Mipui Aw 17.06.2012

MIPUI AW

Vol. XVIII Issue No. 25 Kristian Thalai  Pawl  Saikhamakawn Branch  Pathianni Dt.17.6.2012

KOHHRAN PROGRAMME

            Vawin hi Pastor bialfan programme a ni a, tin, Bial kohhran hmeichhia ten Kristian chhungkaw campaign an nei bawk dawn a ni.

17. 6. 2012 (Pathianni)

Chawhma S.S inkhawm

Tantu          : Pi R. Lalzuali

Chawhnu

Thupui        : Kristian chhungkua

Thusawitu  : Pi Zothanpari (Vice Chairman Bial kohhran hmeichhia)

Zan Inkhawm

            Rualban lo te puala inkhawm neih tur a ni a, thilpek pawh lakkhawm  tur a ni.

Thupui        : Heng mi te ber te chung ti chu ka chunga ti in ni.

Thusawitu  : Pastor G.Chhunthuama

KTP PROGRAMME

 Dt. 18. 6. 12 (Thawhtan zan)

Hruaitu         :Nl. Briggite Zonunmawii

Tantu             : Tv. Lalhruaitluanga

Sermom         : Pu Jeff Lalhmingsanga

Thilpek lakh : Nl. Debie Lalfakzuali

awmtu turte : Ni. Zorinpuii

            June thla chhunga Inkhawm leh Fellowship zai hruaitu leh musician turte.

Hla hruaitu   : Pu Lalchhandama

turte                 Tv. Malsawmzuala

Musician       :Pu Lalremruata

                          Tv. R.Lalzamlova

VAWIIN  TLAI   FELLOWSHIP

            Pastor bialfan leh Bial kohhran hmeichhe Kristian chhungkaw campaign a nih avangin vawiin tlai fellowship a awm lovang.      

SERMON

LALPA  CHU  MIN  VENGTU  A  NI.

            LALPA chu mi vengtu a ni a; ka tlachham lo vang.Ani chuan hlobet hring dup hmunahte mi bawhtir thin a:Chawlhna tui kamahte mi hruai thin....  Sam 23: 1-6

            Khawvel mihring lo piang tawh zawng zawng hian kan mamawh ber chu him taka kan awm theih na hi a ni awm e. Rilru lam zirmi Abraham Maslow chuan mihring kan lo pian chhuah a kan mamawh chi hrang hrang hlawm lian deuh deuh panga (5) ah a then a, chumi zingah chuan kan taksa himna lam chu a pawimawh pahnihna ah a dah nghe nghe a ni. Hetiang a nih avang hian khawvel ram hrang hrang te pawhin harsatna tamtak atang a ram mipuite venghim turin venhimna lam thawk tur Department lian pui pui a lo siam reng a ni.

            Hetiang dinhmuna ding mihring kan nih tlat avang hian Lal ropui tak Davida meuh pawhin min vengtu chu Lalpa a ni a lo ti hial a. Veng him tu a va nei tha nangiang em ve le! Khawvel ram ropui tak tak ten vengtu sipai leh ralthuam tha pui pui an neih laiin keini ringtu te chuan lei leh van Lalber leh a siamtu Pathian meuh vengtu kan nei hi kan vannei in a ropui a, kan phu  lo hial zawk awm e. Kan Pathian hian a mite hi min lo va hmangaih em, a siam te ve mai kan ni a; a thisen a min tlan ngawt tem min veng tur keb min tanpui tura  keini a siam mihring te koh phaka a awm reng hi thil mak leh inngaihtlawmna ropui tak chu a va ni em. A hniak a zui turin kan in buatsaih sauh sauh a tul tazet a ni.

            Natna kan tawh chang tem hlauhawma kan awm lai te, keh thihna hllimkawr ruam kan zawh  lai pawhin amah kan Pathian chu min tanpui tur leh min thlamuan turin a hnai reng a. Amah hawisanin khawvel lamah han tlan thin mah ila inchhir a, ngaihdam dil chunga tanpui tura kan sawm chuan a ngaihdamna leh a hmangaihna nen min tanpui in min thlamuan a, harsatna khur thuk tak atan min chhanchhuak nghal mai thin a ni. Pathian hi thikthuchhia leh tihbaiawm tak tiin sawitu tamtak chuan an sawi fo thin a, kei ka tan chuan a hmangaihna leh a zahngaihna te, a dawhtheihna te hi ka hmuh tan a ni fo thin. Mahse hmangaihna vanga thihna thleng a fate tuartir hrehlo Pathian a ni erawh ka hai ngai lo thung si.

            Lal Davida in Lapa chuan a vengin hlobet hringdup hmuna a hruai thinzia te, a do tute lak ata a chhanchhuah thin zia a sawi te, thihna hlimkawr ruam a zawh lai pawha a thlamuan thin zia a sawi te hi keini ringtu te tan pawh a ni ve tho a ni tih kan hriat a tul hle mai. Mangan na leh harsatna kan tawh lai te, thihna hlim ruama thlaphang taka kan thut lai te hian Lapa chu min vengtu a ni tih hre reng a, amah kan auh zel hi a pawimawh in a tul hle a ni.

