Mipui Aw 30.9.2012

MIPUI AW

Vol. XVIII Issue No. 40 Kristian Thalai  Pawl  Saikhamakawn Branch  Pathianni Dt.30.9.2012

INKHAWM HUN SAWN

            October thla atang hian kohhran inkawm hun sawn a ni a, dar 6:00 ah dar hmasa a ri anga 6:30 tan tur a ni. Naktuk zan atanga hman tan nghal a ni ang.

KOHHRAN PROGRAMME

Kristian chhungkaw ni

Chawhma S.S Inkhawm

Tantu              : Pi Chawngthangliani

Chawhnu Inkhawm

Thupui           : Chhungkuaa Pathian biak

Thuhriltu       : Upa Lallawmchhunga

Zan Inkhawm

Thupui           : Chhungkuaa rawngbawl

Thuhriltu       : Upa Lalzuiliana

K.T.P PROGRAMME

Ni 1.10.2012 Short Sermon( Thawhtan)

Hruaitu           : Tv. R.Zodinsanga

Tantu              : Nl. Lalhruaitluangi

Short Sermon            : Tv Abraham Lalnunthara

sawitu turte      Tv Malsawmzuala

Thilpek Lakhawm: Nl Malsawmtluangi

tu turte               Nl C.Zosangliani

October thla chhunga Zai Hruaitu leh Musician turte

Zai Hruaitu    : Pu Lalduhkima

                          Tv F.Laldingliana

Musicians       : Pu Lalremruata

                          Tv Zomuanpuia

VAWIN  TLAI  FELLOWSHIP

A hmun          : Sunday School Hall

Hruaitu           : Nl. Lalhmunsiami

Tantu              : Nl. R.Zonuntluangi

KOHHRAN HRIATTIRNA

            Saikhamakawn Prsbyterian Kohhran chuan Zirlai ti thate lawmpuina hun a hmang leh dawn a. HSLC leh a chunglam pass tharte September thla ral hmain Kohhran Secretary hnenah in report tur a ni e.

SERMON

MIN  TAWNGTAI  TIR  RAWH

                                                                                                                                                                                                                                                                                               

            “L^wmin ka khah theih n^n hmuh che ka duh >m >m a, i mittui hre rengin achh<n azanin b^ng lovin ka \awng\ainaahte chuan ka hriatpui \hin che av^angin Pathian hn>nah l^wmthu ka hril a ni” II Tim 1:3

            Chrissy chu Pathian hnen lak ata hun rei tak chhung a tlanbo a, a chhungte lakah a hel a, in atangin a tlan bo bawk a. A chhungte leh Pathian hnen lak ata a hla thei ang ber a awm a tum a ni.

            Zan khat chu, he tleirawl hian thil mak deuh mai a hre ta a, a muhil lai chu a tho a, a chhungrilah chuan mi tute emaw hian an tawngtai sak ni tlat hian a hre ta a.Mi tute emaw chuan an lo tawngtai sak reng chu lo ni in. A pa pastorna biak ina lawi thin zawng zawngte chuan Chrissy tan an lo tawngtai thin a. Kar khata an tawngtai inkhawm an neih thinah chuan member pakhat chuan Chrissy tana tawngtai thin turin a lo thawh a, an lo tawngtai ta thin  a ni.

            Zana thil danglam tak a hriat hnu nihnih hnu chuan an inah chuan a haw ta a. A pa mak ti lutuk tawh hnena a zawhna hmasa ber chu, “Tuin nge min lo tawngtai sak thin?” tih hi a ni. Chumi hnuah chuan ngaihdam te dilin Pathian hnenah a intulut thar leh ta a ni.

            Tirhkoh Puala’n Timothea hi thahnemngai takin a tawngtai sak thin thu a hrilh a. Hetih lai hian Timothea hi fiahna leh harsatna tam tak a tawh mek lai niin a lang. Timothea tan pawh hian Tirhkoh Paula’n a lo tawngtai sak thin thu a hrait hian a lawm ve ngei ang tih a rinawm a ni.

            In tawngtaipui hi kan va han tul tak em! Mizo chu mite thatlohna tawngtaipui aiin mite sawichhiat mai kan ching thin. Hei hi sim a kan chaklohna laite kan intawngtaipui thin hi a hun tawh tak zet zet a ni. Tawngtaina chuan thil nasa tak a ti thei si a. Kohhran hruaituten mipuite tan, mipui te pawhin kan hruaitute tan leh midangte tana kan tawngtai thin hi a va pawimawh em!

            Khawtlanga ruihhlo kan do na kawngah pawh hian a do tute leh ruihhlo titute tan hian kan tawngtai hnem a va tha em. He tawngtaina rah hi Pathian hian min hmuh tir ngei pawh a rinawm a ni. Chrissy pawh midangte tawngtaina avangin chhandamna a chang a, kan veng chhunga ruihhlo ngaite pawh hian an chang thei tih hriain Kohhran mite kan tawngtai nasat lehzual a hun tawh tak zet zet a ni. A chhanna erawh kan duh hunah a lo thleng lo mai thei mahse Pathian hian kan tawngtaina te hi a hnawl ngawt lovang tih hi i ring theuh ang u.

