chatuan lal turin” kan ti dawn.     

                       

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

CHANGKAN NA

            ‘Changkanna’ han tih chuan hnam puitling tawh te Sap kan tih ho khu kan rilruah a rawn langin kan mitthlaah a lo lang nghal mai awm e. A dik a, an nun leh an khawsak phung te, an ram inrelbawl dan kalphung reng reng te a dik in an changkang bawk em  a tin ni. A changkang hle mai kan tih hian eng ber hi nge maw a changkan lai chu ni ang le?

            A hmasa ber ah chuan ram/ hnam a changkan nachhan chu a mi cheng te an changkan vang a ni. Mihring zawk te kan pawimawh ta tih na a nih chu. Ruihtheih thil ti a buai buai te an changkang thei lo phawt, nihna sang leh zahawm tak dinhmun pawh luah se, an nihna chelh kha an tizahawm lo hlauh zawk. Zirna in a khawih danglam sak loh mihring nun chuan changkanna kawng dik a pawh thei lo bawk. Khawtlang nun leh kan chenho na nun hriatthiam tum na nun hi changkanna a ni a. Tin, dikna te,huaisenna dik te leh nun nghet te  hi mi changkang te ze lairil ber a ni tih hi kan hriatchian a tul hle mai.

            A bak zawng mi changkang te nuna kan hmun te hi changkan na in a ken tel a ni mai zawk ani. Chuvang chuan keini thalai te pawh in michangkang te pawnlam lan dan zir mai lova chhung lam atang kan in zir a tul zawk a ni.

ARTICLE

KA PA!

                                                                        Mawitei pa

            Ka zuam love zuapa tel lova Krismas hman chu,

            Ka ngai mang e, chhungkimte a kan lawm lai;

            Koh kir theih chang si lo!

            Midang kan phak loh hlau a tha leh neih senga theihtawp chhuaha a thiam a theihna zawng zawng kan tana hmang thin tu, tisa leh thlarau lam a ka pa, tun dinhmun ka thlen theih nana ka nu nen bang lova min tawngtaisak thintu Ka pa tel lovin Krismas kan hmang ve dawn ta reng mai! Chhungkaw tam tak an hmangaih em em te tel lova Krismas hmang ka lo hmuin ka lo hre ve tawh thin, mahse, chhungkim te a hman thin,  Hunpui boruak lo thleng chhoin rilru a khawih zia hi ka lo hre phak ngai lo!

            Ka pa kha zirna lamah chuan pawl 8 (Hmanlai pawl 8 tih deuh kher thin) a ni a, kei hi a hminga graduate ve ngawr ngawr ka ni, zir thlen chin atanga chhut chuan kei aiin a chhawr tlak zawk. Tin, rawngbawlna lamah a ni Tualchhung Upa a nia, kei, Pathian khawngaihna zarah Upa ordained chu ka ni ve. Mahse, thlarau lam zirna atanga ka teh chuan kei chu pawl 8 pawh pass lo ka ni a, ka pa kha chu post graduate a ni. A thlarau lam  nun rilzia leh thukzia kha kei hian ka chhut chhuak thiam pha lo chiang khawp mai. Thlarau Thianghlim hruaina avanga inchhungah pawh awm hlei thei lo khawpa vah chhuah a ngaih thin laite, tawnghriatloh leh taksa chetna chang a mi tih bak bak a tih thin lai pawha thlahthlam lova tawiawm thintu ka nu ka fak tel lo thei lo. Ka pa’n hetiang taka taksa chetna changa, a back changte, zaikhawm naa kutzungchal vilika a beih vak thin laite khan khawvel mi kan nih lai a ni na a, tun hnua ka ngaihtuah hian ka lo zahpui ngai miah lo kha a mak ka ti leh hnuhnawh hle mai. Kohhran hlim laia thlarau lam hmahruaitu atana Lalpan a hman thin, mihlim tul deuh an awm changa keini ang duangin tihngaihna hre lova kan thlir mai mai laia, tawnghriatloh nena thawi dam thintu, a tel lova kohhran zaikhawm neih te pawh a va huphurhawm ta em! Thlarau bo leh ramthar lam a vei em em te kha a ropui ka ti. Ka pa kha ka ngaihtuah let leh hian Lalpa ngaiha milian zingah tel ve thei turah kei chuan ka ngai. A dam laia ka fak tam tawk hman lo erawh a pawi ka ti.

