Mipui Aw 12.8.2012

MIPUI AW

Vol. XVIII Issue No. 33 Kristian Thalai  Pawl  Saikhamakawn Branch  Pathianni Dt.12.8.2012

VAWIIN CHANG VAWN

            Miin a tawngkam chhuak rah chu a seng ang a, Ama kut thiltih ngei chu a hnenah hlan a ni ang. Mi a kawng chu ama mitah chuan a dik a, Mifing erawh chuan rorel a ngaichang thin.

KOHHRAN PROGRAMME

12. 8. 2012 (Pathianni)

Chawhma S.S inkhawm

Tantu: Pi Ropari

Chawhnu

Thusawitu: Upa Lallawmchhunga

Zan Inkhawm

Thusawitu: Upa Zonunmawia

KTP PROGRAMME

 Dt. 13 .8. 12 (Thawhtan zan)

Neihthil thehkhawm

Hruaitu :Nl. Lalrinchhani

Tantu     :Nl.Malsawmtluangi

August thla zai hruaitu turte

Hla hruaitu   : Tv. R.Lalzamlova

turte                 Tv. Lalhmangaizuala

Musicians     : Pu Lalduhkima

                          Pu Lalchhandama

VAWIIN  TLAI   FELLOWSHIP

A hmun: Pu F. Lalrinpuia In

Hruaitu: Nl. V. Lalrindiki

Tantu: Tv.Israel Lalhmunmawia

KOHHRAN  HMEICHHE  PROGRAMME (Ni 14. 8.2012)

KRISTIAN CHHUNGKAW PUAL  A HUN  HMAN  TUR  A NI

SERMON

MALSAWMNA

He rilru, Krista Isua pawha awm bawk kha, nangmahniah awm rawh se; ani zawngin Pathian anga awma Pathian tluka awm chu thil thlakhlelh hleih theihah a ruat lo va, mihringte anga lo piangin, bawih angah a insiam ta zawk a, amah leh amah a intitlawm ta zawk a. Philipi 2:5-7

            Khawvel hmun hrang hrangah hian pawisa hi thiltihtheihna a ni tiin pawisa buaiin kan buai nuai nuai a. Pawisa hmangin ka thil duh zawng kan lei a, kan duh hrang hrangte kan ti thinin, thawmhnaw te, lirtheite leh thil dang dang lei nan kan hmang thin.Khawvel hnamzia a pawisa ngaina hnam chuan Lal Isua rinna kawngah harsatna an tawk fo thin. A then chuan pawisa hi chhungkaw rorelnan an hmang a, pawisa pek duh lohah te invauin sawrkar pawhin thuneihna te neih an tum thin. An duhdan anga midang an awm tir theihnan pawisa an hmang thin.

            Lal Isua nen chuan kan va danglam thin em! Ani chuan natna chungah thuneihna a nei a, midangte a tidam thin. Thli leh tuifawn chungah thu a nei a, hlauhna ata chhandamnan a hmang a, thil siam theihna a nei a midang riltam te tihpuarnan a hmang a. Sual chungah thuneihna a nei a, midangte a ngaidam thin. Ama nunna chungah ngei pawh thuneihna a nei a, mahse chhandam kan nih theihnan a nun min hlan a ni.

            Lal Isua chuan thuneihna zawng zawng a nei a, ama tan hmang lovin midangte tan a hmang zawk thin. A zirtirten zanriah hnuhnung an kil lai khan ‘LALPA’ tiin an ko a, mahse kha tah khan amah chauh chhiahhlawh a awm si, a zirtirte ke a sil sak vek a nih kha.Keini nen chuan kan inang lo thin hle mai. Kan pawisa neih tlemte pawh kan ui a, kan tih theih tlemte pawh ka ti peih lo va, a ti peih leh thawk hram hram te kan la sawisel duh hial thin. Chutiang mihring chu kan ni, thlak danglam kan va ngai em.

            Keini ngei pawhin kan nun hluite kan kalsan a hun tak zet zet a ni. Lal Isua anga kan awm theihnan Thlarau Thianghlim hi kan auh reng a pawimawh a ni. Rawngbawltute pawh chhiahhlawh nun kan neih a ngai. Midangte leh kan member te tan rawngbawltu kan ni, thuneihna kan chan hi midangte tan malsawmna nise a va duhawm dawn em. Mahni in tih len nan mai te, mahni tanghma hai nan mai te, mahni duh dan kal tlang pui nan te a hmang mai lovin, midangte tan i hmang zawk ang u. Chu chu Lal Isua duh dan pawh a nih a rinawm a ni.

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

                        CHHIATRUPNA  HI....

