Mipui Aw 15.7.2012

MIPUI AW

Vol. XVIII Issue No. 29 Kristian Thalai  Pawl  Saikhamakawn Branch  Pathianni Dt.15.7.2012

KOHHRAN PROGRAMME

            Kohhranah hla kutpui programme hman mek a ni a, nizan atanga hman tan niin thupui awmsa hmanga Pathian thu ngaihthlak thin tur a ni a, zanin thleng hian he programme hi hman tur a ni. Sunday school erawh a pangngaiin a awm ang.

15. 7. 2012 (Pathianni)

Chawhma S.S inkhawm

Tantu          : Pi Laldawngliani

Chawhnu

Thupui        : Pathian fak hla sak, leiah leh vanah

Thusawitu  : Upa Zairemthanga

Zan Inkhawm

Thupui        : Lalpa fakin zai rawh u

Thusawitu  : Upa Lalzama

KTP PROGRAMME

 Dt. 16 .7. 12 (Thawhtan zan)

Hruaitu :Nl.Lallawmsangi              Hrahsel

Tantu     : Tv.Jeremy Lalhruaitluanga

Thupui           : Isua nen- Inlaichinnaah

Hawngtu       : Tv. Lalfakzuala

Thilpek lakk            : Nl. Lalrinliani

hawmtu turte Nl. Pinky Lalparmawii

May thla zai & hla hruaitu turte

Hla hruaitu   : Pu Jeff Lalhmingsanga

turte                 Pu R.Lalmuanpuia

Musician       : Upa Lallawmchhunga

                          Tv. Malsawmzuala

VAWIIN  TLAI   FELLOWSHIP

A hmun    : S.S Hall

Hruaitu      : Nl. Lalrinchhani

Tantu       : Nl. Jenifer Zorinsangi

KOHHRAN  HMEICHHE

PROGRAMME (Ni 17.7.2012)

Hruaitu         : Pi C. Lalrinpuii

Tantu             : Pi Hmangaihzuali

Thusawitu     : Pi Rokhawli

SERMON

LAL  CHHUNGTE  I  HRILH  THUAI  ANG  U

            “Kan tidik hauh lo mai a; vawiin hi chanchin lawmawm thlenni a ni a, keini hi kan ngawi reng mai a; khawvar kan nghah....                                II Lalte 7: 9

            Suria Lal Benhadada chuan a sipai te khawmin Samari khua chu a hual bet tlat mai a, chutia an hmelma ten a hual beh tlat vang chuan khawpui danga ei leh bar han lam khawm  theih pawh a ni lo, matheilovin Samari khuaah chuan tam nasa tak a tla ta reng a ni. He khua hi an tam nasa viau a ni ngei ang, nu pawhin an fate sa an ei hial a ni tih pawh kan hmu bawk. Hetiang taka an tam nachhan ber ni a lang chu; an ngamloh Lal dangin che thei lova an awpbeh tlat vang a ni.

            Mahsela kulh pawna lama phar pali awm te chu Pathianin a hmang a, Suria sipaite ei tur dil a thih leh thih ti a belh an tum a an kal thawm chu Pathianin mi chak tak leh huaisen, sipai rual tamtak thawm ah chantirin Suria sipai tamtak hlauh tur khawpin Pathianin phar pali te thawm chu a chantir ta a ni. Suria sipai te chu baklengin an tlanchhe ta a ni nih kha. Tichuan pharte chu tlai puar takin an awm ta a, an chanthat zia chu hria in khawchhunga tam tuar a thi lek lek te pawh chu an va hrilh ve a. Phar pali te chuan mi tamtak nunna an chhanchhuak ta a ni.

            He thu a lang chiang em em ta chu, Pathian hian mi chak leh fing leh remhria te a thlang lem lo, hetih hunlai pawh hian zawlnei Elisa pawh a awm reng, mahse Samari khua chhanchhuak tur hian phar pali te chu Pathianin a thlang tlat. Keini rawngbawltute pawh kan fel vang leh kan that vang te, kan  tlin em vang pawh ni hauh lovin; kan chakloh na leh kan pharna hre reng chungin Pathianin min thlang hi kan vannei thlawt a ni tih i hre thar mawlh ang u.

