MIPUI AW
Vol. XVIII Issue No. 16 Kristian Thalai Pawl Saikhamakawn Branch Pathianni Dt.15. 4 .2012
KOHHRAN PROGRAMME
15. 04. 2012 (Pathian ni)
Chawhma S.S
Tantu : Pi Lalchhuanawmi
Chawhnu
Thusawitu : Pu Siamliana
Zan Inkhawm
Thusawitu : Upa Lalzuiliana
KTP PROGRAMME
Dt. 16.4. 12 (Thawhtan zan)
Hruaitu : Tv.Lalhmangaihzuala
Tantu : Nl.R.Lalngaihawmi
Thu sawitu : Nl. Lalramnghaki
Thilpek lakk : Nl.Lalngaihawmi
hawmtu turte Nl.Vanlalpeki
April thla chhunga Inkhawm leh Fellowship zai hruaitu leh musician turte.
Hla hruaitu : Pu Lalremruata
turte Tv. F.Laldingliana
Musician :Pu Lalchhandama
Tv. Malsawmzuala
VAWIIN TLAI FELLOWSHIP
A hmun : S.S Hall
Hruaitu : Pu C. Lalremruata
Tantu : Nl.R.Zonuntluangi
KOHHRAN HMEICHHIA PROGRAMME (Ni 17.4.2012)
Hlimen Damveng Kohhran Hmeichhia tlawha hun hman tur a ni a. Member te thahnemngai takin kal theuh i tum ang u.
Tantu : Pi Lalrinngheti
Thusawitu : Pi Lallianpuii
Sawrkar kumthar a nih avangin Pathian Ram chhiar hun sawn a ni a. Tunthla chawlhni tawp ber Ni 29.4.12 hian chhiar tur a ni.
ISUA KRISTA
Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan. Khawvel thiam loh chantir turin Pathianin a Fa khawvelah a tir lo, khawvel amah avanga an dam theihna turin a tir a ni zawk e.“Tupawh amah ring chu thiam lohvin an awm lo vang, tupawh ring lo chu tun apangin thiam lohvin an awm, Pathian Fapa mal neih hming an rin loh avangin. Johana 3: 16-18
Pathian pakhata minung pathum zinga pakhat fapa Krista Isua hi kan hre chiang vek awm e. Bible chang kan tarlan ah khian Pathian fapa mal neihchhun a ni tih kan hmu a. Chu a fapa mal neihchhun ngawi ngawih chu Evi leh Adama bawhchhiat vanga Pathian anchhia kan dawn Thihna ata min tlan chhuak tura amah Pathian ngeiin khawvel mihring dam leh nana min rawh pek a ni, a va hlu in a va ropui em. Mihring dik tak, chhul atanga hrin a ni a. Hebrai ziakah chuan mihringte chaklohna zawng zawng hriatthiampui vek a nihzia pawh chiang takin a sawi nghe nghe a ni.
Evi leh Adama bawhchhiat vanga khawvel mihring zawng zawng sualfa, hremhmuna kal ngei ngei tura Pathian anchhia dawng tawh kan ni a. Lal Isuan Kalvari tlangah Kros lerah kan thih ai a thi a, a thih hmaa Isuan Pa Pathian hnenah “Ka Pa an ni hi ngaidam rawh an tih sual an hrelo a nih hi” tia ngaihdam mihringte tan a dil na kha Pathian chuan a va chhang nasa dawn em. Tin, a nun ngei hlan a, a thisen thianghlim senga mihringte sual thawi nan Pa Pathian hnena mihringte min dinpui meuh chuan Biakbuk puanzar a lo in thler chhuak nghal a, sual vanga inthawina chu Lal Isuan min tih tawpsakin ama thisen chu chatuan atan kan tan a tawk ta. Eden bawhchhiat vanga hremtur tumah kan awm ta lo, Pathian chu fakin awm rawh se.
