Mipui Aw 1.7.2012

MIPUI AW

Vol. XVIII Issue No. 27 Kristian Thalai  Pawl  Saikhamakawn Branch  Pathianni Dt.1.7.2012

VAWIN  CHANGVAWN

Tin, an hnenah, “Buh seng tur a tamhle a, nimahsela a thawktute an tlem; chutichuan a buh seng tura thawktu turte tir turin buh Neitupa hnenah chuan ngen rawh u.

KOHHRAN PROGRAMME

            Vawin hi Health Sunday a ni a, chawhnu atangin Health Sunday puala hun hman tur a ni a, zanah inkhawmah hemi pual hian thilpek lakkhawm tur a ni ang.

            1. 7. 2012 (Pathianni)

Chawhma S.S inkhawm

Tantu          : Pi Tlanglawmi

Chawhnu

Thupui        :  Mit enkawl dan

Thusawitu  : Upa Lalzuiliana

Zan Inkhawm

Thupui     : Khawvel dam nan Lal  Isua

Thusawitu  : Upa R. Lalngena

KTP PROGRAMME

 Dt. 2. 7. 12 (Thawhtan zan)

Hruaitu         : Pu C. Lalremruata

Tantu             : Tv. V. Lalsangzuala

Short              : Nl. Lalhmunsiami

Sermom         : Tv.C.Lallawmzuala

Thilpek lakh : Nl.J.Zothankimi

awmtu turte : Nl. K. Lalawmpuii

            July thla chhunga Inkhawm leh Fellowship zai hruaitu leh musician turte.

Hla hruaitu   : Pu R. Lalmuanpuia

turte                 Pu Jeff Lalhmingsanga

Musician       :Upa Lallawmchhunga

                          Tv. Malsawmzuala

VAWIIN  TLAI   FELLOWSHIP

Hruaitu                     :Tv. Pc. Vanlalhriatpuia

Tantu             : Tv.Lalhriatpuia s/o                                                  KC.Khaia

KOHHRAN  HMEICHHE PROGRAMME

 Dt. 3. 7. 12  Ramthin Zin

A hmun          : S.S Hall

Hruaitu         : Pi Rimawii

Tantu          : Pi Vanlalbiaki

SERMON

KA THLARAU ZAWKIN LE

Jakaria 4:6

Falte-a.

            Juda te chu an sal tanna Babulon atangin Jerusalemah 538 BC ah an kir leh a. Babulon hovin 598 BC-a an tihchhiat tak temple thlakna tur Temple thar lungphum pawh an phum nghal mai a. Mahse, 520BC-ah Temple sak chu an chhunzawn thei ta lo a ni. Temple sak that hi engvanginnge chuti taka pawimawh a nih? A pawimawh chhan chu Pathian biakna hmun pui ber a nih dawn avang leh Pathian mi an rama kir lehte chunga Pathian malsawmna thar lo thleng tur chhihchiahna anih dawn vang a ni. Hetih hun lai kum 520 BC velah chuan Larsap Zerubabela chu Babullon saltang kir lehte tan Jerusalem leh Temple tungding turin Persia lal Daria khan a ruat a. Engtinnge bul a tan anga, eng hmanginnge, engtikawnginnge? a thawh ang tih a ngaihtuah nasa hle ang. A chhan chu hnam ropui tak takte, thlang lamah Aigupta chhak lamah Kaldai Babulon, hmar lamah Assuria leh Persia-te kara hnam te takte awm ve mai an ni a. Chubakah chutih hunlai leh tun thleng pawha ram leh hnam chakna hnar ber sipai rual an nei ve si lo. Tah chuan zawlnei Zakaria hnenah Pathian thu alo thleng ta, “Chakna nilovin thil tihtheihna ni lovin ka thlarau zawkin le” tiin. Ram leh khawpui tungding turin lang theia chakna leh thiltihtheihna zawng zawng aiin Pathian thlarau hruaina a pawimawh zawk tih chu Pasthian thu a lo ni ta.

            Awle, Kohhran hote Pathian ram zauhna kawngahte kohhran rawng bawlna peng hrang hrangahte hma nasa takin kan sawn a, a ropui hle a ni. Amaherawhchu kan khawtlang dinhmun kohhran chhungkua ngei pawh zah zo lova hmelmapa in tan a lak nachhan hi engvangnge? tih hi rawngbawltute tan zawhna pawimawh tak a ni. Tunlaiah chuanTemple tundin leh hranpa a ngai lova, kan thinlung chhungril bera Pa chibai kan buk nate, thlarau leh tihtakzeta fak leh chawimawinate, fianriala Lalpa pawlna nunte hi kan tundin a siamthat ngai lai tak a ni tih tunlai ringtu nun hian a tilang chiang hle a ni. Heng tungding tur chuan Judate hnam ropui tak takin a hual vel khup ang khan tunlai hunah min dip theitu thil tam tak a lo awm ta. Damchhung khawsak ngaihtuah luatnate, abikin thalaite tan kan khawvelchangkan nate hi min daltu lian tak a lo ni ta. Mahse kan tih a ngai miau si a. Hemi kawng zawh tur chuan Pathian aw, thlarau aw, Eliza’n Horeb tlang puka Lalpa aw dam diai a hriat ang kha hriat ve kan mamawh ta. Engtinnge kan hriat tak ang le. Kum 1940 chho vela mihlim nu pakhat chuan