            Tunlaiin ruah te a sur nasa thin hle a, Mizoram in harsatna kan tawh len ber chu leimin leh kangmei hi a ni awm e. Nizan lawkah pawh Chanmari Ramhlun Road ah leimin vangin nunna hial pawh chan an awm a ni tih kan hre tlang theuh awm e. Fur lai a ni a hmun hrang hrangah leimin vangin harsatna kan tawk mek zel a, mipui te pawh dawih ngaihna lai ah chuan dawih ngam khawpa huaisen te pawh a ngai awm e.

            Chhiatrupna lo thleng thin ah hian Mizo te hi kan tlawmngai hle mai a, chhiatna thlenna hmunah nasa takin kan pung khawm hluai thin. Thil tha tak a ni a, hlauawm tak karah pawh chhiat tawk mek te chhanchhuah nan mahni nunna ngei pawh ngaihlu zo lovin chhanchhuahna hna kan thawk thin. Mahsela awmze nei leh chhanchhuah hna hlawk zawk leh chak zawka kalpui a nih theih nan in dip buai hauh lova thawh thiam kan zir a tul hle awm e.

            Chhiatna a lo thlen changa mahni buai buaia lo sapa tal ve chiam mai lovin, remruattu fel tak in siam a; hmalak vat a, chu chu mipui te pawhin zawm thiam kan zir a tul hle awm e. Kan duh vang ni hauh lo, vanduai vanga kum tin kan ram chhunga kan tawh thin hi a hmachhawn dan zir chian a tul takzet a ni.

ARTICLE

I WINDOWS COMPUTER-A KEYBOARD SHORT CUT I HMAN THEIH HRANG HRANGTE

Dinga Fanai.

Heng hi a short cut key an tih mai a ni a, i computer-ah i hmet anga, i duh danin i command thei tawh ang.

F1: I thiam loh thil a awm anih chuan F1 hi I hmet anga, tanpui i ngaihna lai apiang i zawng thei tawh ang).

CTRL+ESC: Start menu hawnna.

ALT+TAB: Programme hrang hrang i hawn ho thlanna (Alt hi i hmet reng anga, TAB hi i hmet keuh keuh dawn nia)

ALT+F4: Programme kharna. (Desktop-ah chuan Turn Off Computer tihlanna)

SHIFT+DELETE: Recycle Bin a lut lova thil delete tlangna.

F10: Menu Bar Option tih lanna.

Windows Program Key Combination hrang hrangte:

CTRL+C: Copy.        CTRL+X: Cut.           CTRL+V: Paste.

CTRL+Z: Undo.        CTRL+B: Bold.         CTRL+U: Underline.

CTRL+I: Italic

Mouse Click leh Keyboard hmang ve thungin:

SHIFT+right click: Shortcut menu leh command dangte tihlanna. SHIFT+double click: Command pangai Run-na (Menu-a a second item a ni ang.)

ALT+double click: Properties tih lanna.

Shortcut key dangte:

SHIFT+F10: Kan duh zawng kal natura shortcut (Right-click nen a in ang)

CTRL+ESC: Start menu hawnna ( Item i select nan ARROW keys i hmang dawn nia)

CTRL+ESC or ESC: Start Button tih lanna (TAB hmangin task bar i select ang, or press SHIFT+F10 hmangin context menu i kal thei bawk)

ALT+DOWN ARROW: Drop-down list box hawnna.

SHIFT: CD-ROM-ah Disc i thun chiahin SHIFT hi hmet reng la, Automatic-a Run i pumpelh thei ang.

ALT+SPACE: Main window’s System menu tihlanna (System menuatang hian restore, move, resize, minimize, maximize, or close window te i hmu thei ang)

ALT+- (ALT+hyphen): Multiple Document Interface (MDI)(Hei hi Document hrang hrang i hawn sawina a ni) tihlanna,  child window’s System menu pawh a awm (MDI child window’s System menu atang hian  restore, move, resize, minimize, maximize, or close child window i ti thei ang)

ALT+F6: Programme in ang i hawn a, duh zawk thlanna. (entirnan, Notepad Find dialog box-ahte hian, ALT+F6 chuan Find dialog box leh main Notepad window inkar a rawn khawih ang.)

Shell Objects leh General Folder/Windows Explorer Shortcuts:

Selected object thenkhat bikah:

F2: Rename object.

F3: Files zawng zawng zawnna.

ALT+ENTER: Kan object select-a properties hawnna.

(Kar lehah chhunzawm tur)

A  THLAWNA  THISEN  PEK  HI....

Thisen pek tumte hriat tur

            Ni 15.8.12 a KTP  bul tuma  thisen pek a ni dawn vangin tihchhuah nawn leh a ni.

i) Pek hma in:

            a) Zanah mut that leh, mut tam tur a ni.

            b) Rltam laiin pek loh tur. Thil ei that a, tuiril lam ei tam tur a ni.

            c) Zu, kuhva leh vaihlo lam chi reng reng pek dawnah tih loh tur a ni.

ii) Thisen pek zawh ah:

            a) Tuiril lam in tam tur a ni.

            b) Hengte hi tih loh tur a ni- Meizuk (darkar chanve), Zu (Chaw ei hma), exercise/ hah lutuk (darkar 24).

            c) Band-aid darkar 5-6 hnuah phelh tur.

            d) Thisen pek avangin ei tih tui bik a ngai lo.