                       

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

                        ZIRNA

            Zirna hi mihringte min ti fingtu leh mi pangngaia min chhuahtu a ni tih chu kan hriat theuh a rinawm. Keini Mizo te ngei pawh zirna that zia leh mihring te min tih hmasawn dan te kan hriatchian chhoh ve tak avangin  nu leh pa tam tak te pawh an fate zirna kawngah neih thinglungkhawng tak meuh  meuh in kan tlan ta. Amaherawhchu kan zirna kalpui dan erawh thiamna tak tel lovin a kal vak theih a ni tih hi kan hriat tel a tul awm e.

            Tunlai kan Mizo khawtlang nunah ngei pawh zirna lama kan in tlansiak nasa hle mai,midangte phaklo nih kan hlau a theihtawp chhuaha pakhatna nih ngei tumin inelna pawh a nasa hle tawh a ni. Keini vengah te ngei pawh lehkhathiam kan lo pung ve ta hle mai a, a lawmawm e, mahsela tun dinhmunah erawh duh aiin inelna rilru kan la pu lo deuh emaw chu aw.. a tih theih, la naupang zawkte pawhin zirna lam kawngah thangharh ila, midangte aia hniam zawk hlauna rilru nen kan zirlai te zir chung leh kan zir chin chhawr tangkai zel thei tura hrethiam chunga tan kan lak sauh sauh a tul takzet a ni.

ARTICLE

TUNGE  MI   ROPUI  CHU?

 

                        Mihring kan nih chhungin kan nuna thil thleng reng rengah mahni kan pawimawh ber a, kan nunah a chhelam emaw a tha lamah emaw keimahni in kan duh phawt chuan kan nuna awm hlen turin kan duh chuan kan la lut hmak thei a ni tih hi kan hre theuh awm e. Mihring nun hi danglam thei, kan thil hmuh leh tawn te hian nasa takin nghawng nei thin a, chu chuan mi tha leh thalo ah a lo siam mai thin a ni. Pathianin kan hringnun zinkawng a lo duan danah hian hei hi mi tha  nise hei hi chu misual tak nise, hei ve thung hi chu rethei in he pa hi chu hausa rawh se tia duan sa a nei hian ka ring lo. Mihringah theihna te chakna te chhia leh tha hriatna thiang min pek hmangte hian kan nun kawng rel fel turin min siam zawk a ni tih hi kan pawm ngam a tul awm e.

 

                        Mihring kan nih chhung hian a tu te pawh mai hian hmelma kan nei theuh a, nun kawng pangngai min zawh tir thei lo tu, min ti buai tu enge maw chu kan nei theuh awm e. Kan hmelma lian ber erawh keimahni a ni fo thin tih hi kan pawm tlang ngei ang. Miin a thil tih tha lo tak sim duh thin mahse sim thei lo in a awm fo thin, ruihtheih thil ti thin te pawhin an duh ang angin a sim thei lova, mahse chu an sim theih loh chu anmahni kutkawih ngeia an tih a ngei si, ti lo mai se an sim ni mai tur kha an ti leh tho thin si a, engvang nge? anmahni vang a ni. Tunge an hneh loh ruihtheih thil kha nge an hneh lo anmahni kha!! Chhan thiam har tak tur chu ani, mahse ngun taka ngaihtuah chuan anmahni an inthunun zo lo a, an taksa chunga chhiatna thlen tir tu hmelma chu mahni bawk hi a lo ni leh thin.

 

                        Khawvelah miropui leh hmingthang tak tak te a lo piang chhuak a, an nihna vang te, an thiamna vang te a hmingthang leh ropui an ni thin. Mahsela chutiang a nihna ropui leh thiamna chu engtia an neih nge? An tumruhna te an taimakna te vanga nei kan ti anih pawhin a mawh love, mahse anmahni a in thunun theih vang a ni, thatchhiatna leh peihlohna te pawhin a tibuai ve ngei ang mahse chu chuan a dang zo lova, chhunglam chakna in a dan zawh loh mihring chu pawnlam thil chuan a dang zo ngai lo tih hi kan hriat a pawimawh hle ang. Kan hlawhtlinna tura min dal tu lian ber chu keimahni hi a ni tih kan hriat a chu mibei let leh do let ve tura mahni inthunun thei mi kan nih a tul hle a ni.

                        Engkawng pawh zawh ila keimahni ngei mai hi ka duh duh dan a kan awm tir theih chuan miropui kan ni anga, khawvel hriatah ropui lo mah ila miropui te zingah chhiar tel kan ni ngei ang.

HRISELNA HUANG

SLIPPED DISC LEH SCIATICA(SAI-TI-KA)….

-Pricilla Zodinpuii

            Slipped disc hi a then tan chuan la hriat ngai loh thil a ni mai thei a, mahse kan veng chhungah ngei pawh he natna nei hi an awm ve nawk avangin ka hriat ve chhun ang angte he chanchinbu kaltlang hian ka rawn sawi ve leh dawn a ni. Mahse, chumi hmain he natna lanchhuah dan chi khat sciatica/saitika tih hi lo sawi hmasa ila. Sciatica tih thumal hi mizo te a bikin Saikhamakawn mipuite tan chuan a mikhual lo hlein a rinawm a, ‘ka saitika a chhuak a’ an han tih tawh hi chuan  ke nâ kal tha theilo rilru ah alo lang nghal uarh uarh awm e.