heti hian a sawi a, “Sawma, vawiin ka thil hmuh chu ho i ti maithei a. Losul haw hma deuhin kan vauah lungpui tlawhchhanin ka fianrial a. Ka han men chuan  lungpuia hrui zam hnah zawng zawng chuan min lo en thuap mai a, ka zak deuh a, ‘Aw, in va zahawm tak em! Halleluiah’ tiin hreh deuh chungin ka haw san ta ni” tiin. Pa pakhat pawhin, “Ka vau-a luite ka kan laiin lui tuite chu hlim taka zaiin an lam del del niin ka hmu a, lui tui ka’n kan a; tumbu vui ka hmu a, lak tuma kan kit chu a tlu ri chuan ‘Halleluia’ ti hian ka hria a” tiin a sawi a. Heng hi thil hote niin kan ngai mai thei a, mahse a ho lova, Pathian lama thlarau mit meng leh thinlung varte tan engpawh mai hi thlarau aw lo chhuahna a chang thei thin.

            Mihring tupawh hian zir tan nih hi kan duh lova, mahse kan dam chhung hian zir tan nih mai loh chu engdangmah kan ni thei chuang lo tih i pawm ang u. Chuvangchuan Pathian aw hre turin inbuatsaih ila, chumi tur chuan Pathian thuril pui pui hriatte, mihlim kan tih ang leh thlarau mi kan tih ang chi va nih kher a ngai lo, kohhran ruala ke kan pen zel a; Pathian thu kan hriatsate awih thar mai hi kan mamawh ber chu a ni zawk e. Chu chu a thlarauva, thlarau mi nihna alo ni zawk a ni.

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

                        FIMKHURNA

            Kan hriat tlan theuh angin kan veng kawngpui a lo tha ta hle a, tunhma te ngaihtuah chuan lei leh van ang mai a ni ta. Lirthei a bik takin two wheeler te tan phei chuan chak tak taka tlan a nuam bawk ni tur a ni, tlan chak luat tuk vanga chetsualna thleng sawi tur a tam ta malh malh khawp mai.Tlanmuang tura in ngenna te han tar ve bawk thin mah ila kan in khap seng lo nasa mai si a, chuvang in khawtual mite tal hi chuan fimkhurna lamah tan kan lak nasat a ngai khawp mai.

            Veng pawn lam mite chu kan thunun thei lo pawh a ni mahna, vengchhunga lirthei khalhtu te tal hi chuan chak tak tak a thlan ching lo hram ila. Mahni himna a pawimawh mai piahlamah kawngsira kal te himna pawh ngaituah tel ila, neihthinglungkhawng a kan lei kan lirthei te chu thuhran nise,   kan nunna hlu tak; suma lei theih loh hi kan chan mai ang tih a hlauhawm takzet.

            “Thlen theihloh ai chuan tlai a tha zawk” tih a nih kha.......  

ARTICLE

PHAITUALHNIM CHUNGAH NGEI SPORT ANG AW!!

                                                                                   Mawitei pa

            Kum 2003 a AR Lammuala National Under 16 a Mizoram kan Champion tuma ‘Khel mual tha’ tia au zingah khan kawrsen ngat ha chungin ka tel ve a, chu khelmual tha; an sawi phaitualhnim siam chawp chungah ngei chuan inkhelhna hun remchang Saikhamakawn KTP member te tan a rawn inhawng ta hi a va ropui em!  AR Lammuala mipui au rual laia khuangpu Upa Lawmchhunga pawh a lawm ve ngei ka ring!

            Ni e! Cable TV in min luh chilh hma khan Bangladesh TV velah World Cup etc.  grass chunga inkhel kan en ve zeuh zeuh a, Cable TV in min luhchilh hnuah ram hrang hrang league etc. duh tawkin kan en ve thei ta a, he hnamin Football kan atchilh zia leh kan tui pui zia hrechiangte tan chuan rual awh a na ngawih ngawih thin reng a ni. Footbal lama kan mi lar hmasa rual, kan Football star, mahni home chirhdiak kara in buatsaiha, phairam grass chunga kan State ti hmingtha thin tute khan, mahni home-ah, phaitualhnim chungah ngei hian duhtawka tal an va chak dawn em ka ti thin! Chung mi, keini aia inkhelh thiam zawk ten an khelh phak lohna stadium a inkhelh theihna chance kan nei hi KTP member tan chuan bawhpelh chi a ni dawn em ni?

            KTP ten Sport kan lo nei fo tawh thin, a changin kan veng field-ah, a changin hmundangah, rawngbawlna pakhat a ni tih hriain theihtawp kan lo chhuah tawh thin. Tunah, tute mahin duh hun huna an hman theih lo Rajiv Gandhi Stadium-ah, phaitualhnim chungah ngei Sport kan nei thei dawn ta! AR Lammual leh Rajiv Gandhi Stadium hi la sak zawh loh, hna kalpui lai mek a ni, an zawh fel hunah tun ang hian Football khel tura pawl din pawh nilo, KTP te tan hian Sport theihna hun remchang a inhawng leh ang em? Kei chuan an sak zawh meuh chuan tun ang hian an phalrai ka ring tawh lo, chuvangin, Football hi kea pet tur a ni tih hre chin tawh chu tel vek ila kan inchhir lo tawp ang.

