Mipui Aw 27.05.2012

MIPUI AW

Vol. XVIII Issue No. 22 Kristian Thalai  Pawl  Saikhamakawn Branch  Pathianni Dt.27.5.2012

VAWIIN CHANG VAWN

            Miin a tawngkam chhuak rah chu a seng ang a, ama kut thiltih ngei chu a hnenah hlan a ni ang. Mi a kawng chu ama mitah chuan a dik a, Mifing erawh chuan rorel a ngaichang thin. Thufingte 12: 14-15

KOHHRAN PROGRAMME

27. 5. 2012 (Pathianni)

            Vawiin hi Pentikos ni a ni a, S.S a awm lovang. Chawhma inkhawmah thilpek lakkhawm tur a ni.

Chawhma

Thusawitu     : Pi Khawlvuani

Chawhnu

Thusawitu  : Pastor G Chhunthuama

Zan Inkhawm

Thusawitu  : Upa C. Lalmuankima

KTP PROGRAMME

 Dt. 28 .5. 12 (Thawhtan zan)

Hruaitu         : Tv. F. Laldingliana

Tantu             : Tv.Lalrinawma

Thu sawitu    : Pu C. Lalremruata

Thilpek lak- : Nl. Vanlalmalsawmi

hawmtu turte Nl.Pricila Lalramsangi

            May thla chhunga Inkhawm leh Fellowship zai hruaitu leh musician turte.

Hla hruaitu   : Tv. Lalhmangaizuala

turte                 Tv. Pc.Vanlalhriatpuia

Musician       : Pu Lalduhkima

                          Tv. Zomuanpuia

VAWIIN  TLAI   FELLOWSHIP

A hmun    : S.S Hall

Hruaitu      : Pu R.Lalmuanpuia

Tantu       : Nl. Malsawmtluangi

Items turte

Solo          : Nl.Lalrinhlui

Live Band: Pu Lalchhandama leh a thiante

       

SERMON

FAMKIM  LOH  NA  KHAWVEL

            Chutichuan, in Pa vana mi a tha famkim angin in tha famkim tur a ni.  Mathaia 5:48    

            Kan thupui sawi tur leh kan chang thlan han en kawp chuan a in persan hle mai, an sawi thin angin chak leh thlang ang mai a in hlat a ni e, tiin sawi mah ila awmlo a ni awm love. Famkim theih lohna khawvel tia kan sawi thin naah ngei hian kan zui Pathian thu chhuak chuan famkim tur a beisei leh thupek hmu kan ni tlat si. Ngaihtuah ngun a ngai hle awm e. Ka theilo kan tih fo te hi kan lo ti thei reng a ni mai lo maw? Kan kawng zawh ngun taka chhut chunga Pathian tan famkim thei tura he khawvel famkim lohnaah hian tan kan lak a tul ta tihna a nih chu.

            ‘Famkim lohna khawvel’,  tih thu hi engvanga lo chhuak mai nge ni ta ang le?  Ringtu te chu; kan Pa Pathian chu kawng engkimah a famkim angin keini pawh famkim tura tih kan ni si. Kan tih theih loh hi Pathianin min tih tir a tum tihna em ni ang? chu chu kan Pathian thil tum a nih a rinawm si loh. Pathian lam atanga thlirna atang chuan engkim tih theih a ni si a, mihring te hian kan chakna te, kan theihna te leh tisa taka kan tum ve thin avang hian kan beidawng fo thin a. A tirah thlarau a tan si in, a hnuah kan duhzawng leh kan chakna lam rinna ah mihring te kan tluk luh  chiah hian kan tluin kan tih theih tur kan ti thei lo leh ta thin zawk a ni. Chutianga tha lo taka sual  hnathawh vanga kan awm tak avangin mahni in thiam chawp nan ‘Famkim lohna khawvel’, tih tawngkam hi a lo chhuak ta niin a lang.

            Pathian nen lo chuan he khawvel hi famkim theihna chu a ni lo chiang bal a, mahsela Pathianin a fapa Lal Isua kan engkima engkim ni turin min pe a, thinghlim theilo, fel thei lo, finna neilo, vanram chang thei tawhlo mihring kan nihna ata chu min chanchhuakin; Krista avangin mi famkim kan ni ta. Pathian chu fakin awm rawh se. He vang tak hian Mathaia 5:48 ah chuan famkim tura thupek kan hmu ta. Krista zarah famkim lohna khawvelah famkim tura koh leh thupek dawng tu mihring kan ni a. Krista hnenah famkima awm reng tura nitin kan inpek a, a hnena kan awm reng a tul takzet a ni.

            Famkim lohna khawvel tih hi Pathian ring ve lo te tan chauh a ni tih kan hriat thar a pawimawh hle mai. Keini ringtu hi Pathian tan kan inpek zawh phawt chuan khawvela kan awm chhung hian theihloh nei hauh lovin Pathian rawngbawlna kan kalpui thei dawn a, chu kan famkimna leh kan theihna thuruk chu Krista ah a ni thung. Chumi thuruk hre tute tan chuan min tichaktu leh min puitu Krista vangin engkim kan ti thei dawn a ni. Amah Krista hnenah nitin kan inpek thar sauh sauh a tul takzet a ni.

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

                        MORAL  REFORM  HI...