Sciatica chu enge?

            Mihring taksaah hian hriatna thazâm(nerve) kan tih hi tam tak a awm a, chûng zinga pakhat kan hnungzâng (spinal cord) atanga chhuak kan kâwng achin hnuailama kan thil hriat theihna min petu chu sciatic nerve an ti a. he nerve hi mihring taksa a nerve lian ber  a ni nghe nghe a ni. Chu sciatic nerve chu chhan hrang hrang vangin a chhe thei a, hemi anih avang hian kan kâwng a chin hnuai lamah hriatna thazam natna chi hrang hrang, zeng thlengin a thlen thei a ni. Chutiang ang sciatic nerve dikloh vanga nâ kan neih chu sciatica an lo ti ta a. A awmziaah chuan natna ani lo a,a lan chhuah dân mai zâwk ani.

A awm chhan:

            Achhan hi sawi dawn chuan atam maia,nerve natna nei ve hrim hrim te, sciatic nerve bul vela thil awm dik lovin nerve ava nek chep vang a awm a ni tlangpui a, intihpalhte,kâwng ruh inpelsawlh leh diklote,bâwkte leh natna chi hrang hrang vangin a awm thei a, râipuar lai pawn a awm thei a ni.

A nat dân :

            Kâwng kham/nâ ,mawng bawr nâ , malpui hnunglam, chutiang zelin chhuk zâwngin a zawh thla thin a ni. A nat mai baka tisa a ti ngawng chhû in ke zâ mer mer a inhriatna te pawh a awm thin. A thenah a na nêp deuh a,a thenah chuan a na lutuk a, ke a kal harsa khawp tein a awm thin a ni.

A enkawl dân:

            A enkawl dan hi sawi fak a harsa a, sciatica awm chhan a zira enkawl tur a ni a. Chuvangin hetiang natna nei  i nih chuan ruh doctor (orthopaedician) hnenah inentir vat thin tûr ani. A awm chhan zawn chhuah vat vat kha a tha ber a ni. Tunlaia sciatica awmna chhan tam ber chu a thupui a kan hman ang khian hnungzâng ruh in pelhsawlh (slipped disc) an tih a ni a. A lehpekah engchiah nge anih kan rawn ziâk zawm leh dawn ani.

Invêndân :

Sciatica hi naupang natnate anga hri venna lâka invên mai theih thil a ni lova. Mahse kan invên theihna awmchhun chu kan taksa abikin kan kâwng lehhnungzângte dim thiam in, rit kan châwi anih pawhin rualkhai takin kan taksa hmang thiam ila. Tin,taksa insawizawi lam pawh tih than a tha. Heng hi puitling leh kum upa tân chauh ani lova, kum naupang tak tak a hetiang natna nei hi an tam tawh a, chuvangin mahni i in dim thiamin i inenkawl tlâng theuh ang u.

BIBLE QIUZ NO. 40

iI SAMUELA BUNG 1-5

A Kâr âwl dah khat rawh :

Q1.Tin, Davida chuan a hnênah, “Khawi atanga lo kal nge i nih?” a ti a; tin, ani chuan a hnênah, “_____________ mite tanhmun atangin ka lo tlan chuak a ni,” a ti a.

Q2.Tin, Davida chuan a hnêna mi zawm zawng zawng chu a hruai chho va, mi tin, an chhûngkuate theuh nen, ________________ khuaahte chuan an awm ta a.

Q3.a dawttu chu Kileaba, Karmel mi Nabala nupi Abigaili laka mi a ni; tin, a pathumna chu Absaloma, ______________ lal Tamaia fanu Maaki fapa a ni a;

Q4.Beeroth khuaa mite chu ____________-ah an tlan a, tun thlengin chutah chuan an awm ta a.)

Q5.Chutichuan Israel upa zawng zawng chu Hebron-ah lal hnênah an kal a; tin, lal Davida chuan Hebron-ah chuan LALPA hmaah an hnênah thu a thlung a: tin, _______________chu Israelte chunga lal atân hriak an thih a.

A bung leh Châng dah rawh :

Q1.Tin, Davida chuan a hrilhtu tlangvâl hnênah chuan, “Engtin nge Saula leh a fapa onathana chu an thi tih i hriat?” a ti a.

Bung: ...............          Chang: ....................

Q2. Tichuan LALPA chuan in chungah ngilneihna leh thutak lantir sela: hêng thil in tih avang hian kei pawhin in ngilneih man chu ka rul ang che u.

Bung: ................         Chang: ....................

Q3. Saula chuan hmei a nei a, a hming chu Rizpi a ni a, Aii fanu a ni. Tin, Is-bosetha chuan Abnera hnênah, “Engati nge ka pa hmeinu hnênah i ka;?” a ti a.

Bung: ................         Chang: ...................

Q4. Tin, Is-bosetha lu chu Hebron-ah Davida hnênah an rawn la a, lal hnênah chuan, “Ngai teh, hei, nangmah thah tum, i hmêlma Saula fapa Is-bosetha lu; LALPA chuan ka LALPA phuba chu vawiinah hian Saula leh a thlah lakah a laksak ta a ni,” an ti a

Bung: ................         Chang: ...................