            He Sport a tel tur hian hmel chhiat leh that lam a ni lo, sum leh pai ngah leh ngah loh lam a  ni lo, pa len leh pa tet pawh a ni lo, KTP member i nih chuan a tawk der, mi pen hnih pen, pen thuma i hmang thin a nih pawhin pawi ti suh, an ni aiin phaitualhnim i dai tam zawk dawn a ni mai. KTP member ni chung hian tamtak chuan Inkhawm, Fellowship, Hla zir, hnatlang etc. ahte kan lang ngai lo khawp mai, mahse, chung mite tan hlei hlei chuan he Sport hi a pawimawh tlat! KTP thiltihna danga lang thei lo member tan he Sport hi KTP activities a kan lan ve theihna a ni. Inthlahrungna chi a ni lova, KTP thiltihnaa ka tel ve theih na remchang ani tiin tim miah lovin rawn chhuak pawp rawh, tute pawhin an lo lawm ang che.

            A tawp nan, khawnge Saikhamakawn tana diak ka dai pui thin, Venghnuai field etc. ah te kerek pil hmawk hmawk khawp a he Saikhawpui tana ball leh chirh ka lo pet pui thinte kha in awm tak le? Kan goal vengtu Sanghnuna  mita chirh lut phei kha chu mita chirh lut ka hmuhah a la tam ber! Khang ho nena phaitualhnim chungah ngei ball pet ho leh a va chakawm ve. KTP in lo over tawh anih pawhin Pavalai ho an rawn tel dawn tho a nia, hetah tal hian rawn in lan teh u!

            KTP member i ni duh em? Duh e, tih china kumtluan hmang chhunzawm thin te, theihtawp chhuaha pen chhunzawm thinte, kan zavaia tan Lalpan Sport na hun remchang min siamsakah hian, hawh u! tumah in kiltawih lovin i tel vek ang u. Kei chu Lalpan rem a ti a, damtea min awm tir anih phawt chuan phaitualhnim chungah hian ball ka va pet ve dawn chiang rua em!!

           

           

HRISELNA HUANG

            ELAICHI

Damdawia hman theihte: A mu.

Damdawia hmannate: Alaichi nu naupai tan erawh chuan ei tam a hlauhawmin nau tlakna hial pawh a thlen thei.

Lung tha lo: A mu leh thing hmarcha sei chi (long pepper) 1gms ve ve densawm pawlha bawnghnute ghee thirfiante khat nen ei thin tur.

Lu hai: A mu densawm 10gms leh palm candy (tum thing atanga kurtai siam) 25gms chawhpawlha tui 150ml-in mei na vak lovah 5mins chhum hnuin a chhumna tui in tur a ni.

Thia luak: A mu rawt dip leh thakthing pil densawm chhumna tui hrawk thuah nana hman a tha.

Hmeichhe serh atanga thil var chhuak: A mu rawt dip 1gm leh butter thifiante khat chawhpawlha ni 15 chhung nitin vawi 3 zelin ei tur.

Zung thei lo, zung harsat: A mu 1gm leh mai mu 2gms densawma khawizu thirfiante khat nen ni 3 chhung nitin zing leh tlaiah ei tur a ni.

Mit tha lo: A mu densawm 1gm, bawnghnute ghee thirfiante khat chawhpawlha ni 15 chhung nitin vawi 1 ei thin tur.

Taksa chaklo, thil ei tui lo, chaw pai nuam lo: A mu rawt dip 1gm leh khawizu thirfiante khat chawhpawlha ni 1ah vawi 3 ei tur.

Taksa lum dan a thunun: Alaichi hian taksa lum dan a thunun thei a, ka rimchhia tihreh nan a tha bawk. Zunkawng thalo leh thin tha lo tan pawh tha tak a ni.

Zung thei lo: A mu densawm 1gm leh brandy emaw whisky emaw 30ml chawhpawlha in tur, vawi 1 inin a dam hmiah thei.

Zun nei tlem lutuk: A mu rawt sawm 1gm thingpui no khatah pawlha in a tha.

Luakchhuak, pumpui chak lo, thil ei tui lo: A mu densawm 1/2gm leh khawizu thirfiaante khat chawhpawlha ni 1ah vawi 3 ei tur. (emaw)

A mu densawm 1/2gm leh coconut rah chhunga tui no khat chawhpawlha in a tha.

Awmna: A mu rawt dip leh khawizu chawhpawlh tlemte ei a tha.

Taksa chau: A mu densawm thirfiante khat, tui no 2 in mei na vak lovah a tui chanve a so kang thlengin chhumna tui leh kurtai chawhpawlh in a tha.

Nau neih zawh hlima taksa chaklo: A mu densawm chhumna tui in tur, naupai lai erawh chuan in hauh loh tur a ni.