Bawhchhiat vanga Pathian hremtuar tur kan ni ta lo, Pathian fapa mal neihchhun Lal Isua kan tana tuar a, a nun hlan tu, thisen ngainep a, kan sual vanga tuar tu Lal Isua engahmah ngai lova hrereng chunga mahni duhdan leh nawmsakna zawnga sual kawnga kal te hi Pathian hian a hrem hreh dawn hauh lo. Chatuana kan nun theihnan Lal Isua hi Pathianin min pe a, amah ring duhlo tute tan chuan Lal Isua thisen hi Pathian thinurna tizual tu a ni dawn tih hi kan hriatchian a tul takzet a ni. Mihringte chhandamna tura a nun hlan tu Lal Isua chanchin hi hrelo te hrilh hi kan mawhphurhna a ni, hrelo te thisen mawh chu kan chungah phut let a ni dawn si.
EDITORIAL BOARD
(
Editor :
Tv.PC.Vanlalhriatpuia
9862732381
Jt.Editor:
Pu R. Lalmuanpuia
9612159842
News Editors :
Tv.RLalzamlova 9612413196
Tv.R.Zodinsanga 8974743073
Tv.F.Laldingliana 9862378567
Tv.Lalhmangaihzuala
9862846345
Circulation Manager:
Pu.C.Lalnunsanga
9612413287
Editorial.........?
DING LEH VEI
Kut ding lamin a tih chu kut Vei lamin hre suh se tia min zirtir tu Lal Isua hnungzui te Kristian ram kan ni hi a nuam a, a va hahdam thlak em. Mahni hlawkna ngaihtuah ran chunga thil tha ti lo tura zirtirna tawngkam mawi tak a ni. Tlawmngaihna nen pawh a in hnerem thlap a ni.
Mihringte hi mahni chauha awm thei kan ni lo a, in mamawh tawn leh hlimni leh lungngaihniah in lawmpui a leh in tanpui tawn tur kan ni. A bikin Mizo khawtlang nunah a ni bik emaw tih mai tur a ni nghe nghe. Engapawh chu nisela kan mihringpui te chunga that chhuah a, tanpuingaite theih tawpa tanpui hi midangte tih tur a ni bik lo a, keimah ngei hian ka tih ve tur a ni tih rilru put pawh a tha hle. Midang mahmawh lo mihring tumah kan awm si lo.
Kan sawi tawh ang khian, phut let nei lova thil tha ti turin Lal Isuan min duh a, chumi dungthula midangte tana inpe mi te hi Vanramah engtiang takin nge ro an khawl khawm tawh ang le? Thihna khura tang mek te chhanchhuak tura thih thlenga inpe kan Lapa Isua hnung zui turin rilru i siam thar ang u.
Article
MAHNI HMASIALNA VANG
VEK A LO NI ZAWK.
- Hmangaiha
He hringnun hi a chhut peih apiangin mahni hmasialna a khat a nih zia an hmu chiang a, a ngaihtuah tam apiangin a tenawm zia an hre chiang thin a lo ni....
He khawvelah hian lungawina kim nei chu an vang ngawt ta ve ang le.!! Mahni hmasialna avangin Hausaten hausak leh zual chakin an phi buai a, retheite lah hausak chakin an rum thung, duh zawng leh chak zawng hmuh zawh loh avangin mawhpuh tur zawngin fak derna leh demna awka nen a thim a var pawh thlu lovin kil tin kan dap ta hlawm a nih tak ber hi.!! Kan sawi chamchi thin Vanram kan ngaihna chhante pawh hi eng dang vangmah a lo ni lo... mahni hma kan lo sial vang vek a lo ni zawk.
Thih chak ngawih ngawih khawpa natna khuma mute pawh hian hrisel tak leh nuam taka khawsak ve an chak tawh vang maia thih thlang thin an lo ni a, Tin, Dam thlakhlelh luat avanga thih hlau ngawih ngawihte pawh hian hriselna tha tak neiin sum leh paiah leh nitin khawsaknaah harsatna em em an lo neih loh vang mai mai chauh a lo ni thin, ei leh in tur leh silh leh fen tlachham ngawih ngawihin emaw tho kang peih eih lovin natna khumah an hun tam zawk han hmang ve ngat sela’ng zawng dam hi an thlahlel viau reng bik lovang maw le..!!
