Mipui Aw 25.11.2012

MIPUI AW

Vol. XVIII Issue No. 48 Kristian Thalai  Pawl  Saikhamakawn Branch  Pathianni Dt.25.11.2012

VAWIN  CHANGVAWN

            Chutichuan, Krista hnenah kaihthawhin in awm ve tawh chuan chung lam, Pathian ding lama thu Krista awmnaa thil awmte chu zawng rawh u. Chung lama thil awmahte chuan in rilru nghat tlat rawh u, leia thil awmahte chuan nghat lovin. In thi tawh a, in nunna chu Pathianah chuan Krista hnenah thuhrukin a awm si a.

KOHHRAN PROGRAMME

25.11. 2012 (Pathianni)

Chawhma S.S inkhawm

Tantu           : Pi Hmingthanzuali

Chawhnu

Thusawitu   : Pu Siamliana

Zan Inkhawm

Thusawitu   : Upa Zairemthanga

KTP PROGRAMME

 Dt. 26.11. 12 (Thawhtan zan)

Hruaitu           : Tv F.Laldingliana

Tantu              : Tv P.Lalnunsanga

Thuhriltu       : Upa Lallawmchhunga

Thilpek           : Nl Lalrinliani

Lakhawmtute              Nl Vanhlupuii

Hla hruaitu    : Tv R.Zodinsanga

turte                  Tv P.C.Vanlalhriatpuia

Musician         : Upa Lallawmchhunga

                          Tv. R.Lalzamlova

VAWIIN  TLAI   FELLOWSHIP

A hmun    :  S.S Hall

Hruaitu     : Nl C.V.L.Biakzuali

Tantu        :  Nl Lalrinawmi

Thupui        : Value System

Hawngtu     :  Pu Lalchhandama

KOHHRAN  HMEICHHE

PROGRAMME (Ni 27.11.2012)

Hruaitu           : Pi Sanghluni

Tantu              : Pi Sawithuami

Thusawitu      : Pi Khawlvuani         

           

           

SERMON

PATHIAN  LAWMTLAK

                                                                        Josepha Nu

              Rom bung 12:1 ah chuan, chutilochuan unaute u, Pathian khawngaihna avang hian, inthawina nung leh thianghlim leh Pathian lawmtlak ni turin in taksa chu inhlanah ka ngen a che u, chu chu in rawngbawlna awm reng a ni, tih kan hmu a, kan chang thlan tur chu Pathian lawmtlak tih lai hi a ni.

            Pathian lawmtlak ni tur hian kan nun hi kan uluk a ngai em em mai a, Ringtu piangthar inti te nunah hian kan Pathian hi a lawm a ngem? Kan in enfiah a ngai hle a ni.

Kawng hnihin han chhui dawn ila:

1. Kan eizawnna  hmunah:

            Sumdawng kan nih chuan kan sumdawnna hmuna dawt tello, Pathian lawmtlak in kan sumdawng em? Office kal kan nih chuan Pathian lawmtlakin office hna dik takin kan thawk em? Ram hnathawk mi kan nih chuan taima leh rinawm takin kan thawk em? Mithenkhatte chuan thlaite a neitute hriat lohvin kan la mai mai thin em? Pathian lawm tlakin hna kan thawk em?

2. Kohhranah:

            Rawngbawltu hrang hrang kan awm a, kan rawngbawlna ah hian Pathian lawm tlakin rawng kan bawl em? a langa mawi mai mai hian em ni rawng kan bawl, kan in enfiah a ngai hle mai. Pathian fak leh chawimawia kan lamna hmunah te hian kan thiante an lam avang mai a lam lo hian Pathian lawmtlak a, amah fak leh chawimawina tak tak nen, Thlarau leh tihtakzeta amah fak tur te in kan Pathian hian min ko a. Kan awmna hmun apiangah a lawmtlak ni tura kan nun kan hun hmang turin mi mal tin te Lalpan min ngen a ni.

                       

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

BIAKIN CHHUNG  AWMDAN

                       

            Pathian nung bia kan ni a, chuvangin amah kan biakna hmun atana kan serhhran Biakin hi kan zah in kan enkawl tha hle tur a ni, tin, a vawnfai kawngah pawh kohhran mipui/mimal tin te kan pawimawh a ni tih hi kan hriatreng a tul awm e.

            Mi thenkhat, a bik takin tlema kum lama la naupang deuh te, inkhawm laia awmdan phung kan la man thiam tawk lo emaw ni chu aw... a tih theih, tlar hung lamah thuin duh aiin kan bengchheng deuh thin tlat, a pawi in kan biak Pathian hi a zahawm a ni tih hi kan hriat theuh a pawimawh hle mai. Nu leh Pa te pawhin kan fa te inkhawm laia awmdan phung kan in hrilh nawn fo a, kan in zirtir fo a tul takzet a ni, tumah hresa leh thiamsa a piang kan awm si lo, Sunday Sikul zirtirtu lam te pawhin kan zirlai te kan hrilh hriat a tul hle bawk. Tin, kum upa lam deuh te pawh inkhawmlaia nepnawi ei mai te, a hmuam lam chi lo ti mai te pawh kan awm thin, hengah  hian kan insum a, biakin zahawmna kan ngaihpawimawh a tul tak meuh meuh a ni.