BIBLE QIUZ NO. 27

I chronicles BUNG 1-5

A Kâr âwl dah khat rawh :

Q1.Japhetha fapate chu Gomera te, Magoga te, Madaia te, Javana te, Tubala te, Meseka te, ................................. te an ni.

Q2.Tin, Zera fapate chu Zimria te, Ethana te, Hemana te, Kalkola te, Dara te an ni: an vaiin ................................. an ni.

Q3. Tin, Jerusalem khuaa a hrinte chu Simea te, Sobaba te, Nathana te, Solomona te an ni a; an pali chuan .................................... fanu Bath-sui laka mi an ni:

Q4.Tin, Nari chuan Ahuzama te, Hephera te, Temenia te, Hahastaria te a hrinsak a. Chungte chu .............................. fapate an ni.

Q5.chu mi fapa chu Beera, Assuria lal Tilgathpileseran sala a hruai chu a ni: ani chu Reuben-ho mi ........................ a ni.

A bung leh Châng dah rawh :

Q1.Tin, Kusa fapate chu Seba te, Havila te, Sabta te, Raama te, Sabteka te an ni. Tin, Raama fapate chu Seba te, Dedana te an ni.

Bung: ...............          Chang: ....................

Q2.Tin, Raman Aminadaba ahring a; tin, Aminadaban Juda thlah mi lian Nasona a hring a;

Bung: ................         Chang: ....................

Q3.chu mi fapa chu Jorama a ni a, chu mi fapa chu Ahazia a ni a, chu mi fapa chu Joasa ani a;

Bung: ................         Chang: ...................

Q4.Tin, Estona chuan Beth-rapha te, Pasea te, Ir-nahasa pa Tehina te a hring a. Chungte chu Reka-hote an ni.

Bung: ................         Chang: ....................

Q5.an chhûng te, an unau Mikaila te, Mesulama te, Seba te, Joraia te, Jakana te, Zia te, Ebera te nen pasarih an ni.

Bung: ................         Chang: ....................

Hming : ......................................................

Section : .....................................................

BIBLE QUIZ  NO. 26 RESULT

Chhanna lut zawng zawng              : 4

Chhang dik vek                                : 4

Lawmman dawngtu              : C.Lalremkima (T.Sec)

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni

TANKY HRALH DUH

            Tanky (Zoplast) 2,000ltrs chu dahna tur hmun a awm loh avangin ` 7,000/- chauhin ka hralh phal e.

J.Vanlalhruaia

9463963623

BRANCH SPORT HRIATTIRNA

            Ni 7.7.2012 (Inrinni) a Rajiv Gandhi Stadium Mualpui a Branch Sport neih tura hriattur pawimawhte:

1. Mipa Football-ah Group tin atangin team 2 (A&B), hmeichhe Football-ah Group tin atangin team 1 in ruat tur a ni.

2. Mipa Football-ah players 11 a khelh tur, substitution bithliah a awm lo, hmeichhia in players 15 a khelh tur, substitution bithliah a awm lo.

3. Mipa Football-ah players pakhatin team pakhat aia tamah khelh theih a ni lo (Hei hian Branch Committee a huam lovang)

4. Inkhelh hun chhung mipa 15+5+15 minutes, hmeichhia 10+5+10 minutes a ni anga, inhnehtawk chu hun pek belh awm lovin Penalty Shootout hmanag chak zawk zawn a ni ang. Inkhelh hun chhung hi a tul anga tihdanglam theih a ni.

5. Mipa leh hmeichhe inkhelh a official tur Group tin atangin Referee pakhat, Linesmen 2 theuh in ruat tur, chinchang hria leh rintlak ngei ruat tur a ni.

6. Relay Race a tlan tur Group tin atangin mipa leh hmeichhia 4 theuh, 100mtrs. race a tlan tur Group tin atangin mipa leh hmeichhia 3 theuh ruat tur a ni.

7. Ei leh in Group/mimal in tum tur, Branch in a tum lo vang.

8. Branch in Jersey a hawh anga, a hawh man erawh a hmangtu Group ten an tum ang.

9. Group tinin Group Flag ken tur.

10. Stadium hi zing dar 10 atanga tlai dar 3:30 thleng chauh hman theih a nih dawn avangin tan hun dar 10:00 am ah thlen hman vek tur a ni.

TUALCHHUNG

,Tv. David Vanlalruata s/o Thangluaia (Ch.sec) chu accident avangin Civil Hospital ah enkawl mek a ni.

,Tv.Vanlalhmuaka s/o Lalthlamuana (T.sec)chu accident avangin Civil Hospital ah enkawl mek a ni

,Lalsiamliana s/o Zothanpuii (V.sec) chu damlohna avangin Civil Hospital-ah enkawl a nih hnuin a lo chhuak.

,Pu Zisangliana w/o Zochhuanpuii (V.sec) chuan khawi ilo vah vel nan Bike (Karizma ZMR) an lei thar.

,Pu Lalnithanga w/o ZLalramthari (V.sec) chuan khawi ilo vah vel nan Bike (Apache 180) an lei thar.