Rawngbawltu tam takte pawhin vanram an ngaih ngawih ngawihna chhan pawh eng dang vang mah a ni bik lo, rim taka an rawngbawlna tlansana chawlh hahdam an thlakhlelh tawh vang leh Isuan an tana a lo tiam tawh ropuina Lal lukhum khum chunga inti vei taka len ve an chak tawh vangte pawh a ni mahna..!!!
Mihlim ho pawh an bang chuang bik dawn em ni.? Vanram ngai a, khuangte leh lama ‘Lo kal ta che’ an tih chhan chu nuam an tih zawng tak hlim tawp hlau lova zaia lam mup mup an thlak hlelh tawh vang mai a ni ve thei tho lo maw. Misualte pawhin thih an hlauh a, an chak loh em em chhan pawh eng dangmah vang ni lovin, hremhmuna tlak an hlauh vang mai mai a ni.
Kan nawmna tur zawng hian kan khawsa a, kan chak zawng anga awm kan duh luatna avang hian thih kan thlangin damte kan thlahlel ngawih ngawih thin thin a lo ni......
Scientists Chanchin
Pythagoras (582 B.C - 500 B.C)
HIPPOCRATES (460 B.C - 370 B.C)
Hippocrates-a hi Greek rama Aegean tuipui a Cos Island ah kum BC 460 vel kha a lo piang a. A mimal chanchin hi hriatchian a harin, hriat theih a awm chin pawh a tlem em em a ni. A pianna Cos thliarkarah hian Damdawi lam zirna dinin chutah chuan a zirtir nghe nghe a ni awm e.Tin, damdawi lam thiamna zirtir hian a zinkual nasa hle bawk a ni.
Hippocrates-a hi ‘Father oh Modern Medicine’ ti a koh a ni a.Natna chanchin a hrilhfiah thin a, chu chu khawvel tan hian a tangkai em em thin a ni. A ni hian damlo an natna hmuchhuak turin endik dan chi li a duangchhuak a. Chung te chu damlo mit lan danah te, an vun rawng rawn lan chhuah danah te, a taksa lum leh vawt dan ah te leh zun leh ek an inthiar dan hmang te in a ni a. Nitin record mumal tak nen a enkawl thin a ni. Hippocrates-a hian in zai na pindan leh in zai na hmanrua hmandan tur fel takin kaihhruaina a duang nghe nghe a. Hliam enkawl dan te leh ramhmul atanga pemthar damdawi han siam mai tur te pawh a ngaihtuah chhuak nasa em em bawk.
Hmanlai hunah damdawi hmanga tihdamna leh damlo enkawl hna reng reng chu puithiam te kutah a awm tlangpui a. Damlo reng reng engvang pawhin puithiamin a enkawl laia a lo dam chuan Pathian tihdam tiin Puithiam te chuan an sawi thin a, tin, natna reng reng hi sual vang a lo awm leh, Pathian tihlawm loh vanga lo awm a ni tiin Puithiam te chuam mipuite hnenah rinna an theh darh bawk a ni. Chu chu Hippocrates-a hian tha a ti lo in, Pathian hminga chhechham meuhin damlo enkawl dan a lo duangchhuak a, damlo enkawl dan hrang hrang chi 87 lai a lo chingchhuak a ni.
Tunlai hunah chuan thil ho te leh hriatsa a kan lo ngaih thin, mahse hmasang hunah chuan tukhaw hriat leh sawichhuah la ni lo tam tak a lo sawi chhuak a. Mi thau te chu cher aiin a tlangpuiin an thi hma zawk tih te a lo sawi chhuak a. Tin, kum upa te hian thalai te aiin chawtha an mamawh tlem zawk tih te, Nipui lai hian thlasik hunlai aiin mihringin thil kan ei tlem zawk tih ang te a lo sawi chhuak daih tawh a. Ho te anga lang pawh nise tunlai mi tamtak te hian ngaihtuah nachang pawh kan hre lo thung hial awm e. Tin, a hunlaia natna enkawl dan leh kalphung a lo duan sa zawng zawng te kha tunlai khawvel thleng pawh hian inzirtir a la ni reng bawk a ni. Hippocrates-a hi kum B.C 370 vel khan a thi a ni. (Source- Our World Scientise)
BIBLE QUIZ NO.16
i Lalte BUNG 4-8
A Kâr âwl dah khat rawh :
Q1. Hengte hi a mi lianho neihte chu an ni: Zadoka fapa Azaria chu ....................................... a ni a;
Q2. Tin, Solomona chuan Hirama hnênah, “Ka pa Davida khan LALPAN a kephah hnuaia a dah hma loh kha chuan a vêl kil tin, kil tanga indonate avâng khan, .................................. a Pathian hming atân in a sa thei lo tih i hria a.
