Mipui Aw 8.7.2012

MIPUI AW

Vol. XVIII Issue No. 28 Kristian Thalai  Pawl  Saikhamakawn Branch  Pathianni Dt.8.7.2012

VAWIIN CHANG VAWN

            Miin a tawngkam chhuak rah chu a seng ang a, Ama kut thiltih ngei chu a hnenah hlan a ni ang. Mi a kawng chu ama mitah chuan a dik a, Mifing erawh chuan rorel a ngaichang thin.

KOHHRAN PROGRAMME

8. 7. 2012 (Pathianni)

Chawhma S.S inkhawm

Tantu          : Pi V.L Beiseii

Chawhnu

Thusawitu  : Pi Khawlvuani

Zan Inkhawm

Thusawitu  : Upa R. Lalrindika

KTP PROGRAMME

 Dt. 9. 7. 12 (Thawhtan zan)

Neihthil Thehkhawm

Hruaitu         : Pu C. Lalnunsanga

Tantu             : Tv. C. Laldinpuia

            July thla chhunga Inkhawm leh Fellowship zai hruaitu leh musician turte.

Hla hruaitu   : Pu R. Lalmuanpuia

turte                 Pu Jeff Lalhmingsanga

Musicians     :Upa Lallawmchhunga

                          Tv. Malsawmzuala

.VAWIIN  TLAI   FELLOWSHIP

            Tualchhungah chhiattawk an awm avangin vawiin tlai fellowship a awm lovang.

.KOHHRAN  HMEICHHE PROGRAMME

 Dt. 10. 7. 12

Tawngtai rual programme

Hruaitu : Pi Lalchhingpuii

Tantu : Pi Chawngkungi

Malaysia chanchin chhiar

Chiartu : Pi Saithangpuii    

SERMON

TAWNGTAI  NA

            Chutichuan, tihdama in awm theih nan in sualte thupha chawi tawn ula, intawngtaisak tawn thin rawh u. Mi fel tawngtaina chuan thil nasa tak a ti thin. Elija chu keimahni nungchang ang pu mihring bawk a ni a, ani chuan ruah sur loh nan thahnemngai takin a tawngtai a; tin, kum thum leh thla ruk chhung zawng lei chungah ruah a sur ta lo va. Tin, a tawngtai leh a, vanin ruah a surtir a, leiin a rahte a rawn chhuahtir ta a.

                                                                        Jakoba 15: 6

            Ringtute tana pawimawh leh kan thlarau tan a thanlenna hnar chu tawngtaina hi a ni. Tawngtaina kan tih hian a awmzia taka lang chu Pathian hnena thu kan sawi a, amah kan biakna a ni e tiin sawi ila a fiah ber awm e. Amaherawhchu tawngtai ringawta Bible chhiar thlahthlam leh si chuan kan thlarau nun thanlen na kawngah a khingbai thei a ni tih erawh kan hriat a tha ang.

            Tawngtai thiltihtheihna hi ringtuten kan hriat thar fo a tul hle mai. Bible chang tarlanah chuan Elija chu keimahni ang bawk mihring a ni a, mahsela Pathian hnenah tihtakzeta a tawngtai chuan a tawngtaina chu tihhlawhtlinin a awm chiang kher mai. Ruah sur lo turin a tawngtai a, kum thum a sur lo mai a, sur turin a tawngtai leh a, Pathinin a tawngtaina lo chhangin a sur tir leh mai bawk a ni. Hetah hian thil langchiang em em chu Elija leh Pathian inkar inzawmna hi a thuk hle a ni tih ching takin kan hmu thei ang. Engati nge tunlai hunah kan tawngtaina te chhanin a awm lo nia kan hriat tak thin. Pathian nen nun inzawmna tak kan nei lo nge? Kan thil dil te; kan dil dan a diklo zawk. Kan Pathian thu vek chuan ‘in dil a in dil dan a dik loh avangin in hmu lo a ni’ tiin a sawi a, kan dil danah dik tawklo, mahni hmanthatna te, mawina lam zawng te emaw tuarna pumpelh zawngte emaw in kan dil pawh a ni mahna, in enfiah tlan a tul mai thei a ni.

