Vol. XVI Issue No. 49 Kristian Thalai Pawl Saikhamakawn Branch Pathianni Dt.27.11.2011

PAGE 1

VAWIIN CHANG VAWN
Kei Grep hrui taktak ka ni, ka Pa a huan enkawltu a ni. Ka zawmpui peng rah lo apiang a paih thin a;a rah apiang a ti thianghlim thin, a rah tam leh zual nan” Johana 15:1-2

27.11.2011(Pathianni)
Chawhma S.S Inkhawm
SS Tantu : Pi Sawizuali

Chawhnu
Thusawitu : Tv. F. Lalrinpuia,
Deputy Speaker

Zan Inkhawm
Thusawitu : Tv. F. Lalrinpuia
Deputy Speaker
Nizan inkhawm atangin Pre Camping Crusade hman tan ani a, vawiin chawhnu leh zanah chhunzawm ani ang. Rawngbawltu kan rawih tur Mi lungngaite thian team ten Khanpuiah rawng an la bawl avangin Deputy Speaker Tv. F.Lalrinpuian hun a rawn hmang a ni.

NI 28.11.2011 (THAWHTAN) ZAN
Pre Camping Crusade chhun- zawmna.
Thusawitu: Pu Hmingthansanga Speaker Mi Lungngaite Thian Team.

VAWIIN TLAI FELLOWSHIP
Camping programme hman tan a nih tawh avangin Fellowship a awm lovang.

PATHIAN RAM CHHIAR DAWN
Vawiinah Pathian ram leh thilpek dang chhiar tur a ni. Ip la kir lo tan kir theih a ni a, a chhiarna hmun Vestry-ah pawh pek theih a ni.

CAMPING-AH I LUT DAWN EM?
‘Hmuh awla a awm lai hian LALPA chu zawng ula, a hnaih lai hian ko rawh u’ Isaia 55:6
Zawlnei Isaia chuan Lalpa chu hmuh awla a awm laia zawng turte, a hnaih laia ko turte in thahnemngai takin Israel fate a hrilh a ni. Israel fate hian Lalpa hnung an zuinaah nasa takin thil an tisual thin a, Pathian pawi an sawi fo thin a ni.Mahse chutichung pawhin Lalpan a hmangaiha a lam hawi turin a sawm reng thin a ni.
Keini ring tute pawh hi Lalpa hnung kan zuina kawngah rah pelh chang, petek chang kan nei a, sualin min hliam chang a awm thin. Mahse, sima Lalpa lam kan hawi a, Lalpa kan auh phawt chuan Pathian hmangaihna hian min lo la ban phak reng thin a lo ni.
Tin, khawvel nawmchenna lama hun hmang a, Lal Isua tel lova khawvela tuihal rehna zawnga, nuam zawng thin, mahse, hmu si lote tan pawh inchhira Lalpa kan auh tak tak chuan min ngaidam turin a inpeih reng a ni.(I Johana 1:9)
Pathian chu hmun tina awm auh phak reng a ni kan ti bawk si a, hnaih lai nei niawmin sawi a ni bawk sia kan ti mai thei. Keimahni lam hian Pathian hi kan hlat fo thin a, min tanpui tura inpeih reng kan banphaka awm Lal Isua Krista Thlarau Thianghlim hi kan hlat fo thin zawk a ni. Keimahni lamah a tul tihna te nei thin mah ila, chumi tihlawhtling tur chuan chakna kan nei lo va, keimahni chakna ringawt chuan kan tlin loh fo thin a vangin Lalpa kan auh theihna atan hmanrua a lo ngai ta thin a ni. Tichuan Lalpa kan auh theihna hmanrua atan chuan, Camping/Crusade te neih a lo ngai ta thin a ni.
Ruihtheih thil leh sual chi hrang hrang bawiha kan tan avanga hrehawm kan tihna zawng zawngte, sual kan tih pui thinte nuna Lal Isua hnathawh lo thleng avanga nun hlimna an chhar tak kan awh em em thin kan neih ve theih si lohte kan neih ve theih nan, mahni tumna atanga Pathian au hlei thei lo, sualin a sal beh tlat nia inhriate tan Lalpa auh theihna hun buatsaih a ni ta! Misual ten Lal Isua kan auh theihna hun remchang Kohhran hoten an rawn chhawp hnai ta, engtin nge i chhan dawn le?
Lalpan hmuh a awl zawk theih nan, auh mai theih a hnaia a rawn inchhawpna hmanrua atan Camping hi a hmang thin asin! Sual avanga i lungngaihna leh hrehawm thinna zawng zawng a lo reh a, Lal Isuaah nun thar i neih theih nan Camping-ah hian i lut ve dawn lawm ni. Hun remchang i bawh pelh palh hlauh ang e.

