MIPUI AW 6.11.2011

VAWIIN CHANGVAWN
...Chhandamna hmu khawpa tifing thei che Lehkha Thianghlimte chu i naupan tet ata hre tawh i ni tih hriain , i thil zir leh i thil hriat chianah te chuan awm reng rawh. II Tim.3:14-15b
OHHRAN PROGRAMME

Dt.06.11.2011(Pathianni)
Khawvel SS Ni
Chawhma Inkhawm
Hruaitu :Upa Lalzama Suptd.
Tantu :Pi Lawiziki
Thupui :Pi Puii chanchin
Sawitu :Pi Khawlvuani
Chawhnu Inkhawm
Hruaitu : Upa Lalrindika,Asst.Suptd
Tantu :Pu Lalfakzuala
Thupui :Pi Zosaphluii chanchin
Sawitu : Pu Zoramnghaka
NPSS lamin Tv. Chalbuanga leh Corrie Ten Boom chanchin an zir ang.
Zan Inkhawm

Thusawitu :T.Upa Sangzuala

KTP PROGRAMME
Dt.07.11.2011(Thawhtan zan)
Hruaitu : Tv. Lalhmangaihzuala
Tantu : Nl. R. Zonuntluangi
Short Tv.Abraham Lalnunthara
Sermon : Nl. Lalhmunsiami
Thilpek la Nl. Laltanpuii
khawmtu : Nl.Jennifer Zorinsangi
Zai hruaitu: Pu Lalduhkima
Tv.PC Vanlalhriatpuia
Musician : Upa Lallawmchhunga
Tv. Zomuanpuia

FELLOWSHIP PROGRAMME
A hmun : S.S. Hall
Hruaitu : Pu Lalchhandama
Tantu : Tv. HT Lalhruaitluanga

SIM RAWH U, VANRAM CHU A HNAI TAWH E.
(Tirhkohte Thiltih 3:17-19, Matthaia 3:1-3)

Pathian ram/Vanram hi Chanchin Tha bu te sawi dan chuan leia lalram hmuh theih ang hi ni lovin thinlung lama Lalpa lalna,Lalpa thuneihna hmun an sawina a ni. Lalpan Thuthlung Hlui hun atang tawhin din a tum tawh a, mimal leh chhungkua, hnam hmangte pawhin din a tum a ni. Israel hnam ngat phei chu Kum 2000 chhung zet a khalh kual vel a, mahse, he kum 2000 chhunga Israel ten Pathian pawi an sawi tam zia leh chumi a vanga hremna an tawrh nasat dan chu sawi tur tam tak a awm a ni. He Israel hnam hian an tluksan nasa lutuk a, Zawlnei te pawhin an vaukhan nasa a nih kha, Thuthlung Hlui leh Thuthlung Thar inkar tawp lamah phei chuan Zawlnei au thawm pawh hriattur awm mang lo khawpin a reh duk mai a ni.
Chumi hnuah Baptistu Johanan, ‘Sim rawh u, Vanram chu a hnai tawh e’ tiin Pathian ram chungchang thu bawk a rawn au chhuahpui leh ta! He thu chiah hmang hian Lal Isua pawhin a rawngbawl hna bul kha a tan a ni (Mat.4:17). Lal Isuan Pathian ram din a rawn tum dan leh Juda te lo beisei dan a in mil ta lo! Juda ten hnam feeling chawh harh a, anmahni awp bettu Rom laka fihlimna lam an lo beisei laiin Lal Isua erawh chuan Chhungril lam takna, chhungril lama simna tak tak awm si lova, in tih sakhaw mi a, pawnlam lan dan ringawt buaipui na te chu sima chhungril lam nun pawimawhzia hmangin Pathian ram din a tum si a, an in mil thei ta lo a ni. Pathian thuawihna tel si lova hnam feeling chawk tho zawnga hma an lak apiangin Israel ho an buai ziah thin atangte hian zirtur kan va ngah em!
Chu Pathian ram a lo thlen theih nan chuan simna a pawimawh ta a ni. Simna awmzia chu Lunglenga kal turin chhuak ila, Melthum atangin Hualngo lamah kalin, Falkawnah inngaihtuah chhuak ta ila, ‘Aw, ka kalna kawng a diklo, ka va inchhir em! A va pawi em! Ka va sim chiang tak em ti vawng vawng ringawt ila, engtikah mah Lungleng ka thleng lovang, Ka kal tumna Lungleng thleng tur chuan ka kir leh anga, Melthum atangin Lungleng lam panin ka kal tur a ni. Chu chu simnain a tum chu a ni. Simna chu kawng zawh lai thlak thleng hlawk hi a ni. Tichuan, Kan nunah he Pathian ram/Vanram hi lo thleng tura kan duh tak tak anih chuan kan sim a ngai. Mahni theuh kan in bihchian a, kan sim a ngai a ni.
(Ni 4.11.2011 zana Pu R.Zaihmingthanga Sermon lak tawi a ni e)