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

CHANCHINTHA  VANG

            Mizo te nun hlui kan chhui let chuan mi lu la hnam, hnam mawl mai kan nihziaah kan in chhui lut lo thei lo a nih hi maw...

            Mahsela Zoramah chanchintha alo lut a, Lal Isua kan rin chinah hmasawnna chu a zuan zuan in a zuang tak meuh meuh a tih theih awm e. Thawmhnaw tha hak nachang kan hre nghal a, Mizo tawng hi ziak theihin a awm nghal bawk. Chanchin Tha avang hian Zofate hi khawvel tukverhah kan dak ve phak ta ti ila kan sawi sual tam lo khawp ang.

            Chu Chanchin Tha avang chuan Zoramah Kohhran tha tak tak a lo ding nghal khup a, chu chuan Zofate nun kawng dik lamah leh thlarau nun lamah pawh nasa takin a hruai nghal bawk, kan hlawkpuiin tunlai thlengin kan ram leh khawtlang nunah Kohhran chuan hmun pawimawh a la chang ta zel mai, a lawmawm ti zawng pawhin sawi ila a dik tho ang chu.

            Tin, Zofate min thuikhawm tu Y.M.A ngei pawh Chanchin Tha vangin kan nei  ti ila kan daw hauh lovang. Day pawh nimin piah lam lawkah kan hman nghe nghe kha. Zoramah khalh ngiltu pawh tha tak a ni a, tisa lama kawngdik kan zawh theih nana Pathian min pek pawh ti hial teh ang. Zofaten kawng dik kan zawh zel theih nan dik leh huai taka a kal zel turin hruaitu te pawhin huaisenna nei zel rawh se.

ARTICLE

THAIKAWI  BIAHTHU

                        Ka thinlai luahtu leh a ruka ka lo vei em em, a hmasain ka tuanna mual za tam kar atangin vawn loh chibai ka buk a che. Nun thar leh thinlung thar nena i kianga lo kir leh thuai theih ka in beisei.

                        Ka tan chuan heng min hual veltu thing zar tin hnah nem zawng te leh engkim mai hi lung ti lengtu an chang zel si a, ka lunglen chhan chu i hriat kha. Ka thinlai ruk luahtu chu nang ngei hi i ni a; ka hlimna chhan pawh. Nang hmangaih hi atna ni sela chuan he khawvela mi a ber ber te nuih tiza tu ka ni fo ang. I tello chuan mi tamtak karah pawh pakhatin ka kim lova, nang nen erawh mi zawng zawng kan kim bawk si. Ka nun hmandan in a zir loh avanga vawikhat pawh rawn hmasa lo ka chhuahsan ngawt mai che hi pawi ka ti takzet a ni. Vawi tamtak ka tih sual min haider sak tawh thin angin tun tum chauh hi chu min ngaidam nawn leh turin ka ngen ngawih ngawih a che.

                        Ka thinlung chhungril duhna che hi chetzia leh ziaka lanchhuahtir dan tha thiam ila ka va ti tak em! Mahse thiamin han thei tehreng pawh ni ila khawvel hmangaihna thuril leh tha ber ber te leh rimawi ber ber te pawhin a hril zo dawn si lo. Nang hmangaih tur che hian neih leh chuan tur engmah ka nei lo; ka hmangaihna che chauh lo chu. Ka tuanna hmun leh mual apiangah ka ngaihnat thu hlan che hi ka duh thin; englai pawhin. Nang theihnghilh tum che chu chhia leh tha ka hriat hma atang tawha ka chun leh zua ten an lo sak tawh keima hming ngei theihnghilh ai pawhin a sam bik lawng e. Ka lawmna ber chu i lawmna leh thatna hmufiah thei tur tawk vela KHUANU in finna min lo pe ve hi a ni. A pawi ka tih ber erawh chu ka nun uluk loh avanga i mawina leh duhawmna duh thala ka chen ve thei tawhlo tur hi a ni. I lakah ka thikthu a lo chhiat thin em avang hian nangmah lo hmangaiha lo vei ve thin tu che pawi vawi tamtak ka lo sawi thin a, ngaihdam min lo dilsak hram dawn nia. I parmawina chauh chena i kuhmuma par chhuan tumtute nia ka lo hriat thin vang an ni.

                        I angchhunga awm ka kham theilo ang bawkin i taksa a ral hnu pawha i thinlung pheka ka hming chuantir zel hi ka duhsam ber a ni fo thin. Chapo leh tawng uangthuang ka bansan huna hlim taka min lo khuang khuah leh erawh kei aiin i thlahlel zawk tih khel lovin mi tinreng in an hria.  I hming khandaih hriam tawn eng ang ai pawha hriam, rilru chu sawi loh taksa ruh leh thling phel hrang hlak thei khawpa mawi leh nalh hian he ka thinlungah hian ka lungphu che ve dep dep thin hi kawlphe anga rang in a rawn ti che si thin. Ka insumtheihloh luat avanga i lung ka lo tiawiloh thin avangin khawngaihin min ngaidam nawn mawlh mawlh dawn  nia. I tan chuan mihring tam tak zinga ti hmingtha thin tu che pakhat ang lek ka ni mai thei, mahse ka tan chuan ka hmangaih keima Saikhamakawn  ka damchhan, ka nunna, ka khawvel leh ka engkim a engkim i ni si.