PAGE 2

DIKNA
A ri chhuak ringawt pawh a mawi hle mai. Dikna hi enge ni? dikna a awm dawn chuan thil diklo a awm a ngai a ni. A awmzia sawifiah dawn ila, thil a nih dan tur ang thlapa kal leh awm hi tiin awlsam tein a sawifiah theih awm e. Mi dik ni tur chuan thil pakhat neih tel a ngai a chu chu huaisenna a ni. Dikna neih dawn chuan rinawmna neih tel a ngai kan ti a ni mai thei e, rinawmna tello chuan dikna a awm theilo a, tin, dikna a awm dawn chuan rinawmna a awm ngei ngei a ngai bawk a ni. Thil kalkawp tlat a ni a, hming hrang si pawimawh dan intluk a ni ti ila kan sawi sual lo ang chu.
Mi dik chu a huaisen ngei ngei a, mahse mi huaisen nazawng hi mi dik an ni chuang lo. Thil in hmu rem thlap awm taka lang si hi, a hmasa tur zawk a hmasak loh chuan a rem thei tlat lo thung. Thudik zep avanga thih ngam hi huaisenna a ni lova, thian tha te leh mahni chhungte ngei dik lohna sawi chhuah hi dawihzepna leh rinawm lohna a ni hek lo. Dikna chuan tan lam a nei tur a ni lova, a mal din anga, huai takin engpawh a lailang ngam tur a ni, chu chu mi dik awmzia pawh a ni reng a ni.
Tunlai khawvelah dikna hian hmun a va chang tlem ta em, mihringte anga nunna nei ni sela, chhenna in a nei lo mai nilovin, kawtthlerah a vakvai ngei ang le. Dikna duh tu te pawhin kan humhalh ngam ta mang si lo. Midangte huat kan hlauh avang hian kan tan ngam ta lo a ni ber awm e. Hemi avang tak hian huasenna chu a pawimawh ta a ni. Dikna tan ngam khawpa huaisenna kan neih chuan si loh chuan dikna chu a awm ngei em tih hi a hriat theih dawn chuang lo a ni. Kan dik a ni tih midang te pawhin an hriat theih nan chuan kan ti lang ngam tur a ni dawn lawm ni. Kawng lehlamah chuan kan tana thatna tur leh kan hming thatna turah hi chuan dikna tan ngam taka awm hi thil har a ni vak lo, amaherawhchu keimahni ngei pawh kan mualphona tur te, channa teleh kan tan harsatna nasa tak lo thleng thei turah hia chuan dikna tan ngam tur khawp a huaisenna neih chu thil har a va ni teh lul em! Tin, kan thiante diklohna ngei hailang ngam tur khawp a mi dik chuan dem a hlawh lek lek mai zawk bawk si. Lal Isua ngei pawh mite duh a ni bik hleinem mawle.
Engpawhnise kan nitin hun hmanah hian dikna vawng nung reng turin kan inbuatsaih hi a tul tak meuh meuh a ni. Diklo taka thil ti thin ten hlawkna te hamthatna te dawng in an vanneihna par vul chuk chuk thin mahse; mihring nuna neih harsa ber mai an thlachham a ni tih hi kan hriat sak a, an khawngaih thlak zia hi an in hriat ngei theih nan entawn tur a kan awm ngam a tul ta takzet zet a ni. Dikna nen chuan tia lungawi tak chunga hun hmang thei turin inbuatsaih sauh sauh hi a va pawimawh tawh em. Diklo taka hamthatna hmute hi thangthar ten kan ngaihsan loh thiam pawh a hun tawh hle mai.
Kan ram neih chhun Zoramah hi dikna in a chhuahsan hma hian, a chhelh ngam tur mi huaisen Pasaltha kan va mamawh em! Thangthar chhuan lo awm zel tur te tan hian hlemhletna leh diklo taka thil tih duhna zirtirtu nih mai hi a va hlauawm em. Dikna nun mawi tak vawng nung reng a, luipui anga luantir thei ngei tur thalai ni thei theuh turin huaisenna dik nen kan nun i inbuatsaih sauh sauh ang u.