            Tunlai thangthar ten ka thlachham deuh ta mai nge ni ngei tur a ni, tunhnai mai khan Sorkara mi pawimawh tak takte leh kan ram NGO lian tak tak te ho ten rilru lam insiamthatna (Moral reform) chungchangah seminar an nei a. Ngaihtuahna a kal thui duh angreg hle mai. Englai tak hi nge diklo ta ang le? tih leh englai ber hi nge a pawp thawm ngai ni ta ang. Chik taka ngaihtuah in a lang thei riai ruai mai lo maw?

            Kan Mizo nuna bet tlat thin chu tlawmngaihna te, aia upa zah thiamna te, taimakna te leh khawtlang nunah leh mimal nuna rinawm tlatna te a ni kan ti thei ang. Hei tak hi reform ngai chu a  ni mai lo maw. Kan nitin nunah rinawmna, tlawmngaihna, taimakna te hi a nawlpuiin kan tlachham hlawm ta, kut hnathawk mai ni lo sawrkar hnathawk chenin rilru lama kan mizo tunhma nun kha nei let leh tura kan insiam that a tul ta hle mai. Hemi avang pawh hi a ni mahna  Seminar hial te buatsaih a lo tul ta.

            Engpawhchu lo ni ta sela, sawrkar leh a pawl anga siamthat chi a ni lova, a bul berah chuan chhungkaw inenkawlna mumal tak, fa te tana kawng engkima nu leh pa nih tling zo tak kan nih a ngai tel bawk. Rilru puitling tak nih hnuah nupa a insiam a tul tel tihna a kawk tel awm e. Mahse a bul leh a tawp chu Pathian bawk a ni tih hre tel ang u.

ARTICLE

DEPRESSION

Pc. Mami

            Mihring hian kan taksaah hliam, pem, na kan tuar theih ang bawkin kan rilru hi a hliamin a na thei a, chu chu enkawl a, tihdam a ngai a ni. Taksa na damdawi hmanga enkawl dam tum anga enkawl dam tum chi a ni lova, rilru lam natna leh hriatna lam enkawl thiam Psychologist/ Psychiatrist-te enkawlna a ngai thin avangin pan nachang kan hriat hi a pawimawh hle a ni.

            Psychologist / Psychiatrist te hi mi anglo leh pangngailo te chauh enkawl thintu nia kan ngaihdan kan lo neih thin hi kan thlak a hun tawh hle mai. Tunlai thalaite suattu leh harsatna tawh lian ber pakhat chu Depression ( Rilru hah / beidawnna) hi a ni awm e. Enkawl a, tihdam anih loh chuan kan duh leh tum lawk miah loh thilpawi leh sual lian tak thlen tir theitu a ni. Hetiang anih avang hian thlahthlam a, khuareiin a la hnem ve mai ang tizawnga in hnem ngawt te hi thil fu ber leh innghahna a hman ngawt chi niin a lang lo.

            Miin engvang pawha rilru hahna emaw beidawnna emaw a lo nei a nih chuan a nungchang, mizia leh a taksa hriselna alo danglam thin. Depression neite awmdan tlangpui (Diasnostic criteria) han tarlang dawn ila:-

            1. An thin a chhe thin hle.

            2. Rilru put dan mumal an nei lo.

            3.Midang ngaihdan an ngaichang lo.

            4. Hlim hmel an pu lo.

            5. An chau ngawih ngawih a, engmah tih phurna / chakna an nei lo.

            6. A dan pangngai aia thil ei tlem lutuk emaw ei tam lutuk emaw a ni thin.

            7. A dan pangngai aia mu tam lutuk emaw mu tlem lutuk.

            8. Hlutna / pawimawhna nei ve lo niin an in hria.

            9. Mahni a awm nuam an ti a, mi zingah an awm tam peih lo.

            10. Tu emaw tal hnenah thih an chak thu emaw intihhlum an tum thu an sawi thin.

            Miin Depression a neih chuan a chunga mi ang khian kar hnih chhung tal hmuh theihin a awm thin a, tu emaw  tal hnenah thih daih an duh thu an  sawi hial tawh phei chuan a rang thei ang bera enkawl an ngai tawh a  ni. An ti fiam ngai miah lo tih kan hriat a tha hle bawk ang. A tha berah chuan Pathianah damna famkim an chan theih nan hma kan lakpui anga, chuti anih loh pawhin Psychiatrist / Psychologist-te kan rawn vat vat a tul hle a ni. A bik takin hetiang lam enkawl thiam bik Clinical Psychologist; Mizoram pawhin pakhat kan nei ve tawh a, rawn nachang kan hriat pawh a tul tawh takzet a ni.

            Thih an chak thu a sawi hial tawh chuan a tawpkhawk tawh tihna a ni a, enkawl dam pawh a har deuh tawh thin. Chuvang chuan kan thiante emaw kan chhungte emaw a chunga kan sawi lan tak point 1-9 anga awm kan hriat chuan ngaihthah mai lovin, mithiamte rawn vat vat nachang hria ila engemaw chen chu kan thil duh loh leh kan chunga thleng se tih kan duh lo thil thleng thin hi kan pumpelh thei ngei ang.           