            Pathian nung bia kan ni tih hre reng a, amah bia a kan in serh hran chhung hun reilo te chhung hi chu kan insum tlan hram hram a tul hle.

ARTICLE

RINAWMNA

            Mi tamtakin Mizote hi hnam rinawm tak niin kan in sawi thin a. Kristianna a rim a ra  pawh kan hriat  hmaa kan mizo nunphungah hi chuan hnam  rinawm tak ni a sawi thin kan ni awm e. Amaherawhchu Kristianna hian min chenchilh chinah hian kawng tamtaka hmasawnnaah hian a zuan in kan zuang dawr mai a, khawvel eng hmu ve phak thei dinhmunah min hlangkai ta. Kan hman nunphunga tel ve thin nia kan hriat rinawmna chuan tlak hniam lam a pan ve mek zel niin vawiin kan nunphung atang hi chuan a hriat theih awm e.

            Kristian kan nih hma pawh a, rinawm thin kha, tunah kristian kan nih hnuah kan rinawmna a tla hniam telh telh a nih chuan thil inhmeh lo tak a ni dawn a ni. Kristian kan nih tawh ngat phei chuan a hma aia rinawm leh tlawmngai zawk  tur kan ni  dawn lawm ni? Nge ni a, kan nihna lo zawk deuh hian kan lo inchhal ta mai mai zawk tih hi chhut tham a tling?

            Kan hnam rinawmna kan sawi apianga kan sawi hmaih theih ngai loh chu kawngka kalh a ngai lova, tute tan pawh a luh mai theih in thingfakin kan do va, ngaihngam takin kan kalsan thin tih a ni. Tunah erawh chuan a kalhna satliah mai pawh ni lo, tihbo tur ngah deuh te phei chuan a venna hmanrua changkang tak tak nen kan in kharkhip pawhin kan ngaih a ngam tak tak thei tawh meuh lo a ni a. A in thlau ta hle mai.

            Neih in ang them them, mi ta awh bik tur awm chuang lo kan nih avanga bo lo mai mai kan ni nge? Kan rinawmna avanga in ruksak lo. Ruk tur awm chuan loh vanga kalh ngai ta lo zawk nge? tih hi chhut tham a ni lo maw? Kan mizo pipu hunah pawh khan rukruk hrat sawina tawngkam lar tak chu ‘kutkem nei’ te pawh kan an lo ti thin ve tho mai. ‘Khual thuthang leh ar pan chuk a pun tual tual’ an tih thin te pawh hi rinawm loh rah a ang deuh lo maw? Thil nihna tak aia tlem dawt tel hret pawisa lo hnam kan ni em? tih te hi chhut tham atling in ka hria. ‘Dawt var’ te pawh kan nei nual mai. Hnamdang hian nei ve tak maw?

             Heng zawng zawng chhut hian kum za chuang awrh thilah heti em em a nasa hian kan nunphunga bet tlat nia kan sawi thin rinawmna hi kan thlauhthla duak thei dawn em ni? Nge ni a, hnam rinawm ni a kan lo inchhal thin na hi a tak tak a ni lo zawk? Kristian kan nih hnuah hian kan Kristianna nena tawngkawp phei chuan hnam a zawnga rinawm ber tur nia ngaih theih kan nih laiin tuna kan dinhmun han thlir vang vang hian, chu chu a dik si lo. Kan rinawm loh sa ve reng a, kristianna pawh hian min siam tha zo lo nge? Kristianna kan chan zarah rinawm lohna kan chhar ta zawk? chu chu thil ni thei a ni si lo. Ngaihtuah a ti thui vawng vawng hle mai.

SAIKHAMAKAWN  WORK  CAMP  REPORT

(Bunghmun ‘N’  Ni 19- 23/ Nov. 2012)

            Kan Kohhran chuan ni 19-23. Nov. 2012 chhung khan Bunghmun North, Mamit Distric ah kan neih a ni a. He work Camp ah hian kan kohhran atangin mi 16 an kal a, Sunday School hall tha tak an zuk saksak a ni. Work Camp a kal te an hlim tlangin hlawkthlak an ti hle a ni. Work Camp a kal te chu heng mite hi an ni.

1. Upa Zonunmawia                2. Pu C. Zakhuma

3. Pu VL Zidinga Sailo                       4. Pu Kamzawngliana

5. Pu Dennis Rohmingliana    6. Pu Zochama

7. Pu C. Lalremmawia                        8. Pu C. Lalhruaia

9. Pu C. Lalchhuansanga        10. Pu Ramdinsanga

11. Pu Jeffrey Lalremsanga    12. Pu Rinngaihzuala

13. Tv. Lalhmangaihsanga      14. Tv. Lalhmangaihzuala

15. Tv. Abraham Lalnunthara 16.Tv. Lalhruaitluanga

WORK  CAMP  THUNAWI

* Kohhran committee chairman, secretary leh sunday sikul Superintendent tena lawmthu an sawi kha chu a dan turah ka ngai ve mai a, naupang hovin an sunday school hall tur kan sak zawh hlima rawn tlan luh paha inkhawm ka van chhak tawh, chawlni ni thuai thuai se kan van ti, an han ti nak nak khan ka rilru a hneh ber. - Pu Mawitea

* Keichu ‘ Korean film a an in kha  a va ang, ka inkhawm chak lutuk tawh an ti mawlh mai kha’. - Pu Jeffrey-a, Pu Zochama, Pu Ramdinsanga (Pu Sangtea)

* Keichu kan inkhawm laiin kel leh vawk an lo lut tawh dawn lo an ti mawlh mai kha ka rilru a hnen. - Pu Hruaia ,Tv. Abrahama. Tv. Lalhmangaihzuala

* Kan Sunday School hall chhungah hian mei i chhem maih lo ang u, a fai em mai. - Tv. Hmangaihsanga S/o Pu Nghaka. Tv. Lalhruaitluanga.

