Mipui Aw 16.9.2012

MIPUI AW

Vol. XVIII Issue No. 38 Kristian Thalai  Pawl  Saikhamakawn Branch  Pathianni Dt.16.9.2012

VAWIN  CHANGVAWN

      Chutichuan tunah zawng Krista Isuaa awmte tan chuan thiam loh chantirna reng a awm tawh lo. Krista Isuaa Nunna Thlarau dan chuan sualna leh thihna dan ata chu mi tichhuak tawh si a.

KOHHRAN PROGRAMME

Pastor Bial Fan Programme

Chawhma S.S Inkhawm

Tantu              : Pi Lalrinngheti

Chawhnu Inkhawm

Thupui                       : Khua leh tui tha                                              khawtlangah

Thusawitu      : Upa Lalzama

Zan Inkhawm

Thupui                       : Khua leh tui tha ram leh                                 hnam ah

Thusawitu      : Pastor G. Chhunthuama

FELLOWSHIP PROGRAMME

A hmun       : Pu C. Kapliana In

Hruaitu        : Upa Zonunmawia

Tantu           : Nl.Laltanpuia

            Karleh ni 17 - 21 chho hi  Beihrual Fehchhuah Programme hman tur a ni a. Naktuk Thawhtan zan hi KTP fehchhuah a ni,  ni 18 hi Kohhran hmeichhe fehchhuah zan a ni thung, ni 19 zanah Biak In ah fehchhuah report inkhawm neih a ni ang. Ni 20 &21 hi Kohhran fehchhuah niin Inrinni zanah report inkhawm Biak In ah hman tur a ni ang.

            Vawiin hi Pathian ram chhiar ni a ni a, inkhawmna a pe remchang lo te pawhin a chhiarna hmun (Vestry) ah pek theih a ni e.

SERMON

FIMKHURNA

            Ngaihven ula, fimkhur rawh u; in khingpui Diabola chu sakeibaknei rum thin angin a ei theih tur zawngin a phi ruai thin;  I Petera 5:8

            Bible chang tarlan atang khian thupui kan sawi dan tur kalhmang chu a hriattheih mai awm e. Fimkhur pawimawh zia hi Bible ah a chung hnem hle a, Thuthlung Thar lamah ringawt pawh vawi 47 lai a inziak nghe nghe a ni. Ringtuten nun kan hman na kawng hrang hrangah fimkhur a ngai hle mai a, engemaw ti a kan lo inthlahdah emaw kan nun kan lo hman uluk lo deuh emaw hian Setana hian ama lama min hnuk lut thuai tur hian min lo chang reng thin a, chumi hre reng chung chuan ringtu ten kan nitin hun kan chhiar thiam a pawimawh hle a. Sual hnathawh nan ka thil tih ah hian kawng a in hawng thei em tih ngun taka ngaihtuah chunga kan fimkhur  a pawimawh hle a ni.

            Eng nge fimkhur na chu? kan tih chuan; kan thil tih na kawng hrang hrang ah diklo takin thil ka ti palh hlauh mai ang emaw thil dik lo ka ti palh thei mai em? tia kan thil tih tur reng reng ngun tak leh Pathian rawn chung zela kan tih thin hi fimkhurna chu a ni mai awm e. Mi pakhatin hna uluk tak in a thawk a, a chhe leh hma mai ang  nge tia, hmanraw thalo tak tak hman theih kawnga uluk tak leh fimkhur taka hmaraw tha chauh thlang chhuak chunga hna a thawh hi fimkhurna dik chu a ni bawk.

            Fimkhurna awmzia chu kan sawi lang ta a, engvang chiah in nge kan fimkhur tak ang. Kan Bible chang tarlanah khian Setana chuan a ei theih tur zawnga a phi ruai avangin fimkhur turin min ti a. Ringtu ten ngaihtuah chiang lo leh ngaihsam taka thil kan tih mai mai hian setana tan hmun kan kian thei reng mai a, chuvang chuan kan thiltihna kawng engkimah kan fimkhur hle tur a ni.

            Chutiang taka fimkhur ngaihna nun kawng zawhtu kan nih avangin ringtu te engtiang kawngin nge kan fimkhur tak ang. Pathian duhzawng dik tak ti thei tur chuan mihring finna in a daih lo. Pathian rawn chung leh amah tih chunga kan hringnun zin kawng uluk taka hman hi setana min hneh theih loh tur khawpa kan fimkhur theih dan chu niin a lang.

            Ringtute kan kawng zawh mekah Thlarau Thianghlim finna dil lova kal hi Pathian pawi sawina awl tak a ni a, hremhmun kawng zawh awlsam na ber pawh a ni, I fimkhur ang u.

                       

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

            ISUA  NISE...

            Isua nise engtin nge a tih ang tih tawngkam hi kan hre fo tawh awm e. A ni taka he thu kamkhat te mai hi a pawimawh hle mai. Ringtute nun kawng hruaitu tur dik tak pawh niin a lang. Kan thil tihna kawng tinrengah mahni inhmangaih tak leh hmasial taka hun hman mai pawh a awl hle mai. Chumi hunah chuan he thu tawi te hi ringtu tan chuan a pawimawh hle awm e.

