Mipui Aw 3.6.2012

MIPUI AW

Vol. XVIII Issue No. 23 Kristian Thalai  Pawl  Saikhamakawn Branch  Pathianni Dt.3.6.2012

VAWIIN CHANG VAWN

            Miin a tawngkam chhuak rah chu a seng ang a, ama kut thiltih ngei chu a hnenah hlan a ni ang. Mi a kawng chu ama mitah chuan a dik a, Mifing erawh chuan rorel a ngaichang thin. Thufingte 12: 14-15

KOHHRAN PROGRAMME

3. 6. 2012 (Pathianni)

Chawhma S.S inkhawm

Tantu          : Pu Lalfakzuala

Chawhnu

Thusawitu  : Pu Lalrintluanga

Zan Inkhawm

Thusawitu  : T.Upa Sangzuala

KTP PROGRAMME

 Dt. 4. 6. 12 (Thawhtan zan)

Short sermon inkhawm

Hruaitu         : Pu Lalduhkima

Tantu             : Nl.Lalramhluni Chawngthu

Thu sawitu    : Tv.Lalhmangaihzuala

turte               : Nl. Lalrinchhani

Thilpek lakk            : Nl. Runremsangi

hawmtu turte  Nl.K.Lalmuanpuii

            June thla chhunga Inkhawm leh Fellowship zai hruaitu leh musician turte.

Hla hruaitu   : Pu Lalchhandama

turte                 Tv. Malsawmzuala

Musician       :Pu Lalremruata

                          Tv. R.Lalzamlova

VAWIIN  TLAI   FELLOWSHIP

            Vengchhunga chhiattawk an awm avang leh Hlimen Bial K.T.P meet a nih avangin vawin tlai fellowship a awm lovang.       

SERMON

INDO NUN

Upa Lallawmchhunga

 " indona chu LALPA indona a ni si a".(I Sam  17:47)

            Kan thupuia kan hmuh ang hian "Indo nun" tih a ni a. Rev. H. Killuaia chuan a fakna hla ah chuan "Indona zawnga rapthlak ber ka nun hi, Leh lam leh lama nek sawrin a awm a; Van in dona aia nasa zawk a ni, Hruaitu Krista ni suh se ka tlawm ngei ang," a lo ti a. Indo na ah chuan tu nge min bei tu leh tunge kan hmelma tih te hi ngun taka kan ngaihtuah chian a tul hle mai.

            Kan nun ah hian nun insual thil tha tih duhna leh sual ti thin duh nun insual reng mai hi a awm vek a ni. Thil tha tih duhna chu rilru ah a lo awm a, mahse thil tha tih thei na nun chu a awm si lo. "Thatna tih ka duh hi ka ti lo va; sualna tih ka duh loh hi ka ti zawk si thin a" tiin Tirhkoh Paula ngei pawhin a lo sawi a, a nun a lo buai em em a, Mi rethei ka va ni tehlul em! He thihna taksa lakah hian tuin nge min chhan chhuak thei ang?" a lo ti thlawt mai a ni. He lai thu hi Paula hian a Kristian hma nun nge a sawi a, Kristian a nih tawh hnu nun em ni a sawi? Tiin zirtute pawh an in then phawk a ni. A enga pawh ni se he mihring nun ah hian Famkimna hmun kan thlen hma hi chuan nun indona hian tawp ni a nei dawn si lo. Kan Lal Isua ngei pawh thlarau hruaia a awm lai khan diabola'n a chak lohna lai ah a rawn thlem chat chat a nih kha. (Mat 4:1-10). Sualin a thlem loh rawngbawltu an awm dawn em ni ?

            Indona hmunah mi a awm chuan hmelma in an rawn bei a, a hneh theih na tur chuan eng anga tan lo lak tur nge tih te leh inhumhimna hmun a mamawh zia te, a hriat chian a tul a. A hmelma a hneh theih na tur pawhin eng anga beih let tur nge tih te, a hneh theih na tur a tan a pawimawh ralthuam te a lak khawm zung zung a ngai a, theih tawp a hmelma a beih leh ve na ah hnehna a chang thin. Chutiang ni lova indona hmun ah a awm mai mai a, in thlah dah tak leh mu thlu mai mai te a, a awm chuan hmelma in awlsam takin an rawn hneh mai dawn a ni. Chuvang chuan kan nun a tisa thiltih awm zawng zawng te, kan tisa duh zawngte chu  Krista Thlarau a kan tih hlum zel chuan kan lo nung zel dawn a ni.