,Pu Tommy Zirnuntlanga s/o M.S.Dawngkima (V.sec)chu accident avangin Civil Hospital ah enkawl mek a ni

KTP  SPORTS  NEI  DAWN

            Ni.7.7.2012 (Inrinni) khian Saikhamakawn K.T.P chuan Branch Sports Rajiv Gandhi Stadium Mualpuiah ah neih a ni dawn a. Zing dar 9 ah chhuah tur a ni. KTP member-te a tam thei ang ber kal turin kan inhriattir a ni e.

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300

Mipui Aw 24.06.2012

MIPUI AW

Vol. XVIII Issue No. 26 Kristian Thalai  Pawl  Saikhamakawn Branch  Pathianni Dt.24.6.2012

VAWIN  CHANGVAWN

Tin, an hnenah, “Buh seng tur a tamhle a, nimahsela a thawktute an tlem; chutichuan a buh seng tura thawktu turte tir turin buh Neitupa hnenah chuan ngen rawh u.

KOHHRAN PROGRAMME

24. 6. 2012 (Pathianni)

Chawhma S.S inkhawm

Tantu          : Pi Lalrinengi

Chawhnu

Thusawitu  : Upa Lalzuiliana

Zan Inkhawm

Thusawitu  : Upa Lallawmchhunga

KTP PROGRAMME

 Dt. 25. 6. 12 (Thawhtan zan)

Hruaitu         : Nl. Lalramnghaki

Tantu             : Nl.F.Lalrintluangi

Sermom         : Pu C.Lalnunsanga

Thilpek lakh : Nl.C.Zodintluangi

awmtu turte : Nl. Vanlaltlani

            June thla chhunga Inkhawm leh Fellowship zai hruaitu leh musician turte.

Hla hruaitu   : Pu Lalchhandama

turte                 Tv. Malsawmzuala

Musician       :Pu Lalremruata

                          Tv. R.Lalzamlova

VAWIIN  TLAI   FELLOWSHIP

Hruaitu                     :Tv. R.Lalzamlova

Tantu             : Tv.Lalrinpuia

KOHHRAN  HMEICHHE PROGRAMME

 Dt. 26. 6. 12 (Thawhleh zan)

Hruaitu         : Pi Lalrinngheti

Tantu             : Pi Laldawngliani

Thusawitu     : Pi Lalhmangaihi      

SERMON

PA  HNEN  THLENNA  KAWNG

          “Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo.  (Joh  14:6)

          Miring hi han in bih chiang ta ila, fel leh tha in tihna hian kan khat a, Mahni chu tha viau in kan in hmu a, midang chu tha lo deuh in kan hmu a. Mahni tihsual chu awm takin kan hmu a, mi dang tihsual chu khawngaih taka ruanga rel zui mai thin mihring kan ni. Kei chu ka sual em mai kan in ti a, ni e, I sual a lawm min tih chuan ngai thei leh miah lo mihring kan ni tlat. Zuruih hmang te, help ruk hmangte, fel lo taka thil tu te hian Pa hnen hi thlen kan tum vek mai. A ni hi vanram a kai chuan ka kai awm em mai kan ti thin. Ngun takin in ngaihtuah ila, Pa hnen vanram kan kal leh kal loh chu roreltu thu a ni a. Ni hnuhnung ah chuan Rorel  sakin kan la awm dawn. Thu kan nei lo.

            Mi fel leh tha ni a in hriatna hi Lalpa hma ah hian a lo ten awm khawp mai. Mi fel tak nih inringa, mi dang zawng zawng hmusit thin tute emaw hnena mi pahnih Pathian biak ina tawngtai tura an kal a tehkhin atang khan kan hmu thei ang( Luka 18:14) Pathianin ka mifel Joba, a tih ngei pawh khan a felna kha sim a lo ngai  reng mai, Pathian hmaah hian kan felna ber pawh pawn chhe hnang khai ang mai a lo ni e.

            Pa hnen thleng tur chuan thianghlim a ngai si, Keini chu kan thianghlim si lo, kan ngaihtuah na zawng zawng te chu sualna hlir mai a ni a, thinlunga thianghlim te chauhin Pathian an la hmu dawn si (Mt.5:8). Chuvangin mi zawng zawng nena inremna leh thianghlimna kan um a tul, chu mi thianghlimna lovin tuman Lalpa an hmu lo vang. ( Heb 12:14).

            Thianghlimna leh fel famkimna reng reng kan neih loh avangin, kan thianghlimna leh kan fel famkimna atan sualna reng reng neilo, Van Angel ten an fak nin theih loh mi fel famkim Lal Isua Krista chuan kan famkimnante, A thisena thiam kan chan nan leh Pa hnen kan thlen theih nan kan tawrh ai Kross ah min lo tawrh sak ta. Krista thlangtute hnenah Pathian Khawngaihna chu a thlawna pek kan lo ni a, Krista nun tawmpui tu apiangte hnen ah Pathian Thlarau thianghlim hnathawh a lo thleng a, a lo thleng zel ang. Lal Isua Krista a awm reng mi te chuan khawvel sual an kal san thin a, thutak ah an awm a, chatuan nunna an lo nei thin.  Lal Isua Krista a awm hi Pa hnen thlenna a ni.