PAGE 2

Editorial.........?
KRISMAS INBUATSAIHNA
Kristiante hunpui leh kan nghahfak Krismas chu thla leh mai khi a ni leh ta reng mai. Tute pawhin hlimtaka he hun hi hman kan duh a,kan hmang tur pawh a ni reng a ni. Hlim taka Krismas hmang tur hian inbuatsaihna tha tak kan neih pawh a tul hle a ni.
In leh lo siama chei thatte, silh leh fen leh engkim he hun hmang tura inbuatsaihna hi a hmalama tan loh chuan belebut taka hman a hlauhawm hle a ni. Kan hunpui, kumkhata vawikhat chauh leh nghal hmang tur hian rilru lam pawh inpeih a, hahdam taka kan hman theih nan tun atanga inbuatsaihna kalpui hi a hun khawp mai.
Rilru hahdam lo leh buai nuaia Krismas hman hi a hmangtu tan a nuamlo a, midang tan pawh a nuam chuang lo. Chuvangin, Krismas hlim tak leh rilru engthawl tak, thianghlim taka hmang turin mimal leh chhungkuate inbuatsaih tan ang u hmiang.

AN INANG LO!
Mawitei pa
Tun hnai deuh atang khan khawtlang hruaitu han tih hian tlawmngai pawl a bikin YMA hi thenkhat rilruah a lang tel ve nghal fo thin. Hei hi thilmak teh chiam pawh a ni lo, a chhan chu YMA ten ram, hnam leh khawtlang tana loh theih lohna avanga chet chhuah a tul fo thin vang a ni. Khawtlang hruaitu kan tih VC, tuna Local Council ni ta nen hian inkawp tlat chunga khawtlang tana lungrual taka thawk dun tura beisei an ni.
YMA hruaitute hi mahni inzuar pawh nilo, member ten ani hi a tha anga, a ni hi a tlawmngai thei anga tia an thlan chhuah thinte an ni. Chutiang mite chuan a thlang tlingtute beiseina tihhlawhtlin ngei tumin theihtawp an chhuah zui thin a ni. Tun hnai deuh atang khan YMA hruaitu nih chaka campaign awm thin anga sawite a awm a, a pawi hle a ni. Kan khawtlangah chuan heng boruak hi a awm loh hram beisei zel ila. Tichuan, tlawmngai tura thlan chhuah YMA hruaitute chuan khawtlang tan theihtawp chhuaha hma an lakna kawngah an tih theih chin leh thuneihna chin a tawi deuh thin avangin khawtlang hruaitute nen lungrual tak leh pheikhai rual taka an thawhho a tul ta thin a ni. YMA hruaitu khawtlang hruaitute nena thawk ho hleithei lo khua leh vengte an awm fo thin, a pawi hle a ni, chutiang khua leh vengah chuan khawtlang hmasawnna a thuanthu fo thin reng a, chutiang khawtlang nih chu hlauhawm tak a ni. YMA hian loh theih lohna avangin Sawrkar leh khawtlang hruaitute hma tur khawih tel thin mah se, ram, hnam leh khawtlang tana thawk tura sawrkarin a ruat, India Danpuiin thawk tura a tih ten an thawh sen bik loh avangin an pui bawm a, khua leh tui tha tih tur an ti a ni tih an hriat reng fo hi a tul hle a ni.