            Tin, keini ringtute Pathianin thihna atan min chhanchhuak a, chatuan nunna min pe a, a fapa Lal Isua roluahpui turin fa nihna thlarau min pek te hi kan ngawih pui  reng mai dawn em ni. Kan chhehvel ramah te leh khawvel hmun hrang hrangah ringlo mi tam tak an awm a, hengmi te hian Pathian in a chhandam tih pawh an hre lo a, Pathian thu pawh an chhiar ngai hek lo, Setana leh a tirhkoh  ten an thlarau chu hremhmuna kal turin an hualbet reng a, thihna hlim hnuaiah tam tak an thu mek si a. Keini ringtu te hi kan ngawi reng mai dawn em ni. Pathian  mitin  tan chhandamna a buatsaih hi an hriat ve theih nan i pen chhuak ang u.

            Sual vanga tuar mek te tan, Missionary hmangin emaw, Kohhranah chhungah emaw thilpek hmangin emaw i thawkchhuak thuai ang u. Pathian rawngbawl tur hian mahni in sit in tlinglo in ti hle mah ila, Pathian chuan sipai rual ropui tak ang maiin min siam ve ngei dawn a ni, i zam lovang u.

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

            Vengchhung chanchinbuah chuan vengchhung chanchin a lang tam lo thei lo a ni ber mai. Pathian khawngaihna keini vengchhung pawhin kan dawng nasa hle mai a.  Tunhma lam ngaihtuah chuan kawng engkimah nasa takin hma kan sawn a, a lawmawm hle. Chhungtin leh mimal tin ten tun aia  nasa  hian kawng engkimah kan veng hmel a lo mawi theih nan tan la thar zel bawk teh ang u.

            Hmanni lawk atangin kawngpui tha tak kan nei a, kan veng kawng chhiat lai hre phalo fa kan awm lovang, tin, a hreawmzia pawh kan hre tlang theuh a nih kha. He kan kawng tha tak hi a chhiat leh mai loh nan vengchhung mipui ten a vawn that lamah kan mawhphurhna a ni tih hi i hre thar theuh ang u.

            Tin, kan vengchhung hi ruihtheihthil reng reng awm lohna  vengah vengchhung mipuite ka tan  tlan phawt chuan kan siam thei a ni tih hi hre bawk ila a tha hle awm e. Hei bakah mipui ten khawtlang hruaitu atana tling tawk leh tha tawka ngaia kan thlanchhuah  khawtlang hruaitu te pawh hian  vengchhung thatna tur kil tin atanga ngaihtuah chungin hma la zel se tih hi a duhawm hle bawk a ni.

ARTICLE

FACEBOOK-AH  ENGNGE  AN  SAWI?

- Dinga Fanai.

Facebook hi tunlaiah mi ţhenkhat chuan kan hman nasat viau laiin ţhenkhat ve thung kan nu leh pa, kan pi leh pu, kum upa lam deuhte erawh chuan enge anih pawh kan la hre fuh lo mai thei a ni. Hmâi lehkhabu tia lehlin ngawt chi chu a nilovang. Anihna hi ka sawi tum a ni lem lo, facebook chu internet hmanga thu, thlalak, file, etc. inthawn kual leh inbiakna, thil sawi hona a ni ber mai.

            Tunlai facebook lama chanchin langsar zual bîk heng chanchinthar lam Group-a comment hlawh zual ţhenkhatte zingah mahni ngaihdan han thâi lang ve ila. Langsar han tihah pawh hian han thliar hrang lehin lâk bîk nei leh ta bawk ila. Chanchinbu lamah te pawh a lang tho bawk a, amaherawhchu chanchinbu lamah erawh chuan mi ngaihdan (comment) a hmuh theih loh avang hian miin engtinnge an lo ngaih tih hi hriat a harsa a, hei vâng tak hian ania facebook ka’n tih deuh kher ni.