            Tichuan, Rom bung 7:25 kan chhiar chuan Isua Krista kan Lalpa avangin Pathian hnenah lawmthu ka sawi a ni. A lo ti ta a ni.  He kan nunah hian min beitu tisa thil zawng zawngte chu Lal Isuan Kross ah a hneh tawh a ni tih hi kan thinlungin a rin tlat a, he rilru Krista Isua a awm kha keimahni ah hian a awm reng phawt chuan nitin ni mai lovin.

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

NU  LEH P A  MAWH

            Mihring nupa a kan insiam hian Laiking fa neih ang ngawta fa nei  tur kan ni lo, kawng engkimah kan mawhphurhna kan hriat a tul hle mai.

            Kan society in mi tha leh fel nia kan pawn mizia leh nihna a awm a, tin, Pathian duh dan kawng pawh a awm a. Heimi ze pahnih ang deuh a kan sawi hi a kal kawp tlat ngei ngei tur a ni, chu chuan mihring nun kawng dikah a damchhungin a kaihruai tawh ang.

            Mihring kan lo pian chhuah reng reng hian chhungkuaah kan damchhunga kan vawn tur mizia kan zir a, chu chu kan nu leh pa leh kan chenpui te hnen atang kan zirchhuah a ni ching hle bawk. Hemi a nih avang hian nu leh pa te kan pawimawh hle mai. Tunlaia Mizo ten kan mamawh em em Moral Education kan tih te pawh hi khawi lai pawl pakhat in; zirtirna a pek atang neih chi a ni lo. Nu leh pa emaw chhungte hnen atanga naupan lai atang zir chi a ni.

            Pathian thu in naupang chu a kal na awm kawngah chuan zirtir ula a upat hun pawhin a thlah lovang a tih pawh hian nu leh pa pawimawh zia a sawi na tawngkam tho a ni tih i hre thar mawlh ang u.

ARTICLE

KA  LUKHUM (Helmet) A  TLA  A

Pc.Hriata

            Thu leh hla lama kan mithiam leh Zoram khawvel ah pawh tu rilruah hriatloh mah ni ngailo mihring, Zikpuii Pa pawh in 'Thil nawi kan hmaih thelh te' tih a ziah kha kan hre vek lo a nih pawh in hria erawh kan tlem hauh lovang. Thil nawi leh ho te te a kan ngai pawh a lo ho loh zia leh zawm ngai tak thil a nih zia a ziak chhuak a nih kha maw… Tun tumah pawh hian a thupui khi ho viau mahsela kei a ngaihah chuan thil ho tak a ni lawi si lo.

            Nu an cheh tia an sawi ang deuh in ri nghal bawrh bawrh mai ila a mawi lo hran lovang chu maw. A hun leh Ni tak kha ka hrechhuak zo ta chiah lo a; Aizawl khawpui chhung kawng lun lai tak leh Sawrkar Office lian tak tak pali in; pahnih ve ve in kawngpui chu an laitat a, hmun chengker leh biru mi tlem na lai chu a ni lo chiang tih in hre thei nghal mai awm e. Chumi lam pan chuan kei leh ka thiante pahnih nen chuan chu mi hmun lam pan chuan Tow-wheeler hian kan tlan a, a hmun kan thlen chuan office thlang lam kawt kawngpui bula chuan ka Two-wheeler chu ka dah a, khalh paha ka khum thin lukhum chu chumi Two-wheeler ah chuan ka dah nghal mai bawk a. Kei leh ka thian te pathum chu mahni pawipang leh chak zawng ni hauh lo ah kan buai em em a, hlawk na pawh kan tel dawn hek lo. Chunglam Jerusalem Thar vang a ni kan buai em em ni tiin sawi pawh ni ila dawt sawi kan ni hauh lovang.

            Chulai vel bawra kan buai zawh chuan; ruah te a sur vei bawk nen hmun hul laiah kan chawl a. Chutah leh Two-wheeler ka dah na lam ka ve en chuan ka lukhum (helmet) chu kawngpuiah a lo tla thal hal mai a. Ka thiante pahnih Tv.R.Mapuia leh Pu Tommy-a te pahnih (awkhaih! an hming ka sawi lo ang ka ti asin mawle, pawi love an haw chuang lo ang chu maw) chuan va chhar vat turin mi ti a, mahse ka duh lova ka char duh lohna chan chu a bul vela mite rilru ka en duh vang a ni ber awm e.