Q5. Tin, Davida chu kulhah chuan a awm a, Davida khua a vuah ta a. Tin, Davida chuan Milo atangin a velin kulh a siam a, a chhûng lamah nen,

Bung: ................         Chang: ...................

Hming : ......................................................

Section : .....................................................

BIBLE QUIZ  NO. 39 RESULT

Chhanna lut zawng zawng : 5

Chhang dik vek : 5

Lawmman dawngtu   : Rebecca (V.sec. CZC)

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni.

PAVALAI PROGRAMME

A hun : Ni.4.10.2012(Thursday)

A hmun : Vestry

Chairman : Pu Kamzawngliana

Tantu  : Pi Suithanga

            Tawngtai rual leh rilru sawia hun hman tur a ni ang.

HRIATTIRNA

            MHIP, Saikhamakawn Branch chuan kan din champha Vawi 32-na denchhenin khawtlang mipuite hrisel nan a thlawna inentirna (Free Clinic) a buatsaih dawn a, tualchhung mipui a duh apiang tan Doctor thiam rualte rawn theih an ni ang.

A hun : 3rd October, 2012 (Dar 11:00am)

A hmun: Presbyterian Kohhran Sunday School Hall, Saikhamakawn.

Sd/-

Secretary

MHIP Saikhamakawn Branch

NGENNA LEH HRIATTIRNA

            Keini Rualbanlote Pawl Disable People Organization (DPO) Saikhamakawn te chuan Advance Christmas hmanna tur sumtuak nan Ni 4.10.2012 (Ningani) zanah hian Hatkora leh Limbu tui zuarin hnatlan leh kan tum a, Vengchhung mipui te’n tlawmngaia min lo leisak leh turin inkhawngaihna kan rawn ngen a ni.

            Tin,Saikhamakawn Rualbanlote Pawl Disable People Organization (DPO) Committee vawi 10-na in a rel angin, member zawng zawngte Ni 4.10.2012 (Ningani) tlaiah Hatkora leh Limbu tui zuara hnatlan tur a ni a, DPO represent member zawng zawngte Zan dar 6:00-ah Pu Mangheta dawr kawtah kim vek tura hriattir kan ni e.

Sd/-

President

DPO, Saikhamakawn

KTP HRIATTIRNA

            Ni 2.10.2012(Thawhlehni) hian Pu R Zohmingliana te huan sâma hnatlang neih leh tur a ni a, a hmâa kan lo sâm tawh bawk kha sâm leh tur a ni e, a hnim pawh a nêm deuh zawk beisei a ni. Chhuahlam, vengthar lama mi kha chu sâm tel a ngai tawh lo. Chaw fûn tûr a ni ang. Memberte a tam thei ang ber thawhchhuah i tum ang u.

ROLL CHUNGCHANGA MIPUITE HRIATTIRNA

            MLA/MP Roll ennawn a, siamthat hna thawh alo hun leh ta a, hriattur pawimawhte:

1. January ni 1, 2013-a kum 18 tling chin tan dilna thehluh theih a ni. (Ni 1.1.1995 leh a hma lama piang tihna a ni)

2. Roll a chuang tawh, mahse hming, kum, Nu, Pa, Pasal hming diklo tan pawh tel theih a ni.

3. Hmun dang atanga rawn insawn duh tan pawh dil theih a ni.

4. Hun hawn chhung : October, 2012 chhung chauh hun hawn a ni.

5. Diltu reng rengin Passport Size thlalak copy 2 thil tel tur a ni a, mahni Moble Phone Number ziahlan ngei ngei tur a ni bawk.

6. Dilna hi Pu Lalzuiliana, Designated Officer hnenah hun tiam chhung ngeia thehluh tur a ni.

7.Roll siam that mek hi Pu Lalzuiliana / Pu Lalzama hnenah en theih reng a ni e.

            Nakkumah MLA kan thlan dawn avangin ngaipawimawh theuh ang u.

Sd/-

(J.F.Lalzama)

BLO, 20/1-Saikhamakawn

CYBER CAFE

            Internet chak tha tak hmangin Facebook leh Online Gaming rawn ti ve chhin rawh. Hei aia chak hi chu hmun dangah pawh a awm chuang lo ania.

Malawma Ph.:8974308952

Vengsang, Saikhamakawn

Tualchhung

,Pi Darringaii w/o Pu Zonunsanga (V.Sec) chu damlohna avanga Synod Hospital-a enkawl anih hnuin dam takin alo chhuak.

IN LUAH TUR DUH TAN

            Society inhnuai luah theih a ni a, a luah duh tan a hnuaia Phone Number tarlanah hian zawh fiah theih a ni e.

Contact   : 9089612364

                   (Secretary)

(Ruihtheih thil ti tan dil buai a ngai lovang)

Zanin EPL inkhel turte:

Aston Villa Vs West Brom (8:30)

Thawtan zan

QPR Vs West Ham (12:30)

MOTOGP

            Vawiin dar 1:30pm ah MotoGP Aragon Grand Prix (Circuit Name: Motorland Aragon) chu an tlan ang.

VAWIIN KHAWCHIN

A lum lai berin      : 270 C

A vawh lai berin    : 230 C

      Zing lamah ruah 1mm a tla ang a, chawhnu lamah 14mm, zan lamah 1mm a tla bawk ang.