TUANNA  TLANG  DANG  ATANGIN

Mapuia U

TAWNG  HMAN  DIK  KHER 

A  TUL  EM.??

            Inhnialna tam tak awm  thin mahsela,inhnialna te chuan tawng hman dik chungchangah ber kher hi chuan awmzia a nei thui lem lo ni awm tak a ni, kan tawng hmante a dazat tulh tulh a, Kan thu sawiah pawh tawng hmang uluk deuh te tan phei chuan ner sawk sawkna tur a tamin, Saptawng kawi khat pawh hre lo tana hriat kim theih loh tur khawpin thu kan sawi ta fo mai.

            Hengte a nih avang pawh hi a ni mahna tawng hmang uluk leh mizo tawng thiam deuhte chuan mizo tawng dik tak humhalhna kawngah hma nasa takin an la a, mizo tawng kan hman dik theihnan leh kan ngaihpawimawh zawk theihna atan nasa takin tan an la thin reng a ni. Mahsela, hetih lai hian mi tam tak rilruah chuan tul tih lem lohna a lian ve viau bawk a, Thalai rilruah ngat phei chuan a tla na lem lo khawp mai. Mizo tawng thiam tak nih aia Sap tawng thiam tak emaw Vai tawng thiam tak kan ngaihsan zawk vang te pawh a ni mahna. Mahsela, Saptawng thiam tak te leh vaitawng thiam tak tak hote hi Mizo tawngah pawh an duai lo tlangpui thin, hei erawh hi chuan ngaihtuah a ti thui deuh..!!!

            Mahsela, mizo tawng chu eng ang pawn lo hmangin ‘Sam ka met’, ‘Thingpui in hona kan nei dawn’ te pawh lo tiin, ‘mai mai’ aiah ‘mei mei’ te pawh ti se,  ‘Sipai’ aiah pawh lo ti ‘sipei’ ta nawk nawk mahse enge a danglamna chuan le.!! Zoram khawvelah hian an buai bik chuang lo a ni lawm ni. Mizo tawng te chu lo kuai herin tawngkam bungraw tharte pawh lo chher chhuak ta zut zut mahsela a pawina a awm dawn em ni.! Kan tawng a hausa ting zawk dawn a sin.!! Hmanlai anga a nawlpuiin mizo tawng kan hman dik thlap thlap loh hi enge a pawina em em le.!! Tawngkam hmang dik thlap thlap hote pawh hian enge hlawkna an hmuh chuang bik..? Zo tawng dik thlap thlap hmang reng thei ila eng nge Mizo te hian kan hlawkpuina tur chuang ni ang.? 

            A enga pawh nisela, mizo kan nia mizo tawnga tawng thei lo lah kan awm lo a, mizo ni ve si tawngpai phei chu kan tei thei der lo a, kan nuihsawh mai zawk thin hian mizo kan nihna a phawk tawk viau lawm ni.? Chuvangin, Thalai zawkte tawng hmang dik lo veia phul phul reng ai chuan Mizo kan ni a, kan tawngkam chheh chhuah apiang hi mizo tawng dikah pawm mai ila, a remchangah chuan hmang ve zel mai ila a hahdam zawk ngeiin a rinawm.!!!!

BIBLE QIUZ NO. 25

II LALTE BUNG 16-20

A Kâr âwl dah khat rawh :

Q1.Chutchihuan puithiam ...................... chuan lal Ahaza thupêk ang zawng zawng chuan a ti ta a.

Q2.Chutichuan LALPA chu an tih a, an zinga mi hmun ...................... inahte chuan mi an thawi thin a.

Q3. Ram tin pathian zawng zawngte zinga mi chuan tute nge an ram ka lakah chhanhim a,   LALPA chuan .................................... khua hi ka lakah a han chanhim tehlul ang?’ tiin,” a ti a.

Q4.Hei hi a chungchâng thu LALPAN a sawi chu a ni: ...................... fanu nula chuan a hmusit chia, a nuihzatbur che; Jerusalem fanu chuan a lu a thin khum che.

A bung leh Châng dah rawh :

Q1.Tin, i rila rah, i hrin tûr, i fate ngei zinga mi pawh an kal bopi ang a; Babulon lal inah      chuan mi tilreh an la ni ang,’ a ti,” a ti a.

Bung: ...............          Chang: ....................

Q2. Tin, chawlhni atâna chung nei kawng inaan siam leh pawn lama lal luhna chu Assuria lal avângin LALPA inaha thlakthleng ta hlauh va.

Bung: ................         Chang: ....................

Q3. Hnam tinte pathian zawng zawng zinga mi rêng rêngin an ram chu Assuria lal lakah an chhanhim tawh ngai êm ni?

Bung: ................         Chang: ...................

Q4.Tin, Ahaza chu api leh pute hnênah a muhil a, a pi leh pute zingan Davida khawpuiah an           phûm ta a; tin, a fapa Hezekia chu a aiawhin a lal ta a.

Bung: ................         Chang: ....................