            Hla deuh atangin kan thlir ho ngar ngar a, sawrkar pisa a thawk nula nalh tak tak leh pa vengva awm tak tak Pisa kawta thu te chuan han dah that mai an tum der lo, mi panga(5) ai tlem lo chuan an kal pel a, a then lahin an thlir mai mai bawk a. Mi sawm ai tam chuan ka Lukhum tla chu an kalpel ngei ka ring, a tlak tirh atanga hmu kan ni tlat lo va, a tlakna pawh a rei tawh ngei ang. A tawp ah nu upa lam hmelfai vak lo hian a tlak na hmun kawng ata chu chharin Two-wheeler ah chuan a bang kang leh ta a. Mizo dik tak ka hmu ni hialin ka in hria nia mawle. Moral Eucation pawh ti hial te ang; Mizo te hian kan mamawh takzet ta niin ka hria.

            Ka naupan lai chuan ka chhungte hian, mi puanpho tla ka hmuh chuan kal pel lova bang tha leh tura min zirtir thin te, tlawmngaina te, rinawmna te, taimak na te, a tam mai kan sawi seng lo, keichuan ka theih tawpin ka zawm thin asin mawle ka ti vawng vawng mai a. Nu leh pa ten kan fa te kan lo zirtir hmaih fo thin, thil te tham anga ngaihna a awm vang ti ila kan sawi sual lovang, mahse nun kawng dik in tanna bul thut a ni tlat si. In zirtir thar kan mamawh ta niin  a lang, ka thil tawn atang a ka hriat chhuah tak chu hei hi a ni; mi sawm chuang in ka lukhum tla an hmu a, chhar an tum loh chuan za zelah pakhat pawh chutiang rilru tha pu chu Mizo zingah kan awm ta lo a ni mai lo maw? Kan moral a chhiat vek hma hian nu leh pa te pawhin ka fa te zirtir uar a ngai ta hle mai. Thiamna kawnga kan san viau lai hian Moral Education lamah kan ngaituah awm ta hle mai. I harh in kan puanven I sawi chhing ang u.

HRISELNA  HUANG

THLAI LEH THEI DAMDAWIA HMAN THEIHTE:

            Limbu : A hnahah hian Limonene (Tel rimtui) a pai a, a hnah 20 gms, tui 1 litre ah chhuan so a, ni tin no 3 in tur, chu chu muttui nan te, pumna atante, rulhul damdawiah te a tha. A kawr pawh hi khawsik, rulhut, pum nuamlo leh chawei tuilo tan a tha fu bawk. Tin, Limbu tui hian Vitamin B, C, Acid, Flavonoid te a pai.

            Vitamin C tlak chham vanga Scurvy natna te, pumpui chaklo te, taksa a al tam lutuk (Sa ei tam hian thisen leh zunah al a tam duh) hian ruhseh te, kal a lungte a siam thei a, heta tan hian Limbu tui sawr in tam a tha. Limbu tui hian thisen a ti thianghlimin, kal natna, rihseh te a veng thei. Tin, Limbu a Citrates (Citric Acid & Salt) te hian Kala lungte awm an chiah ral thei tih proof a ni tawh bawk.

            Limbu tui hian Vitamin P leh Hespiridin te a pai tel a, chu chu thisen zam tan a tha hle bawk. Ke vung, thahruichat, piles, BP sang tan a tha bawk.

            Limbu tui hian khuhhip hrik, Tonsil a awm te, kawthalo hrik te a suat vek thei. In chhungkuaa kawthalo an awm chuan Limbu tui in tir ang che.

            Limbu tui hian vun, tin, sam a ti chak a, sam phei chu a ti mawi duh hle.

PUMPUI  NA

            Kan thil ei, pai tawih har chi ei vang emaw, thil mawm lutuk ei tam vang emaw hian pumpui na leh nuamlo a awm thin. Kan ei leh in hian pumah thur tam tak a siam a, hei hian pum a ti nuam lo thin  ani, zuin mi ah phei chuan a awm duh hle.