            Kan tunlai khawvel leh he Zoram chhung ngei pawh han thlir ila, sualna tam takin a pung a, nasa takin Setanan a ram a din mawlh mawlh mai niin a lang. Tin, keini vengchhung ngei pawh thlir ila, ruihlo leh ruih theih lam chi a hluarin, a  zalen ta mah mah lo maw? Rinngtu kohhran ho ten kan tihtur leh kan theih ang tawk tawk chuan ti ve te pawhin kan in hre mai thei e, mahsela he khawtlang leh kan ram tan hian kan tawngtai tlem deuh a ni lo maw? Elija chuan thahnemngai takin a tawngtai asin. Vawinni a ringtu in ti te hian kan ran leh khawtlang a lo dam theih nan thahnemngai takin Pathian hnenah kan tawngtai ngai em? Kan tih theihtawk Pathian tak kan taksa ngei che chhuaka kan in pek baka Zoram leh he khawtlang a lo dam theih nan thahnemngai takin i tawngtai ang u.

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

CHHEL  NA

            Kan Pathian chuan amah ringtute hi hlim tak leh a nuam zawng lam ringawt te, kan thiltihna kawng tinrengah hlawhtlinga vannei reng turte leh amah avanga ropuina chang reng turin min ti reng reng lo. Krista avang tuar turate, chan turte, mualphona thleng pawha hmachhawn turin min buatsaih a ni tih hi kan pawm  a, chumi kawng zawh ngam tura ringtute kan inbuatsaih a, chhelna kan neih a tul hle mai.

            Tin, he khawvela kan awmchhung hian natna te, lungngaihna te, thlaphanna te pawh kan tawh turin Pathianin a lo dah tel bawk a, ringtu chhungkua ten thihna kut vawt a pumpelh bik hauh lo, lungngaihna leh thlaphan manganna in a chim buai reng tho mai; Pathian remruat a nih tlat vang a ni. Mahsela englaipawha min venga min awmpui rengtu chu Pathian chuan natna leh manganna ruama kan awmlai pawhin amah ringtu te chu chhel taka tuar thei turin min pui zawk thin a ni.

            Hebrai ziaktu chuan chhel taka a tuar chhuah hnuin thil tiam chu a hmu ta ngeia tiin  a lo sawi ang hian, Ropuina ram thleng turin chel takin i awm ang u.

ARTICLE

HMUN HLAUHAWM

            Fur chu a ni ta reng mai, Mizoramah chuan furin a ken tel tlat thil pakhat chu leimin hi a ni ngêi ang. Mizoramah chang lo pawh Sonapur lamah pawh leimin hi chu alo awm ve ngêi ziah bawk. Amaherawhchu Mizoram hi a hlauhawm bîkte pawh ti ila kan sawi sual âwm love. Dawihzep vâng nge thil lo suangtuah thui vâng zawk Aizawlah ngêi pawh hian hmun hlauh deuh deuh mai ka nei nual tlat mai, han sawi thuak thuak ila:

1)  Thuampui to Bawngkawn Road: He lai hmuna i kal tawh chuan chhaklam han hawi phei la; a hlauhawm zia chu sawi kher a ngai tawhin ka ring lo, a ko a sang a, motor pawh nise tlân laklawh laiin lung alo tla thut ang tih hlauhawm tak a ni. Bawngkawn Hmarveng (Bawngkawn North) phei saw chu ka þih tak zet.

2)  Durtlang to Bawngkawn Road: Durtlang kawngchho kan tih mai hi a zâu tawh viau nâa ala min fo mai, kawnghnawh vek khawpa a min châng pawh a awm ţhin. A zauh avang hian hlauh loh ngawt chiah kei chuan ka ruat ve lo.