Q3. Tin, Solomonan LALPA tana in a sak chu a dung lam tawng sawmruk ani a, a vang lam chu tawng sawmhnih a ni a, a san lam chu ................................. sawmthum a ni.
Q4. Lebanon Ngawpui In sidar ban tlar li, ban chunga sidar thingphel chungah chuan a sa bawk a; a dung lam chu tang za ani a, a vang lam chu tawng sawmnga a ni a, a san lam chu .................................. sawmthum a ni.
Q5. Tin, Israel mi zawng zawngte chu Ethanim thla (thla sarihnaah chuan kutnaah lal ................................. hnênah an inkhawm chiam a.
A bung leh Châng dah rawh :
Q1. Nathana fapa Azaria chu hotute chunga mi ani a; Nathana fapa Zabuda chu puithiam leh lal thian a ni fawm a;
Bung: ............... Chang: ....................
Q2. Tin, heti hi a ni a, Hiraman Solomona thu a lo hriat chuan a lawm ta êm êm mai a, “Heng mi tam tak chunga roel tûra fapa fing tak Davida petu LALPA chu vawiinah hian fakin awm rawh se,” a ti a.
Bung: ................ Chang: ...................
Q3. Chutichuan in chu a han sa a, a zo ta ; in chu sidar khanchhuk leh a phekin a khuh a.
Bung: ................ Chang: ....................
Q4. Chu mi chung lam chu lung man tam tak tak, lung a tawk chiah zela chher, leh sidar thing a ni a.
Bung: ................ Chang: ....................
Q5. I chenna tûr in, kumkhuaa i awmna tûr chu ka lo saksak ta ngei che a nih hi,” a ti a.
Bung: ................ Chang: ....................
Hming: ..............................................
Section: .............................................
BIBLE QUIZ NO. 15 RESULT
Chhanna lut zawng zawng : 2
Chhang dik vek : 2
Lawmman dawngtu : Victor Lalmuanpuia
Bible Quiz leh lawmman hi Cir. Manager Pu.C Lalnunsanga hnenah thehluh a, lam thin tur a ni
PAVALAI PROGRAMME
A hmun : Senior Hal
A hun : 19.4.2012
Hruaitu : Pu Kamzawngliana
Tantu : Pu C. Lalduhawma
Tawngtai rual leh rilru sawia hun hman tur a ni.
LAWMTHU SAWINA
Ni 10.04.2012 zan khan Branch K.T.P chuan Pu Lalrochama Brick thiarin hnatlang a nei a. Member mi 60 chuang thawk chhuakin dar 11:00pm bawr vel thleng hnatlang hi thawh a ni a. Member te inpekna Branch K.T.P chuan ropui a tiin, member hnatlanga thawk chhuakte chungah lawmthu a sawi tak meuh meuh a ni. Tin, thawhtur tha tak min siamsak tu Pu Lalrochama chungah lawmthu a sawi bawk a ni.
INKHAWMPUI THLENG DAWN
Hlimen Pastor Bial Inkhawmpui chu tunkar lo awm tur Ni 20-22.4.2012 thleng hian Saikhamakawn Kohhran chuan thleng dawn a, inbuatsaihna pawh kalpui mek a ni. Kohhran mipui ten hlawk taka kan hman theih nan tawngtai na nen thahnemngai takin tan ila theuh ang u.