Thisen pek a hlauhawm lo:

            1. Thisen pe tur reng reng hi an hriselna  a that leh that loh enfiah hmasak zel a ni a, an hriselna in a tuar dawn ai chuan an laksak lo mai thin a ni.

            2. Mipa puitling hian thisen 76ml/ Kg body weight an nei a. hmeichhia puitlingin 66ml/ Kg body weight an nei a ni Puitling chuan 4000-6000 ml (4-6 litres) kan nei tihna a ni a, heta tanga 300ml emaw vel lakchhuah chu hriselna atan a hlauhawm tham lo a ni.

            3.Thisen pek hian, darkar 24 chhungin a tam lam pang (volume) hian ngai a awh leh a. Hb pawh thla 1 chhungin ngai a awh leh thin.

            4. RBC  hi englai pawha kehchhia leh insiam reng a ni a, ni 120 bak a dam lo. Thisen hi pe lo mah ila an kehchhe tho zel tihna a ni.

            5.Thisen pekna hmanrua te hi thianghlim tak (disposable) vek an ni a. Thisen pek atangin eng natna mah a kai theih loh.

Thisen kan pek chhan thenkhatte:

i) Damlo thisen mamawh an tam em vangin.

ii) Mahni tana hlauhawm si lova midangte nun chhanhim na a ni.

iii) Kan mawhphurhna theuh a ni a, kan ram chhunga damlo te tan hian ram dang mi ten min rawn pek sak hauh lovang.

iv) Tupawh hian thisen mamawh thut thei vek kan ni a, chuvangin midang tan pawh kan inpe ve tur a ni.

BIBLE QIUZ NO. 33

I SAMUEL BUNG 6-10

A Kâr âwl dah khat rawh :

Q1.Tin, Philistia mite chuan, “LALPA bâwm chu engtin nge kan tih ang? A awmna pangngaia kaltir lehnaziamin hrilh teh u khai,” tiin ................................. leh aienthiamte an ko va.

Q2. Tin, heti hi ani a, Kiriath-jearim-a bâwm a awm chung chu rei tak ani a. kum sâwmhnih ze a ni: tin, ................................ chungte zawng zawngin LALPA chu an lunglen leh ta a.

Q3. A fa tir hming hu Joela a ni a; tin, a dawttu hming chu ............................. ani a; Beer-sea-a rorêltu an ni a.

Q4. Tin, ani chuan fapa a nei a, a hming chu Saula ani a, tlangvâl tlawntlai tha tak ani a, ............................. mite zinga chuan a aia tlawntlai tha rêng rêng an awm lo va; tuma a koki khûm pawh an awm lo.

A bung leh Châng dah rawh :

Q1.Aigupta mite leh Pharoan  rilru an tihkhauhang khan engati nge in rilru in tihkhauh ni? An zinga thil mak taka a tih khan mie chu an kaltir a, an chhuak ta ani lâwm ni?

Bung: ...............          Chang: ....................

Q2. Aigupta mite leh Pharoan  rilru an tihkhauhang khan engati nge in rilru in tihkhauh ni? An zinga thil mak taka a tih khan mite chuan kaltir a, an chhuak ta ani lâwm ni?

Bung: ................         Chang: ....................

Q3. Aigupta ram ata ka hruai chuah ni atanga tun thlenga an thiltih dan zawng zawng, min hawisan Pathian dang rawnte min bawlsan thin ang bawk hian i chunga an ti a nih hi.

Bung: ................         Chang: ...................

Q4.(Tun hma lam chuan Israel hote zinga miin Pathian rawn an duh hian, “Hawh teh, hmutheitu hnênah i kal teh ang,” an ti thin a: tun laia zâwlnei an tih thina hi tun hma chuan Hmutheitu an ti thin a ni.)

Hming : ......................................................

Section : .....................................................

BIBLE QUIZ  NO. 32RESULT

Chhanna lut zawng zawng              : 0

Chhang dik vek                                : 0

Lawmman dawngtu                          : Awm lo.

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni

PAVALAI INKHAWM PROGRAMME

A hun:16.8.2012 (Ninga zan)

A hmun: Senior Hall

Hruaitu: Pu C. Lalchhuansanga

Tantu: Pu Suithanga

            Rilru sawi leh tawngtai ruala hun hman  tur a ni.

M.U.P  HRIATTIRNA

            Vawin ni 12.8.2012 chawhnu inkhawm ban ah Pu R. Sangzuala ral tur a ni a, member te kal theuh tur a ni e.