            Khawvel a cheng kan la nih miau avangin dik, fel famkim erawh a har hle ang tih chu a hriat theih a. Mahsela Lal Isuan min chhandam khan mifel famkim Amah Isua nun ngei nei tura chhandam kan ni bawk si. He khawvela kan chen chhung hian felna kawng chu zawh tur a buatsaih ringtu kan ni tlat si. Isua kan tisa mizia ang pu khan felna dan a zawh famkim tlat si a, chumi hnung zuitu kan nih avangin Isua tih ang ti thei tura siam, buatsaih leh chhandam mihringte kan ni tlat ani.

            Kan thenawmte chunga kan rilru put hmang te hi Isua nise a pu ve kher ang ngem? Khawtlang leh ram kan hmangaih dan ah Isuan khawvel a hmangaih angin kan hmangaih ve em? Pathian rawngbawl kan in tih na kawngah Isuan a Pa rawng a bawl angin kan bawl ve chiah em? Kan hna a kan rinawm danah hian Isua nise kan rinawm ang tho hian a rawn ni ve a ngem? Mahni theuh in zawt ila, in siamthat kan ngai a ni chuan in siamtha ang u. Isua nise engtin nge a tih ang ti chungin nun i zir ang u.

ARTICLE

HEI HI MIZORAM A NI

-Dinga Fanai
Mizoram Geographical Area hi 21,080 ang a sawi thin a ni a, mahse department hrang hrang chhinchhiahdan enkual chuan 21,080 / 21,081 / 21,087 sq.km ti te a ziah a ni thung. Khawi ber hi nge kan hman dawn tih chu mimal ngaihdan lo ni ta sela a hahdam thlak awm e. 

District hi 8 (Pariat) nge kan neih a 11(sawm pakhat) tih laiah pawh hian buaina tham a ni a, Sub-Division hi 23 kan nei a, RD Block 26 kan nei bawk a ni. Population hi 10,91,014 kan awm a, Nuai 11 kan la tling lo hret a ni. Town hi 23 kan nei a, Villages Council hi 750 awm ang a chhinchhiah a ni a, Chuti a nih chuan Town & Villages Council belhkhawm chu 773 a ni. Khaw khat a VC pakhat aia tam awmna khua hi khaw 24 a awm a, Chuti a nih chuan Total No. Of Town & Villages hi 654 a lo ni dawn tih na a ni.

Mahse P&E record kan en chuan khaw 570 ah eng(Electrict) pe tawh angin an record a, Chuti a nih chuan Mizoram khua zawng zawngah an la pe kim lo deuh tihna a ni. PHE lam kan en ve thung chuan Tui hi khaw 909 ah pe tawh angin an record ve thung a. Mizoram a khua awm zawng zawng aia tam ah Tui an pe tawh tihna a nih chu…. Thenawm State ah an pe tel nge phei chu ka hre thiam bik tawh lo…

BPL family hi Rural Development Chhinchhiah dan ah chuan 39,932 (Rural ah – 33,713 leh Urban ah – 6,219) awm ang in an chhinchhiah a. UD&PA ve thung chuan Urban ah -26,571 awm angin an chhinchhiah ve thung a ni. 

Police Station hi 38 kan nei a. Govt. Hospital hi 81 kan nei a. Private Hospital hi 12 kan nei bawk a ni. Community Health Centre hi 12 kan nei a, PHC hi 57 a vaiin Govt.Hospital hi 81 kan nei a ni. Heng hospital zawng zawng ah hian Ambulance dah vek a ni bawk. (Ambulance hi mipuiin kan nei a ni tih kan hre lo fo, Doctor Motor emaw ti mai tawk kan awm a, Doctor thenkhat te pawh in Mahni Motor dawn ang a cheibawl ta mai lkan lo awm bawk nen, Mipui in kan mamawha kan hman tur a ni tih hre thar threuh ila) Private Hospital 12 nen chuan hospital 93 kan nei a ni. Sub-Centre hi 370 kan nei a ni.

A hmalam ah khian kan sawi tawh a, Georaphical Area khi chi hrang hrang pathum kan nei a, khawi ber nge dik kan hriat tak si loh ah chuan a laita 21,981 sq.Km khi ring ta mai ila. Reserved Area hi 8,342.42 Sq.Km kan nei a, Catchment area of Hydel Project hi 18,847.53 Sq.Km kan nei bawk a. Pass holder’s Land hi 4534,19,343.24 Sq.Km……!!!!! A nuihzatthlak det…..4534,19,343.24 Sq.Km atang hian kan Geographical Area 21,081.00 Sq.Km hi kan paih chuan 4534,25,452.19 Sq. Km…….????????