Source : Weatherforecast.com

SAREP TUIHNAI

            Vawksa rep tuihnai leh thianghlim tak lei tur englai pawhin kan nei reng e. Min han dawr ve ula, in inchhir lovang.

In thian,

Lalnunfimi & Lalrammawii(Seni)

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300

Mipui Aw 23.9.2012

MIPUI AW

Vol. XVIII Issue No. 39 Kristian Thalai  Pawl  Saikhamakawn Branch  Pathianni Dt.23.9.2012

VAWIN  CHANGVAWN

      Tluknate avangin khawvel chung a pik e! tluknate chu lo awm tur reng zawng a ni a; nimahsela tlukna awmtirtu chung chu a pik e! Tin, i kutin emaw, i kein emaw a tihtluk che chuan, tan la, paih daih rawh; kut pahnih emaw, ke pahnih emaw neia kumkhaw meia paih ai chuan, piangsualin emaw, kebaiin emaw nunnaa luh i tan a tha zawk e. Tin, i mitin a tihtluk che chuan kher chhuak la, paih daih rawh; mit khing hnih neia Gehenna meia paih ai chuan, mi khing khat neia nunnaa luh i tan a tha zawk e.“Heng mi tete zinga pakhat pawh hi hmusit lo turin fimkhur rawh u; an vantirhkohten vanah ka Pa vana mi hmel chu an hmu fo thin tih, ka hrilh che u hi.

-Matthaia 18:7-10.

KOHHRAN PROGRAMME

Chawhma S.S Inkhawm

Tantu              : Pi Ainawnpari

Chawhnu Inkhawm

Thupui                       : Van khua leh tui kan nihdan

Thusawitu      : Upa Ziremthanga

Zan Inkhawm

Thupui                       : Van khua leh tui mawhphurna

Thusawitu      : Pi Khawlvuani

FELLOWSHIP PROGRAMME

            Tualchhungah chhiat tawk an awm avangin Vawiin tlai fellowship a awm lovang.

            Beihrual thla a ni a, beihrual hun hman a nih dawn avangin KTP inkhawm leh Kohhran hmeichhe inkhawm a hrangin a awm lovang.

SERMON

KAWLKIL THLENG PAWHIN KA THU HRETUTE IN NI ANG.

Tirhkohte 1:8.

Rev.C.Chawngliana.

            Khawvel danah chuan rorelna court-ah tu emaw rorelsakin a awm a. Amah a insawi thiamna mai kha a tawk loh avangin a insawi dan ang tak kha a dik a ni tih lo sawipuitu, thuhretu a mamawh thin a. Thuhretu rinawm leh tha chuan thiamloh chang tura chu a chhanchhuak thin. Kan Lal Isua, mi fel, sual neilo si kha rorelna hmaa dawta an hek a, misual thi tlak hiala puha ro an rel sak laia thuhretu a neilo kha han ngaihtuah hian a lainatawm a, a khawngaihthlak a ni. Mi tha famkim nisi amah chhan tura tumah thu hretu an awm lo kha a thiurthlak ngawih ngawih te pawhin a hriat theih. Amaherawhchu, kha tih hunlai khan awm ve ta ila enge kan an ang le, Petera anga phatsantu nge kan nih ang a, Isua tan rinawm takin kan ding ang? Tunlai huna thil thleng ni ta se thuhretu kan ni ngam angem le? Mahni inenfiah chu a ngai hle awm e.

            Thuhretu nihna dang pakhat chu diklo taka rorelnain ro a rel sak a, thiamloh a chantirate aiawha a tulna apainga din a ni. Rorelnain thiamloh a chantir taka kha a diknate, a hnathawh leh a nihnate puanchhuahsak a, thiamloh chantirtute diklohna hriattir a ni. Rom sawrkar chak tak leh thiltithei takin thiamloha chantir Isua ngei kha mi dik, mi thianghlim, chhandamtu anih zia huaisen taka auchhuahpui ngam, thuhretu rinawm nih a ngai. He thuhretu hnathawk tur hian phur thut a zam leh mai mi nilo, martar nun neitu nih a tul.

            Kan Bible chang tarlanah khan, “Kawlkil thleng pawhin ka thuhretute in ni ang” tih kan hmu a. Kawlkil chu khawilai nge ni ang? Hmanlai mite rin dana khawvel hi zawl duai a, a tawp chu lei hnuai lam, tlak vang vang theihna ang kha anih loh zia finfiah a ni ta si a. A kil, a tawp lai bik awm lova khawvel hi a mum alo nihsi a, kal kual chhuah theih vek a lo ni a, kawlkil tak tak awm bik lovin kan awmna atanga a lang hla thei ber kha kawlkil chu ni ta zelah ngai ila a dik ber ang. A  awmzia ber chu chanchintha la hrelo apaingte hnenah, Hla taka mite hnen thlang pawhin hril zel tur a ni. Hnam leh ram bik thliar mai lovin, rethei leh hnuaihnungte leh hnam changkangte hnenah Isua chhandamna ropui tak lo hre ve lo, thihna thim hnuaia Setana phuar beha awm apiangte chu phelh tur leh chhanchhuak tura a tulna hmun apainga kal zel mai hi thuhretu nihna hmun tur chu a ni.