            Thin thip vung vung te hi lung lam that loh vang emaw tih a awl viau, thin thip hi pumpui pan emaw, pumpui lawng vang emaw a ni duh viau zawk a ni.

            Pum na lutuk si lo, na awm reng si, tawrh theih tawka na, a changa thip zawk zawk thin hi pumpui atanga acid insiam tam lutuk avanga pumpui pan leh rilfang pan vang a ni duh khawp mai.Hei hi chaw mawm lutuk ei te, zu in te, mosola leh hmarcha eite hian na a ti zual duh hle.

            Pumpui pan ven nan hian Bawnghnute chhuanso, cheese, bawnghnute khar, chhangphut chhum diak leh balhla te ei a tha. Artui, Biscuit al chi, Chow chhum tui hang, Alu, Iskut, Cake leh balhla te hi pumpui panin a haw lo.

            Zu, Coffee, mei zuk, mosola, hmarcha, soda, Coca cola leh thil mawmte hian pumpui pan a ti zual thei.

            Bawnghnute hi pumpui lawng, pan leh thin thip tan damdawi tha berte zinga mi a ni.

(Source Hriselna Magazine February 2011)

BIBLE QIUZ NO. 23

II LALTE BUNG 11-15

A Kâr âwl dah khat rawh :

Q1. Tin, ani chu amah nen chuan lalap inah kum ruk an biru a, tichuan Athali inah kumruk an biru a, tichuan ..........................chuan chu ramah chuan ro a tel ta a.

Q2. Amaherawhchu hmun sângte zawng thehthang bo a ni chuang lo; hmun sângahte chuan mite chu an la inthawiin ........................... an la hal reng thin.

Q3. Tin, LALPA thin chu Israelte chungah chuan a alh a, tichuan Suria lal Hazaela kutah leh ....................... fapa Benhadada kutah chuan a pe ta zel a.

Q4. Amaherawhchu hmun sângte zawng thehthang bo ani chuang lo; ............................ sângahte chuan mite chu an la inthawiin, rimti an la hal reng thin.

Q5. Tin, a pa Amazia thiltih ang apiang ti vein, ...................... mithmuha thil tha tak a ti thin a.

A bung leh Châng dah rawh :

Q1. Tin, in zinga pâwl hnih, chawlhnia tin, tûr zawng zawngte chuan lal kiang vêlah LALPA in chu in veng ang a.

Bung: ...............          Chang: ....................

Q2. Tin, puithiamte chuan mite hnên ata tangka lak tawh loh leh, in hhe laite siamtu nih loh chu an remti a.

Bung: ................         Chang: ....................

Q3. Tin, Jehoahaza chu a pi leh pute hnênah a muhil ta a; tin, Samari khuaah an phûm a; tin, a fapa Joasa chu a aiawhin a lal ta a.

Bung: ................         Chang: ...................

Q4. Nang hian Edom-ho chu i hneh ngei tak a, i rilru a lo chapo ta a nih h; i chapo kha tawngpui hle hle mai rawh; nang leh Juda ram chawp chawp achhiatna, i tana tha lo tûr thil eng atân gne i cho chhuah dâwn ni?” tiin mi a tir ve a.

Bung: ................         Chang: ...................

Hming : ......................................................

Section : .....................................................

BIBLE QUIZ  NO. 22 RESULT

Chhanna lut zawng zawng              : 2

Chhang dik vek                                : 2

Lawmman dawngtu              : Lalrempuia(T.Sec)

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni.

PAVALAI INKHAWM PROGRAMME

A hun  : 7. 6. 2012(Ningani)

A hmun: Pu C.Ramliana (L) te In

Chairman: Pu V.L Zidinga Sailo

Tantu : Pu Vanlalfela

Hun Hman dan: Meet report leh hla zir a hun hman tur a ni ang.

HRIATTIRNA

            Keini Upa R.Lianzinga Group te chuan sumtuak nan vengchhungah Euro 2012 Squad list, fixture leh player te bihchianna bu kan rawn zuar dawn a. Vengchhung mipui te tlawmngaia min lo dawr theuh turin kan ngen che u a ni. A man hi `30 a ni ang.

Sd/-

(R.ZODINSANGA)

Secretary

Upa R.Lianzinga Group

ZUN LEH THSEN TEST THEIH

Engtik lai pawhin zun, ek, khak  leh thisen kan test thei reng e.