            Mahse! tunah chuan a awm ta si lo! Nakinah ahnenah ka la kal ve dawn a ni. A sulhnu leh hlimthla hmuh chang erawh chuan lung a lengin ngaihtuahna a va vak thui thin em! Hei erawh ka hria e, kan hmangaih kan then takte nen hian khawpui hlun leh mawiah, inkhawmpui tiak tawh lohnaah kan la in tawk leh dawn a ni.

            Hmangaih kal ta te tel lova, Krismas hmang tur zawng zawngten hei hi i hria ang u! Thihna avangin kan lungngai a, kan tap a, hmangaihte tel lova Krismas hman kan hreh thinte hi a mak lo, mihring kan la  ni miau a, heng ang lungngaihna te hi nei lo ila mi anglo kan ni tihna a ni mai! Mahse, heng zawng zawng hi Lal Isua daltua kan hman Thlarau Thianghlimin a phal lova, heng lungngaihna te hi kan chungah lo thleng mahse hnehtu Lal Isua kan nei a, chu Lal Isua piancham Krismas chu kan hmang dawn a ni tih i hre thar theuh ang u. Kan hmangaih kal ta te avanga kan lungngaih dan lam aiin a la dam ten Krismas kan hman dan hi a pawimawh zawk a lo ni!

Damlo phaia refer te tana hriattur pawimawhte :-

             Damlo enkawltu doctorin a phai lam pan tura a tih hnuah pawh Sawrkar phalna lak leh a la ngai a, sawrkar phalna la tur chuan Medical Board hmaa inlan a ngai a ni. Hriat thiam a awl zawk nan point hrang hrangin hetiang hian han tarlang ila:-

1.         Damlo phai lama kal tura Doctor in an tih  te, phai kal tura Sorkar phalna pe theitu Medical Board ah hian member 3 an awm a, he Board hi kar tin Nilaini chhun dar 11-12  ah Medical Superintendent Office (Civil Hospital Casualty chung), room no. 201 ah an thukhawm thin.

2.         Board hmaa inlan turte chuan zing atangin Office ah hming ziak lawk theih a ni.

3.         Phai lama kal tura Doctor chawhte chuan Board hmaah, an inentirna lehkhate nen inlan tur a ni a, Board fee Rs. 30/- ken nghal tur a ni.

4.         Board hmaah hian damlo aiah chhungte pawh insawisak theih a ni.

5.         Medical Board lehkha  pekchhuah thil telin Director, Health Services Office (Dinthar) ah Provisional Permission dil tur. Dilna hi Theh luh hmain damlo emaw, damlo chhungte emaw thawhna thuneitu (DDO) phalna/hriatpuina (Forwarding) lak hmasak tur a ni.

6.         Phai atanga kir leh hnuah, Director, Health Services atang bawk hian final permission dil leh tur a ni. Hetah hian provisional certficate leh discharge certificate leh DDO phalna (forwarding) thil tel tur. Final Permission hi T.A. leh M.R. bill nana hman theih chauh a ni.

7.         Sawrkar-in phai lama kal tura a phal theihte chu sawrkar hnathawk lai emaw, a chhung hnai emaw (Sawrkar phal chin) bikte chauh a ni.

Bachelor  Of Missiology (B.Mis) Zir duh tan hun hawn mek a ni

            B.Mis zir duh tan tunah hian form lakchhuah theih a ni a. Mission vengthlang Missionary Traning Center atangin Rs 100 in a lak chhuah theih a, hun hawn rei a ni tawh lovang. Zir thei chin hi B.A pass tan leh Pawl 12 pass chin missionary leh hetiang lam rawngbawlna a kum hnih emaw tal experience lo nei tawh tan a dil theih a.

      A zir hunchhung hi kum thum chhung a ni a, Hostel-a awm tur a ni. Hetiang lam zir tur hian vengchhung thalai te rilru i siam ang u.