           

Pu Lalnghakliana te Insak tanpuina pawisa leh thildang pe te:

1. Pu K.S.Thanga, Bialtu M.L.A- `58,000

2.Vengchhunga vehbur khawn - `43,210

3. Hmeithai Association, Aizawl - `10,000

4. Pi Lalawmpuii, Sihphir - `100

5. Pu R.Chalkhuma, Skk - `700

6. Pu M.S.Dawngkima Skk - `500

7.Presbyterian Kohhran Skk - `5000

8. MHIP Skk Branch - `5000

9. Pi Ngaihzuali Skk - `100

10.  Pu Vanlawma Kulikawn - `100

11. Pu Lalthansanga s/o Vala Skk - `100

12. Pu Lalrimawia LPS - `1000

13. Pu Lalhuliana Electric veng - `500

14.  Pu C.Lalsangzuala Shillong - `5000

15. Pu Vunga Ngaizela dawr nei - `2000

16. Hminghriat loh - `5000

17. Pu Manphunga - `800

18. Pu R.Lalngheta Hlimen - `1000

19. Pu Lalruatsanga Falkawn - `2000

20. Tv. Zatinkhuma Skk - `1000

21. N. Lungleng Zirtirtu - `500

22. Pi Chhingi Kulikawn - `1000

23. Pi Faki Bethlehem veng - `100

24. Second hand bale - `30995

HMANRAW  THAWH  TUTE

1. Pu Lalrochama Skk - Ita 1000

2. Upa Zonunmawia Skk - Tukverh khar li

3.Pu H Lalliantluanga Skk - Balu 3.1/2 metre.

4. Pu C.Lalrinmawia Skk - Rora 3 metre

5. Pi Lawmveli Skk - Thingzai (3x4)

6. Pu Chhuanvawra Kulikawn - Rod sut 4, Nos4

7. Pu C.Lalduhsanga Skk - Thingzai (3x4) 2 nos.

8. Pu Sangliana Thingzai (3x4) 1 no.

9. Pu C.Runkima Thingzai - (3x4) 1 no.

10. Pu F. Lalbuaia Thingzai - (3x4) 1 no.

11. Pu Zonunsanga Thingzai (3x4) 1 no.

HNATLANG  EI  TUR  THAWH  TUTE

1. Pu Lalhmangaiha s/o Pu Rinmawia Skk- Chini                           5kg

2. Pu Zosangliana Skk - Sanghatin bur4

3. Pi Laldingpuii Skk - Chini 1kg

4. Pu C. Lalduhsanga Skk - Chana 10kgs & Dal                              3kgs

5. Pu Zarzoliana Skk - Thingpuife 250grm, Sanghatin bur2 leh Taza bur1.

            Pawisa dawn zawng zawng- `180905, hman zawng zawng- `169251, Hmanbang-`11654, tin vengchhunga pawisa thawh hming kan tarlan te hi vehbur khawn hnua thawh leh te an ni. Tin, hman bang awm leh nachhan hi in sak zawh hnua  thawhbelh an awm vang a ni. Hnatlang tha hi 500 chuang nia hriat a ni.

            Mi tlawmngai te leh tha tam tak sengtute leh sum, eitur, tui, thing leh gas hmaraw thawhtute zawng zawng chungah fund rising committee chuan Pathian hmingin lawmthu a sawi a ni.

Sd/-

(H.LALLIANTLUANGA)

Treasurer

Fund Rising Committee

BIBLE QIUZ NO. 22

II LALTE BUNG 7-10

A Kâr âwl dah khat rawh :

Q1.Tin, kulh luhna kawngka bulah phar pali an awm a; anni chuan, “Eng atân nge maw .................... nghâk maia kan thut reng le?

Q2.Tin, kum sarih a lo vei hnuah chuan heti hi a ni a, chu hmeichhia chu Philistia-ho ram ata a let leh ta a; tin, a ............. leh a lo lal dil tûrin a va kal a.

Q3.Tichuan hriak bâwm hi la la, a lu-ah leih langin, ‘LALPAN heti hian a ti: Israelte chunga lalah .......................... ka thih a che, tiin,’ ti rawh.

Q4.chutichuan in pu fate zinga mi a tha ber leh a fel ber zawng chuak ula, a pa lalthutthlenga thuttir ula, in pu chungte do chu ...................... rawh u,” tia ziak lehkha a thawn a.

A bung leh Châng dah rawh :

Q1.Tin, kawngkhâr vêngtute chu a ko va; tin, anni chuan lal in chhûnga mite chu an va hrilh a.

Bung: ...............          Chang: ....................

Q2. Tichuan a tan zathlak khawpin a melh ta reng mai a; tin, Pathian mi chu a tap ta a.

Bung: ................         Chang: ....................

Q3. Tin, Ahaba chhûngte chu Nebata fapa Jeroboama chungte leh Ahija fapa Baasa chhûngte angin ka siam ang a.

Bung: ................         Chang: ...................

Q4. Tin, a tho va, a chhuak a, Samari-ah a kal ta a. Tin, kalkawnga berâmpute berâm hmul mehna in a va thlenin,

Hming : ......................................................

Section : .....................................................