Contact:-

J. Lalngaihawmi- 9612307387

R. Vanlalpeki - 9862132852

LAWMTHU  SAWINA

            Kan pa duhtak Pu Lalremruata’n min lo boralsan tak avanga min lainattu zawng zawngte leh a damloh laia min buaipuitute zawng zawng chungah lawmthu ka sawi tak meuh meuh a. A bik takin Pi Hrangthangvungi chhungkua in an in leh a chhehvel a tul ang anga min hman tir naah leh an tuite phal taka min hmantir avangin lawmthu kan sawi tak meuh meuh a ni. Mitin hnenah lawmthu kan sawi seng lova hei hi lawmthu sawina a min pawmsak turin ka ngen  bawk che u a ni.

In khawngaihna dawngtu

Pi Lalhmangaihsangi (Te-i)

kohhran hmeichhePROGRAMME

A hun :5. 6. 2012 (Thawhleh zan)

Chairman : Pi Ropari (Ruthi Group)

Tantu : Pi K.Lalhmingliani (Hani Group)

Ramthim zina hun hman tur a ni ang.

EVANGILICAL  MEET HMANG MEK

            Hlimen Kohhran Biak Inah Hlimen Pastor Bial KTP chuan Evangilical Meet a hmang mek a, Thupuiah ‘Lal Isua a lokal leh dawn’ tih a ni a, Thupui sawitu atan hian CKTP Leader Rev Lalrinmawia a ni. Zanin hian a tiak dawn ang. Tin, vawiin chawhma inkhawmah hian kan kohhran zaipawl te chuan Pathian fakna hla an rem dawn bawk a ni.

Vawiin programme:-

Chawhma inkhawm.

Hruaitu: Pastor G.Chhunthuama

Zaipawl: Saikhamakawn kohhran

Speaker: Rev. Lalrinmawia (Leader CKTP)

Thupui: “Lal Isua a lo kal leh dawn”

Chawhnu inkhawm.

Hruaitu: T.Upa Lallianzama

Zaipawl: Damveng kohhran

Speaker: Rev. Lalrinmawia (Leader CKTP)

Thupui: “Lal Isua a lo kal leh dawn”

Zan inkhawm.

Hruaitu: Pu R.Lalhmunsiama

Zaipawl: Melthum kohhran & Bial zaipawl

Speaker: Rev. Lalrinmawia (Leader CKTP)

Thupui: “Lal Isua a lo kal leh dawn”

Zan Inkhawmban zaikhawmpui

A hmun: Biak In hnuai

Hruaitu: Pu Biaknghinglova

TUALCHHUNG

,Pu Jordyneff Zoremsanga s/o Pu Zirsanliana chuan UD&PA ah hna a hmu thar.

,Pi Khawlvuani h/o T.Upa Sangzuala chu damlohna avangin Greenwood hospitalah enkawl mek a ni.

VAWK  LEI  DUH

            Vawk hralh duh in awm chuan engtiklai pawhin ka leisak thei reng a che u. A  man pawh ka pe nghal zel bawk e.

Pu C. Lalremruata (Mafela)

Contact No. 9862817055

ZAIPAWL  MEMBER TE HRIATTIRNA

            Saikhamakawn Kohhran zaipawl member zawng zawngte tukin zing dar 9:00 am ah Bial KTP meet a hla rem tur ennawn tur a ni a. Dar 9:15am ah biakin kawt atangin bus a chhuah tur a ni e. Member ten i ngaipawimawh theuh ang u.

CHATUAN  RAM  LAMAH

            Pu Lalremruata (24) chuan ni 30.5.2012 (Nilai) zan khan natna leh hreawmna awm tawh lohna chatuan ram min lo pansan ta a, a kalsan tak a nupui fanaute leh a chhungkhat lainate Mipui Aw editorial Board chuan kan tawrhpui takzet a, Pathian thlamuanna leh awmpuina a chan zel kan duhsakin; chu chu an tan kan tawngtaina pawh a ni e.

THU  ROTLI NG

* Khawvel hi suangtuah tu tan chuan thawnthu nuihzat thlak tak ang a ni a, thinlunga tuartu tan chuan thawnthu lungchhiat tak ang a ni thung.            

-Horace Wolpole

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300