            Keini pawh hi Kawlkil thleng pawha Lalpa thuhretu kan nih theih nan Lalpan a thu kan sawi takte mal min sawm sak rawh se. AMEN.

                       

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

                        Reilote emaw tih chhungin kum tawp lam kan lo hnaih leh ta hle mai, pang a dam a chhungkua kan hrisel that bawk chuan kum khat chhung chu hun reilo te chauh a ni reng a. Hetiang hian hun hian hringnun hi min liam pui zung zung thin a ni tih hi kan hriat reng a, chumi hrereng chung chuan hun kan hman a pawimawh khawp a ni.

            Laiking pawnpui tah tur an sawi anga kan thil tih tur kan khek reng mai chuan chawl ve ngai lo hun hian nun insiam that theih tawhlohna ruamah min thlen mai dawn a ni tih hi kan ngaihtuah chian a tul hle awm e. Tun kum chhung pawh hian engtiang taka thil tha nge kan tih tawh a, ram leh khawtlang, midangte tan vawi engzat nge malsawmna kan nih tawh tih chhut chiang ila, hun kan hman liam nasat tawh ang hu in thil tha hi kan lo la ti tlem viau mai lo maw?

            Midangte tana thawh chu sawi loh, mahni hna ngei, midang te anga mahni kut ke a ding ve thei tura kan beih na kawngah hian engtiang chiahin nge hma kan sawn tawh? Kumin chhungin khawvela mi zawng zawng in ni 266 theuh kan hmang ral tlang vek tawh a, thenkhat chuan hna ropui tak leh thil ropui tak tak tih nan an hman laiin thenkhat chuan eng ber nge kan tih pawh sawi tur mumal kan hrelo maithei a ni. Engpawh nise kan hun hman tawh lamah engthil pawh lo ti ila chulam chu theihnghilhin kan hmalam hun lo kal zel turah thawhrimna rilru pu ran chungin hun liam mek zel hi i hmang thiam ang u.

ARTICLE

ZAN  KHAW  THIM

                                                                                    PcHriata                                                                                                         

            Mumang ramah tui tak leh nuam ti takin ka leng vel a, hringnun zinkawng ah a awm thei awm lo mange... tih khawp a mak leh nuam in chu ka mang ramah chuan ka cheng. Tichuan thawklehkhatah ka harh ta hlawl mai, chu ka mumang khawvel ka han chhuahsan ta thut mai chu ka ui rilru hle a ni. Hla phuah tu in kum sang atana chelh din a lo chak te kha, a mak hran lo ve tiin ka khumlaizawlah chuan ka ngaihtuah ta zawk a. Kan hringnun ram chhhuahsana a tak ram ang maia han khawsak tak mai chu tiin mumang ram lam chu khawvel leilunga dingin ka han thlir zui a, a mak in a ropui ka ti hle mai, siam tu hian eng atan nge maw min lo siamsak reng reng le? Zawhna lian tham tak chu kei mi mawl ngaihtuhna atang chuan a tling phak tlat.

            Chutia ka harh chu ka khum bula tukverh atang chuan thla eng hian ka khum chu a rawn chhun raih mai a, rilru ah nunhlui a rawn lang uarh uarh a, a thiangin a reh ruih mai bawk si nen, kan kawmthlang ramhnuai chin a chhimbuk kuk rui rui bak hriat tur a awm hek lo. Thla eng fiah mang lovah chuan thil tam tak chu fiah lo ruai hian a hmuh theih hlawm a, ngawi rengin ka thlir kual vel a, misual te tan chuan hun tha a va ni dawn tak em, Setana leh a  sa-ngawi-zawnpui te ten chuan zalenna hun hlu tak a ni tih pawh hai rual a ni lo. Chu zan khaw thim tak hnuaiah chuan chhawrthlapui in fiah lo ruai a eng a thlen bak chu eng dang awm hek lo, thla mang lai phei chuan engtiang taka thim ni ang maw!!! ka kawng zawh lai zawh chhunzawm na atan chuan kei ka thlang mawlh lo a ni. Chu zan thim tak mai chuan hringfa te tan hahchawlhna thlen sa teh mah se, na tuar a rum te tan erawh zawng he hun hi paltlang a va huphurhawm thin tak em!!! an natna te chu chhawk zangkhai a hnekin a tih pun sak ta ni awm fahran hian natna te pawh chuan diriam takin he hringnun duhawm tak hi an sawisa thin bawk si. Heng ang mite tan chuan kawla ni chhuak hi a mawi bik in ka ring thin. Zan thim nunrawng tak hnehtu a ni miau si.

            Kan hringnun zinkawngah hian, hlimna te, lawm ni te, kan damchhung ni a kan hriat reng tawh tur khawp a hlim em em chang te pawh kan nei fo thin, chutiang chiah chuan lungngaihna leh tahna te, beidawnna leh thlaphang taka rum vawng vawng chang ni te kan paltlang fo bawk a. Chung hun thim tak hnuaia kan len lai chuan, kan chheh vel a eng awm chhun chu min lainattu ten thurawn min pek hi a ni fo thin, mahse chumi engah pawh chuan kal ngam a harsain, in chhuiha tluk palh hlauhthawnna in kan la khat fo thin a ni. Min lainattu an awm loh chang ni te phei chuan thim chhah takin min hual vel a, kan tan eng a awm tawh lo, lungngaihna leh beidawnna in diriam takin lainatna tel hauh lovin kan rilru taksa thlarau thlengin min sawi sa ta thin a nih hi.