3)  Ramhlun to Chanmari: An inrîna tak maia kawngchhak lam lung ko saw i en chho ngai em? Kal laklawh laiin vawilehkhatah a rawn tla phut ang tih ka hlau ţhin. A chhak lamah rawn tla; insah huk thei tûr Laipuitlang tuikhuah ala awm cheu bawk.

4)  Chaltlang to Chanmari: Chaltlang Road tiin hriat a hlawh hle, in race nân an hmang fo ţhin bawk. Hmânni chu Chanmari aþanga Chaltlang pana ka tlân lai takin chhaklam aţangin a rawn min thut pek a, ka bula tlân ve tho bike khan tlan lui pawp rawh a rawn tia ka tlân lui a, ka chhuak hrâm. Bike pawh tlêmte chu a rân phah tawh. Hei vâng hian ania leimin ka hlauh tâk êm êm ni.

5)  Bawngkawn to Hunthar via edenthar & Chanmari west: Lêngtâwi an tih lai tak mai saw. Hmânah pawh nunna chân an awm tawh kha. Zûam ngawt chi a ni lo. A chhak a ko luttuk. La tla tûr waiting list ala awm þeuh mai.

6)  Tuikual to Vaivakawn via Dinthar & Dawrpui Vengthar: Temple aþanga i kal thlâk chuan lungpui ko bûr hnuaiah i lût thla ngêi ang tih ka ring. Saw lai kawng ko bûr mai hnuaia ka kal lai sawn thlamuangin ka kal ngai lo hrim hrim. A ko chungah lah in lian mangkheng ala awm zui… Chupawh an la luah vek nia mawle... In neitupa saw chu saw inah sawn a awm ka ring lo hrim hrim.

7)  Mission veng to Kulikawn via Thakthing: Thakthing Khâmphei tiin a lâr mah zawk âwm e. A min tawh a, a thlanga in pawh a hnâwl thlâk vek tawh kha. Kawng a zau lova, tlân chak har lai tak a ni. Thakthing tlang aţangin a tlângpumpui mai saw min thhei mai tûrah kei chuan ka ngai hial mai.

8)  Saikhamakawn to Kulikawn via Ngaizel: Ngaizel khâm zet saw chu ruah a sûr hlek chuan ka kal ngailo hrim hrim, a hêlna tûr a awm ţhat vângte pawh nimahnâ. Râwn tla mai thei tûr waiting list pawh a awm þeuh mai. Thlamuangin ka kal ngailo ve bawk.

Mihring vânneihna hi a sang in ti phawt mai teng. A sang hi ka ti tak meuh meuh a ni. Hetiang lung ko leh khâm ko tam tak kârah hian Aizawl mipui leh khualzin kan vei vâk a ni a, mihring nunna chân hi chu sawi tham lek chauh ania, tûn fur lai rauhtui tam lai hi chuan mitinte kan theih ang chin chinah i fimkhur ang u.

M.H.I.P  DAY  VAWI 38na

Pi Lalchhingpuii

President

MHIP Saikhamakawn

            Pathian hruainain Mizo Hmeichhe Insuihkhawm Pawl (MHIP) chuan kan din champha vawi 38-na kan lo hmang ve ta reng mai a, a va hlu e,! Keini Saikhamakawn Branch pawhin kan Day Ni 6.7.2012 chu zing karah kawngpui dung tifaiin hnatlang kan nei ve a, kan branch ah hian kumin 2012 ah member 319 kan awm a, zingkar hnatlangah hian mi 40 vel kan thawk chhuak a, member te tan lak a ngai hle mai. Kawngpui dung kan phiahfai a bawlhhlawh tam ber chu meizial bung leh kuhva pack-na sarang a ni. Naupang bawlhhlawh paih aiin puitling bawlhhlawh paih hi a tam zawk tlat mai a, kan in enfiah a tul hle mai. Kan YMA ten kawngpui dungah a khat tawkin bawlhhlawh bawm an hung a, kan vengchhung a a lo thianghlim theih nan bawlhhlawh bawm hi hman tangkai i tum theuh ang u.