BIBLE QUIZ  NO. 21 RESULT

Chhanna lut zawng zawng              : 3

Chhang dik vek                                : 3

Lawmman dawngtu                          : Vansangpuii(V.sec)

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni

PAVALAI INKHAWM PROGRAMME

A hun  :31.5.2012(Ninga ni)

A hmun  :Pu Lalduhawma te In

Chairman     : Pu R.Lalsangliana

Tantu : Pu Saienga

Hun Hman dan: Sharing leh tawngtai ruala hun hman tur a ni. Inkhawm banah hla zir nghal tur a ni

SKK  TAXI  WELFARE THUCHHUAK

            Petrol man litre-ah Rs.7.54 laia alo san tak avangin Keini Saikhamakawn Taxi Welfare pawhin loh theih loh a rate kan tihsan ve a ngai dawn ta a.Hei hi mipui ten min lo hrethiam hram turin kan in  ngen a ni e. Hetiangin -

1. Bazar pui ( Zing kara bazar thinte tan) - Pakhat tan - Rs.50/-

2. Thakthing Bazar ( Zing kara bazar thinte tan) - Pakhat tan - Rs 30/-

1. Khatla leh Treasury Bazar 

(Zing kara bazar thinte tan) - Pakhat tan - Rs 40/-

            Tin, Sikul naupang Kulikawn thlenga Rs.10/- chawi thin khan Rs.15/- an chawi a ngai tawh dawn a ni. Rate thar hi Dt.28.5.2012 atanga hman tan tur a ni.             

                       Sd-

              (Lalremsiama)

Secretary

Taxi Welfare. Saikhamakawn

EVANGILICAL  MEET HMANG  DAWN

Ni 2&3.6.2012(Pathian) hmang hian Hlimen Kohhran Biak Inah Hlimen Pastor Bial KTP chuan Evangilical Meet a hmang dawn a. Thupuiah Lal Isua a lokal leh dawn tih a ni a, Thupui sawitu atan hian CKTP Leader Rev Lalrinmawia ani ang.

kohhran hmeichhePROGRAMME

A hun :29.5.2012(Thawhleh zan)

Chairman     : Pi Vanlalhruaii

Tantu : Pi Rampuii

Thusawitu:

                Pi Hmangaihsangzuali

YMA HRIATTIRNA LEH NGENNA

            Vengchhung a lo faia a lo thianghlim zawk nan, kawngpui dung leh Side Drain-ah reng reng bawlhhlawh eng chi pawh paih loh nise tiin YMA Executive Committee chuan a rel a. Tin, mipuite kan him tlan zawk theih nan Lirthei(Motor) eng chi pawh kawngpui kama dahtu ten kawng dung zui zawnga dahin, a sir thei ang berah dah hram turin lirthei neitu te kan inngen a. He kan ngenna hi min zawm sak a, min tihhlawhtlin sak hram turin Saikhamakawn YMA Executive Committee chuan mipuite kan ngen tak meuh a ni e.

            Tin, kawng kama Motor sil/siam thin ten bawlhhlawh leh oil buate thian fai zel turin kan ngen bawk e.

            Chhiat ni fund veng chhung in tinah Rs 100/- a rawn khawn a ni leh dawn a. Vengchhung mipuite kan in hriattir lawk a ni e. Chhiat ni fund hi Branch  Executive Committee member ten remchang hmasa berah khawn tur a ni.

Sd/-

(K.LALHULIANA)

Secretary

YMA Branch. Saikhamakawn

            PAWISA CHHAR

            Pu Lalrinsanga te In leh Pu Lalbiakzuala te In peng inkarah Pawisa chhar a ni a, a ti bo chuan a zat sawiin ni 28.5.2012 Thawhtan ni ral hmain Pu Lalremsiama hnenah lam theih a ni.

TUALCHHUNG

,Pu C.Zakhuma h/o Pi Liansangi(V.Sec) te chuan khawi ilo vahvel nan Santro Car an lei thar.

,Pu Ng.K.Sailo h/o Pi Lalduhawmi(V.Sec) te chuan khawi ilo vahvel nan Chevrolet Spark Car thar an lei.

,Kan Circulation Manager Pu C.Lalnunsanga te fanu C.Lalchhuanawmi(V.Sec) chu khawsik awmna avangin Synod Hospital Durtlangah enkawl anih hnuin dam takin a lo chhuak ta.

,Pu Zohmingthanga h/o Pi Lalchuani(T.Sec) te chuan khawi ilo vahvel nan Karizma Bike thar an lei.

,Pu Lalthuneiha h/o Pi Lalhmingliani(V.Sec) te chuan khawi ilo vahvel nan Alto Car an lei thar.

,Pu Zohmangaiha h/o Pi Zairemchhungi(Ch.Sec) te chuan khawi ilo vahvel nan Scooty Flyte  thar an lei.

VAWK  LEI  DUH

            Vawk hralh duh tan; engtiklai pawhin ka leisak thei reng a. A  man pawh ka pe nghal zel bawk e.

Pu C. Lalremruata (Mafela)

Contact No. 9862817055

MATRIC  PASS  THARTE HRIATTIRNA

            Bialtu M.L.A in lawmpuina certifcate a pek zinga tihdikloh leh la pek ve loh te chu thawhtanni ral hma in Pu Lalthuneiha hnenah inhriattir tur a ni e.

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300

Mipui Aw 20.5.2012

MIPUI AW

Vol. XVIII Issue No. 21 Kristian Thalai  Pawl  Saikhamakawn Branch  Pathianni Dt.20.5.2012

VAWIIN CHANG VAWN

            A tawp berah chuan unaute u, a dik apiang te, a zahawm apiang te, a fel apiang te, a thianghlim apiang te, a duhawm apiang te, a thangmawi apiangte – thatna reng a awm a, fakna reng a awm phawt chuan – chung chu ngaihtuah rawh u.        - Pilippi 4:8

KOHHRAN PROGRAMME

20. 5. 2012 (Pathianni)

Chawhma S.S inkhawm

Tantu          : Pi F.Lalrinkimi

Chawhnu

Thusawitu  : Upa R.Lalngena

Zan Inkhawm

            The Leprosy Mission in kan Kohhranah rawngbawlna an rawn nei dawn a, thilpek pawh an puala lak khawm tur a ni.