* Biakin leh Sunday School hall signboard a ruala ka ziah vawikhatna niin ka hria. - Pu Dennisa

* Nileng leh zan inkhawm ban thlenga Bru-ho bawngtuthlawh sawmhnih (20) chuang han tahhriam chu namai lo tak a ni. -Pu C. Lalhruaia.

* Pavalai rawnghnawih thiam kan ni e, kan khawih pherh ngun deuh mai pawh a. Pu Dingtea, Pu Chhuansanga

* Saikhamakawn mistiri pathum ngawt mai helpera han tan chu a hahthlak lam deuh a ni e. -Ringaiha, Pu Kamzawngliana.

* Kohhran puitling ve meuh chairman thutna tur chair han siam chu a thawhdan a dang daih mai. Pu Mawitea.

* Bunghmun West ah emaw Work Camp kan neih dawn kan lo ti ve ngar ngar a. -Upa Zonunmawia, Pu C.Zakhuma

            Mipui Aw lam chuan Upa Zonunmawia  thusawi a tla tha deuh nge ni, Bunghmun N kohhran chuan Camping emaw Crusade neihpui turin ngawrh taka an sawm thu report kan dawng.

BIBLE QIUZ NO. 48

i Lalte  BUNG (17-22)

A Kâr âwl dah khat rawh :

Q1.Tichuan ......................... fapa Zedekia chuan a rawn naih a, Mikaia bianga a rawn beng a, “LALPA thlarau chuan i hnêna thu sawi tûrin khawi lamah nge mi .....................?” a ti a.

Q2.Tunah hian nangin, ‘Kal ta la, ngai teh, .....................chu sawta sawn a awm e, tiin i pu va hrilh rawh,’ i ti mai a: mi that ngei ang le,” a ti a.

Q3.Tin, .................... chungchâng thu pawh LALPAN a sawi a, “Jezreel khaw kulh bula uiin Jezebeli h a la ei ang.

Q4.Tin, LALPA vântirhkoh chu a lo kal nawn leh a, a rawn khawih a, “....................., ei rawh, ikalna tûr i chelh lo vang e,” a tia.

A bung leh Châng dah rawh :

Q1.Tichuan ani chuan ram thetea hotute tlangvâlho chu a han khâwm a, zahnih leh sawmthum leh pahnih an ni a; tin, chu mite zawhah chuan mi zawng zawng, Israelta       thlahte zawng zawng chu a khâwm a, sângsarih an ni a.

Bung: ...............          Chang: ....................

Q2.Tin, LALPAN Elija thu chu a lo ngaihthlâksak a; tichuan naupang nunna chu amahah chuan a lo awm leh a, a lo harh leh ta a.

Bung: ................         Chang: ....................

Q3. Tin, LALPA mithmuhah thil tha lo a ti thin a, a nu leh a pa kawng zawh te, Nebata fapa Israel-hote tihsualtirtu Jeroboama kawng zawhte a zawh ve thin a.

Bung: ................         Chang: ....................

Q4..Tichuan LALPA mei chu a lo tla a, hâlral thilhlan te, thing te, lung te, vaivute chu a kangral a, laih khuara tui chu a hip kang ta vek a.

Bung: ................         Chang: ....................

Q5.Tin, ani chuan a mit ata chalhrenna chu a lim ta thuai a; tin, Israel lal chuan zâwlneite zinga mi a ni tih a hre ta a.

Bung: ................         Chang: ....................

Hming : ......................................................

Section : .....................................................

BIBLE QUIZ  NO. 47 RESULT

Chhanna lut zawng zawng : 4

Chhang dik vek                       : 4

Lawmman dawngtu   :Lalthlamuanpuii (V.Sec)

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni.

HRIATTIRNA

            Mizoram Sorkar chuan kum 2012 Krismas vuakvetah halpuah hal a khap a. Halpuah leh Halmawite hi mihringte tana tangkaina neilo, hriselna tichhe thei, a lo thlawna sum tam tak sen ralna a nih bawk avangin, kumdangah pawh kan lo tih thin tawh angin, central YMA chuan Halpuah leh Halmawi zual lo tur leh hal lo turin mitinte a ngen a, Sub- Hqrs./ Group leh Branch zawng zawngte pawh mahni huamchhung theuhva hma lo la turin kan inngen bawk a ni.

            Tin, Silai lem a mu kahchhuah theih naupangin an hmang thin hi Central YMA chuan tha lo a ti bawk a, heng silai lem hi mi tam takin chhiat phah nan an hmang tawh avangin, an fate lei sak lo turin nu leh pate kan ngen bawk a ni.