Q5.Israelte chu Davida chhûngte an nihna a paishak a si a; tichuan Nebata fapa Jeroboama kha lalah an siam a; in Jeroboama chuan Israelen LALPA an zi chu a lo kuai peng a,            thil sual nasa aka tihtir a.

Bung: ................         Chang: ....................

Q6.Lal chuan heti hian a ti, ‘Hezekia bumin awm suh u; ani chuan a kut ata a chanhim thei dâwn si lo che u a:

Bung: ................         Chang: ..................

Hming : ......................................................

Section : .....................................................

BIBLE QUIZ  NO. 19 RESULT

            Chhanna a luh loh avangin a ngai dah nawn leh a ni.

            Bible Quiz  leh lawmman hi Cir. Manager Pu.C Lalnunsanga hnenah thehluh a, lawmman pawh lam thin tur a ni.

PAVALAI INKHAWM PROGRAMME

A hun  :21. 6. 2012(Ningani)

A hmun:Senior Hall

Chairman: Pu T.K Manga

Tantu : Pu Biakvela

Hun Hman dan: Rilru sawi leh tawngtai rual.

TBZ NEIHTHIL THEHKHAWM

A hun : 18.6.2012 (Thawhtan Zan)

A hmun : Pu Khawlhmingliana  In

Hruaitu : Pu TK Manga

Tantu : Pi K.Lalhmingliani

UPA  DENGHLUMA Gr. TE HNENA  HRIATTIRNA

            Keini Upa Denghluma Group te chuan ni 19.6.2012 (Thawhleh ni) zan hian vengchhungah Bible Quiz kan rawn zuar dawn a, vengchhung mipui te min lo dawr theuh turin kan ngen che u a ni. A man hi bu khat Rs10 a ni ang.

            Hemi zan hian Group member te a tam thei ang ber hnatlang turin kan in hriattir a, zan dar 7:00 ah Tv.C.Lalngheta dawr kawtah innghah khawm tur a ni.

LAWMTHU  SAWINA

            Ni 15.6.2012 (Zirtawp ni) Y.M.A day zingkar khan Br. Y.M.A chuan vengchhung tifaiin hnatlang a ko a, member thawkchhuak zawng zawng te chungah Br. Y.M.A chuan lawmthu a sawi tak meuh meuh a ni. Tin, hemi zinga bawlhhlawh lakkhawm phurh nana Motor thawhtu Pu Liantluanga chungah lawmthu a sawi bawk a ni. 

Sd/- (LALHULIANA)

Secretary

Branch  Y.M.A

Urban  health  center hlimen  hriattirna

            Urban Health Center Hlimen a nau nei te tan heng hamthatna te hi a dawn theih.

FA PAHNIH (2) NEI CHIN TAN

1) Rs.600/-

2) Damdwi man Rs.350/-

3) Laboratory charge Rs.200/-

4) Nau puan paruk (6).

5) Motor kal man Km. 1 ah Rs.15/- zel.

FA PATHUM(3) CHIN/CHUNGLAM TE TAN

1) Damdwi man Rs.350/-

2) Laboratory charge Rs.200/-

3) Nau puan paruk (6).

4) Motor kal man Km. 1 ah Rs.15/- zel.

In entir  turte  tana  hriattur  te

1. Registration (hming ziah luh theih hun) dar 12noon hmalam. Emergency case chu eng hunah pawh a tih theih.

2. Dressing hun zing dar 6 atanga zing dar 8 thleng.

3. Damlo kan hun zing dar 6 atang dar 9, tlai lamah dar 3 atanga dar 6.

4. OPD Monday to Friday

5. Holoday leh Saturday ah in entir a theih loh.

6. Damdawiin area ah meizial zuk phal lo a ni, zu lui man an awm chuan Rs. 200 chawi tir a ni ang.

Dr. Debbie Lalremruati

Medical Officer

UHC, Hlimen

BO  CHHAR

Plier chhar a ni a, a tibo chuan a hnuai a phon no. tarlanah hian a rang lama contact tur a ni e.

Contact No. 9862361661

TUALCHHUNG

,Pu Zairemthanga H/o Pi Hnehthangi (V.Sec) te chuan khawilo vah vel nan Bike R15 an lei thar.

,Pi Lalngaii w/o Pu Vanlalvena (L) (CH.Sec) te chuan khawi lo vahvel nan Bike (Fz) thar an lei.

,Pu Lalthakima H/o Pi Lalbiaktliangi (V.sec) te chuan khawi vah vel nan Bike Royal Enfield (Classic) thar an lei.

,Pi Lalmuani w/o Pu C.Kapliana (V.sec) chu damlohna avangin Aizawl Hospitalah enkawl mek a ni.

,Pu Lalbiakmawia h/o Lalhmingliani (V.sec) chu damlohna avangin Alpha Hospital ah enkawl a nih hnuin dam takin a lo chhuak ta.

,Pu Laldawla h/o Rosangi (Ch.sec) chu Lunglam thatloh na avangin Civil Hospitalah enkawl a nih hnuin a lo chhuak.

,Pu Vanlalruata h/o Pi Tete-i(V.sec) chu damlohna avanga Alpha Hospital Kulikawn ah enkawl a nih hnuin dam takin a lo chhuak.