            A hmasa berah chuan Champhai Vengthlang YMA ten Lock-up (Savawm Bâwm) an siam a, chutah chuan misual an khung þhin tih hi. A comment-tu hi YMA chuan an ensan hialin ka hria. Comment tam zawk chuan ţha an tih loh thu an târlang a, ţha ti chu an awm ve zauh zauh bawk. Comment ţhenkhat zînga mi, mihring/misual mana Savawm Bâwma mihring khung duhlo chuan, “Sual nei lo chuan dêng rawh se” tih ngat phei chu Vanglai Chanchinbu-a Article-ah ka hmu nawlh mai. A  chhan bulpui be ni tâa lang chu ‘Sual ka tih hi engchinnge?’ tih hi a ni. Mi ţhenkhatin khawlai zurui kal ringawt chu sual an lo tih laiin ţhenkhat chuan a sualna a awm lo, tu pawi mah a sawi lo; an ti miau bawk si a. Ka lo ngaih ve dânah chuan sakhuana lama sual tih leh ram dânina sual a tih hi a danglam þhin vâng niin ka hria. pawngsual, rûkrûk, tuaklthah etc. ang chite hi kan ram (India) dânah chuan sual tih a ni. Mahse, hêng awhna sual, nupui pasal nei lova mahni duh thua sex hmang, buaina siam lêm lova zu in (Mizoram chauh ngaihtuah ta lo ila, MLTP Act kan la hman hi), duhâmna etc. ang chite hi chu kan ram (India) dân chuan a huam chiah lovin ka hria, amaherawhchu Kristiannaah ve thungah chuan sual a ni tlat si. Hei hi thliar thiam ila chuan kan NGO tam tak hi chuan sawisêlna tam zawk hi chu kan pumpelh ngêi chuan ka beisei.

            A dawt lehah chuan pawngsual, tunlai tak phei chu kum tlinglo pawngsual hi a lâr hle mai. Sex education lamah hian kan hnufual vang ani thei angem? Hetiang lamah hian naupangtê nih lai aţang hian in zirtir ni ta sela, naupang pawh chuan invêndân engemaw chu a hre thei zawk angem le? Chumai nilovin a pawngsualtu tûr tân pawh a ţangkai thei angem? Thudang alâiah chuan, MHIP thuchhuah ang deuh khân a hremna dân hi a khauh tawk lo a ni thei zawk angem? Ka ngaihdânah chuan Sex education lam hi têttê aţangin inzirtir thei ta ila, chumaibakah a hremna dân hi tûn aia khauh zawk hian duan hi ta sela a ziaawm mai ka ring. “Khaihlum tur” emaw “Dam chhung Lungin tân” emaw han ti sela a ziaawm ka ring. A rum luttuk em aw….?

A tawp ber atan chuan Punjab MLA pakhatin an rama Uicho (Stray Dog) kan ram Mizoram leh Nagaland leh China-a thawn bo a duh thu a sawi chhuah hi. He thu hi chuan khel a hlawh malh malh þhin khawp mai. Ka lo ngaih ve dân mai maiah chuan inhmuhsitna chu a ni chiang mai, amaherawhchu uisa ei hi Mizoramah hi chuan kan tam ve khawpin ka hria,a eilo chu an awm tak meuh nachung hian. Mahse… kan ti têng, hetia uisa ei duh kan tam rual hian khawlai Uicho sâ han ei duh tûr hi chu kan tam lo khawp ang. Uisa chu kei paw’n ka duh alawm, mahse vâi ram uicho sa hi chu ten tak ka ni. Ka lo ngaihdan ve mai maiah chuan rawn thawn chho ta tak tak pawh nise hralh a kal hian ka ring lo hrim hrim. Zo-ui dik tak a neitu ten mahni duh thâla an vulh kan lo ei ang ngawt chu a ni lovang. Thawn pawh rawn thawn lo se ţha ka ti, kan NGO ţhenkhatte leh Party lam te’n an dem hi âwm ka lo tih pui mai piahlamah ka thlâwp khawp mai. Tun dinhmunah chuan Punjab Uicho tello paw’n Uisa lei tur chu ala awm reng tho hi tih hi ka ngaihdan a ni e.

A  THLAWNA  THISEN  PEK  HI....

Blood bank hian khawi atangin nge thisen a hmuh thin.

                       

            Blood Bank hian thisen hmuhna (source) pathum a nei a, chungte chu:-

            1. Professional Donation: Hei hi thisen hralh leh lei a ni a, mimalin a thisen a hralh thin chu  a ni, mahsela hei hi Supreme Court chuan a khap bur tawh.