KTP PROGRAMME

 Dt. 21 .5. 12 (Thawhtan zan)

Hruaitu         : Upa Lallawmchhunga

Tantu             : Nl R.Lalmuanpuii

Thupui           : Isua hi tunge?

Hawngtu       : Tv C.Laldinpuia

Thilpek lakk            : Nl.F. Lalrinfeli

hawmtu turte  Nl Vanhlupuii

            May thla chhunga Inkhawm leh Fellowship zai hruaitu leh musician turte.

Hla hruaitu    : Tv P.C.Vanlalhriatpuia

turte               Tv Lalhmangaihzuala

Musician       :Pu Lalduhkima

                          Tv Zomuanpuia

VAWIIN  TLAI   FELLOWSHIP

         Tualchhungah chhiat tawk an awm avangin vawiin Pathian ni tlai fellowship a awm lovang.

         Vawin hi Pathian Ram chhiarni a ni a, la  pe remchang lo tan a chhiarna  hmunah  pawh pek theih reng a ni.

       

SERMON

LAWMNA  NUN

            Lalpaah chuan lawm fo rawh u: ka ti leh pek thin ang, lawm rawh u.In dawhtheihzia mi zawng zawng hriat ni rawh se. Lalpa chu a hnai e. Engah mah mangang suh u; engkimah tawngtai leh dilin, lawmthu hril tel zelin, in duhnate chu Pathian hnenah hriattirin awm zawk rawh se. Tichuan, Pathian thlamuanna, rilru reng renga hriat sen loh khan, in thinlung leh in ngaihtuahnate chu Krista Isuaah chuan a vensak ang che u.  Pilippi 4: 4-7

            Mihring kan nih chhungin nun hlim lai te lungngaih ni leh tah ni te kan tawng fo a, hei hi hriatthiamloh tur a ni lem lo, hringnun kalphung a ni tih hi kan hriat a tul awm e. Tumah hlim reng kan awm lova tumah lawm reng kan awm hek lo. Pathian mi kan tih te pawh an lungngaih in an rum thin, kan zui Lal Isua ngei pawh thihna khawp hialin a lungngai a nih kha, hei hian ringtu kan nih avanga lawm reng tur kan ni bik lo tih a ti langchiang awm e.

            A nih leh engvangin nge lawm tura tih kan nih nachhan. Lungngaih ni leh manganna vawrtawp kan tawh lai ni pawhin kan lawm reng dawn tihna em ni. Kan Pathian thu vekin tap te tah pui turin min ti leh lawi bawk si. Ringtu te chu he khawvela kan awmchhungin kan lungngai anga, kan tap anga, nasa takin khawvel mite angin kan mangan hun pawh a lo thleng ang, chumi hunah chuan lawm a nui vur vur tur tih lam zawnga in zirtirna a ni lem lo. Hetiang hun hreawm kan tawh lai pawhin  Pathiana vui mai lo leh demna rilru pu mai lovin, Pathiana kan rilru put dan leh tun hun thlenga min enkawlna kan dawn ngaihtuaha, kan harsatna tawh na zawn ringawt thlir lova, Pathiana vui ngai lo thinlung nei tura in zirtir na zawk niin a lang. Hetianga kan lawm zel a nih chuan Pathian thlamuanna pawh kan chang zawk dawn a niin kan hmu  a ni.

            He lawmna nun neia Pathiana vui ngailo mi Joba nun han thilr lawk ila. Mihringte ngaiha chhiatna ang chi zawng zawng chu a chungah a thleng vek ti ila kan sawi sual lo mai thei a ni. A hreawm lai niin lawmin a nui vur vur kher lo, a tuar a, a rum a, hreawm a ti nasa hle, mahse Pathianah a lawm reng a, vuina reng reng Pathianah a nei hauh lo, hetiang lawmna hi a ni Pathianin nei tura min tih chu ni. Tichuan Pathian thlamuana rilru reng renga hriatsen loh chuan Joba chu chhel na a pe a, Pathian malsawm ram, a let zaa punna ramah a hruai thleng ta a ni. Tin, Pathian phatsan duhna thinlung ata amah Pathian vek chuan Joba rilru chu a vensak chiang hle bawk a ni tih a hriat theih bawk awm e.

            Eng hunah leh eng dinhmunah pawh ding ila Pathian tan tlat a, Pathian phatsat lova amah Pathian chunga lawmna rilru pu thei reng turin i in buatsaih thar theuh ang u. Amen....

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

                        Ngaihtuah  chiang  ang  u...

            Tunlai Mizoram boruak han thlir ila, thalai lam rilruah chuan infiamna lam a lian hle awm e. Khawvel in a ngaihsan leh a buaipui em em Football pawh keini tualchhungah ngei pawh kan ti ti tui ber leh buaipui ber a ni ve pha ta, tin, internet khawvel ah lah ram dang mite nen game te hial pawh kan khel ho ta liai liai mai. Chumai pawh a ni nem le, kan duh duh hi kan hmu in kan chak zawng apiang mai hi  mahni inlum atangin kan ti thei a nih ber tawh hi.