Potential Area kan neih te hi lo en leh thuak thuak teh ang…. Agriculture Potential Area hi 746.44 Sq.Km kan nei ang a record a ni a. Chutiang chiah in Horticulture Potential Area hi 19,161.13 Sq.Km. Sericulture ah 1,439.00 Sq.Km. Fisheries ah 240.00 Sq.Km… Tichuan kan Total Potential area neih sawrkar chhinchhiahdan chu 21,586.57 Sq.Km a lo ni ta a ni… Mizoram pumpui (Geographical Area) aiin a zau leh hem mai……A zauh zawkna zat chu 8,847.99 Sq.Km lai a ni…..!!!!!!! HEI HI TUN A KAN RAM DINHMUN A NI….INRELBAWLNA THA HI A AWM THEIH IN RING EM…????? LO NGAIHTUAH VE TEH LE.

(Source : Special Report)

ENGE I NGAIHDAN?

DIKNA

            Dikna tih tawngkam hi a nihna angin han let dawn ta ila. Dikna tih chu ‘a nihna ang tur thlap thlap a kal leh awm tih na’ ti ila a thelh lo viau in a rinawm. A nih leh engvangin nge Mizoram ah hian Dikna chu luipui angin luang sela tia kan sawi chamchi. Kan in ti dik viau lawi hlawm si. Kan sawrkar kal phungah te, kan mimal nunah te, khawtlang leh pawl hrang hrang lian tak tak ah te hian thil a nih dan tur ang thlap thlap in a kal lo deuh thin a ni mai lo maw? Nge ni a he Dikna hi awm reng se tih duh vanga chelh na tawngkam zawk, nge incheina? Mahni nun theuhah kan chiang tlang ngei ang.

RINAWMNA

            Rinawmna hi a ri a mawi a, he nihna chanvo neih pawh mitin ten kan chak a, a ropui em a tin ni. Rinawmna hi chikhat chiah a awm a, heta rinawmna kan sawi tak  hi mihring nunze tha zinga mi a ni kan sawi tih hre hmasa phawt ang. Thil dik tak tan a, nghet taka chumi dinhmuna thih thlenga din tlat hi rinawmna chu kan ti thei ang. Mahsela thil diklo tan vanga thih thlenga tang ngam a awm theih bawk, an tan a te tan chuan an rinawm viau mai thei, mahse rinawmna tia chhiar theih a ni lo, thil diklo a tan tlat vang a ni. A hniak tam lam ringawt zui ching Mizote hi hnam rinawm kan ni angem? Kan hnathawh na kawng hrang hrangah ‘mi tihdan a ni tho’ tih tawngkam hi Rinawmna dik atanga chhuak a ni lo duh phian.

TLAWMNGAIHNA

            Tlawmngaihna hi Mizo te chuan kan ta bik emaw tih mai tur hian kan in ti neitu hle in a hriat. A awmzia tak kan chhut chiang ngai em aw? Thil tha engpawh mi tih peih tawh loh hnu thlenga a tul a nih pawt chuan ti peih zel, mi vantlang tih peih baka thil tha tih na kawnga ke pen peih mi tihna a ni. Hnam tlawmngai tak nia kan in hriatna te hi a dik ta chiah em le? Mizote hi a huho chuan kan tlawmngai viau kan in ti thin. Tlawmngaihna hi a huho a neih chi a ni lova, mimal nuna bet tlat, chhunglam mihring thatna a ni a. A huhoa awm a neih chi a ni lo. Mi vantlang tih peih loh mahni chauha han mal beih ngat ngat mai tu hi mawl ti tu an lo tam phian zel a nia. Mimal taka tlawmngai peih lo hi awmkhawm ta se an tlawmngai thar thut thei angem?

            Dikna, Rinawmna leh Tlawmngaihna te hi tun aia nasa zawka mitin ten nei a, zawm thei turin eng nge pawimawh ber ang.  Sikul zir tirh lamah sap tawng nasa taka kan inzirtir ang hian naupang te hi nitin zirtir ve se  a ziawm viau chuan a rinawm a. Tin, a bul berah chuan chhungkua atanga inzirtirna leh mahni ngei inthununna kan tlachham tlang niin a lang thei a ni.

BIBLE QIUZ NO. 37

I SAMUELA BUNG 21-24

A Kâr âwl dah khat rawh :

Q1.Chutichuan Davida chu Nob khuaah puithiam Ahimeleka hnênah chuan akal a: tin, Ahimeleka chuan khur chungin Davida chu a lo hmuak a, a hnênah “Eng tizia nge i va mal ve, tumah kalpui ineih loh?” a ti a.

Q2.Tin, Saula chuan Davida leh a hnêna awmte chu an hmu ta tih a lo hria a: Saula chu Gibea-ah Rama khuaah tamarisk thing hnuaiah a fei kengin a thu a; tin, a vêlah chuan a chhiahhlawh zawng zawngte chu an ding a.

Q3.Tin, Davida chu chuta ta chu a chho va, Engedi kulhbingah te chuan a awm ta a.

Q4.Tin, heti hi a ni a, Saula Philistia mite a va um lo haw chu, “Ngai teh, Davida chu En-gedi thlalêrah a awm e,” tiin an hrilh a.

A bung leh Châng dah rawh :

Q1. Chutichuan puithiam chuan chhang thianghlim a pe ta a: chutah chuan chhang dah an lak nia chhang luma thlak tûra LALPA hma ata an laka chauh lo chu chhang dang a awm si lo va.