            Zan thim hnuah khua a lo var angin, kan hringnun hun thim taka kan kal lai chuan Pathian chuan kan tan khua min tih var sak thin a, Thla eng hnuaiah ni lovin Ni eng hnuaiah min kal tir a, kan tan hruaitu Ni eng ropui tak a ni thin a ni.

HRISELNA HUANG

ALU

A chanchin tlangpui: Alu hi thlai  a bul bawk ei atan chin thin a ni. A mineral leh vitamin paite hi a kawr hnuai deuh chiahah a awm a, chuvangin chawhmeha siam dawnin a kawr vel loh tur, tui tlemtein chhum a chumi hnuah a kawr kheh thin tur a ni.

Damdawia hman theihte: A bul bawk.

Damdawia hmannate:

Khuh: Alu, tuiin chhuma, a chhumna tui paih hnuah alu atang tui hu rawn chhuak chu ka in hip luh tur.

Kang: Alu densawm diak kangah hnawih a tha.

Ruhseh: Alu ei a tha.

naupang vun natna: Alu densawm diak leh serte tui sawr chawhpawlh hnawih a tha.

Vun mam nan: Alu chhum hmin, a kawr kheh hnuah tui tlemte nen rawt sawm diaka vunah hnawiha minute 10 hnuah silfai leh tur a ni.

ANHLING

A chanchin tlangpui: An hling hi hnim te lampang, hling neilo chi a ni. A hnah hi hmarcha hnah ang deuh, hnah bial hmawr zum a niin a par chu te reuh te te rawng var a ni. A rah hi a mum a ni a, a lian pawl chu vaimim fang tiat vel a ni, a rah hmin chu a dum thin. A hnah hi chawhmehah an hmang thin a, Mizoramah chuan Bazarahte an zuar thin. Chin lohhvin khawi hmunah pawh a to thei a, fur ruahtui tlak tam laiin hmuh tur a awm thin.

Damdawia hman theihte: A hnah, a rah hel.

Damdawia hmannate:

Thisen sang: A hnah chhuma chawhmeha hman thin a tha.

Ran hnara vangvat lut tihchhuah nan: A rah hel tui tlem nena densawm a puan hmangin a tui sawr chhuah aran hnarah far luh tir tur a ni.

Kala lungte awm: Anhling chhumna tui in tam a tha.

Zunin: Anhling chhumna tuiin a tha.

ANKASA TE

A chanchin tlangpui: Ankasa te hi kumkhat thlai ‘annual plant’ a ni a, hmun hnawng deuhaha awm thin, a par hi rawng eng a ni a, thialin ka chhung a hiar thei.

Damdawia hman theihte: A par leh a hnah.

Damdawia hmannate:

Ha na: A par thial sawm ha na laiah dah tur.

Naupang dangawk: A par rawtsawm diaka 1gm zelin ni 1 ah vawi 3, karkhat chhung naupang ei  tir tur.

Ka chhung ro huam huam thin: A hnah, a par leh a chi thial sawm tur.

Hahni na: A par chhumna tuia hrawk thuah a tha.

Hrawkna, lu na, lei chaklo: A par thial sawma lem a tha, ni 1 ah vawi 3 zel hun engemaw ti chhung ei tur.

BIBLE QIUZ NO. 39

I SAMUELA BUNG 25-31

A Kâr âwl dah khat rawh :

Q1.Tin, Davidan thlaler atang chuan ____________________ a berâm hmul amet tih a lo hria a. Tichuan Davida chuan tlangvâl sawm a tir a,

Q2.Tin, Saula chuan ____________________ aw chu a han hria a, “Chu i awm ela ni, ka fapa Davida?” a han ti a. Tin, Davida chuan, “Aw lalpa,  ka pu, ka aw ani e,” a ti a.

Q3.Chutichuan ___________________chu chumi ni chuan Ziklag khua chu a pe ta a: chuvangin Ziklag chu tun thlengin Judai ram lalte ta a ni ta reng a.

Q4.Chutichuan _____________________ “Unaute u, LALPA, min humsaka min do tûra lo thawkho kan kuta petu thil min pekte chu chutiang chuan in ti lo vang.

A bung leh Châng dah rawh :

Q1.Tin, an ruhte chu an la a, Jabes-a  tamarisk thing hnuaiah an phûm  a, tin, ni sarih chaw an nghei a.

Bung: ...............          Chang: ....................

Q2. Tin, Philistia mite chu an pung khawm a, Sunem-ah chuan tanhmun an va khuar a: tin, Saula chuan Israel mi zawng zawng a khawm a, Gilboa-ah tanhmun an khuar ve a.

Bung: ................         Chang: ....................

Q3. Chutichuan Davida leh a mite hchu Philistia rama kir leh tûrin zinga chhuak tûrin zingtakah an tho ta a. Tin, Philistia mite chuan Jezreel-ah an chho ta a.

Bung: ................         Chang: ...................

Q4. Saula chuan a fanu Mikali, Davida nupui kha Galim khuaa mi Laisa fapa Paltia a lo neihtir tawh a ni.

Bung: ................         Chang: ...................

Hming : ......................................................