           

BIBLE QIUZ NO. 51

iI Lalte  BUNG (7-12)

A Kâr âwl dah khat rawh :

Q1.Chutichuan an tho va, thimhmulah chuan an tlanche ta a, an puan in te, an _______________ te, an _________________ leh an riahhmun chu a awm ngai ngaiin an tlansan a, an tlanche ta chiam a.

Q2.Nimahsela anni chuan an hlau ta êm êm mai a, “Ngai teh u, ______________ pawh khan an chelh tawh lo a ni a, keinin engtinnge kan chelh tehlul ang?” an ti a.

Q3.Tin, puithiam chuan sipai za hotute chu LALPA ina awm ,  lal ____________  fei leh phawte chu a pe a.

Q4.Ka chhiahhlawh zâwlneite thisen leh LALPA chhiahhlawh zawng zawngte thisen phuba chu Jezebeli laka ka lak theihna tûrin i pu ________________ chhûngte chu i tiboral vek ang a.

A bung leh Châng dah rawh :

Q1.Tin, heti hi a ni a, bâwmah huan tangka a tam ta hle tih an hriatin, lal lehkha ziaktu leh   puithiam lalber chu an han kal a, an fun a, LALPA ina tangka awm chin hu an chiar a.

Bung: ...............          Chang: ....................

Q2.Tin, ani chuan, “Anungin man rawh u,” a ti a. Tichuan anungin an man a, berâm hmul   mehna in khur bulah chuan an that a, mi sawmli leh pahnih zet an ni a; pakhat mah a zuah lo.

Bung: ................         Chang: ....................

Q3. Tin, mi tinin hriamhrei kengin lal chu in hual vêl ang a; tupawh hual chhûnga lo lût apiang chu lo thah zel tûr a ni; tichuan lal chu a lût leh a chhuak chu zui zel rawh u,” tiin thu a pe a.

Bung: ................         Chang: ....................

Q4.Tin, Jorama chuan a kai her a, a tlan a, Ahazia hnênah, “Inbumna a awm anih hi, Ahazi,” a ti a.

Bung: ................         Chang: ....................

Q5.Chutiang ngei chuan a chungah a lo thleng ta a ni; mipuiin kulh kawngka bula chuan an             chil nuai nuai a, a thi ta a ni.

Bung: ................         Chang: ....................

Hming : ......................................................

Section : .....................................................

BIBLE QUIZ  NO. 48 RESULT

Chhanna lut zawng zawng : 0

Chhang dik vek                       : 0

Lawmman dawngtu   : 0

Chhanna lut a awm loh avangin angai dah leh a ni. Lawmman hi Cir,Mng. Pu C. Lalnunsanga hnenah lam tur.

            NPSS te chuan vawin chawhma inkhawm hian kumtawp exam an nei dawn a ni. Thawhlawm a awm bawk ang.

PAVALAI  PROGRAMME

A hmun       : Pu T. Lalrinthanga In

A hun          : 20.12.12                                                                       (Ningazan)

Hruaitu      :Upa R. Lalngena

Tantu                  :Pu Kamzawngliana

            Ramthar kal tur puala inkhawm a ni ang.

RAMTHAR (TRIPURA-AH) CHRISTMAS  HMANG DAWN

            Saikhamakawn Kohhran Pavalaite chu Ramthar Tripura lam ten Christmas hmanpui turin an rawn sawm a. Kohhran mipuite a kal duh apiang tan kal theih a ni a, a kal duh tur te chu vawin chawhnu inkhawm hma ngeiin Pu V.L.Zidinga Sailo hnenah in hriattir tur a ni. Chawhnu inkhawm ban lamah a kaldan tur ngaihtuah nghal a ngaih dawn avangin a kal duh tur te chuan a rang lama in report tur a ni e.

ZALEN  SUNDAY  CHANCHINBU  SEM  TUR  DUH  A  NI

                        A lak man thla khatah Rs 40/- (Sunday vawinga pawh nise) zingkar chauh sem.

Hlawh: Copy-1 Rs 10/- kan pe

Copy- 100 ah Rs 1000/-(With Bonus)

Copy- 200 ah Rs 2000/- (With Bonus)

            Mirinawm te tan a sem theih a, sum hnar tha tak a ni. Branch/ section/ Group- YMA/KTP/SAY/ PYD leh mimal tan inhlawhna tha tak a ni.