THU  ROTLI NG

          * Mahni pwisa ip tilang tu chuan rukru a thlem a ni. Pawisa thuah chuan mitin hi sakhaw pakhat bia vek kan ni.

                      

                   - Voltaire

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300

Mipui Aw 10.06.2012

MIPUI AW

Vol. XVIII Issue No. 24 Kristian Thalai  Pawl  Saikhamakawn Branch  Pathianni Dt.10.6.2012

VAWIIN CHANG VAWN

            Ngai teh u, Pain min hmangaihna chu a va nasa em! “Pathian faahte” min vuah tak hi; chutiang chu kan ni reng e. He mi avang hian khawvelin min hre lo a ni, amah chu an hriat loh avangin. I Johana 3:1-2

KOHHRAN PROGRAMME

10. 6. 2012 (Pathianni)

Chawhma S.S inkhawm

Tantu          : Pi Lalhmachhuani (Buangi)

Chawhnu

Thusawitu  : Pu Khawlhmingliana

Zan Inkhawm

            Bible Society Campaign a hun hman tur a ni a, Thilpek pawh Bible Society pual a lakkhawm tur a ni.

Thusawitu  : Rev.C.Lianhmingthanga

KTP PROGRAMME

 Dt. 11. 6. 12 (Thawhtan zan)

Neihthil thehkhawm

A hmun          : S.S Hall

Hruaitu         : Nl. Zohmingmawii

Tantu             : Nl.C.Lalrempuii

            June thla chhunga Inkhawm leh Fellowship zai hruaitu leh musician turte.

Hla hruaitu   : Pu Lalchhandama

turte                 Tv. Malsawmzuala

Musician       :Pu Lalremruata

                          Tv. R.Lalzamlova

VAWIIN  TLAI   FELLOWSHIP

A hmun          : S.S Hall

Hruaitu         : Pu C.Lalnunsanga

Tantu             : Nl.Pc.Lalrinmawii       

SERMON

LAWM  RAWH  U

            Philippi 4  4Lalpa ah chuan lawm fo rawh u: ka ti leh pek thin ang, lawm rawh u. 5In dawhtheih zia mi zawng zawng hriat ni rawh se. Lalpa chu a hnai e. 6Engah mah mangang suh u; engkimah tawngtai leh dilin, lawmthu hril tel zelin, in duhna te chu Pathian hnenah hriattirin awm zawk rawh se.

            Mihring te hian vanneihna kan dawng chang te, kan duh leh kan awh ngawih ngawih kan neih ni te, harsa taka kan beih a; a tawp a kan tum ram kan thlen ni te hian lawmna leh hlimna duhawm tak chu kan nun chhungah a lo luang lut thin a ni. Chu hun chu a nuam in a engthawl thlak a, thil tih a nuam in, kan bula awm midangte tan a nuam thin. Lawmna a kan nun a khah ni chuan midang kan huat te, kan hmelma thin te pawh kan rilru ah a lang tawh ngai lo. Lawmna in kan rilru a luah khah ni ang renga awm tur leh chu lawmna atanga Pathian kan dawr ang reng a dawr turin kan Pathian thu in min duh a. Mahsela chu nun neih reng chu harsatna leh vanduaina a lo thlen niah meuh chuan a harsa thin a ni. He hunah tak hian kan Pathian chuan lawm turin min ti tlat si. Lawmna chhan awm lova lawm erawh mihring te tan thil har leh tih rualloh a ni lawi si.

            Zawlnei Habakuka chu Pathian hmaah han phun ve bawk mahsela a tawngtaina hlaah chuan; a hmelma ten harsatna leh mangan na tawpkhawk rawn thlenin; a ran rual te, a grape kung te, a olive thing duah tha tak tak mai te chu rawh tihchhiat sak vek mahsela Pathianah chuan ka lawm zel dawn a ni a ti tlat a. Engvanga he thu hi sawi thei nge a ni, tu fa nge lungngaihniah lawm ngai a, ngui ni ah tap lova hlim thin. Habakuka erawh chuan engkim hi Pathian pek a nihzia te, Pathian chu a chhandamna leh a chakna a nihzia a hrechiang a, Pathianin a kalsan ngai dawn bawk si lo tih a hriatchian na chuan lawmna leh thlamuanna a pe a, a hmelma ten engtiang pawhin a chuangah hleilenna lantir mahse engkim a engkim zawk Pathian a neih avangin a lawm mai zawk a ni. Khawvel thila innghat ni ta se Habakuka hi a lawm reng theih hauh lovang. A  innghahna leh a chhandamna chu a hmelma ten an tichhe ve thei lo tih a hrechiang tlat a ni.

            Kum tam tak he khawvelah kan lo hmang ral tawh a, kan kum hman tawh zawng zawng chanve pawh lungngaihna in kan hmang em ni? Harsatna leh manganna kan tawh ni hi belhkhawm ila kumkhat pawh a tling tawh angem? Pathinin min hruaina zawng zawng hi; kan chungah harsatna a lo thlen chang pawhin i chhut kir thin ila; chutah chuan Pathian min hruai tawhna avangin harsatna vawrtawp kan tawh mek lai pawhin lawmthu kan sawi thei ngei ang. Lungngaihna ni reilo te kan tawh changa kan vui mai thin hi kan ti dik dawn em ni? Harsatna karah pawh lawm thin te hnenah kan Pathian hi a awm hla  ngai lova, manganna an tawh mek lai pawha; Pathianin alo enkawl tawhna avanga lawm tlat thin mite tawngtai na chuan Pathian a ko eih a, tichuan mihring rilru in a hriat ngai loh thlamuanna a  pe thin a ni.