                                               

            2. Replacement Donation (Tu emaw tan bika pe tute): Tu emaw in thisen a mamawh avanga pe thei tur kan in koh khawm ang hi a ni a. Mizo te hi kan tlawmngai em em a, vengchhungah damlo thisen pek ngai awm sela zanlai pawh nise kan tlanchhe ngai lo. Mahsela kan thisen pek kha test chi hrang hrang (HIV, Hepetitis etc.)  neih a ngai leh phawt thin, in zawnbuai chhung nen hun kan khawhral nasat lutuk bakah damlo in a hun takah thisen a dawn theih loh phah a, tin,  Blood bank-ah thisen a awm theilo phah  bawk thin.

                                               

            3. Voluntary Donation: Tu tan bik nilova kan remchan hun apianga pek mai ang chi hi a ni. Tunlai hian kan uar viau a, KTP, YMA leh NGO’s hrang hrang te pawhin kan din champha ang te a kan pek ang chi hi a ni. Hetianga thisen pek hi a ropuiin khawvel ram zawng zawngin thisen pek dan tura duhthusam an neih chu a ni ta a ni.

            Sorkarin Blood bank te a siam a, khawl tha tak tak leh mithiam tak tak hmangin thisen vawn thatna a siam te hi a dah tur ber thisen mi tlawmngai te hnen atang dawn a nih si loh chuan awmzia a awmlo tihna a nih chu.

               

Voluntary a pek kher hi enge a tul na?

a) Blood bank-ah thisen test sa diam, emergency-a hman mai tur a khawl khawm theih phah.

aw) Thisen pek sak tur nei ve lote tan an hmang thin.

                                               

b) Blood group mamawh ang an awm lovin a thleng theih phah thin a ni.

                                               

ch) Damlo chhungte  tan thisen petute lakah senso a ngai ve lo.

                                               

d) Zanlaiah te inkoh khawm chuk chuk a ngai ve lo.

                                               

e)Hetianga pe an tam chuan thisen petu tur in zawn buai a ngai ve lo.

            Voluntary a thisen pe kan tam tak tak hunah chuan damlo chhungten thisen an zawn buai a ngai tawh lo ang a, tin rulh ngai lo in Blood bank atangin lakchhuah zung zung a ni tawh ang.

(A thlawna thisen pek chungchang hi chhuak leh ah chhunzawm zel a ni ang)

BIBLE QIUZ NO. 29

RUTHI  BUNG 1-4

A Kâr âwl dah khat rawh :

Q1.Tin, Elimeleka, Naomi pasal chu a thi a, ama leh a fapate  .......................... chauh an ni ta a.

Q2.Tichuan, a kal ta a, buh sengtute seng hmaih chu a va zawng ta a: tichuan Elimeleka thlah ........................... lovah ngei chuan a va kal fu hlauh mai a.

Q3. Chutichuan, inbual la, inthih la, i incheina puan sin la, hruiah chuan zuk kal rawh; amaherawhchu chawte a eia a in ............................. hma loh chuan a hnênah inhriattir hauh suh ang che.

Q4.Tin, an laichun bula hnênah chuan, “Moab rama atnaga lo kir Naomi chuan kan ........................... Elimeleka ram kha a zuar a;

A bung leh Châng dah rawh :

Q1.Tichuan a awmna ata chu a mote pahnih nen chuan an chuak a; Judai rama haw leh tûrin an kal ta a.

Bung: ...............          Chang: ....................

Q2.Chutichuan Boaza chuan Ruthi hnênah chuan, “Ka fanu, ngai teh aw; lo dangah chuan buhto zawngin kal suh la, heta ta hi kal sawn suh, ka chhiahhlawh nulate hnênah hian awm reng rawh.

Bung: ................         Chang: ....................

Q3.Tin, ani chuan, “Tunge i nih?” a ti a. Ani chuan, “I chhiahhlawhnu Ruthi ka ni; chutichuan i chiahhlawh hi i puan mi han zawn rawh, ka laichin bul i ni si a,” a ti a.

Bung: ................         Chang: ...................

Q4.Tin, chu chauh chu ni lovin, mitthi chu a hming dai lova ro luahtu siamsak tûr leh mitthi chu a unaute zingah leh a awmna hmun kulh kawngkaa a hming a bo loh nan, Moab hmeichhia Ruthi, Mahlona nupui chu ka nupui atân ka lei a; chu chu vawiinah hian

Bung: ................         Chang: ....................

Hming : ......................................................

Section : .....................................................