BIAL INKHAWMPUI-A USHER TURTE HRIATTIRNA
Ni 20-22/4/2012 a Hlimen Pastor bial inkhawmpui lo awm tura Usher tura ruat te Sunday School Hall bangah list hi tar chhuah a ni a, mahni duty hun tur lo in en mai tur a ni e.
Tin, vawiin chawhma inkhawm ban dar 11:30 hian Usher a ruat zawng zawng te Biakinah training neih tur a ni, usher a ruat zawng zawng ten ngaihpawimawh tur a ni e.
T.B.Z. PROGRAM
A hmun : Ng.K. Sailo In
A hun : Ni 16.04.2012
Hruaitu : Pu Khawlhmingliana
Tantu : Pu Lalfakzuala
Neihthil thehkhawma hun hman tur a ni a.
MIIPUI HRIATTIRNA
Kan hriat theuh ang in Pu K. Lalnghakliana te chhungkua in harsatna namen lo an tawh avangin an tan in sak sak nise ti a Saikhamakawn Joint Committee in a rel angin hmalak mek a ni a. Tunah hian Local Council member te leh YMA Branch Executive ten a bul an tan in, a ban thenkhat pawh phun tawh a nia. A tuldan a zirin hnatlang pawh a vantlang huapa koh zel tur a ni a. Hnatlan dan tur hetiang hian ruahmanna siam a ni a. Vengchhung mipuite thahnem ngai taka thawk chhuak tur a ngen kan ni e.
MIPUITE HNATLAN DAN TUR
Vanapa Section huam chhung
Dt.16. 4. 2012 ( Thawhtan ni)
Taitesena Section huam chhung
Dt.17.4. 2012 ( Thawhleh ni)
Chawngbawla Section huam chhung.
Dt.18.4. 2012 (Nilai ni)
Tin, Bialtu MLA Pu K. S. Thanga’n insak tanpui nan Rs 50000/ (Singnga) min pek bakah sum tam tak a la ngaih dawn avang in Fund Raising Committee chuan vengchhungah vehbur khawn nise ti a rel angin tunah hian khawn mek a ni a. Mahni remchan dan ang a tanpuina lo pe turin vengchhung mipui te kan inngen a ni e.
Tin, Vengchhung leh veng pawn a tanga tanpuina kan dawn te kar leh issue ah rawn tih chhuah kan tum ang.
TUALCHHUNG
,Vanlalhruaitluangi d/o Pu Rony Vanlalhauha (V.Sec) chu Pneumonia natna avangin Alpha Hospital, Kulikawn ah enkawl mek a ni.
,Hana Lalrinchhani d/o Pu Andrew C.Lalnunsanga (T.Sec) chu Dam lohna avangin Aizawl Hospital, Kawlthei huan a enkawl anih hnuin alo chhuak ta.
,Pu Lalneihhlua h/o Pi Thuami (Ch.Sec) chuan khawi ilo vah vel nan Bike an lei thar.
,Pu Lalhmangaiha h/o Pi Chhungi (Ch.Sec) chuan khawi ilo va vel nan Bike (TVS Star) thar an lei.
,Pu Lalrochama (V.Sec) chuan khawi ilo vah vel nan Bike (R15) a lei thar.
EPL RESULT
Norwitch 1-6 Man.City
Sunderland 0-0 Wolve
Swansea 3-0 Blackburn
West Brom 1-0 PR
Zanin inkhel tur
Man.Utd. Vs Aston Villa (8:30)
Thawhtan zan
Arsenl Vs Wigan (12:30)
VAWIIN KHAWCHIN
A lum lai berin : 300 C
A vawh lai berin : 200 C
Khua a tha anga, zan lamah ruah 7mm a tla ang.
Source : Weatherforecast.com
THU ROTLI NG
** Thil ti sual ngai miah lo chuan thil thar a ti lo a ni
- Albert Einstean
** Nupui te hi tleirawl zirtirtu, vanglai te thian leh tar te enkawl tu an ni
- Francis Bacon
PUBLISHED BY LITERATURE SUB. COMMITTEE KTP SAIKHAMAKAWN BRANCH, COPIES : 300