Khawtlang hruaitute ve thung chu, mipuite hnenah min lo thlang tling ve hram ula, min lo khawngaih ula, ka tlin phawt chuan khawtlang tan theihtawp ka chhuah ang tia intina rawn inzuar, chuta tanga mipuiin kan duh kan lo thlanchhuahte an ni. Chuvangin, tlawmngaia thawk tur pawh an ni chiah lova, an in zawrh ang ngeiin a hnu zelah pawh thlan leh chakawm khawpa thawk tur niawm tak an ni. Khawtlang hruaitute hi India Danpuiin a phut ang thlapa thlanchhuahte an nih avangin, thuneihna pawh an nei a, khawtlang rorelnaa thutawp kengtu an ni a, chuhpui vak chi pawh an ni lo. A nihna takah chuan Khawtlang tana hmalakna reng rengah a theih chin chinah khawtlang hruaituten hma an hruai anga, an hnungah kawi kawm thin ang thap a lungrualin tlawmngai pawl hrang hrang leh mipui ten kan zui tur a ni. Khawtlang hruaitute pawhin tlawmngai pawl YMA leh pawl dangte pawh a thawhpui thiam a pawimawh a, nu leh pa chan chang takin khawtlang an enkawl thiam a pawimawh a, chu chu an mawhphurhna leh tihtur pawh a ni.
Khawtlang hruaitute leh YMA hruaitute lungrual taka hna an thawhho theihna khawtlangin hma a sawn a, khawtlang pawh a nuam thin. Chutiang khawtlang kan lo nih tawhna te chhunzawma a awm zel theih nan kan khawtlang hruaitute leh YMA leh tlawmngai pawl dang hruaituten tan la zel se, mipuite pawhin heng kan hruaitute thu zawm hi kan tih tur a ni tih hriain anmahni tawngtaipui zel chungin thuawih takin an hnung i zui zel ang u hmiang.

PAGE 3

ZU HIAN CANCER THLEN THEI EM?

Zu hian thin lam natna a thlen thei tih chu kan hre theuh tawh awm e. A bikin zunthlum vei leh lunglam thalo te tan zu in hian a nghawng thui thei hle tih pawh kan hre theuh awm e. Amaherawhchu, zu hian cancer natna a thlen ve thei tih erawh tamtak chuan kan hre lo mai thei a ni. Mizo zingah a ni tela cancer vei an pun zel avangin cancer leh zu inzawmna hi kan hriatchian a pawimawh hle a ni.

1. Mi thiamte zir dan chuan zu in thin ho hian zu in ngai lote aiin cancer an vei awl zawk a. Hnute cancer, chawkawng, ka chhung, hrawk, pumpui leh ril cancer an vei hma bik a ni.

2. Zirchianna pakhatah chuan meizial zu a, zu in thin bawk tan chuan ka leh lei cancer vei a awl em em a. Zu leh vaihlo kaihhnawih thil hmanpawlh hi cancer thlentu hluar tak a ni.

3. Zu in thin mite hian meizial an zuk reng rengin a let 15 in cancer an vei awlsam zawk a ni. Meizial khu han hip luh hian ka chhung leh hrawkah meiziala chemical chi hrang hrang kha a bet a, chutah zu an han in leh chiah khan, khang chemical thalo zawng zawngte kha taksa hmun hrang hrangah a lo darh ta thin a ni.

4. Ngaihruatna pakhatah chuan zu in thinte chu, an thin (liver) hian zu ken tel thil thalo a lo paih char char a, chuvangin an taksaa thil thalo dang (vaihlo leh thildangte) paih chhuak turin hun a neilo tiin an sawi thin a ni.