            Zingkar kan hnatlangah hian mi inphal te hnen atangin thilpek kan dawng a, kan va lawm tehlul em! Thilpek min pe tute:-

            1. Pu Ngura Sailo                  - `300

            2. Pu R.V Ramdinthara        - `100

            Tin, Pu C. Lalrinmawia’n hnatlangte theitui min intir bawk a, a chungah kan lawm hle.

            Tin, kan Day denchhen hian damlohna avanga harsatna tawk Pi Lalfamkimi w/o Pu Lalpiangthara te chhungkua chu buhfai leh pawisa in kan tanpui a ni.

MHIP vul zel rawh se.

SPORT  HMANG  ZO  TA

            Nimin inrinni khan Saikhamakawn K.T.P te chuan Rajiv Gandhi Stadium Mualpuiah nilengin sport hlimawm tak neih a ni a. He sportah hian Pavalai Pawl te KTP in opening match neih puia an sawm angin an rawn tel thei a, Branch KTP Committee nen inkhel in 1-0 in Pavalai an chak ta lo a ni. Tin, he sportah hian footbal final mipa khelh hman a ni ta lo bawk.

BIBLE QIUZ NO. 28

RORELTUTE BUNG  (20-21)

A Kâr âwl dah khat rawh :

Q1.  Tin, Israela thlahte chuan “Eng tiziaa hetianga .................................... lo awm nge ni min hrilh teh u?” an ti a.

Q2. Nangni Israel thlahte u, in vai hian ngai teh u, in ...................................... leh in remtih dan chu sawi rawh u khai,” a ti a.

Q3.Tin, Benjami thlahte chu Israela thlahte do tûrin khawpui ata te an lo chhuak khawm a, ...................... khuaah an lût chiam a.

Q4. Tin, Israel mite chu ................................ mite tiam lovin khandaih keng thiau nuai li an ni: chungho zawng zawng chu indo mi vek an ni.

Q5.Mi.................... erawh chu thlaler lam Rimon lungpuiah an tlânchhia a, chu mi Rimon lungpuiah chuan thla l an awm a.

A bung leh Châng dah rawh :

Q1.Anni chuan, “Aw LALPA, Israelte Pathian, eng tizia nge Israelte zinga hetiang thil hi a lo awm a, vawiinah hian Israelte hi hnam khata kim ta lo nge ni le?” an ti a.

Bung: ...............          Chang: ....................

Q2. Tin, anni chuan, “Ngai teh u, Bethel hmâr lam, Bethelh atanga Sekem kalna lamlian chhak lampanga Lebona chhim lama awm Silo khuaah kum tin, LALPA tan kut a awm thin kha,” an ti a.

Bung: ................         Chang: ....................

Q3.Tin, heti hi ani  a, a tukah chuan mipuiho chu zing takah an tho va, chutah chuan maichâm an siam a, hâlral thilhlante leh remna thilhlante an hlan a.

Bung: ................         Chang: ...................

Q4.Tin, chu veleh chuta tang chuan Israel thlahte chu mahni chi chi leh mahni hnam hnamin     an intêl hrang a, chuta ta chu anmhani ram theuhvah chuan an haw leh ta a.

Bung: ................         Chang: ....................

Hming  : ................................................

Section : ................................................

BIBLE QUIZ  NO. 26 RESULT

Chhanna lut zawng zawng : 5

Chhang dik vek : 5

Lawmman dawngtu : Rinngaihzuala(T.sec)

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni

PAVALAI INKHAWM PROGRAMME

A hun  :12. 7. 2012(Ningani)

A hmun:Senior Hall

Chairman: Pu T. Lalrinthanga

Tantu : Pu Ramdinthara

Hun Hman dan: Rilru sawi leh tawngtai rual.

LAWMTHU  SAWINA

            Saikhamakawn Branch KTP chuan nimin inrinni khan nilengin Branch Sport Rajiv Gandhi Stadium Mualpuiah a vawikhatna atan phul lem chung ngeiah soprt a nei a, Branch KTP chuan member tin te he sport a hlawhtlin theih nana lo tel zawng zawng te chungah lawmthu a sawi tak meuh meuh a ni.