Bung: ...............          Chang: ....................

Q2. Tin, lal chuan “Ahimelek, i thi ngei ngei tûr a ni, nang leh i pa chhûngkua zawng zawngte nen,”  at i a.

Bung: ................         Chang: ....................

Q3. Tin, Saula chuan, “LALPA chuan malsawm che u rawh se; nangniho chuan min khawngaih hle a ni.

Bung: ................         Chang: ...................

Q4.“LALPAN nang nena kan chungthu hi rêl sela, tin, LALPA chuan i lakah phuba mi laksak rawh se; mahse kei chuan i chungah kut ka thlak lo rêng rêng ang.

Bung: ................         Chang: ...................

Q5. Tin, Ahituba fapa Ahimeleka fapate zinga pakhat, a hming Abiathara chu a tlan chhuak a, Davida hnênah a tlan a.

Bung: ................         Chang: ....................

Hming : ......................................................

Section : .....................................................

BIBLE QUIZ  NO. 35 RESULT

Chhanna lut zawng zawng : 6

Chhang dik vek : 5

Lawmman dawngtu   : Laldampuii (V.sec)

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni

KTP  HNATLANG

            Ni 19.9.2012 (Nilaini) hian Branch K.T.P te Slap chhunga hnatlang nilenga neih tur a ni a, hna a tam deuh dawn avang leh nikhat a tih zawh hman ngei ngei a ngaih avangin K.T.P member a tam thei ang ber thawkchhuak turin kan in ngen a, mi 40 aia tlem lo thawkchhuak hram turin member te in buatsaih ang u.

            Bial tinah hruaitu ten hnatlang tur sawmna an rawn nei dawn a, member te hnatlanga thawkchhuak ngei thei turin rilru lo siam ang u.

Secretary

Branch KTP

JOINT  FELLOWSHIP

            Hlimen Pastor Bial KTP leh Lungleng Pastor Bial KTP te chuan Joint Fellowship October thla hian neih a ni dawn a. Kan Branch atang pawhin Solo leh Male Voice te neih a ni dawn bawk.

            Member te a tam thei ang ber kal turin inbuatsaih ang ila, heta kal tur zat hi a tlangpuia hriat a ngaih avangin, a kal duh tur zawng zawng te chu a rang lama Branch Secretary hnenah in hriattir tur a ni.

NGENNA

            Bialtu MLA in kan veng Chekbawk a eizawng thin te harsatna lian tak pakhat tui  kan mamawh zia hria in, tuikhuah lian tak pahnih a rawn pe a, a lawmawm hle . Tunah hian thawhzawh thawkhat tawh a ni a, he tuikhuah hi pawl leh mimal ta bik a ni lo tih hria in, tha tak leh tangkai tak a hun rei zawk kan hman theih nan, a enkawl zui kawngah pawh helaia kal thin te leh eizawng thin te hian mawh kan phur ve a ni tih kan hriat a tha awm e. A tichhe zawng leh ti bawrhbang zawng in tuman khawi lo turin kan in ngen nghal a ni.

LAWMTHU  SAWINA

            Kan pa Pu Lalbiakkima  (V.Sec) chuan ni 2.9.2012 (Pathianni) a min boralsan na-a min lainat a min khawngaih tu te, a nat chhung zawnga damdawiin leh in lamah te nasa taka min tanpui a, sum leh pai leh tha leh zung nasa tak senga kan chunga in hmangaihna in lantir na zawng zawngah kan lawm takzet a ni. Mimal tin chungah lawmthu kan sawi seng lova, he chanchinbu kaltlanga lawmthu kan sawina hi kan lawmthu sawinaah min pawm sak turin kan ngen che u a, Pathianin a let tam takin rul che u rawh se tih hi kan tawngtaina a ni e.

In khawngaihna dawngtute

Lalduhsaka te unau

THU  ROTLI NG

**      Khawvelah hian Mihring lo chu thil ropui engmah a awm lova, mihringah pawh hian rilru lo chu engmah ropui a awm lo.

  

 - Sir William Hamilton

TUALCHHUNG

,Pu Lalsawia (Ch.Sec) te nupa chuana pakhatna atan Synod Hospital Durtlangah  fanu duhawm tak an nei.

,Pu J.Lalpara h/o Pi Lalchhanhimi (V.Sec) chu damlohna avanga Civil Hospital enkawla nih hnuin a lo chhuak.

HLA  ZIR  DAWN

            Saikhamakawn Kohhran zaipawl te chuan tun kum Aizawl Chhim Presbytery, Kulikawn Kohhran a neih turah  hla rem tur a ni a, heta rem tur hla hi zir tan a ni dawn tawh a, KTP member te a tam thei ang ber hla zir turin inbuatsaih ang u.

            Hla zir hun tur tak erawh Music Committee te thuchhuak ngaihchan rih tur a ni e.