5. Zu hian taksaa ralvengtu (immune system) kha a ti chau thin a. Kan immune system chu cancer veilohna tura min humhimtu pawimawh tak a ni.

6. Zu ngawlveite hian tlakchham (malnutrition) an nei a, protein, mineral leh vitamin te hi an taksain a tlakchham avangin cancer insiamtheihna lakah a inveng zo lo thin a ni.

Hriatreng atana tha chu eng zu pawh nise, cancer vei theihna chance chu a ngai reng a ni. Eng anga thianghlim leh uluka siam pawh nise, a danglam bikna a awm chuang lo a ni.

(Courtesy : Hriselna Magazine October 2011)

BIBLE QUIZ

JOSUA BUNG 21-24

A Kâr âwl dah khat rawh :

Q1. Kanaan rama Silo khuaah chuan,” LALPAN Mosia hmangin kan awmna tur khawpuite, kan ran tlatna tur a daivelte nen min pe turin .................. a lo pe tawh asin,” tiin a an sawi a.
Q2. an hnenah, “LALPA chhiahhlawh Mosian thu a pêk apiang che u pawh in ............................ zel a:
Q3.Tin, Josuan mi zawng zawng hnenah chuan, “LALPA, Israelte Pathianin heti hian a ti a ni: ‘In thlahtute kha hman laiin .................. piah lamah khan a awm thin a, Abrahama pa leh Nahora pa Tera meuh pawh kha: anni chuan pathian dangte rawng an bawl thin a.

A bung leh Châng dah rawh :

Q1. Chutichuan Israela thlahte chuan LALPA thupêk angin an chanpual ata chung khawpuite chu a daivelte nen Levi chite an pe a.
Bung: ............... Chang: ....................
Q2. Tichuan LALPA in Pathianin an hnena a lo sawi tawh ang khan in unaute hi muanna a lo pêk tak hi: chuvangin LALPA chhiahhlawh Mosian Jordan rala in chanpual atana ram a lo pêk tak che uah khan, in puan in lamahte chuan haw leh tawh u.
Bung: ................ Chang: ....................
Q3.Tin, LALPA in Pathianin inhmaah hian a hnawtchuak ang a, in hmuh phak lohvah a hnawt bo vek ang a; tichuan LALPA in Pathianin in hnena a sawi tawh ang khan a ram chu in nei dawn nia.
Bung: ................ Chang: ...................
Q4.Tin, inthlahtute chu Aigupta ram ata ka hruai chhuak a: tin, tuipui in va thleng a; tichuan Aigupta mite chuan in thlahtute chu tawlailirte leh sakawr chung chuang mite nen Tuifinriat Sen thlengin an um a.
Bung: ................ Chang: ....................

Hming : ......................................................
Section : .....................................................

PAGE 4

KOHHRAN HMEICHHE PROGRAMME
08.11.2011 (Thawhleh zan)
Ramthim zin

A hmun : S.S.Hall
Hruaitu :Pi Lalchhanhimi
Tantu :Pu Lalrinengi

WORK CAMP KAL DAWN
W.Bunghmuna Work Camp a kal turte chu naktuk zing hian Bus in an chhuak dawn ta.Work Camp kal turte hi an vaiin mi 11 an ni a, W.Bunghmun Kohhran Biak In extend leh rawng hnawih hna an thawk dawn a ni. Work Camp neih nan hian Kohhranin Rs. 30000/- a ruahman a, Ramthar Committee in Work Camp atana an lo tuak Rs. 20000/- vel hman tel bawk tur a ni. Work Camp a kal turte zing dar 6:30 a chhuak hman turin Biak In bulah kim tur a ni.