            Mahni ta pawh kan ni tawh lova man a lei kan nih tawh a, chuvang chuan kan taksa hian Pathian chawimawi ila, Lal Isua hniak hnung hi zui mai ila, chu chu Pa hnen kan thlenna kawng a lo ni e. Amen.

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

            Pathian hruaina leh awmpuina in kumin 2012 kum chanve chu kan lo chuangkai leh ta reng mai. Chhungkaw thenkhat te chuan harsatna leh manganna, lungngaihna vawrtawp pawh kan tawk ngei ang. Mahsela tun thlenga dam taka Pathianin min hruai hi a lawmawm takzet a, Pathian hnenah lawmthu i sawi mawlh mawlh ang u.

            Kan nitin hnathawhna kawng hrang hrangah tun aia taima leh phur taka ke kan pen a, tan kan lak thar sauh sauh a pawimawh hle. Tin, harsatna pehhlel leh pumpelh zawnga rilru hmang lova kan hnathawh leh kan hmabak theuh a hlawhtlinna hmu ngei turin huaisenna nen tan i la thar zawk ang u.

            Tin, tunlaiin khua a cheng in, ruahtui a tlak  reng bawk avang hian kan thli leh tuichhe paihna thlengin kan thenawmte tan hnawksak leh ram tichhe zawnga awm mai a hlauhawm ta, chutiang thleng lo tura inbuatsaih a ngai hle bawk awm e. Thenawm te tana hnawksak ni hi thil har a ni lem lo, i fimkhur tlang ang u.

            Kohhran hrang hrang te pawhin mahni kohhran theuhah Thlarauthianghlim hnathawh a lo thlen theih nan tan lak a; thahnemngai taka Pathian kan dawr a tul tak zet a ni. Khawtlanga sualna lo pung zel leh he Zoram ngei pawh sual vanga kan rum na zawng zawng hi Pathian atang lo chuan a dam zo tawh si lo. Kohhran hote i harh ang u.

ARTICLE

KUM  9 1  KA  TLING  VE  TA....

                                                                                    Pc. Hriata

            Min hmangaihtu nu leh pa te thlazar hnuaiah hlim tak leh thlamuang taka ka awm lai te, lungkham reng nei lo a, zing thawh hlim atanga tlai ni tlak thlenga hun ka hman lai ni te kha a va rei ta em. Hun leh kum te a lo vei zel a, rawlthar nun duhawm tak ka hman lai ni te ka ngaihtuah chang phei chuan lung a lengin khua a har hle mai. Vanglai tha; duhzawng leh chakzawng duh duh a ka tih theih hun lai te ka ngaihtuah chhuah chang phei chuan tar chaklo tha hi ka lo hrethiam ngai reng reng lo kha a ni a, mahsela han tawn hriat meuh chuan mahni inchhung dungah ngei pawh duh thalin kan chhe thei lo tih hi pawm lo chi rual a ni lo. Fanau te chawm thin tu hetiang taka chaklo leh chawmhlawm mai han nih tak chu hreawm tih chang pawh a awm dawn dawn mai thin nia mawle.

            Ka thatlai leh ka vanglaia ka thiante zawng zawng pawhin mual min liamsan ta bawk si nen. Khua hi a va har thin tak em. Rual pawl tura ka kal hlat theih ber hmun lah kan kawngkapui pawh a thleng phak tawh si lo. Tukverh leh kawngkapui atanga mi kal ka va hmuh te chu ka rualpawl theih chin tawk a ni tawh si. Ka sawi tak ang khan ka rilru hahna leh ka duhzawng han sawipui tur ka thian tha ten mual min liamsan tawh avangin pawn lama vakchhuak theih pawh han ni tehreng ila; riakmaw ianga vai mai tur ka ni tih ka chiang hle tho mai.

            Nimahsela kum upat lama Pathian malsawmna ropui tak ka dawn chu sawi hmaih atan ka phal lo. Pathianin nupui tha tak min pe a, ka khawhar tur ata te, damlo a ka theihloh chang ten duat taka min enkawl a, kei ngei pawhin theihtawpa enkawl chu ka tihtur a ni tih chiang takin ka hria. Pathianin hmangaihna mihring tea a lo dah hi kum upat hnu hlei hlei hian a lo va hlu em. Tin, tu leh fa tha tak Pathianin min pek hi thilpek a zawngah chuan a va hlu tehlul ngai em! Damloh hreawm ka tawh laite, tenawm khawpa buaipui ngaia kan nupa a kan awm lai te hian, fa duat takin min duat a, ten na hmel pu miah lova min buaipui te hi a va nuam em. Fanau rochan Lapan min pek avang hian Pathian hnenah lawmthu sawi ka va ba nasa tehlul em. Kawng lehlamah chuan ka upat pui tuna malsawmna ka dawn ang dawng ve pha lo a, hreawm taka awm mek te ka ngaihtuah chang chuan; an tu leh fa te zilh sak a, nausen an nihlai a an nu leh pa ten an enkawl nasat zia te, tun dinhmun an thlen theih nana an thawh nasat zia te talhfiak nena hril mawlh mawlh ka chak thin. Mahse chumi ti thei chuan ka awm chakna ka nei tawh si lo. Ka nupui duh tak nena kawvel chhuahsan kan hreh nachhan ber chu kan tu leh fa ten min duat na hi keini nupa chuan kan thlahlel em a, nuam hi kan ti em vang chauh a ni. Chuti ni suh sela chuan he khawvel chhuahsana min hmangaihtu Lalpa hnena chawlh veng veng chu a chakawm hle si a.