BLOOD  GROUP  HRE  DUH  TAN

            Saikhamakawn KTP ten Durtlang Synod Hospital tana ni 15.8.2012 a thisen pek ni a, thisen petute zawng zawng blood group chu KTP secretary hnenah rawn hriattir a ni tawh a, mahni blood group hre duh chuan secretary hnenah hian zawh tur a ni e.

Blood Group atanga mize chhutna

A (+)   : Leadership nei tha.

A (-)    : Thawkrim.

B (+)    : Mi dang tana inpe mi.

B (-)     : Mi chimlim.

O (+)   : Midang tanpui tura piang.

0 (-)     : Rilru zau lo.

AB (+) : Hriatthiam harsa.

AB (-) : Mi fing leh rilru hriam tha. In chian rawh leh!!

ZANIN  EPL  INKHEL  TURTE

Reading 8:30 Tottemham

THAWHTAN  ZAN  INKHEL  TUR

Everton 12:30  Newcastle

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300

Mipui Aw 9.9.2012

MIPUI AW

Vol. XVIII Issue No. 37 Kristian Thalai  Pawl  Saikhamakawn Branch  Pathianni Dt.9.9.2012

VAWIN  CHANGVAWN

      Chutichuan, Krista hnenah kaihthawhin in awm ve tawh chuan chung lam, Pathian ding lama thu Krista awmnaa thil awmte chu zawng rawh u. Chung lama thil awmahte chuan in rilru nghat tlat rawh u, leia thil awmahte chuan nghat lovin. In thi tawh a, in nunna chu Pathianah chuan Krista hnenah thuhrukin a awm si a.Krista kan nunna chu a lo inlar hunah chuan nangni pawh ama hnenah ropui zingah in inlar ve ang.

KOHHRAN PROGRAMME

Chawhma Inkhawm

Tantu  : Pi Lalnunfimi

Chawhnu Inkhawm

Thupui : Lucknow leh Delhi field a rawngbawlna

Thusawitu : Upa R. Lalngena

Zan Inkhawm

Thupui : Mission pawl dangte nena rawngbawlna

Thusawitu : Upa Lalzuiliana

FELLOWSHIP PROGRAMME

A hmun : S.S Hall

Hruaitu : Tv.R.Zodinsanga

Tantu  : Nl.R.Lalremchhungi

SERMON

A  BUL  LEH  TAWP  PATHIAN

        “Kei Alpha leh Omega ka ni,” Lalpa Pathian, awm meka leh awm tawha leh lo la awm tura, Engkimtitheia chuan a ti a ni. Thup. 1: 8

        Tin, ka hnenah, “A lo thleng ta. Kei Alpha leh Omega, a Bul leh a Tawp ka ni.Tuihal apiang hnenah chuan Nunna Tuikhura mi athlawnin ka pe ang.      Thup. 21:6       

        Kei Alpha leh Omega, a Hmasaber leh a Hnuhnungber, a Bul leh a Tawp ka ni.    Thup. 22:13

            Kan Pathian hian engkimah a Bul leh a Tawp a nihzia hi   kan Bible tarlan atang khian a lang chiang hle mai. Hei hian a Pathian zia a ti lang chiang hle bawk awm e. Lal Davida chuan Pathian hnen ata a tlanbo theih loh zia a sawi a, khawiah pawh kal sela chutah chuan Pathian a lo awmz zel si, chu chuan a bul leh a tawp ah Pathian a awmzia a ti lang chiang bawk awm e.

            Mihring kan nih chungin kan chungah engpawh lo thleng thei a ni a. A chang chuan hlimna leh lawmna, hei aia nuam leh hlimawm ka nun hman tawhah  ka la tawng ngai lo tih hial khawpa hun hlimawm kan hman chang a awm thin. Ngun taka ngaihtuah chuan engvanga khatiang hun nuam leh hlimawm hmang thei nge ka nih? ka tih chuan Pathian venna leh awmpui na kan chan vanga hmang thei chauh a ni tih kan hre chhuak leh thin, a bul chu Pathian a ni tih kan hrechhuak leh thin a ni.

            Lungngaihna, thihna ruam zawha manganga kan rum vawng vawng lai te hian Pathian awmpuina kan mamawh em em thin, mahse a reh tlat ni a hriat chang a awm fo. Mahsela Pathian thu lovin engmah a thleng ngai si lo. Mangan na tawpkhawk kan chungah a thlen a, belh tur kan neih tawh hauh loh hunah pawh Pathian chu kan tan a lo la ding reng thin. A tawpkhawkah pawh Pathian hi kan auh leh biak theihin a lo awm leh thin si a. A bul leh tawp ka ni ti tu kan Pathian hian a nihna a tlin a, a daw ngai si lo.

            Hetiang anih avang hian eng kawng pawh zawh ila Pathian kan hriat reng a pawimawh hle. Kan hlim ni leh lawm lai ni te, kan hrisel that lai te hian Pathian kan hre lo fo thin, mahse heng zawng zawng kan neih theihna bul chu Pahthian a ni tih i hre thar ang u. Tin, kan mihring pui te chungah beiseina pakhatmah kan neih tawh loh hunah Pathian chu kan tan a tawpah a min tanpui turin a lo ding reng thin a ni.