KOHHRAN ZAIPAWL HRIATTIRNA
Naktuk thawhtan zan inkhawm banah SS Hall-ah Kohhran Zaipawl ten hla zir leh tur a ni a, KTP member te thahnemngaitaka hla zir turin ngen kan ni. Hla hi la zir lo kan awm pawhin inthlahrung lova zir vek turin ngen kan ni a, a bikin nula lamin tan lak a ngai deuh. KTP memberte hla zir lama thahnemngai turin hruaituten min ngen e.

JUMBLE SALE
Ni 12.11.2011 (Inrinni) khian Kohhran Hmeichhia ten Biak In hnuaiah Jumble Sale an nei dawn a, Jumble Sale tur hi Kohhran in tinah an rawn khawn dawn a, phal taka thawmhnaw leh thildang lo thawh khawm turin chhungtinte Kohhran Hmeichhia ten an ngen a ni.

ELECTORAL ROLL HRIATTIRNA
Electoral Roll a in thun thar dil zawng zawngte ni 8.11.2011 (Thawhlehni) zing dar 9:30-ah YMA Committee Room-ah in lan vek tur a ni. Mahni ngei kal tur a ni a, mahni kal remchang lote chu an mahni hrechiangtu nu emaw pa emaw chhungkaw aiawh emaw pakhat kal tur a ni. Tin, hemi hunah hian NGO hrang hrang leh Political Party tin aiawh pakhat theuh seal nen kal bawk tur a ni e.

Sd/-Lalzuiliana
Designated Officer

LAWMTHU SAWINA
Saikhamakawn YMA Taitesena Section te chuan Taitesena section huamchhunga mi inphalte hnen atangin donation ( mitthi khum) kan dawng a, an chungah Taitesena section -te kan lawm hle a ni. Tin, donation hi tlem lua tam lua awm lovin Taitesena section hruaitute hnenah engtik lai pawhin pek theih reng a ni e.

Sd/-Secretary
Taitesena Section

SMTC A TRAINING DUH TAN
Synod Multipurpose Training Centre, Mission Vengthlangah January - December 2011 chhunga Tailoring (mipa tan seat 20, hmeichhe tan seat 40), shoemaking (mipa tan seat 5) training duh tan November thla chhungin Programme Director, SMTC hnenah dilna thehluh theih a ni a, ni 13.12.201, dar 10:00 am-ah interview tur a ni. Dilnaah hian Kohhran lehkha thil tel tur a ni. Zir tura lakte chu thlatin Rs. 500/- pek thin an ni ang.

TUALCHHUNG
,Pi Hmingthangi m/o Lalzawmliani (Ch.Sec) chu damlohna avanga Newlife Hospital ah enkawl a nih hnuin a lo chhuak ta.

,Pu C. Lalrinsanga (Marina) h/o Sangchhingpuii (T.Sec) chu pum lam thatlohna avangin NewLifE damdawiinah enkawl mek a ni.

,Pu Rochungnunga h/o Vanlalchhuangi (V.Sec) te chuan khawii lo vahvel nan Scooty (Flyte) thar an lei.

,Nl.Maria Lalramchuani d/o MS Dawngkima (V.Sec) chuan NLRMP hnuaiah GIS Consultant hna a hmu thar.

,Pu Tommy Zirnuntluanga h/o Vanlalruati (V.Sec) chuan MCA tha takin a pass.

EPL RESULT
N.Castle 2-1 Everton
Arsenal 3-0 West Brom
Aston Villa 3-2 Norwich
Blackburn 0-1 Chelsea
Liverpool 0-0 Swansea
Man.Utd 1-0 Sunderland
QPR leh Manchester City result kan hre hman lo.
Zanin inkhel tur
Wolve Vs Wigan (6:00)
Bolton Vs Stoke (7:30)
Fulham Vs Tottenham (8:30)

THU ROTLING
** Khawvelah hian Mihring lo chu thil ropui engmah a awm lova, mihringah pawh hian rilru lo chu engmah ropui a awm lo.
- Sir William Hamilton

VAWIIN KHAWCHIN
A lum lai berin - 230 C
A vawh lai berin - 190C
Ruah sur lo tura beisei a ni.