                        Mi zawng zawngin kan hmabak chu tar hun hi a ni a, kei ngei pawhin ka hmabak a ni tih ka chiang. Kan han sawi tak tar dinhmun khi kan luah hunah chuan kan sawilan tak  ai khian i chiang tawh ngei ang. Chuvangchuan kan nu leh pa, pi leh pu te duat taka enkaw hi kan tihtur a ni a. Kum 81 ka tling ve ta i tih hunah i tu leh fa te atangin engtiang engkawlna nge dawn i inbeisei le?...

KHAWIAH PAWH  NI  CHHUAHNA  APIANGAH

            He hla hi Isaac Watts-a phuah a ni a. Amah hi Newington Green veng, London khaw hmar lam hmawra hmun reh nuam taka awm a ni a; chutah chuan kum 1748 khan a thi a, a lim chu Westminster Abbey Biak Inpuiah a awm a, a hla erawh chu khawvel pumin an nei ta a nihj hi. Amah hi van sang leh tuipui leh leilung awmphung chik mi a ni.

            ‘Khawiah pawh ni chhuahna apiangah’ tih hla hi Sam 75-na atanga siam a ni. Missionarry tirh hma hian hmasang pi leh pu khualzinho ‘Pilgrim Father’ an tihten America pana lawnga an kal laiin Chanchin Tha theh darhna rilru an pu hle a. Missionary tak tak ni mah suh se chutih laia an phuahna rilru chu thil tih Missionary tirh chhuah lai nen hla khatah a kal thei zel bawk a ni.

           

            Lalnu Elizabeth-i lal lukhum khumtir ni khan Tonga thliarkar Lalnu, Saloti chibai rawn buk vena thu chang chuan he hla thu ropuizia hi a tilang hle a ni. Hmanlaiin Tonga atangin Fiji thliarkarah thu an rawn thawn a. Tonga-hovin mingoho sakhaw hriat an duh ve zia an rawn sawi chuan Bible leh missionary an lo lut ta nghal a, rei lo teah chutih laia an lal ber chuan a upa leh pasaltha te ho (A then phei chu hringei) a han khawm a, kan thliarkar ram hi Kristian ram a ni ang tiin a puang ta a. “Khawiah pawh ni chhuahna apiangah” tih hla an tawnga an lehlin sak chu an han sa ta a ni, an ti.

           

            He hla hi Missionary hla a ni ti mah ila, Lal Isuan Krista phuahna zinga tlar a ni ve reng a, Sam 72-naah pawh chuan ‘Lalpa ram’ a sawi lang a ni reng a, chu chu Krista lalna ram a lo ni ta.

            Thla thar det ban hma loh hi chuan,

            Khawvelah a ram a zau vang.

            Sam-ah pawh chuan a ram zauzia tur a tilang chiang hle a, chu chu Watts-a hian sak theihin a lo siam ta a ni.

           

            Kum 1954-a khawvel Kohhran Inkhawmpui pawh khan he hla hi inkhawm tanna hla atan an sa a ni. Zo tawnga letlingtu chu Pu.Zosapthara a ni.

BIBLE QIUZ NO. 26

II LALTE BUNG 21-24

A Kâr âwl dah khat rawh :

Q1.LALPAN, “Jerusalem-a ka hming ka awmtir ang,” a tihna ........................ inah chuan maichâmte a siam a.

Q2.“Puithiam lalbe Hilkia hnênah han kal la, kawngkhâr vêngtuten mite hnên ata an lo lak khâwm ........................... ina tangka rawn dah chu chhiar sela;

Q3. Tin, lalin puithiam lalber Hilkia te, a dawttu puithiam te, kawngkhâr vêngtute chu .......................... biak in chunga Baala leh, Aseri leh, vâna thil awmho zawng awng tana siam bungbêl zawng zawngte chu la chhuak vek tûrin thu a pe a:

Q4.Mansea thiltih zawng zawn, a thil tihsual leh pawikhawih lo thisen a chhuah a, Jerusalem chu pawikhawih lo thisena a tihkhah avângin a hmuh phak lova suan bo tûr thu Juda chungah ............................. thuin a lo thleng ta ngei a, LALPAN a ngaidam duh lo a ni.

A bung leh Châng dah rawh :

Q1.LALPA in hung chung kawtlai pahnihah chuan vâna awm zawng zawng tan mâicham a siam a.

Bung: ...............          Chang: ....................

Q2. thingrem siamtu te, in satu te, in chhe siamtute huan in he lai siamna thing leh lungchher     anlei theih nân,” tiin LALPA inah a tir a.

Bung: ................         Chang: ....................

Q3. Tin, Aseri puan tahho hmeichhe awmna, LALPA ina mipa inzuarho awmna inte chu a

 thiatsak a.

Bung: ................         Chang: ...................