                       

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

            TANLAK  NGAI

            Tunlai kan Zoram chanchin ngun takin han thlir ila, kan nitin chanchinbu ah te hian a lang tam ber chu rinawmlohna lam sualna te, chhiatna hrang hrang mihring ten kan thlen ngei te a tam hle. Tin, kan ram hruaitu te , an dikloh na lai hai lanna ang chi pawh hmuh tur a tam hle bawk. Heng zawng zawng hi ringtu inti rama thil thleng vek a ni si. A rapthlak ti pawhin sawi ila kan tawng sual hauh lovang. Heng zawng zawng siam tha a, Zoram kulh tluchhe mek siamtha tur hian ringtute tan kan lak a ngai hle mai. Pathian hnenah chakna dila Zoram tana nasa taka kan tawngtai a tul takzet ta, ringtu piangthar te mawhphurhna sanzia hi i hre thar mawlh ang u.

            Tin, Pathiana piantharna la nei lemlo te pawhin kan mihring nuna thil pawimawh tak tak kan hloh mek niin a lang. Sap pa chuan sum a hlohin engmah hloh ah a in chiar lo, a hriselna a lo chhiat chuan thil tlem hloh angin a in ngai, a tawp berah chuan mihringin nun a hloh chuan engkim he khawvelah hian a hloh zo vek a ni tiin an sawi thin. Pathian thu lam atanga thlir loh pawh hian kan nun hi kan hloh nasa ta hle mai. Rinawmna kan tlachham a, dikna aiin mi tih dan kan thlir a, thawhrim na aiin awlsam te sum tam tak hmuh theihna kawng kan zawng bawk. Rinawmna, taimakna, dikna leh awmdan mawi hringnun zemawi tak kan hloh mek hi nei let leh turin mitin ten tan lak a va ngai nasa tehlul em! kan mawhphurhna a ni bawk.

ARTICLE

PAWAN HANS

-Dinga Fanai

            Pawan Hans Helicopters Limited (PHHL) chu kan ram Mizoramah ngei mai alo Service ve dawn ta reng mai, a chanchin hi kan hmuh theih ang angte leh Mizorama a Service Rate-te lo zir chiang dawn chhin ila.

            Pawan Hans Helicopters Limited (PHHL) hi helicopter service company Noida, Uttar Pradesh-a hmunpui nei an ni a, India ram chhûnga ISO 9001 : 2000 certified hmasa ber a ni. Octoberni ni 15, 1985 khân Helicopter Corporation of India (HCI)an in ziak lût a, Oil & Natural Gas Corporation (ONGC) te tuipuia oil laih chhuahna hmun ţhenkhat ah te leh India ram hmun hrang hrangah an Service ţhin a, an hmanna tlângpuite chu:

1. Tuichunga ONGC ho oil lakchhuahna hmunpuiah.

2. Thliarkâr (island) kalpawh nân.

3. Lirthei thlen theihlohna hmuh kal nân.

4. Damlo leh chhanchhuah ngâite phurh nân.

5. ‘Hire’ atân.

6. Film shooting leh boruak aţanga thlâ lâk nân leh adangte.

            Pawan Hans hi alo chesual zeuh zeuh tawh a, ţhenkhat han sawi ila:

* Ni 22 September 2004 khan Meghalaya Com.&R.D. Minister Cyprian Sangma, MLA pahnih leh Deputy Speaker hluite Pawan Hans helicopter-a an chuanna chu Shillong bulah tlâin an thi vek.

* Ni 6 August 2010 khân Pawan Hans hnuaia thawk te feet 10,000-a sang aţangin helicopter in an lo tla hlum tawh.

* Ni 18 Dec. 2010 ah Pawan Hans helicopter chu Chandigarh airport ah chesualin pilot in hliam na tak a tuar.

* Ni 19 April 2011 khan Pawan Hans helicopter LGB Airport, Guwahati aţanga thlâwk chhuak chu Tawang, Arunachal Pradesh a ţum tûr chu chesualin mi 23 chuang zîngah mi 17 te chuan a hmunah an thi nghal a, damchhuak mi 6 te zînga 2 chuan an hliam tuar lovin a hnuah an thi ve leh.

* Ni 29 April 2011ah pawh Arunachal Pradesh Chief Minister, Dorjee Khandu leh mi pali te chuanna Pawan Hans helicopter AS350 B-3 ni 4 a bo hnuah, May ni 4, 2011 khan Lobthang khaw bulah a chesual tih hmuhchhuah a ni a. An vâi hian an thi vek bawk a ni.

An service na hmun te chu Arunachal Pradesh, Tripura, Sikkim, Nagaland leh Assam.