            Hetiang khawpa Mizo te kan changkang tia kan in sawi lai mek hian kan unau thenkhat te chu mei engah nghathu rawt nen chauh a tukthuan leh zanriah  kil an awm mek tho niin a lang tlat. Rethei te chanvo laksaka khawvel tukverh a in tithei taka dak vual vual ten zahna an hmuh theih nan Zoram hmangaihtu thalaite ke kan pen chhuah a hun ta hle mai. Rethei leh hausa te inkar hlat lutukna Mizoram tia hriat kan nih hma ngei hian tan la thei ten tan lak a hun rualin sim tur nei te sim tir tura tan khawh a hun ta takzet bawk a ni.

            Pathianin mi taima leh tumruh te chu mal a sawm ngei mai, mahsela diklo taka hlawkna hmu thin te hi Pathian malsawmna chu a ni vek dawn em ni. Zoram hi eng dinhmuhah chiah nge a din? keini veng kilkhawr tak atang pawh hian I ngaituah chiang ang u.

ARTICLE

ZIRNA  I UAR  ANG  U !!!

                                                                                                                                    - Lallawmsanga Pa

            Tun tum ah hian Manchester City leh Queen’s Park Rangers (QPR) ten Football final turu tak mai an khelh chanchin sawi ka tum lova, YMA Football a kan vengin Tuithiang 2-2(4-1) a an hneh a, an van neih hnua Bethlehem vengthlang 1-5 a an hneh lo  tak dan lam ni lovin, Mihringte hi kan lo pian chhuah ruala tah tuar tuar tih bak hi thiamna neih sa nei lovin, zir tur tam tak hmabak neiin Pathianin a min pian chhuah tir dan chung chang hi sawi ka tum a ni.

            Hla siamtu chuan “Mihring chauh lo chu zirtir an ngai lo”a lo ti a. Mizo tawngte, Sap tawngte, Hindi tawngte hi nu leh pate thisen kan zawmpui avanga kan thiam mai ni lovin zirtirna kan dawn atanga kan thiam a ni. Thiamsa a piang tumah kan awm lo zirtir ngai kan ni.Doctor te hian mihring natnate hi engvangin nge an hriat em em a! Football Star kan ngaih san hote hi engvangin nge an thiam em em? A chhanna chu an zir nasat em vang a ni tih hi a ni. Zir nasa lo tan thiamna van atangin a lo tla ngawt lo.  Pathianin Adama hnenah ‘I dam chhung zawngin rim taka thawkin a rah chu i ei tawh ang’ tih Gen 3:17 ah kan hmu a. Kan dam chhung rei lote ah hian kan pian atanga kan thih ni thleng hian in zir in tawpin tai a nei dawn lo. Pathian in hun min pek zat hi a in ang vek a,  thenkhat chuan Pathianin hun min pek tangkai thei ang ber in rim takin lehkha an zira, taima takin hna an thawk a, minute tin mai hi tha tak leh hna tangkai thawh nan an hmang a, chutianga thawk rim apiangte hnenah chuan Pathian hian an hmalam hun zel ah Malsawmna a rawn thlen mai a lo ni.

            Kan veng hi zirna kawngah engnge kan dinhmun i lo thlir teh ang. Tun tum HSLC leh HSSLC result ah khan HSLC ah mi 25 vel pass ah Distinctionah pahnih leh I Div panga a dang chu II Div leh III Div ah te an pass a, HSSLC ah khan mi 12 vel pass ah I Div  ah pahnih pass kan nei a, a dang chu II Div leh III Div ah an pass a, tun hma te ngaihtuah chuan hma kan sawn hle in a hriat a, a lawmawm hle a ni. Pass thar zawng zawng te hian hei hi kan tawpna tur ni lovin Master Degree neina tura bul kan tanna a ni tih hria ila, Pathianin keimahnia theihna a dah hi hai chhuak zel turin tan la ila. Pastor tur te leh IAS, MPS, MCS Competitive Exam a in ziak tling thei tur lehkha thiam mi rilru chak tak tak hi kan tam a ni. Kan thawh rim phawt a, kan hun te lehkha zir nan kan pek tam chuan mi te pawhin an theih chu kan theih lohna tur a awm lo. Kan tum chuan kan thei ngei ang, tiin mahni i in fuih tang sauh sauh ang u. “Min ti chak tu ah chuan engkim ka ti thei” tih hi i chang thlan ang u. Tommy Lasorda chuan “Thil theih leh theih loh danglamna chu mihring thinlunga tumnaah a awm daih zawk a ni” a tih ang in kan thinlungah thil tum nghet tak kan neih phawt chuan hlawhtlinna hi kan ta a ni mai.

            Tun tuma pass ve lo te pawh bei dawng lo ila. ALLAN Stewart Kum 91 mi Graduate upa ber record siam tu chuan “Mite hian ‘Zirna chhunzawm leh turin ka upa tawh tih te ‘Hun ka nei tawh lo’ tih te hian chhuanlam an siam tur a ni lo” a lo ti a ni. Chuvangin tun tuma hlawhtling ve lo te pawhin in thlah dah lovin a hma aiin kan hunte lehkha zir nan i pe tam ang u.

            Zir thiamna min petu Lalpa hi a hmasa ber ah dah i la, zau zawk a Lalpa ram ti zau tur a kan beih zel theih nante, kan mihring puite tan a mi tangkai rawngbawl sak tu kan nih theih nan awm mai mai lovin ZIRNA I UAR ANG U.       