Section : .....................................................

BIBLE QUIZ  NO. 38 RESULT

Chhanna lut zawng zawng : 2

Chhang dik vekb : 2

Lawmman dawngtu   : Lalruatpuii (V.sec)

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni

LAWMTHU SAWINA

            Ni 19.9.2012 (Nilaini) khan Branch K.T.P te Pi ngeni te Slub chhunga hnatlang nilenga neih a ni a, mipa 47 leh hmeichhia 17 thawk chhuakin, hnatlang zawng zawng hi mi 64 kan ni.

            Inhlawhna min petu Pi Ngeni te chhungkaw chungah Branch KTP te chuan lawmthu a sawi tak meuh meuh a, tin, hnatlanga thawkchhuak zawng zawng chungah leh bungrua min hawhtirtute zawng zawng chuangah Branch Committe chuan Lawmthu a sawi tak meuh meuh bawk e..

Secretary

Branch KTP

HRIATTIRNA

      RKVY Scheme hnuaia Ramri/Reraw lui zau Farmer Association te Ni 24.9.2012 (Thawhtanni) zan dar 7:00 hian Pu C.Runkima te inah Committee pawimawh tak neih tur a ni a, memberte kim taka kalkhawm tur a ni e.

F.Lalhmachhuana

Secretary

Ramri/Reraw lui zau Farmer Association.

BRANCH  AIAWHA  TEL

            Nimin 22.9.2012 khan One Day Mission Seminar, Aizawl khawpui chhunga mite pualin Pi Zaii Hall, Synod Conferance Center ah Interserve India leh Synod Mission Board tangkawp chuan a buatsaih a, Resource persin atan Mr. Eappen John, Interserve India chu hman a ni bawk. Hetah hian kan Branch aiawhin Tv.F.Laldingliana chu tel tir a ni.

KTP  HLA  ZIR

            Aizawl Chhim Presbytery Inkhawmpui Kulikawn Kohhrana neih turah kan kohhran zaipawl chuan hla rem tur a ni a, heta  hla sak tur hi naktuk thawhtan zan inkhawmban ah zir tan tawh tur a ni. Member te a tam thei ang ber zir turin kan in hriattir a ni e.

            Beihrual lai te a nih avangin inkhawmban hnulamah zir thin a ngai dawn a, memberte pawh taima taka zir hram hram turin inbuatsaih theuh ang u.

JOINT  FELLOWSHIP

            Hlimen Pastor Bial KTP leh Lungleng Pastor Bial KTP te joint fellowship October thla a Lungleng a neih turah a kal thei tur zat tlangpui  hriat a ngaih avangin, a kal duh tur zawng zawng te chu a rang lama Branch Secretary hnenah in hriattir tur a ni.

CHATUAN  RAM  LAMAH

            Gedion Malsawmtluanga (3)  s/o Pi Laldingzeli chuan ni 20.9.2012 (Ningani)  khan natna leh hreawmna awm tawh loh na hmun chatuan ram lamah min lo chawlsan ta a.

            A kalsan tak a nu leh pa, a chhungkhat laina leh he thihna avanga lungngai thlaphang zawng zawng te Mipui Aw Editorial Board chuan kan tawrhpui takzet a. Pathian awmpuina leh thlamuanna an dawn zel kan duhsakin chu chu an tan kan tawngtaina pawh a ni e.

VAWIIN KHAWCHIN

A lum lai berin          : 270 C

A vawh lai berin    : 220 C

      Zing lamah ruah 1mm a tla ang a, chawhnu lamah 1mm, zan lamah 2mm a tla bawk ang.

Source : Weatherforecast.com

Tualchhung

,Zothansangi d/o Pu B. Lalrinzaua (Ch.Sec) chu damlohna avangin Regional Cancer Centre Zemabawkah enkawl mek a ni.

,Tv. Benjamin Lalduhsaka s/o Pi Laltanpuii (T.Sec) chuan an hnathawhna lamah Special Combat Course chu tha takin a training chhuak a, silai tel lova inbeih dan zirna lam a ni.

,Pu C. Vankhuma h/o Pi Lallianpuii (T.Sec)te chhungkua chuan khawilo vahvel nan bike (CBR) thar an lei.

ELECTRIC   BILL  CHUNGCHANG

            KTP Upa R. Lianzinga Group te chuan thlatin electric bill pe in an kan hlawh thin a, tlawmngaia min pektir tu te zawng zawng chungah lawmthu kan sawi tak meuh meuh a ni.

            Bial tina rawn khawn thin te khawn laia pe hman lo emaw pe remchanglo te kan awm thin a, a hnu lamah hruaitu te hnena pek theih a ni. Mahsela a rang lama pek thin nise, a chhan chu bill pek na lam hian pek hun tawp lamah hi chuan an dawng duh tawh thin loh avangin buaina a petu group ten kan tawk thin a, khawn laia awm lo emaw pe remchanglo te pawhin a rang lama hruaitute hnena pek thin nise a lawmawm ngawt ang.

Sd/-

(R.Zodinsanga)

Secretary

ZANIN  EPL  INKHEL  TURTE

Liverpool     6:00     Man. Utd.

Newcastle        7:30     Norwich

Man. City        8:30     Arsenal

Tottenham       8:30     Q.P.R

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300