            Vengchhung dawr kai ten hetiang phalloh thil hi zawrh turin la lo bawk ila a tha ang nge.

Sd/-

Secretary

Y.M.A

ZALEN  SUNDAY  CHANCHINBU  SEM  TUR  DUH  A  NI

                        A lak man thla khatah Rs 40/- (Sunday vawinga pawh nise) zingkar chauh sem.

Hlawh: Copy-1 Rs 10/- kan pe

Copy- 100 ah Rs 1000/-(With Bonus)

Copy- 200 ah Rs 2000/- (With Bonus)

            Mirinawm te tan a sem theih a, sum hnar tha tak a ni. Branch/ section/ Group- YMA/KTP/SAY/ PYD leh mimal tan inhlawhna tha tak a ni.

Contact- 2328226/ 9862363559

BIAKSANGA  BUILDING, NEWS AVENUE, TREASURY  SQUARE.

Sd/- (Lalremruata)

Manager

Zalen Leading Sunday Newspaper

PAVALAI  PROGRAMME

A hmun       : Vestry

A hun          : 29.11.12                                                                       (Ningazan)

Hruaitu      :Pu Kamzawngliana

Tantu                  :Pu Ramdinthara

            Tawngtai rual leh rilru sawia hun hman tur a ni.

TIAM  TLATE

            Benjamin Lalduhsaka s/o Pi Laltanpuii leh Pc. Lalbuatsaihi d/o Pc. Rokhara (L) te chu ni 29.11.2012 (Ningani) dar 1:00pm hian Saikhamakawn Kohhran biakin ah a nuam ah leh hreawmah pawh hmangaiha rawng inbawl tawn sak turin Pathian leh Kohhran ho hmaah Kohhran dan thianghlimin tiam tlat e, an ti dawn ta.

            Nupa hlim tak ni a, fanau maltluan chawia kumkhuaa leng dun turin Mipui Aw editorial board chuan duhsakna sang ber kan hlan e.

LAWMTHU  SAWINA

            Saikhamakawn M.H.I.P ten ni 12.11.2012 (Thawhtanni) khan kan harsatna te hria a, kan huan hnim tawh tak leh thlawhfai ngai tawh tak chu hnatlangin min thlawhfai sak a, M.H.I.P chungah kan lawm takzet a. Keini chhungkua chuan kan chunga in thatna te engtikah mah kan rul  seng dawn lo che u a. Tin, mimal tin chungah lawmthu kan sawi seng bawk si lo a, he chanchinbu kaltlanga lawmthu kan sawina hi, kan lawmthu sawinaah min pawmsak turin kan ngen che u a ni.

In khawngaihna dawngtu

Pu B. Lalrinzaua

te chhungkua

THU  ROTLING

** Inhmangaihna hi chhungkuaah a in tan a, dikna erawh chu thenawmteah.

Charlies Dickens

Tualchhung

,Pu Laltlanzara (Zarpuia) h/o Pi Lalnunnemi (Sen-i) te chhungkua chuan an inluah lai atangin Library Building bul (V.Sec) ah an insawn.

,Nl. Lucy Zohmunmawii te nufa chuan Society hnuai (V.Sec) ah an inbawl hrang.

,Pu VL Malsawma (V.Sec) te chhungkua chuan khawilo vahvel nan Taxi (Santro) an lei thar.

WORK  CAMP  LO  HAW

            Kan Kohhran chuan ni 19-23. Nov. 2012 chhung khan Bunghmun North ah work Camp-a nei a, mi 16 an kal. Henga kal te hi ni 23.11.2012 (Zirtawpni) khan dam takin an lo haw a ni.

HRIATTIRNA

            RSBY leh Health Care Scheme 2013 atan ni 26.11.2012 atanga December 2012 thlengin Pi Zohmingthangi Health Worker hnenah in ziahluh leh theih a ni a. RSBY ti thei tur te hi a list a kawl a a duh tan en theihin a awm bawk a ni. Enrollment tih nana ken ngaite:-

* Chhungkaw hotu lu ber ID

* House Number

* Enrollment Fee- Rs 30/-

* Phone Number

ZANIN  EPL  KHEL  TUR

Swansea Vs Liverpool  (7:00)

S.Hampton Vs N.Castle   (8:30)

Chelsea Vs Man.City  (9:30)

Tottenham  Vs W.Ham     (9:30)

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300

Work Camp-a kalte.

Mipui Aw 18.11.2012

MIPUI AW

Vol. XVIII Issue No. 47 Kristian Thalai  Pawl  Saikhamakawn Branch  Pathianni Dt.18.11.2012

VAWIIN CHANG VAWN

I biak in hung chhûng kawtlaia ni khat awm hi, ni sângkhat aiin a tha zawk si a.Suahsualna puan intea

awm ai chuan,Kan Pathian ina kawngkhâr vengtu nih pawh ka duh zawk a ni.

Sam 84 : 10

KOHHRAN PROGRAMME

18.11. 2012 (Pathianni)

            Vawiin Pathian ni chawhma inkhawm atanga zan thlengin Crusade hman chhunzawm zel tur a ni a. Speaker Rev.Lalzuithanga Synod Executive Secretary a ni.