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

THUAWIH  NGAI

            Julius Ceasar-a chuan “Ka lo kal a, ka hmu a, ka hneh a” tih tawngkam tawite hi kum tamfe kal ta khan a lo chhakchhuak tawh a. Hlawhchhamna chuan a hneh loh hmel hle mai. Buai na hmunah awm mahse hlau leh khura awm mai lovin a bei a, a hneh thin tihna a ni.

            Tunlaia kan mahawh ber ni a lang chu kan bauaina neih te, harsatna kan tawh te hian kan tha a ti thum nasa ta lutuk lo maw? Kan hma a harsatna awm mek hel zawnga kal mai hi hlawhchhamna leh mi dawihzep zia a ni tih hi hre thar mawl ila a tha hle ang. Kan harsatna tawh mek chiang takin kan en ang chumi hnuah a hmachhawn dan tur ruahmanna kan finna neih chhun ang ang in kan siam leh anga tichuan huaisen takin kan bei let anga hneh ngei turin tha thlah miah lovin tan kan la anga Pathian zarah kan hlawhtling ngei bawk dawn a ni.

            Kan hlawhchham nachhan ber nia lang chu kan dawizep vang leh kan thatchhiat vang ti ila kan sawi sual tam lovang. Khawvel mihring zawng zawng hian kan hlawhtlinna dal tur khawp harsatna kan nei theuh a, chu chu huaisenna leh taimakna nena hmachhawn a nih chuan hlawhtlinna a awm hla ngai lo.

ARTICLE

A  LANNA  TLANG  DANG  ATANGIN  KA  RAWN 

THLIR A

            Hah em em in tlang chhip chu ka thleng chho hlawl mai a, eng tlang nge tih pawh ka hre lem lo, ka thu hnawk a ka thlan fim a tla zawih zawih mai bawk a. Chutah ka hmalam ah hian thingphek chhe tawh tak mawih tawh lam awn thle fahrana dingah hian he thu hi a lo in ziak kulh mai a “ Tan Lam Neih Lohna Tlangah Kan Lo Lawm A Che”. Tichuan ka tho nghal a, chumi intarna dinglama pen a, thui loteah lung tohlawt hi thlanglam zawngin a lo in khawh chhuak luah mai a, ka va pan phei nghal. Chu lungtohlawt atang chuan kan thlir ta a, khawvel hmun hrang hrang ram hrang hrang hi a lo lang pe uarh mai a, ka thlir reng a, engkim mai hi a lang vek nia mawle. Ram ropui tak tak lang ruih mai chu belhchiang chak awm tak ka nih vei nen, Zopa rilru alo chhuak a niang chu kan ram Mizoram ngei mai chu ka thlurbing duhna rilru a lian ta zawk a. Chiang lehzual zawka thlir tur chuan ka thuthmun ka siam rem ta sauh sauh a.

            Chu tlangah chuan engmah hi tan bik leh awn lam a neih theih miau loh avangin  a nihna ang takin ka hmu thei a. Ram chhung political party hrang hrang kan thlir a, Mizoram hmangaihna rilru chu an neih theuh a, mahsela an hmangaih hmasa ber chu anmahni a ni vek nia mawle. Eiruk hlemhletna kawngah lah an tlan nasa em em mai a, diktaka rorel duh tlemte awm ho lah hnathawk thei lo a dahkhawm niawm fahran hian in pakhatah hian a awmkhawm vek a, chuta tang chuan an chhuak thei der si lo, mahse tumah chu zu tan bik ka nei chuang lo, ka thlir liam mai mai hi a ni ber.

            Veng hrang hrang chu kan thlir kual leh a, Pathian kohhran ho chu kan thlir bing leh hlawm a, piangthar tawh ihthlahdah tak leh zawmthaw tak hi a tam hle mai, Pathian tih mi tak tak an awm bawk a. Mahsela a landan tlangpui atanga ka zuk hmuh danah chuan Pathian rawngbawltute hi an inthlahdah hlawm niin a ka hria.

            Chutah Zoram thalai te ka thlir leh a, ruihtheihthil, mipat hmeichhiatna, zu hmun hlimna, leh mahni mipatpui leh hmeichhiatpui inkawp duh thlengin a lo hluar em em mai bawk a. Chumi kawnga kal te chu tam tak an ni. Duh duh dana awm an duh a, hlimna leh lawmna an zawnga chumi kawnga an kal theih nan engmah an pawisa hlawm lo. Chutiang taka an awm nachhana ka hmun chu Ram hruaitu lu ten Pathian tihna tak tak leh ram hmangaih aia an mahni an in hmangaih hmasak zawng vang te, Kohhran tin ten Pathian an dawr tam tawk lo vang niin ka hmu chhuak bawk a. Mahse tumah ka dem thei chuang lo, tan lam pawh ka nei thei chuang lo, tihtur ti tawk  loin an leng thuau thuau mai a ni zawk.