1. Arunachal Pradesh:             * Itanagar (Helicopter)

* Naharlagun (Helicopter)      * Tawang (Helicopter)

2. Assam:                    * Guwahati (LGB International Airport)

3. Jammu and Kashmir:          * Katra (Helicopter)

* Vaishno Devi (Helicopter)

4. Maharashtra:

* Mumbai - Juhu (tuialhthei laichhuahna hmunah)

5. Meghalaya ah chuan an service te hi suspend rih a ni.

            Alo chetsual tawh avang hian a hlauhawm ta em em tihna lam a ni kher chuang lo ania... Mizoramah alo Service ve dawn ta a, ilo chuang ve duh anih chuan a chuan man chu hetiang hi a ni e:

Aizawl atangin:

Lunglei           `1500/-     

Hnahthial        `1500/-

Serchhip          `1000/-     

Lawngtlai       `2500/-

Saiha               `2500/-     

Chawngte       `2250/-           

Khawzawl      `1000/-     

Champhai       `1250/-

Kolasib           `750/-

            Pawan Hans Helicopter  Ltd. chu  kum khat chhûng zet  chawltir a nih hnuin northeast-ah Service ţan tir leh a nit a. Hetah hian an Flying Machine chu Modern Technology-a thuam ţhat niin tlangrama chêtsualna laka a him theih nan stringent safety pawh hman a ni bawk. 

            “Passenger-te an him theih nân fimkhur theih tâwp kan chhuah ang. Hei hi kan ngaihtuah hmasak ber a ni” tiin PHHL Chairman-cum-Managing Director Anil Srivastava chuan Reporter-te a hrilh bawk.

(Source : Wikipedia & http://www.business-standard.com/generalnews/news/pawan-hans-equips-copterslatest-technology/37049/)

HRISELNA HUANG (ELAICHI)

Damdawia hman theihte: A mu.

Damdawia hmannate: Alaichi nu naupai tan erawh chuan ei tam a hlauhawmin nau tlakna hial pawh a thlen thei.

Lung tha lo: A mu leh thing hmarcha sei chi (long pepper) 1gms ve ve densawm pawlha bawnghnute ghee thirfiante khat nen ei thin tur.

Lu hai: A mu densawm 10gms leh palm candy (tum thing atanga kurtai siam) 25gms chawhpawlha tui 150ml-in mei na vak lovah 5mins chhum hnuin a chhumna tui in tur a ni.

Thia luak: A mu rawt dip leh thakthing pil densawm chhumna tui hrawk thuah nana hman a tha.

Hmeichhe serh atanga thil var chhuak: A mu rawt dip 1gm leh butter thifiante khat chawhpawlha ni 15 chhung nitin vawi 3 zelin ei tur.

Zung thei lo, zung harsat: A mu 1gm leh mai mu 2gms densawma khawizu thirfiante khat nen ni 3 chhung nitin zing leh tlaiah ei tur a ni.

Mit tha lo: A mu densawm 1gm, bawnghnute ghee thirfiante khat chawhpawlha ni 15 chhung nitin vawi 1 ei thin tur.

Taksa chaklo, thil ei tui lo, chaw pai nuam lo: A mu rawt dip 1gm leh khawizu thirfiante khat chawhpawlha ni 1ah vawi 3 ei tur.

Taksa lum dan a thunun: Alaichi hian taksa lum dan a thunun thei a, ka rimchhia tihreh nan a tha bawk. Zunkawng thalo leh thin tha lo tan pawh tha tak a ni.

Zung thei lo: A mu densawm 1gm leh brandy emaw whisky emaw 30ml chawhpawlha in tur, vawi 1 inin a dam hmiah thei.

Zun nei tlem lutuk: A mu rawt sawm 1gm thingpui no khatah pawlha in a tha.

Luakchhuak, pumpui chak lo, thil ei tui lo: A mu densawm 1/2gm leh khawizu thirfiaante khat chawhpawlha ni 1ah vawi 3 ei tur. (emaw)

A mu densawm 1/2gm leh coconut rah chhunga tui no khat chawhpawlha in a tha.

Awmna: A mu rawt dip leh khawizu chawhpawlh tlemte ei a tha.

Taksa chau: A mu densawm thirfiante khat, tui no 2 in mei na vak lovah a tui chanve a so kang thlengin chhumna tui leh kurtai chawhpawlh in a tha.

Nau neih zawh hlima taksa chaklo: A mu densawm chhumna tui in tur, naupai lai erawh chuan in hauh loh tur a ni.

BIBLE QIUZ NO. 37

I SAMUELA BUNG 16-20

A Kâr âwl dah khat rawh :

Q1.Tin, inthawinaah chuan Jesaia chu ko la, tin, i tih tûr chu ka hrilh ang chia; tin, a hming ka hrilh tûra che chu ................. min thihsak ang che.” a tia

Q2.Tin, Philistia mite chu tlang pangah an awm a, tin, Israel mite chu a lehlam tlang pangah an awm a, an inkarah chuan .................. a awm a.

Q3.Chutichuan Jonathana leh ............... chuan thu an thlung a, ama nunna ang chiaha a hmangaih avângin.

Q4.tin, ka kal chhuak ang a, i awmna phulah ka pa kiangah ka va ................. ang a, i chungchang thu-ah ka pa ka bia ang a; tin, eng emaw ka hriat chuan ka hrilh ang che,” a tia .