KTP PROGRAMME

 Dt. 19.11. 12 (Thawhtan zan)

Hruaitu         : Nl V.Lalrindiki

Tantu             : Tv Lalrinawma

Thupui   : Isua nen rawngbawlnaah

Hawngtu       : Tv Lalhmangaiha

Hla hruaitu   : Tv R.Zodinsanga

turte                 Tv P.C.Vanlalhriatpuia

Musician       : Upa Lallawmchhunga

                          Tv. R.Lalzamlova

VAWIIN  TLAI   FELLOWSHIP

A hmun       : S.S Hall

Hruaitu         : Pu Lalduhkima

Tantu          : Tv Roluahpuia

Thupui        : Meantal Health

Hawngtu    : Tv P.C.Vanlalhriatpuia

          KOHHRAN  HMEICHHIA                            PROGRAMME (Ni 20.11.2012)

Hruaitu         : Pi C.Lalthanmawii

Tantu             : Pi Zonunsiami

Thusawitu     : Pi Laltlanzari         

           

           

SERMON

I RAM LO THLENG RAWH SE

            Lal Isua Krista chuan tawngtai dan tur ti hian min zirtir a. “Chutichuan, nangni chuan hetiang hian tawngtai rawh u :-

‘Kan Pa vana mi, I hming zahawm rawh se. I ram lo thleng rawh se.....’ tiin tawngtai thin turin min zirtir a. Lal Isuan tawngtai dan min zirtirna han thlir vang vang hian Pathian ram a ngaih pawimawhzia leh Pathian ram hi keimahniah hian a thleng lovang tih hi a hlau em em a ni tih a lang chiang hle a ni. Mihringin kan damchhung hun atana kan mamawh ei leh in tur thildang zawng zawng aiin ‘Kan Pa vana mi. I hming zahawm rawh se’ tia Pathian address zawh chiahah ‘I ram lo thleng rawh se’ ti nghal turin min zirtir a ni. Hei hian Pathian ram Lal Isuan a ngaih pawimawhzia a tilang chiang hle a ni.

            Chuti taka Lal Isuan a ngaih pawimawh Pathian ram chu nangmahah/keimahah hian a thleng tawh reng em tih hi a pawimawh ta hle mai. Pathiam ram keimahniah a thlen avanga hlimna leh lawmna kan chan tur lam ringawt han thlir hi chuan kan duh viau mai. Amaherawhchu he Pathian ram hi kan nunah hian hlimna leh lawmna lam hawi zawng ringawt hi chuan a lo thleng reng dawn lo tih hi kan hriat a tha. Pathian ram kan chan avanga hlimna leh lawmna par kan tlan maiah hian duhtawk theih a ni lo. He Pathian ram hi kan nunah, kan chhungkuaah hian a tak takin a lo thleng dawn a nih chuan tihtur leh tih loh tur tam tak kan nei dawn a, lungngaihna leh tawrhna te pawh hmachhawn a tul dawn a, channa leh tlakchhamna ruamahte pawh kan tlukluh a ngai dawn a ni tih hre reng chungin ‘I ram lo thleng rawh se’ kan tih a ngai a ni.

            Pathian ram hi a thlenna hmunah tak tak chuan keimahni mihring duhdan leh mizia hi a lal tawh lova, Pathian ram a nihna ang tak hian a lalber leh thuneitu chu Pathian a nih miau tawh avangin lalna leh thuneihna zawng zawng hi a ta a ni tawh a. He khawvelah hian kan nunna leh kan awmdanah hian thuneitu nihna hi Pathian hian a chan puhlum a ngai tawh thin. Chuvangin kan nun, kan chhungkua hi a duhdan ang leh a remruatnain a kal tawh a nga, thil eng pawh ti dawn ila, eng hunah pawh ni sela, enge Pathian duhdan tih hi kan ngaihtuah hmasak ber tur a ni. He khawvel dan ang hian kan awm ve a rem tawh lo.

            ‘I ram lo thleng rawh se’ tia nitin zantin tawngtai thin te hian heng zawng zawng ngaihtuah chung hian kan nun hi Pathian ram thlenna atan kan phal tak tak em? Kan chhungkuaah hian a tak takin Pathian ram hi lo thleng se kan duh ang em? Kan ngam tak tak em? Eng pawh thleng se, I ram lo thleng rawh se ti a, a zawng zawng a inhlan ngamte nunah hian a takin Pathian ram alo thleng thin.

                       

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

HUNPUI  LO  THLENG  TUR  HI

             Kan hma lawkah Mizo ten hunpui kan neih Krismas chu kan thleng leh mai dawn a. He hunah hi chuan a tu a te pawh mai hi kan phawklek vek mai ti ila kan sawi sual lovang. Thil sual leh tha lo tak tak pawh he hunah hian a hluar hle thin reng a ni. Chumi kawnga kan fihlim theih nan khawtlang hruaitute leh mi thahnemngai ten hma an la thin a he an hmalakna hi a tua te pawhin kan zawm thiam a tul hle awm e.