BIBLE QUIZ  NO. 28 RESULT

Chhanna lut zawng zawng : 4

Chhang dik vek : 4

Lawmman dawngtu   : Chawngthangliani (T.Sec)

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni

T.B.Z  PROGRAMME

Neihthil thehkhawm

A hun  :16. 7. 2012(Mon.)

A hmun:Pu C.Lalrinmawia In

Chairman: Pu R.Lalsangzuala

Tantu : Pi K.Lalhmingliani

PAVALAI  PROGRAMME

A hun  :19. 7. 2012(Thu.)

A hmun:Senior Hall

Chairman: Pu Kamzawngliana

Tantu : Pu C.Lalduhawma

Sermon: Pu T.K.Manga

KTP HUANG

 ZO ZAN

            Ni 26.7.2012 (Ninga) zan khian sunday school hall-ah KTP chuan Zozan hman a ni dawn. Member ten he hun hi hlimawm taka kan hman theih nan Branch Committee chuan programme dangdai tak tak nen  ruahmanna a siam a. He programme a tel tur te chu mahni hriat dan anga zo thei ang ber a inchei tura beisei kan ni. Refreshment tuihnai tak  zo teng tawng a buatsaih beisei a ni bawk. Programme kimchang chu karlehah rawn tarlan a ni ang.

SOLFA CAMP

30.July atanga 4.August.2012 chhung hian Kristian Thalaite Solfa lamah hma kan sawn theih nan Solfa Camp neih a ni dawn. Solfa Camp hi riak lut lovin zan lamah inkhawm zanah inkhawm bana tanin inkhawm loh zan chuan dar 7-ah tan thin a ni ang. Thalai ten Zaipawl hmanga Pathian rawng kan bawlna kawngah hian Solfa hi a pawimawh em em a ni tih hria in, memberte thahnemngai taka camp hi ngai pawimawh turin kan in ngen a ni.

HNATLANG

Nimin khan inhlawhna atana huan sam hnatlang neih tum a ni a, khua a nawm tak loh avangin thulh a ni a. Hnatlang dan leh hun tur hi Branch Comt. chuan ruanhmanna a rawn siam anga, memberte hnatlang tur hian lo inring reng tura ngen kan ni.

NIHLIAP  BO

            Ni hliap dum a lian chi tih bo a ni a, a hmu leh a lo kawl palh kan awm a nih chuan khawngaih taka min pe let leh turin ka ngen che u a ni.

Pu C. Lalhmunngheta

Phn.9862046429

TUALCHHUNG

,T.Upa R.Sangzuala leh a nupui Pi Khawlvuani (V.Sec) te chu dam lohna avangin Greenwood Hospital-ah enkawl mek an ni.

,Pu.J.Zothanzuala H/o Lalhmunmawii (V.Sec)  te chhungkua chuan khawilo vahvel nan bike (Karikma)  thar an lei.

,J.LalrinfelaS/o J.Lalthlengliana (T.Sec) chu thawhah natna avangin Civil Hospitalah enkawl mek a ni.

,Pi Biaksangi M/o Chawngi  (T.Sec)chu dam lohna avangin Synod Hospitalah enkawl mek a ni.

,Pu Lalhmingmawia h/o Laldinpuii  (Ch.Sec) te chuan fapa duhawm tak an nei.

GRADUATE RESULT

            Tun tuma Mizoram University in result  tihchhuah takah  Bachelor of Art atanga Graduate tharte -

1.Tv C.Laldinpuia    -II Div. (Geography)

2.Tv.P.C.Vanlalhriatpuia - III Div. (Hon. in Psychology)

            Bachelor of Commerce (Honour) atangin Graduate thar Nl. F.Lalrintluangi, I Div.a ni a. Mizoram pumah a ni hi 11-na dinhmun a hauh pha a ni.

            Bachelor of Science atangin Nl. Lalramhluni Chawngthu  D/o Lalhmunngheta  chu I. Div. (Hon. in Geology) a ni a. Mizoram pumah top ten ah lang phain 4-na dinhmun a hauh pha a ni.

            Heng Graduate thar te hi Mipui Aw Editorial Board chuan kan lawmpuiin kan chhuang tak meuh a ni. Zirna sang zawk an kal chho zelnaah duhsakna kan hlan a ni.

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300