PAGE 3

BARNABA
(Josepha an tih bawk chu)
Barnaba hi Kupra thliarkâr a mi, mi hausa leh khawsa thei tak a ni a. A hming awmzia hi ‘Thlamuanna fa’ tihna a ni. A hming tak zawk erawh chu Josepha tih hi ani. Juda hnahthlak, Levia hnam mi a ni a, a nu leh pa te erawh hi chu an chanchin hriat tur a vâng hle. Mahse, Mari, Marka nu kha a farnu a ni tih erawh a hriat theih (Tirh 12:12). Clement of Alexander-a chuan Barnaba chu Lal Isuan, zirtir sawmsarih a tirh chhuahte zingah khan a telve niin a sawi a. Tin, Jerusalema kohhran a lo dintirh lai pawh khan mahni ram hralhna man tirhkohte ke bula rawn hlantu zinga a ni bawk.
Luka chuan, “Barnaba chu mi tha tak a ni a, Thlarau thianghlim leh rinnaa khat a ni,”(Tirh. 11:24) a ti a, Lal Isua ringtute ti duhdah fo thintu Saula(Paula) pianthar thute, sual a sim a, Lalpa bawih rinawm tak alo nih tak thu te mite hnena puan chhuah saktu a ni bawk. Paula leh Barnaba hian rawng an bawl dun thin a, Jerusalema rawng an bawl zawh hnu hian Antiokei khuaah rawng an bawl leh a. Antiokei khuaa an awm lai chuan thlarau thianghlimin, “Barnaba leh Paula chu ka ruat chhan ti turin min tih hran sak rawh u” a ti a. Tichuan chaw an nghei a, an tawngtai a, an lu chungah kut an nghat a, chanchintha rawngbawl tur chuan an chhuak ta a ni. Tichuan, Kupra thliarkarah, Salamis khua leh Paphos khuaahte chuan kalin, Pisidia ramah kal kai zelin Antiokei khaw lamah an let leh ta a ni. Chungah te chuan an rawngbawlna a tla tha viau aniang, khaw thenkhatah phei chuan Pathian anga biak an lo tum hial anih nghe nghe kha.
Barnaba hi paula ang bawka Jentailte tirhkoh atana serh hran niin a inhria a nih hmel viau mai a(Tirh.13:46-47). Chanchin Tha rawngbawlna pawh ama lo chawr chhuahna hmun Kupra lam atangin a tan a ni.
Barnaba hi engtiang ang taka matara thi nge tih hi hriat chian a ni lova. Sawi dan thenkhatah chuan Kupra thliarkar a, Salamis khuaah martarin a thi tih a ni a. Tin, a ruang chu Marka’n a phum ta niin sawi a ni bawk. AD 474 - 491 khan Barnaba ruhro leh Chanchin Tha Marka ziak chu Kupra thliarkara hmun pakhatah Bishop Anthemios chuan lalber Zeno lal laiin a hmuchhuak a. Tichuan, Barnaba ruhro chu hmun hrang hrangah chuan a thawn darh ta a ni, an ti bawk. Engpawh nise, Barnaba chu hrileng vanga thi emaw, natna avanga thi emaw a ni lo tih a chiang a, chumai nilovin a zui Lal Isua tana nun hlanin a martar ngei a ni tih chu pawm dan a ni.