Q4.Jehoiakima chu a la tantirhin kum sâwm leh kum riat a ni a; Jerusalem-ah thla thum a lal a: a nu hming chu Nehusti, Jerusalem khuaa Elnathana fanu a ni.

Bung: ................         Chang: ....................

Hming : ......................................................

Section : .....................................................

BIBLE QUIZ  NO. 25 RESULT

Chhanna lut zawng zawng              : 3

Chhang dik vek                                : 3

Lawmman dawngtu              : Zodinpuii (T.Sec)

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni

PAVALAI INKHAWM PROGRAMME

A hun  :28. 6. 2012(Ningani)

A hmun:Senior Hall

Chairman: Pu Chhuansanga

Tantu : Pu Rinngaihzuala

Hun Hman dan: Rilru sawi leh tawngtai rual.

LAWMTHU  SAWINA

            Keini Upa R.Lungtiawia Group te chuan ni 23.6.2012 (Inrinni ) zingkar khan Pi Lalzuali w/o Pu Saithantluanga (L) te lung thiarin hnatlang kan nei a, member thahnemngai taka thawkchhuak zawng zawng te chungah Upa R.Lungtiawia group chuan lawmthu a sawi tak meuh meuh a. Tin, inhlawhna tha tak min petu Pi Lalzuali te chhungkaw chhungah lawmthu kan sawi tak meuh meuh bawk a ni.

Sd/- Tv.F.Laldingliana

Secretary

Upa R.Lungtiawia Group

KRISMAS  HLA  PHHUAH

THEIH

            Central K.T.P chuan Krismas Hlabu changtlung zawka buatsaih a tum a, hemi hla bu a telh tur hian a duh apiangin Krismas hla a thawh theih a, mahni hla phuah emaw, chhungte phuah emaw pawh a huam vek a ni.

            A phuahtu hming leh a thluk siamtu hming ziah lan bawk tur a ni a, tin, solfa a dah vek sa vekin branch secretary hnenah thehluh mai tur a ni e.

Sd/- (LALDUHKIMA)

Secretary

Branch  K.T.P

LAWMTHU  SAWINA  LEH  HRIATTIRNA

            Keini Upa Denghluma Group te chuan ni vengchhungah Bible Quiz kan rawn zawrh te tlawmngaia min lo dawr tute zawng zawng chungah lawmthu kan sawi tak meuh meuh a, tin, member thahnemngai taka thawkchhuak zawng zawng te chungah lawmthu kan sawi bawk a ni.

            Ni 26.6.2012(Thawhleh) zan hian K.T.P Upa Denghluma Group te chu Bible Quiz Veng pawnah zuara hnatlang neih tur a ni a, memberte thahnemngai taka thawkchhuak turin kan in hriattir a ni. Zan dar 6:30 ah Nl.Lucy Zohmunmawii dawr kawtah innghahkhawm tur a ni e.

Sd/- Tv.Lalhmangaihzuala

Secretary

Upa Denghluma Group

KTP  SPORTS  NEI  DAWN

            Ni.7.7.2012 (Inrinni) khian Saikhamakawn K.T.P chuan Branch Sports Rajiv Gandhi Stadium Mualpuiah ah neih a ni dawn a. Zing dar 10 tan tur a ni. KTP member-te a tam thei ang ber kal turin kan inhriattir a ni e.         Items kimchang leh kal dan tur erawh rawn tihchhuah leh a ni ang.

THUFING  MAWL

            * Veng fai leh thianghlim nei tur chuan mahni in leh a vel theuh vawngfai ila, chu chuan vengfai leh nuamah a siam ngei ang.

                        - Pu.Amatea

            * Thenawmte tana hnawksak ni tur hian sual lian tak tih a ngai kher lem lo.

                        - Tv. R.Mapuia

TUALCHHUNG

,Pi Lalmuani w/o Pu C.Kapliana (V.sec) chu damlohna avangin Aizawl Hospitalah enkawl a noh hnuin a lo chhuak

,Nl.Zothanpuii (Kimkim-i) d/o H. Remtluanga (V.sec) chu damlohna avangin Guwahati ah enkawl mek a ni.

,Lalsiamliana s/o Zothanpuii (V.sec) chu damlohna avangin Civil Hospital-ah enkawl mek a ni.

Zanin Euro Inkhel tur:

England Vs Italy (12:15)

Semifinals:

27.06.2012 (12:15)

Portugal - Winner match 3

28.06.2012 (12:15)

Germany - Winner match 4

Final - July 1st 2012:

            Final hi Olympic stadium, Kyev. (UKR) ah khelh a ni ang. (12:15)

K.T.P  BLOG  &  MAIL

      Mipui Aw chanchinbu hi KTP SKK emaw ktpskk.blogspot.com ah tihchhuah thin a ni a, a duh tan engtiklai pawhin tlawh theih a ni a. Tin, thuchhuah duh nei tan pawh  ktpskk@gmail.com ah leh ktp_skk@yahoo.com ah thawn theih reng a ni bawk e.

VAWIIN KHAWCHIN

A lum lai berin       :  260 C

A vawh lai berin       : 220 C

   Chawhma lamah leh chawhnu lamah khua a tha ang a, zan lamah 7mm ruah a tla ang.

Source : Weatherforecast.com

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300