Hruaitu: Pu C. Kapliana

Ralna hlantu: Pi Zuimawii

Thuchah sawi tu: Pu Siamliana

SOLFA  ZIR  THEIH

            Synod Music school ah theory of music (Tonic & Staff notation) September - November thla chhung zirna hun hawng leh ta a. A zir duh te chuan hengte hi ngaihven tur a ni.

1. Dilna hi Synod office a music department atangin lakchhuah tur a ni.

2. Dilnaah hian kohhran lehkha thil tel tur a ni.

3. Dilna hi ni 24.8.2012 thleng thehluh theih a ni.

4. Ni 27 ah seat chang turte tar chhuah a ni ang.

5. Ni 28-29.8.2012 ah admission tih tur a ni ang.

6. Ni 3.9.2012 zing dar 6:30 atangin class tan tur a ni ang.

            Hriattur dang pawimawh chu dilna form-ah ziah a ni e.

THISEN  PE  DAWN

            Ni 15.8 2012 (Nilaini) hian  KTP Saikhamakawn branch chuan Synod hospital-a mamawh tu te hman atan thisen pek nise a ti a. Member te hemi ni a pe thei tur hian lo inbuatsaih ila a tha ang. A pek na hmun tur hi Sunday school hall-ah a ni ang.

LAWMTHU SAWINA

            Kan pa duhtak T.Upa R.Sangzuala’n min boralsan chungchangah lawmthu sawi tur tam tak kan nei a, mimal tin chungah lawmthu kan sawi sen loh avangin chanchinbu kalthlanga lawmthu kan sawi hi min lo pawm sak theuh turin kan ngen a che u.

            A damloh tan tirh atanga amah hmangaih leh lainat taka enkawltute chungahte, in lam leh damdawiin lama amah kan a, tha leh zung, sum leh pai seng thin tute chungahte, amah tawngtaipui thin tute zawng zawng chungahte, a boral tak hnua a ruang buaipui a, engmah ui lova amah hmangihna leh lainatna lantirtute chungahte, kan khawhar hnem tura min  riahpuitute chungah leh vawiin thlenga min thlahthlam lova min lenpui a, min tawrhpui a, min lainat a, min tawngtaipui tute zawng zawng chungah lawmthu kan sawi tak meuh meuh a ni. Chutihrualin lawmthu sawina awm tak, sawi hmaih palh kan neih chuan thupha kan chawi nghal bawk a ni.

            Kan chunga in thatna zawng zawng LAPAN a let tam takin rul che u rawh se.

In khawngaihna dawngtu,

Khawlvuani te chhungkua

Saikhamakawn

HRIATTIRNA

            KTP Upa R.Lungtiawia Group chuan kan hmunphiah zawrh man ba leh Motor silna man bate thawhleh (14.8.2012) zan hian rawn khawn kan tum a, kan han inhriattir lawk a ni e. Tin, hemi zana hnatlanga chhuak theuh turin Group Member zawng zawngte kan inhriattir nghal bawk e.

Sd/-

Secretary

Upa R.Lungtiawia Group

TUALCHHUNG

,Pu J.Lalpara h/o Pi Lalchhanhimi (V.Sec) chu damlohna avanga Guwahati-a enkawl anih hnuin dam takin alo haw. Tin, Pi Lalchhanhimi w/o Pu J.Lalpara pawh Greenwood Hospital-a enkawl anih hnuin dam takin alo chhuak.

,Pi Lalfakmawii w/o Pu F.Lalrinmawia (V.Sec) chu khawsik avangin Civil Hospital-ah enkawl mek a ni.

,Pu F.Lalrinpuia h/o Pi Laldawngliani (T.Sec) te chuan khawiilo vah vel nan Scooty (Flyte) thar an lei.

,Pu Zohmangaiha h/o Mahlimi (V.Sec) te chuan khawiilo vah vel nan Scooty (Dio) thar an lei.

,Pu Lalbiakmawia h/o Pi Lalhmingliani (V.Sec) chu damlohna avangin Aizawl Hospital-a enkawl anih hnuin dam takin alo chhuak.

,Tv. Lalhruaitluanga s/o Pu Chhuanvawra (Vsec) chu damlohna avangin Civil Hospital-a enkawl anih hnuin in lama inenkawl turin alo chhuak.

LAWMTHU  SAWINA

            Nimin (Inrinni) khan nilengin Chekbawkah tuikhuah lai a hnatlang neih a ni a. YMA member  thawkchhuak zawng zawng te leh hnatlang a thawkchhuak te ei leh in tur atana sum leh pai rawn thawh tute zawng zawng chungah Branch YMA chuan lawmthu a sawi tak meuh meuh a ni.

Sd/-

Pu Lalhuliana

Secretary  YMA

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300