RORELTUTE BUNG 6-10

A Kâr âwl dah khat rawh :

Q1. Tin, heti hi ani a, Israelhoten thil an han chin tehian Midian-hote, .........................-hote, khawchhak fateho chu an han chho va;
Q2. Chuvangin ngai teh, mipuihote beng hriatah, ‘Tupawh hlau leh khur apiang chu kir leh sela, Gilead tlang ata hi haw leh rawh se,’ tiin puang rawh,” a ti a. Tichuan mipuite chu sing hnih leh sânghnih an kir leh a; tin, ......................................... an la awm a.
Q3.Tin, a nu nutate chuan Sekem khua ami zawng zawngte beng hriatah chuan chung a thu zawng zawng chu an sawi a: tichuan Abimeleka zui duhna rilru an lo pu ta a: “Ani chu kan ............................ a ni alawm,” an ti ta si a.

A bung leh Châng dah rawh :

Q1.Tin, heti hi a ni a, Midian-ho avânga Israela thlahten LALPA an han auh ve leh chuan,
Bung: ............... Chang: ....................
Q2. Chutichuan mipuite chuan ei tûrte leh an tawtawrâwtte chu an keng a: tin, Israel mi zawng zawngte chu an puan in lamah a hawtir ta vek a, mi zathumte erawh chu a awmtir a: tin, Midan-ho kulh chu an hnuai ruamah chuan a ni.
Bung: ................ Chang: ....................
Q3.Tin, Penuel khuaa mite hnênah chuan, “Remna thu hawna ka lo kir leh hunah, he kulh hi ka rawn tichim ang maw le,” tiin a sawi bawk a.
Bung: ................ Chang: ...................
Q4.Tin, thingte chuan theipui kung hnênah hian, ‘Hawh teh, nang kan lalah awm ang che,’ an va ti a.
Bung: ................ Chang: ....................
Q5.Tin, LALPAN Israela thlahte hnênah, “Aigupta-ho lak ata te, Amor-ho lak ata te, Amona thlahte lak ata te, Philistia-ho lak ata te ka chhan chhuak che u a ni lo vem ni?
Bung: ................ Chang: ....................

Hming : ......................................................
Section : .....................................................

PAGE 4

CHATUAN RAM LAMAH
Upa Rallianzuala (1940-2011)
Ni 20. 11. 2011 (Pathianni) khan cancer natna avangin rinawm taka a rawng a lo bawlsak thin Lalpa hnenah min lo chawlhsan ta a, a kalsan tak a nupui fanau te Mipui Aw Editorial Board ten kan tuarpui takzet a, Pathian thlamuanna an dawn zel kan duhsak in kan tawngtaina pawh a ni e.

LOCAL COUNCIL HRIATTIRNA
Bialtu MLA Pu K.S. Thanga hmalaknain Aizawl S-III huamchhunga infiammi, eng discipline ah pawh medal la te tan a hnuaia mi ang hian lawmman a pe zel dawn a, hetiang lawmman dawng thei kan awm a nih chuan Pu R. Vanlalsawma BDO Aibawk RD Block hnenah Local Council & YMA hriatpuina kengin in report zel tur a ni a.
INTERNATIONAL LEVEL
Gold medal - `50,000
Silver medal - `30,000
Bronze medal - `20,000
NATIONAL LEVEL
Gold medal - `10,000
Silver medal - ` 5,000
Bronze medal - ` 2,500

CAMPING NEI DAWN
Ni 29.11.2011 (Thawhleh) ni atang hian Saikhamakawn Presbyterian Kohhran Sunday School Hall ah chhandamna camping a buaisaih dawn a. Mi lungngai te thian team ten rawngbawlna an rawn nei dawn a ni. An team speaker hi Pu Hmingthansanga a ni.
Camping lut turte chu Thawhlehni tlai chaw ei khamah luh tur a ni a, Bible, pen, note bu ken tur a ni.