            Ka thu rei ta deuh a ni ang, ka mawng kham lutuk chu ka tho hlawl a, ka piah kawrte tui luang ri her her lam chu kan pan phei leh a, chu tlang danglam tak maiah chuan enge la awm zel tih hriatbelh chakna chuan ka khat ta tlat a, kal zel turin ka rilru ka siam fel ta a ni.

EURO 2012

            Kum 4 kalta ah khan Austria khawpui Vienna a Ernst Happel Stadion ah chuan Spain mipui te chu lawmin an au, Euro 2008 final ah Spanish Striker Fernando Torres chuan minute 33 na ah chak em em in Germany defender Philip Lahm tlanpel in an champion na goal a khung kha hria kan la awm ang. Tun tum hian tunge champion ang le? Qualifying an khelh chhoh rap rap hnuah ram 16 te chuan Poland leh Ukraine ah champion nih an inchuh dawn. Team tha leh khawng tak tak vek anni tawh a, players te pawh Europe a club tha leh lian a khel deuh vek anni tawh. Tu tih dan tak ah emaw “Millionaire 300 chuang mahni ram tana inkhel kan en leh dawn”.

            Heng ram 16 te hi group 4 ah an in then hrang a, group khat a awm theuh te hi an in khelkual vek anga, a point hmusang pahnih hian quarter-final (last 8) an lut thei ang. Group inthen darh tur hian footballer hranghlui, EURO a lo champion tawh mi pali Zinedine Zidane, Horst Hrubesch, Marco Van Basten leh Peter Schmeichel ten an pawt a ni.

            Poland leh Ukraine te hi ram in thenawm anni a, a tlangpuiin ram vawt an ni. Stadium lian turu tak an nei lova, amaherawhchu an stadium ho ah hian te tak a awm lemlo. An khelhna tur Stadium hming hrang hrang han tarlang ila.

POLAND

National Stadium                     PGE Arena

Capacity: 50,000                  Capacity : 40,000

Venue : Warsaw                   Venue : Gdansk

Municipal Stadium                Municipal Stadium

Capacity: 40000                      Capacity: 40000

Venue: Wroclaw                     Venue: Poznan

UKRAINE

Olympic Stadium                   Donbass Arena

Capacity: 60000                      Capacity: 50000

Venue; Kiev                            Venue: Donetsk

Metalist Stadium                   Arena Lviv

Capacity: 35000                      Capacity: 30000

Venue; Kharkiv                                   Venue: Lviv

            UEFA  Euro 2012 atan an official ball tur hi ‘ADIDAS Tango 12’ a ni dawn a, ball control leh han chawh kual leh khalh (Dribble) nuam tak tura designed a ni a, World Cup 2010 ball JABULANI aia thunun nuam zawk tura ngaih a ni.

            Tun tum Euro a official song tur hi ‘ Endless Summer’ tih a ni a, German zaithiam mihang nula Oceana (29) sak a ni.

BIBLE QIUZ NO. 24

II LALTE BUNG 16-20

A Kâr âwl dah khat rawh :

Q1.Chutchihuan puithiam ...................... chuan lal Ahaza thupêk ang zawng zawng chuan a ti ta a.

Q2.Chutichuan LALPA chu an tih a, an zinga mi hmun ...................... inahte chuan mi an thawi thin a.

Q3. Ram tin pathian zawng zawngte zinga mi chuan tute nge an ram ka lakah chhanhim a,   LALPA chuan .................................... khua hi ka lakah a han chanhim tehlul ang?’ tiin,” a ti a.

Q4.Hei hi a chungchâng thu LALPAN a sawi chu a ni: ...................... fanu nula chuan a hmusit chia, a nuihzatbur che; Jerusalem fanu chuan a lu a thin khum che.

A bung leh Châng dah rawh :

Q1.Tin, i rila rah, i hrin tûr, i fate ngei zinga mi pawh an kal bopi ang a; Babulon lal inah      chuan mi tilreh an la ni ang,’ a ti,” a ti a.

Bung: ...............          Chang: ....................

Q2. Tin, chawlhni atâna chung nei kawng inaan siam leh pawn lama lal luhna chu Assuria lal avângin LALPA inaha thlakthleng ta hlauh va.

Bung: ................         Chang: ....................

Q3. Hnam tinte pathian zawng zawng zinga mi rêng rêngin an ram chu Assuria lal lakah an chhanhim tawh ngai êm ni?

Bung: ................         Chang: ...................

Q4.Tin, Ahaza chu api leh pute hnênah a muhil a, a pi leh pute zingan Davida khawpuiah an           phûm ta a; tin, a fapa Hezekia chu a aiawhin a lal ta a.

Bung: ................         Chang: ....................

Q5.Israelte chu Davida chhûngte an nihna a paishak a si a; tichuan Nebata fapa Jeroboama kha lalah an siam a; in Jeroboama chuan Israelen LALPA an zi chu a lo kuai peng a,            thil sual nasa aka tihtir a.

Bung: ................         Chang: ....................

Q6.Lal chuan heti hian a ti, ‘Hezekia bumin awm suh u; ani chuan a kut ata a chanhim thei dâwn si lo che u a:

Bung: ................         Chang: ..................