           

HRISELNA  HUANG

SENTÛT  (MEASLES)

                                                      -Priscilla Zodinpuii

                  Hmanni lawkah  ka thianpa hnen atangin call ka dawng a. Sentût hian thluak vûng a siam thei a mi????

Thei e, ngatinge???

Ka u fapa in tunah a nei an ti a….

                    Ka ngaihtuah ta a, Sentût hi hman atang tawh a Mizo in naupang natna kan hmelhriat a nia,insawi thaihna nilo se, thil  hlauhawm taka lo thlen thei reng ani tih hi tuman kan lo hre ngai lova, hetia eng eng emaw ni ka han zir ve a kan hriat ve chinah chuan ka hriat ang chhun chhun te ka lo sawi ve dawn ani.

                   Sentût hi virus chikhat paramyxovirus kan tih in a thlen ani a,awlsam taka inkaichhawn theih ani. Hri kai atanga kar khat atanga kar hnih hnuah  alang chhuak tlangpui. A lan chhuah dan te - khuh, khawsik, hritlang hnaptui, mitna, mitsen leh naupang awm nuamlo chiau hiar a ni tlangpui a, hemi hnu ni hnih na atangin vun ah a rawn langchhuak tan a, ninga vel a awm tlangpui thin. Vuna a lan chhuah hma ni hnih vel ah ka chhung ah a rawn awm hmasa a, thil spot sen a laia a pawdal awm, hei hi in hmuh chuan sentût ani tichiangtu ber ani. Vuna alan chhuah hma ni li atang a vuna a rawn lanchhuah hnu ninga vel thleng hi inkaichhâwn theih nasat hun ber lai ani. Kan hriat angin puitling aiin naupangin an kai sam zawk a ni.

               Sentût hi virus natna anih vangin a damdâwi bik a awm lo a, engtinmah tih loh pawn a dam ve leh mai thin a, mahse a natna lanchhuahna tih nep nan a damdawi ei chu a tha tho ani. Mi tamtak an dam fel hmaklaiin mi thenkhatah chuan natna dang a thlen ve thei tlat a. Chungte chu pneumonia, kawthalo, bengkherh,  thin na, kalna leh  a chunga  kan sawi tak thluakvûng te an ni. Pneumonia, bengkherh,  kawthalo vel hi naupangah a tam ber a, a dang hi chu avang a, kum engemawzat hnuah pawh a rawn awm thei a ni. Heng kan sawi tak avang hian sentut hi pawngpaw hlauh rikngawt tur ani lova, a damdâwi awm lo mahse inven  theih natna anih avangin he natna leh a hnu leh zela a thlen theih lakah hian kan fihlim thei ani. Sentût laka hri venna hi naupang thlakua anih in a dawng thei a, I fa chu thlakua a lo tlin ve leh sentût hri venna i laktir ngei dawn nia…

BIBLE QIUZ NO. 21

II LALTE BUNG 1-6

A Kâr âwl dah khat rawh :

Q1.Ngai teh, vân ata ................ a lo a lo tla a, sipai sawmnga hotute pahnih kha an hote sawmnga nen khan an lo ......................... ta a;

Q2.Tin, chuta tang chuan ....................... tlângah a kal a, chuta tang chuan Samari khuaah a haw leh ta a.

Q3. Tin, Elisan, “A bula ka awm thinna Sipaihote LALPA nunna chhalin ka sawi e, Juda lal ................................ hi zah lo ni ila chuan i lam pawh ka hawi duhin, hmuh pawh ka hmu duh    hlek lo tûr che ania le.

Q4.Tin, ani chuan, “.................................. han la te u,” a ti a. Tin, chu chu belah a han thlak a, “He             mite eiah hian han suak chhuak te u,” a ti a. Tichan bela chuan hlauhawm engmah a awm ta lo va.

A bung leh Châng dah rawh :

Q1.Tin, ani chuan, “Eng emaw chu kan tihsak tak ang?” a ti a. Tin, Gehazia huan a chang a, “Gapa chu a nei hauh lo mai ale, a apsal lah chu a tar tawh si a,” a ti a.

Bung: ...............          Chang: ....................

Q2. Tin, samari khaw chhûng an han thlen chuan heti hi a ni a, Elisan,”LALPA, hengho hian an hmuh theihna tûrin an mit han tihmensak ang che,” a ti a. Tin, LALPAN an mit chu ahan tihmensak a, an  hmu ta a; tin, ngai teh, Samari kha chhûngah chuan an lo awm     reng mai a.

Bung: ................         Chang: ....................

Q3. Ahazia thiltih chanchin dangte chu Israel lalte lal lai thu ziakna buah a chuang a ni lâwm ni?

Bung: ................         Chang: ...................

Q4.Tichuan zing takah an tho va, niin tui chu a zuk chhun a, tin, Moab-ho chuan an zawna tui chu thisen ang maia sen kukin an an hmu a.

Bung: ................         Chang: ....................

Q5.Tin, Samari khuaah chuan tam a nasa êm êm mai a; tin, ngai teh, an hual tlat a, sabengtung lu hi tangka sawmriatah an hralh a, tin, thuro ek hi kab hmun lia thena hmun   khat tangka ngaah an hralh hial a.

Bung: ................         Chang: ....................

Hming : ......................................................

Section : .....................................................