HNATLANG
K.T.P member zawng zawng te ni 29.11.2011 (Thawhleh) nileng hian Kohhran in camping a buatsaih tur hmun, Sunday School Hall leh a vel tihfel ngai te tifel a hnatlang neih tur a ni a. Member ten ngaipawimawhin thawhchhuah theuh i tum ang u.
LAWMTHU SAWINA
Tun hnaia kan nu Lalsangi’n tawhsual a tawh chungchangah; kan phuloh leh rin phak bakin khawtlang mipui lainatna leh duhsakna leh kohhran mipui tawngtai sakna kan dawng nasa em em a. Kan phuloha khawtlang mipuite kaltlanga kan vanduaina chunga Pathian malsawmna lo lang hi ropui kan ti hle a ni. Lirthei, tha leh zung sum leh paite senga Durtlang Hospital thlenga kan tana in inpekna te, kan thlaphan leh lungngaihnaa min hnem tura inlamah pawh in hun hlu tak senga min thlahthlam miah lohnaahte kan lawm em em a ni.Kan tlinlohna te theihnghilha kan chunga in thatna zawng zawng ah mimal tin hnenah lawmthu kan sawi seng lova, heihi kan lawmthu sawinaah min lo ngaihsak turin kan ngen che u a ni. Kan chunga in thatna zawng zawng Lalpan a let tam takin rul che u rawh se.

In khawngaihna dawngtu
C.Zokhumate chhungkua

EPL RESULT
Stoke City 3-1 Blackburn
Bolton 0-2 Everton
Chelsea 3-0 Wolves
Man.Utd 1-1 N.Castle
Norwich 2-1 QPR
Sunderland 1-2 Wigan
W.Brom 1-3 Tottenham

TUALCHHUNG
,Lalhriatpuii d/o Lalramhluna Sailo (Ch.Sec) chu damlohna avangin Civil Hospital-ah enkawl mek a ni.

,Tualchhung mi damlo damdawiin a enkawl, heng mite hi damdawiin atangin an rawn chhuak.
Pu VL Malsawma h/o Laldinpuii (L) (T.Sec) Durtlang Hospital.
Pu C.Lalrinmawia h/o Lalchhingpuii (T.Sec) Durtlang Hospital.
Pi MS Dawngliani w/o V.Lalhmingliana (L) (T.Sec) Greenwood Hospital.

,Pu Zoramchhana h/o Vanlalpawmi (Ch.Sec) te chhungkua chu Pi Roziki (L) inah an in bawl hrang.
BARRICADE DAH SAWN LOH TUR
Vengchhung kawng dunga Barricade (Traffic Police tih inziak), Pathianni a kawngpuia kan dah thin hi Bialtu MLA in lirthei laka kan him zawk nana min pek, Traffic SP in a duhdan ang thlapa a rawn dah a ni a, vengchhung mipuiten kan him zawkna tur a ni tih hriain Traffic SP in dahna tur a hrilh anga khawtlang hruaitute leh YMA hruaituten an dah hi tuman dah sawn tawh loh tur a ni e.

Sd/-Secretary
YMA,Saikhamakawn Branch


Arsenal leh Fulham result kan hre hman lo.
Zanin inkhel tur
Swansea Vs A.Villa (7:00)
Liverpool Vs Man.City (9:30)

VAWIIN KHAWCHIN
A san lai berin : 290
A hniam lai berin : 160