            Hunpui kan lawmna hmanrua chi hrang hrang a tam mai a, kan lawmdan pawh a in anglo hle thin, he hunpui lo thleng tur hi ram leh khawtlang phalloh thil nena hmuah kan lo tum anih chuan a fello viau ang. Chumi kawngah chuan inenfiah a tul takzet a ni. Sawrkar lam atangin eng eng emaw an rawn khap leh ngei dawn a, tin, vengchhung YMA lam pawhin Krismas leh a kaihhnawi thilah phalloh thil an nei leh ngei ang. Mipui lam pawhin kan zawm a tul takzet a ni. Halpuah leh thil dang engeng emaw khap a ni thin a, hengte pawh hi zuar lo turin vengchhung mite kan inbuatsaih a tul hle.

            Tute pawh hian zalenna kan nei theuh a, chu chu midangte harsatna siam zawng leh dan tai zawnga kan hman lo a tul hle. Hlim leh lawm taka hunpui lo thleng tur hi kan hmang thiang a, kan theihtawpin kan inbuatsaih tur pawh a ni, mahse chu kan inbuatsaihna chuan pawi a khawih lo tur a ni. Krismas lo thleng mai tur hi dan hnuaiah hlim takin a hman theih a ni tih hre chungin tun atangin inbuatsaih ang u.

ARTICLE

CHAKNA  I  NEI  A  NIA

            Khawvelah hian mi in ang lo, sa in ang lo, dinhmun leh nihna te, zahawmna kan neih te leh theihna kan neih te hi a inang lo hle mai tih chu in awih chawp tir tuma tu pa tawngkam thiamna hmanga zak kau zawk zawka ban vai chunga sawi tehchiam a ngai ve lo, tlan pah pawhin sawi ila, kan hrilha te chu an in hlan nghal zung zung ngei ang le. Mihring te hi Pathian hian min siam ropui hle mai, finna min pek te hi a va ropui tak em, mihring finna thuk zia hi a chhiar zau leh hawi zau tan phei chuan a ropui in awih awmloh khawp zu nia. Finna mai a la ni lo, mitin te hian theihna leh chakna kan nei theuh chu chu kan hriatchiana kan hman thiam pawh a tul hle. he kan theihna leh chakna, finna te hi kan hman thiam theih na Pathian in chhia leh tha hriat na, thil thliar thiamna min pe bawk a, hei tak hi thilsiam zawng zawng aia kan danglamna pakhat a ni reng a ni.

            Kan sawi lan tak ang khan mihring te hian chakna, theihna (ability) kan nei theuh a, mahse kan hman thiam dan erawh a in ang lo khawp mai. Thenkhat chuan ka thei lo emaw kan sim thei tak tak thlawt lo emaw te an ti fo thin a, hengmi te hi mahni in hrechiang lo, chakna hmang thiamlo a ni ve thlawt ani. Ruihtheih thil te, zuk leh hmum lam chi reng reng te pawh a ni ang, ka sim thei tawh lo kan ti ngawt te hi kei a mak ka tiin ka lo tlawmngai thin. Kei ai mahin siamtu Pathian hi a rilru a va na dawn tak em, chakna leh theihna min pek hian keimahni ngei pawh kan thunun zo lo a ni a. Kan sim duh thil te, kan tih duh tawh loh thil te hi engvangin nge kan tih leh tehlul ang le, kan duh duh kan lak na ban hi thunun a har viau em ni? a va har lo tak em!!! A bik takin ruihtheihthil leh zuk leh hmuam hi thlur ta bik ila, Pathian puihna lo chuan ka thei tawh lo ti ngawt suh, nangmah ah khan Pathian ngeiin sim hmak theihna tur khawp chakna chu a dahsa reng, hmang mai la i thei a ni mai. Duh zawng leh chak zawk apiang tih bawrh bawrh mai te, ka tan ala thalo ang tih hrethiam miah lova emaw hre reng chunga tih emaw  pawh a ni ang, chutiang mizia kan neih chhung chuan kan mihrinna kan la phawkchhuak zo lo a, ramsa ang lek kan la ni tih hi kan hriat a tul awm e.

            Pathianin mahni duh duh thlang a, duh loh zawng ti lo a, duh zawng ti thei zel turin chakna leh theihna min pe a, hei hi hmang thiam ila, mahni in thunun na kawng lam i zawh ang u. Mahsela sual bawih kan nihna erawh keini chakna hmanga sim theih a ni lova, mahsela sualin min bawihna atana a hmanrua zawng zawng erawh a sim theih vek a ni. Chu chakna leh theihna chu Pathianin keimahniah a dah vek a ni tih hi i hre thar theuh ila, ka thei lo tih te, ka sim tak tak theilo ti thin te hian sim an duh tak tak lo a ni. A chhan chu an sim duh kha eng pawh ni rawh se, a ti leh tu chu mahni bawk kan ni leh tho, kan duh zawng tih a, duh loh zawng tih loh mai hi mahni in thunun dan kawng awmchhun a ni; a hman thiam i zir bawk a u. He thu lo chhiar tu zawng zawng te he thu hi hre turin ka duh che a ni, mahni duh duh a inthunun thei turin CHAKNA  I  NEI  A  NIA....

HRISELNA HUANG

ATHLO

A chanchin tlangpui: A kung hi feet khat atanga feet thum ani tlangpui. Hling a ngahin a kung leh a hnah hi hlingin a khat vek tih theih a ni. Chi hnih - a par var chi leh a par dumpawl chi a awm a, a kung a bikin a zung hian potassium chloride leh potassium nitrate a pai hnem hle a ni.