Contact- 2328226/ 9862363559

BIAKSANGA  BUILDING, NEWS AVENUE, TREASURY  SQUARE.

Sd/- (Lalremruata)

Manager

Zalen Leading Sunday Newspaper

2013  BRANCH  K.T.P  HRUAITU  THAR

            Ni 13. 12. 2012 (Ningazan) khan Saikhamakawn Branch KTP chuan Advance Christmas nuam leh hlimawm tak a hmang a, gift exchange te neiin memberte pawh kal an thahnem hle a ni.

            Hemi zan hian kum 2013 a KTP hruaitu tur thlanna neih nghal a ni a, chung thlan tharte chu heng mite hi an ni.

1. Upa Lallawmchhunga

2. Pu R.Lalmuanpuia

3. Pu Lalremruata

4. Pu Lalduhkima

5. Pu Jeff Lalhmingsanga

6. Nl. V. Lalrindiki

            Heng thlanchhuah te hian hun remchangah nihna an insiam rem anga, committee member tur pawh an ruat nghal ang.

MI  LUNGLENGTE  HNEMAH  CAROL  HMANG  DAWN

            Saikhamakawn KTP chuan ni 17.12.2012 (Thawhtan zan) hian vengchhungah hmun hrang hrangh Carol a hmang leh dawn a.

            Kum dang anga pawisa khawn a ni dawn lova, tin, mimal inah a hranpa a zai na hun hman tur a ni dawn lo bawk a ni. Vengchhung hmun hrang hrangah zai tur a ni a. Programme pawh a tul anga hman tur a ni ang.

BONEFIRE  HMANG  DAWN

            Saikhamakawn KTP chuan ni 20. 12.2012 (Ningazan) khian Bondfire a hmang leh dawn a. Memberte kal theuh turin kan in hriattir a ni e. A neihna hmun tur hi Pu Zosangliana (T.Sec) te in kawt a ni ang.

LAWMTHU  SAWINA

Ni 10.12.12 zingkar atanga kar tluanin biakin cheiin KTP memberte hnatlang neih thin a ni a, tin, nimin nilengin Biakin chei hnatlang neih leh bawk a ni a, memberte chungah Branch KTP chuan lawmthu a sawi e.

Tualchhung

,Zothansangi d/o Pu B. Lalrinzauva (Ch.Sec) New Life Hospitalah a ke zai a nih hnuin tha takin a lo chhuak.

N.P.S.S  KAL  DAN  TARCHHUAK

            Vawin hian Naupang Sunday School naupangte (Beginner- Senior) kumtluana an Sunday School kai dan tarchhuah a ni a. Kalkim a in hre si kalkimlo anga tarlan te awm palh thin avangin mahni kaldan ngun taka en a, complain ngai a awm chuan zirtirtute hnenah a rang lama report nghal tur a ni. Nu leh pa te pawhin kan fa te Sunday School kai dan lo enpui ila a tha awm e.

2013  YMA  MEMBER  FEE  PEK  THEIH

            Kum 2013 a YMA membership fee chu pek hun a lo ni leh ta a, heng a hnuaia hming kan tarlante hnenah  hian December ni 31 ral hmain Rs 5 kenga  pek theih reng a ni, theihnghilh palh a awl avangin a rang lama pek nise a tha ang.

V. Sec tan - Pu C. Lalnunsanga

T.Sec tan- Pu Malsawmdawngliana

Ch.Sec tan- Pu Lalpianthanga

D.P.O  TEN  ADVANCE  CHRISTMAS  HMANG

            Saikhamakawn D.P.O (Rualbnlo Pawl) te chuan nimin 15.12.12 khan YMA Community Hallah Advance Christmas hun hlimawm tak an hmanga, dar 11:00 am atanga programme tanin, tlailamah zanriah an kil ho nghal a ni.

ZANIN  EPL  KHEL  TUR

Tottenham       Vs  Swansea  (7:00)

W Brom    Vs W.Ham     (9:30)

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300