            Tin, kan sport te min rawn hmanpuia min rawn telpui tura kan sawmna Pavalai pawl ten min rawn tihhlawhtlin saka nilenga hun min hmanpui avangin Saaikhamakawn Pavalai chungah Branch KTP chuan lawmthu a sawi takzet a ni.

Sd/- Lalduhkima

Secretary

Branch KTP

SACRAMENT  DEPT.  LEADER  THAR

            Saikhamakawn Sunday School Sacrament department leader nilai Upa C. Lalchhuanmawia chuan chatuan ram min lo pansan tak avangin a hmun ruak luah tur hian kohhran committee chuan Upa Lallawmchhunga a ruat.

THUROTLING

* Darkar khat lek na tuara awm hi, nikhat nuamsa taka awm nên a reizawng a inang reng.

                        - Thomas Fuller

CHATUAN  RAM  LAMAH

            Upa C. Lalchhuanmawia (62) chuan July 2, 2012 thawhtanni zinglam dar 8:30 vel khan harsatna leh hreawmna karah pawh chhel taka a rawng a lo bawlsak thin a Lalpa hnenah min lo chawlhsan ta a. A kalsan tak a nupui leh a unau te leh a chhungkhat laina zawng zawng te  Mipui Aw editorial board chuan kan tuarpui takzet a, Pathian thlamuanna leh awmpuina a dawn zel kan duhsak in an tan chu chu kan tawngtaina pawh a ni e.

LAWMTHU  SAWINA

            Kan fapa David Vanlalruata leh Vanlalhmuaka te ni 30.6.2012 zan a bikea an accident naah vengchhung mipuiten nasa takin min buaipui a, an accidentna hmunah ruahsur nasa pawh sawi lova min buaipui na zawng zawng te, damdawiin lamah a tul ang anga min buaipui na zawng zawngah te lawmthu kan sawi tak meuh meuh a. Mi zawng zawng hnenah a lawmthu kan rawn sawi seng lova, chanchinbu hmanga lawmthu kan sawina hi min lo pawmsak turin kan ngen che u a, min khawngaihna zawng zawnga Pathianin a let tamtakin rul che u rawh se tih hi kan tawngtaina pawh a ni e.

In khawngaihna dawngtute

Pu Thangluaia &

Pu Lalthlamuana (Pu Val-a)

te chhungkua.

VAWIIN KHAWCHIN

A lum lai berin : 280 C

A vawh lai berin :220 C

Chawhma, chawhnu lamah leh, zan lamah ruah a tla lovang.

Source : Weatherforecast.com

TUALCHHUNG

,Lalsiamliana s/o Zothanpuii (V.sec) chu damlohna avangin Civil Hospital-ah enkawl a nih hnuin a lo chhuak.

,Tv. David Vanlalruata s/o Thangluaia (Ch.sec) chu accident avanga Civil Hospital a enkawl a nih hnuin a lo chhuak..

,Tv.Vanlalhmuaka s/o Lalthlamuana (T.sec)chu accident avanga Civil Hospital a enkawl a nih hnuin alo chhuak.

,Pu B.Lalrinzaua h/o Pi Mawitei (Ch.sec) te chhungkua chuan tul leh mamawha hman atan Taxi (Maruti 800) an lei thar.

,Pu Hualhnuna (T.sec) te chhungkua chuan tul leh mamawha hman atan Bike (FZ) thar an lei.

,Pu C.Vanlalsang h/o Pi Lalchungnungi (Pi Tete-i) (V.sec) te chhungkua chuan tul leh mamawha hman atan Bike (Karizma) thar an lei a, tin, Car (Getz) an lei thar bawk.

TEACHER  WANTED

            Two posts of teacher fluent in english in english are lying vacant at Candid English School: Interested person may apply on or before the 12th July 2012.

Qualification :- HSSLC or above

Pay :- Negotiable

Contact :- 

8731066925

9862648818

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300