Damdawia hman theihte: A zung, a rah leh a kung pumpui.

Damdawia hmannate:

Khuh, thawhah, thawk harsa: A zung 60gms tui liter khatin meina vak lovah a tui 250ml anih thlengin chhum a 30ml leh khawizu 5ml chawhpawlha nitin zing leh tlaiah in a tha.

Kala lungte awm: A zung 60gms densawma tui liter khatin mei na vak lovah a tui 250ml anih thlengin chhum a, 60ml zelin zing leh tlaiah thil ei leh in hmain khawizu thirfiante khat nen ei thin tur.

Ha na: A rah hal a; a khuin ka chhung ur tir tur. A zung chhumna tui 30ml leh kawizu 5ml chawhpawlh a nikhatah vawi hnih in bawk tur a ni.

Ruhseh, awm nuam lo: A kung 50gms densawma tui 400ml-in mei na vak lovah a tui 100ml anih thlengin chhum a, a tui leh chhawhchhi hriak 100ml chawhpawlh tur a ni. Chumi hnuah a kung densawm 25gms, chawhpawlh leh a, mei na vaklovah 100ml anih thlengin chhuan leh tur a ni, chhuan lai hian chawh reng tur. Dah daih deuh hnuah a hriak sawr chhuah a, saidawiumah dah that tur, nitin ruh na lai leh taksa na laiah hman thin tur a ni.

Zun nei lo: A rah den sawm tui sawr 30ml leh rakzu 30ml chawhpawlh a vawi hnih vawi thum in tur.

Luakchhuak: A zung densawm tui sawr 30ml leh rakzu 30ml chawhpawlh a vawi hnih vawi thum in a tha.

AWMPAWNG

A chanchin tlangpui: Hrui zam a ni a, a hnah chu hnah hlai hlep hlawp, hnah bial hmawr zum a ni. A rah no hi chawhmeh atante an hmang thin a, a rah chang tawhte hi nawhfe atan an hmang thin.

Dandawia hman theihte: A hnah leh a rah.

Damdawia hmannate:

Mit mal: Ahnah densawm tui sawr far khat emaw far hnih emaw mita far a tha.

Tai pan: A hnah rawtsawm diaka tai panah hnawih a tha.

Thinlian: Nawhfe densawm diak leh nu hnute tui chawhpawlh a hnar chhungah farin; hnar a tangin hnap tui alo chhuak anga, a hnap tui chhuak a reh hunah Luah bawnghnute Ghee chulh a khawsik a tel loh chuan tui vawta inbual a tha.

Luna: A mu tih dip hnarin hip luh a tha. Hnar atangin hnap tui a chhuak anga luna a tireh thei.

BIBLE QIUZ NO. 47

i Lalte  BUNG (12-16)

A Kâr âwl dah khat rawh :

Q1.LALPA mithmua thil tha lo tak tia a sualnate avâng leh .................................... kawng zawhc hu            zawh vea Israel-hote thiltihsualtira a sualna avângin.

QChutichuan lal chuan mi a rawn a, ..................... bawng no lem pahnih a siam a; an hnênah chuan, “In tan ............................... khuaa han kal chu a harsa lûtuk em a; aw Israelte u, en teh u, Aigupta ram ata hruai chhuaktu che u in pathiante hi,” a ti a.

Q3.Tin, LALPAN tun la laa .......................... chhûngkua rawn tiboraltu tûr ........................ chunga lal a insiam ang; tunah pawh hian engtin nge ni ta ang le?tawh a ni.

Q4.Tin, a fapate hnênah chuan,“............................ mi siamsak leh u,” tiin a sawi a. Tin, an siamsak ta a.

A bung leh Châng dah rawh :

Q1.Tin, Israel lal Baasa chuan Juda-ho a han bei a, Juda lal Asa hnêna lût tûr leh chhuak tûr dan nan Rama khua a siam a.

Bung: ...............          Chang: ....................

Q2. Chutichuan Jeroboama chuan, Ephraim tlâng ramah Sekem khua a siam a, chutah chuan a awm a; tin, chuta tang chuan a chhuak a, Penuel khua a siam a.

Bung: ................         Chang: ....................

Q3. Tin, Baasa chu a pute hnênah chuan a muhil a, Tirza khuaah an phûm ta a; tin, a fapa  Ela chu a aiawhin a lal ta a.

Bung: ................         Chang: ....................

Q4..chutichuan kawng dangah akal a, Bethel-a a lo kalna kawngah chuan a haw leh ta lo      va.

Bung: ................         Chang: ....................

Q5.An hnênah chuan, “Heng mipuiho, ka hnêna, ‘I pan kan chunga nghawngkawl anghah hi           min tihzansak rwah,’ tia sawitute hi ka chhan dan tûr rem engnge min ruatpui le?” a ti a.

Bung: ................         Chang: ....................

Hming : ......................................................

Section : .....................................................

BIBLE QUIZ  NO. 46 RESULT

Chhanna lut zawng zawng : 4

Chhang dik vek                       : 4

Lawmman dawngtu   :Puia (vengsang)

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni.