Q5.Tin, Davida chuan, “I pa chuan i mi khawngiah dan hi a hre chiang hle kmai si a; ‘Jonathana chuan hei chu hre kher suh se, chutilozawng a lungngai dawn em mai e,’ a ti a ni ang: amaherawhchu ......................... nunna leh i nunna chhalin ka sawi e, thihna nena kan inkar chu pen khat chauh a ni,” tiin a sawi uar leh a.

A bung leh Châng dah rawh :

Q1. Tin, heti hi a ni a, an lo kal chuan Eliaba chu a lo en a, “LALPA hriak thiha chu a hmaa awma hi a ni ngei mai,” a ti a.

Bung: ...............          Chang: ....................

Q2. A fei ngul chu themkawl ang hi a ni a; tin, a fei lu chu thir sekel zaruka rit a ni a: tin, a phaw kengtu chu ahmaah a kal a.

Bung: ................         Chang: ....................

Q3. Chutichuan Saula chu a thinur ta viau mai a, chung thu chuan a tilawm lo hle mai a; “Davida chu a singa sing thatah an ngai a, kei erawh chu a sânga sâng chauh thatah min ngai a; ram tih ngawt loh chu aneih tûr dang engnge awm tawh?” at ia .

Bung: ................         Chang: ...................

Q4.Tin, Saula chu a ina fei kenga thut laiin LALPA tirh ramhuai a chungah a lo thleng a; tin, Davida chuan tingtang a tum a.

Bung: ................         Chang: ...................

Q5.Chutichuan Davida chuan Jonathana hnênah, “I pain bung takin lo chhang ta hlauh ang che sela tuin nge min hrilh ang?’ a ti a.

Bung: ................         Chang: ....................

Hming : ......................................................

Section : .....................................................

BIBLE QUIZ  NO. 35 RESULT

Chhanna lut zawng zawng : 0

Chhang dik vek : 0

Lawmman dawngtu   : Awmlo

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni 

SENIOR  INKHAWMPUI

Hlimen Pastor Bial Senior Inkhawmpui chu Melthum Kohhranah neih mek a ni a, vawiin programme chu, hetiangin:

Chawhma  inkhawm (10:00)

Chairman: Upa Lalrindika (Bial)

Tantu: Pi C. Kapchhungi (Vengthar)

Thupui: Thuawihna I

            Chhungkuaah

Sawitu: Upa C. Lalengzauva

Chawhnu  inkhawm (1:00)

Chairman: Upa Lalrindika (Bial)

Tantu: Nl.R. Lalawmpuii (Damveng)

Thupui: Thuawihna II

            Kohhranah

Sawitu: Upa Lallawmchhunga

Zan  inkhawm (6:30)

Chairman: Upa Lalrindika (Bial)

Thuchah: Pastor G.Chhunthuama

CHATUAN  RAM  LAMAH

            Pu Lalbiakkima f/o Lalduhsaka (V.Sec) chuan ni 2.9.2012 (Pathianni) khan natna leh hreawmna ram he khawvel a lo chhuahsan ta a. A kalsan tak a fate, a unau te, a chhungkhat laina te leh he thihna avanga lungngai zawng zawng te Mipui Aw editorial board chuan kan tuarpui takzet a, Pathian thlamuanna leh awmpuina an dawn zel kan duhsakin an tan kan tawngtai na pawh a ni e.

TIAM  TLAT  E

            Lalhmangaihsanga s/o Lalthangliana (Ch.sec) leh Lalramhluni d/o Thangdailova Thingsulthliah te chu ni 13. 9. 2012 (Nilaini) khian a nuam ah pawh a hreawmah pawh Thingsualthilah Kohhranah tiam tlat e an ti dawn.

            Kristian chhungkaw tha tak dina fanau maltluan chawia damchhung ni te chhiar dun turin Mipui Aw editorial lam chuan duhsakna kan hlan e.

TUALCHHUNG

,Tv. Lalremsiama s/o Pu Lalchungnunga (V.sec) chu accident avanga Civil Hospital a enkawl a nih hnuin a lo chhuak.

,Pi Lalfakmawii w/o Pu F. Lalrinmawia (V.sec) te nupa chuan a pakhatna atan Civil Hospital ah fanu duhawm tak an nei.

B.A  PASS

            Tv. Lalhmingliana Singson  s/o T.K.Manga (V.sec) chu B.A (English) tha takin a pass.

M.A  PASS

            Nl. Pc. Vanlalruati d/o C. Lalparmawii (V.sec) chu M.A (Psychology) 2nd Division ah a pass.

BO  CHHAR

Rangkachak Bengbeh khing lehlam ka chhar a, a neitu chuan a awmdan dik tak sawiin a hnuaia phone number ah hian ngaihven theih a ni e.

Phn: 9089532274

NPSS  INKHAWMPUI  RESULT

            Pathiani hmasa Ni 2.9.2012 khan Hlimen Bial NPSS department hrang hrangte inkhawmpui neiin intihsiakna an nei a, heng a hnuaia kan tarlan te hi department tin a pakhatna la tute veng an ni.

Beginner         - Hlimen Damveng

Primary          -  Hlimen Damveng

Junior             - Hlimen

Inter & Sac    - Hlimen Damveng

***

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300