Hming : ......................................................

Section : .....................................................

BIBLE QUIZ  NO. 19 RESULT

Chhanna lut zawng zawng              : 3

Chhang dik vek                                : 3

Lawmman dawngtu                          :Vansangpuii                                                                           (v.sec)

Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni

PAVALAI INKHAWM PROGRAMME

A hun  :14. 6. 2012(Ningani)

A hmun:Pu H.Remtluanga In

Chairman: Pu Kamzawngliana

Tantu : Pu Ramdinthara

Hun Hman dan: Hla zir leh tawngtai ruala hun hman tur a ni.

 KOHHRAN  ZAIPAWL  TE  HRIATTIRNA

            Zanin inkhawmah hian Kohhran zaipawl ten hla rem tur a ni a. Hla rem tur hi vawin tlai fellowship banah ennawn tur a ni, member te ngaipawimawh theuh turin kan in hriattir a ni e.

LAWMTHU SAWINA

            Heng a hnuaia mite hian YMA Saikhamakawn  Branch   tan  hmanraw tangkai leh hlu tak tak, kan mamawh em em an rawn donate-a, an chungah  YMA Saikhamakawn Branch  chuan lawmthu a sawi tak meuh meuh a ni e.

1. Pu Lalnithanga     - Bawngtuthlawh 1 no.

2. Pu Zoramthanga  - Suahdur  1 no.

3. Pu J.Lalthakima   - Hollow Guiter

LAWMTHU  SAWINA

            Keini Upa R.Lianzinga Group te chuan sumtuak nan vengchhungah Euro 2012 Squad list, fixture leh player te bihchianna bu kan rawn zuar a. Vengchhung mipui te tlawmngaia min lo dawr tute chungah lawmthu kan sawi takzet a ni. Tin, tlawmngaia min zawrh sak tute chungah lawmthu kan sawi tak meuh meuh bawk a ni.

Sd/- (R.ZODINSANGA)

Secretary

Upa R.Lianzinga Group

The Leprosy Mission Thilpek Pe Duhte Tan

            India rama phar tamtak tana rawngbawl hna thawktu The Leprosy Mission thilpek pe duhte tan hetiang hian pek theih a ni e.

1. T.L.M founder gift- `1000

2. Patron member- `500

3. Life member- `1300

4. Patron to Founder gift- `500

5. Life to Patron- `200

6. Memorial gift- `200

7. Anniversary gift- `200

8. Annual membership- `100

9. Junior member- `10

            Hei bakah hian tlem lua, tam lua awm lovin Donation pek theih a ni bawk e. Thilpek pe duh te tan Upa Lalzama, Upa Lalmuankima, Upa Zonunmawia leh Upa Lallawmchhunga te hnenah kumin chhungin pek theih a ni e.

TUISIK  THIANGHLIM  DAMDAWI  ATAN  A THA

1.         Kua a thatloh hian kan taksa a tui tam tak a chhuak a, hei vang hian ORS leh thil tui ril lam in hi a tha hle a, tui thianghlim a chi, chini, soda leh ser tui chawhpawlh in hi a tha hle a ni.

2.         Zun kawngah hian natna hrik tam tak a awm thin a, hengte hi kan zun hian a chhuak tel thin a, kan damloh emaw, exer kan lak tlem deuh hian kan zung khat a, natna hrik a inthlah pung chak thin. Chuvangin kan zun tam theih zawk nan tui thianghlim in tam hi a tha hle a ni.

3.         Kan pumpuia thur a tam lutuk loh nan leh pumpui thur lutuk tur tih dal nan tui thianghlim in tam hi a tha hle bawk. Pum a nat zual lai hian nachhawkna ei aiin tui thianghlim in in na a chhawk hma zawk.

TUALCHHUNG

,Pu Laldawla h/o Rosangi (Ch.sec) chu Lunglam thatloh na avangin Civil Hospitalah enkawl mek a ni.

,Pi Lalthanzami w/o P. Vanlalruata (Ch.sec) chu damlohna avangin Aizawl Hospitalah enkawl mek a ni.

,Pu Lalbiakmawia h/o Pi Lalnunfimi (T.sec) chu damlohna avangin Falkawn Hospitalah enkawl mek a ni.

,Tv. Lalhruaizela s/o Pi Zohmingthangi (T.sec) chu damlohna avangin Kulikawn Hospitalah enkawl mek a ni.

,Pu Lalbiakmawia h/o Lalhmingliani (V.sec) chu damlohna avangin Alpha Hospital ah enkawl mek a ni.

,Pi Khawlvuani w/o T.Upa Sangzuala (V.sec) chu damlohna avanga Greenwood Hospital hospitala enkawl a nih hnu in dam takin a lo chhuak.

,Pu Thangkhawmanga h/o Pi Lalthangvungi (V.sec) te chhungkua chuan khawilo vahvel nan Scooty (Blaze) an lei thar.

,Pu Lalrochama (V.sec) te chhungkua chuan khawilo vahvel nan bike (KTM Duke) thar an lei.

THU  ROTLI NG

            * Hmangaihna diktak chu a kawng a rual rem ngai lo.

- William Shakespear

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300