HRIATTIRNA

            Mizoram Sorkar chuan kum 2012 Krismas zawrh leh hal khap a khap a. Halpuah leh Halmawite hi mihringte tana tangkaina neilo, hriselna tichhe thei, a lo thlawna sim tam tak sen ralna a nih bawk avangin, kumdangah pawh kan lo tih thin tawh angin, chntral YMA chuan Halpuah leh Halmawi zual lo tur leh hal lo turin mitinte a ngen a, Sub- Hqrs./ Group leh Branch zawng zawngte pawh mahni huamchhung theuhva hma lo la turin kan inngen bawk a ni.

            Tin, Silai lem a mu kahchhuah theih naupangin an hmang thin hi Central YMA chuan tha lo a ti bawk a, heng silai lem hi mi tam takin chhiat phah nan an hmang tawh avangin, an fate lei sak lo turin nu leh pate kan ngen bawk a ni.

            Vengchhung dawr kai ten hetiang phalloh thil hi zawrh tura la lo bawk ila a tha ang nge.

Sd/-

Secretary

Y.M.A

ZALEN  SUNDAY  CHANCHINBU  SEM  TUR  DUH  A  NI

                        A lak man thla khatah Rs 40/- (Sunday vawinga pawh nise) zingkar chauh sem.

Hlawh: Copy-1 Rs 10/- kan pe

Copy- 100 ah Rs 1000/-(With Bonus)

Copy- 200 ah Rs 2000/- (With Bonus)

            Mirinawm te tan a sem theih a, sum hnar tha tak a ni. Branch/ section/ Group- YMA/KTP/SAY/ PYD leh mimal tan inhlawhna tha tak a ni.

Contact- 2328226/ 9862363559

BIAKSANGA  BUILDING, NEWS AVENUE, TREASURY  SQUARE.

Sd/- (Lalremruata)

Manager

Zalen Leading Sunday Newspaper

IN  LUAH  TUR  AWM

            Community Hall Choka hi kum rei tak chhung man lova luahtir thin a ni a. Nakum 2013 atang hian man chawia luah turin Committee chuan a rel a, a luah duh tur chuan November 25. 2012 aia tlai lovah Branch YMA secretary hnenah dilna lehkha ziaka thehluh tur a ni e. In luah diltu chu vengchhung mi ngei an ni tur a ni. Luah man hi Rs.800/- a ni anga, electric bill an chawi bawk ang.

YMA  PROPERTY  HAWH CHUNGCHANG:

            YMA Bungruate hi mi tupawhin hawh theih a ni a, Bungrua te hi Branch-in kawl lovin Section kutah dah a ni a. Chuvangin Bungraw hawh duhte chuan Section  hruaitute hnenah dilna lehkha siama hawh tur a ni e.

A hawh man hetiangin :

1. Dekchi pakhat (ni khatah)                                                   =  Rs.20/-

2. Thutthlengsei (Sawmnga chin)                                           =  Rs.50/-

3. Gas Stove pakhat (ni khatah)                                              =  Rs.50/-

4. Portable Mike (ni khatah)                                                   = Rs.100/- (hei hi erawhchu Chairman, Light & Sound Sub-Committee hnenah dil thin tur a ni e)

            Bungraw hawh reng reng a hawhtuten fel takin a kawltu hnenah an dah leh ngei tur a ni a. Tin, Bungruate hi tihbo leh tih chhiat palh theih a ni a, tihbo emaw tih chhiat emaw a nih chuan a hmangtuten an tih bo/chhiat ang hu an chawi tur a ni ang.

Sd/- Secretary,

Branch YMA

AIENG  TUI  LEI  DUH  TAN

            Aieng tui fir tha tak duh tan engtik lai pawhin leitur ka nei reng e. Bottol khat Rs 70 a ni e.

Pi Biakdiki (V.Sec)

Phn No. 8974215715

Tualchhung

,Lalrawngbawli d/o Pu Zodinliana(V.Sec) chu damlohna avangin Civil Hospitalah enkawl a nih hnuin dam takin a lo chhuak.

ZANIN  EPL  KHEL  TUR

Fulham           Vs  Sunderland  (9:30)

Petrol man tlahniam

            Tunhnai khan India ramah pettrol man Rs 1.14- in a tla hniam a, Mizoramah pawh hman nghal a ni. Food, Civil Supplies & Consumer Affairs Department chuan hetiang hian bithliah thar a tichhuk.

Petrol Man Thar

Aizawl rate

Petrol               - Rs. 66.36 /Litre

Premium          - Rs 75.36 / Litre

BIAK  IN  HAWNG

            Saikhamakawn Presbyterian Kohhran chuan nimin inrinni khan Biakin thar hawnna neih a ni a, A hawngtu hi Rev. Thangzauva Synod Moderator a ni. Chhun dar 12:00 ah hawnna hun neih niin Biakinah hian inkhawm tawi neih nghal a ni a, in khawm ban hian Biak In thar lawmna ruai ropui tak kohhran mipui te kil ho nghal a ni.

            Tunah hian kohhran upa hi 8 an awm a. Dan zawhkim hi mi 801 an awm mek bawk. Kohhran member mipa zawng zawng hi 576 niin hmeichhia zawng zawng hi 618 an ni thung a, tichuan kohhran member zawng zawng 1194 an ni.

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300