BIBLE QUIZ  NO. 20 RESULT

Chhanna lut zawng zawng              : 2

Chhang dik vek                                : 2

Lawmman dawngtu                          : Vansangpuii(V.sec)

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni

PAVALAI  PROGRAMME

A hun             :9.01.2012 (Ninga ni)

A hmun  :Pu Labiakvela In

Chairman : Pu C. Zakhuma

Tantu : Pu C. Lalduhawm

Thusawitu: Pu F. Lalrinpuia                     

Tawngtai ruala hun hman bawk tur a ni.

LAWMTHU  SAWINA

            Saikhamakawn Rualbanlo (Disable) ten pawl intunnun nana Hatkora tui veng chhunga kan zawrh, tlawmngaih chhuaha min leisaktute leh lei lemloo pawha a thlawna tanpuina kan beisei phak hauh loh min peute zawng zawng chungah kan lawm em em a. Rualbanlote in ngaihsak a, in hmangaih a, in duhsak a ni tih kan hriatin kan thla a muang takzet a ni. Kan chunga in thatna zawng zawngte hi Lapan a let tam takin rul che u rawh se.

Sd/-

(J. MALSAWMA)

President D.P.O

Saikhamakawn

CHATUAN  RAM  LAMAH

            Tv. Lalhriatpuia s/o Lalpianthang chuan Ni 16.5.12 (Nilaini) chawhma lam khan chatuan ram min lo pansan ta a, a kalsan tak a nu leh pa leh a unau te leh he thihna avanga tuartu zawng zawng te Mipui Aw editorial board  chuan kan  tuarpui takzet a, Pathian awmpuina leh thlamuanna an dawn zel kan duhsakin kan tawngtaina pawh a ni e.

LAWMTHU  SAWINA

            Kan nu duhtak Lalparmawii  Dt.16.5.12 a min boral san tak avanga min lainattu te, a damloh laia damdawi in leh in lamah te, sum leh pai te min pe a, min buaipuitu zawng zawngte chungah lawmthu kan sawi tak meuh meuh a ni.

            Tin, khawtlang mipui ten min khawngaiha kan phu loh in tha tak min sak sak a, tin buaipui kan ngaihna zawng zawngah min buaipui hi thinlung takin Saikhamakawn vengchhung mipui te hnenah lawmthu kan sawi a. Tin, Zoram mipui min lainata min khawngaih tute zawng zawng chungah lawmthu kan sawi tak meuh meuh a ni

            Kan chunga in thatna te, min hmangaihna zawng zawngte hi kan rul seng dawn lo che u a, Pathianin a let tam takin rul che u rawh se tih hi kan tawngtaina a ni e.

In khawngaihna dawngtu,

Pu Lalnghakliana

leh a fate

Saikhamakawn

CHATUAN  RAM  LAMAH

   Pi Lalparmawii w/o Pu Lalnghakliana chuan Ni 16.5.12 (Nilaini) zanlam khan chatuan ram min lo pansan ta a, a kalsan tak a pasal fanau te leh a chhung leh khatte zawng zawng  Mipui Aw editorial board  chuan kan  tuarpui takzet a, Pathian awmpuina leh thlamuanna an dawn zel kan duhsakin kan tawngtaina pawh a ni e.

OPEN SCHOOL CENTER THARjb

            Govt. of India Ministry of Human Resource Development hnuaia NIOS chuan study Center thar No. 300018 leh Exam Centre nihna min pe a, Class X leh XII admission a tih theih nghal e, HSLC/ HSSLC fail-te tan October, 2012 exam turin a in admit theih bawk e.

Class:-

GEORGE MEMORIAL SCHOOL

KULIKAWN BIAK IN BUL. (Morning )

Ph 9862095669

KOHHRAN HMEICHHE

PROGRAMME (22.5.12)

Hruaitu         : Pi Chawngkungi

Tantu             : Pi Lalengpuii

Thusawitu     : Pi Lalchhanhimi

LAWMTHU SAWINA

            Dt.16.5.2012 a kan fapa R.Lalhriatpuia boralna chungchangah Kohhran leh Khawtlang nu leh pate leh YMA nula tlangvalte min lainatna leh min tanpuina zawng zawngah hian mimal tin hnenah lawmthu kan sawi seng si lo va. He chanchin bu kaltlang hian in zavai chungah lawmthu kan sawi tak meuh meuh a ni. In mi khawngaaihna leh lainatna avanga in huntam tak min hmanpui mai bakah, sum leh pai leh thildang chi hrang hranga min tanpuina te hi Lalpan a let tam takin rul theuh che u rawh se.

In khawngaihna dawngtu,

Lalpianthanga te chhungkua Saikhamakawn

I  LO  HRISEL  ZAWK  NAN HENGTE HI ZAWM  RAWH

1.   Mahni thua damdawi inchawh hi a hlauhawm.

2.   Mi mal tinah damdawi hnathawh dan a danglam thei.

3.   Kum lam upat danin damdawi hnathawh a ti danglam thei.

4.   Zu in mi-ah te, meizial zu mi-ah te, ei leh in hrang hrang avang pawhin a danglam thei.

5.   Vawikhata damdawi chi hrang hrang ei pawlh vakte hian taksaah chhiatna a thlen theih laiin kan ei chhan ber natna atan a thawk miah lo thei.

6.         Zunthlum damdawi, antibiotics, phungzawl damdawite leh lungna damdawite hi a ruala ei hauh loh tur.

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300