Mipui Aw 9.12.2012

MIPUI AW

Vol. XVIII Issue No. 50 Kristian Thalai  Pawl  Saikhamakawn Branch  Pathianni Dt.9.12.2012

VAWIIN CHANG VAWN

            Thil tha lo titute avangin intilungngai duh suh la,

            Fel lo taka tite chu awt hek suh.

                                    Sam 37:1

KOHHRAN PROGRAMME

9.12. 2012 (Pathianni)

Chawhma Suday School

Tantu           : Nl Lalremliani

Chawhnu

Thuhriltu    : Upa Zonunmawia

Zan Inkhawm

Thuhriltu    : Upa C.Lalmuankima

KTP PROGRAMME

 Dt. 10.12. 12 (Thawhtan zan)

Neihthil thehkhawm

Hruaitu           : Nl. Zohmingmawii

Tantu              : Nl. Malsawmtluangi

            December thla musician leh hla hruaitu turte.

Hla hruaitu    : Pu Lalremruata

turte                  Tv. Lalhmangaiha

Musician         : Pu Lalchhandama

                          Tv Malsawmzuala

VAWIIN  TLAI   FELLOWSHIP

            Tualchhungah chhiat tawk an awm avangin Fellowship a awm lovang.

KOHHRAN  HMEICHHIA PROGRAMME (Ni 11.12.2012)

            Kristian chhungkaw puala Fehchhuah hun hman tur a ni.

           

SERMON

AWT HEK SUH

                Lal Isua Krista ringtute hi he khawvela kan awm chhung hian mihring kan la nih miau avangin awhna te, itna te, chakna te, duhna te hi a bo dawn lo. Lal Isua Krista chhandam te, Pathian fa tak roluah tur, van khua leh tui ni mah ila, he khawvelah mihring niin kan dam chhung ni kan la chhiar si a. Kan ram hlun tur kan thlen hma hi chuan he khawvel a chakna te chawpa boral mekah hian nun kan hman a lo ngai rih si a. Nitina thil kan hmuh leh kan hriatte hi a pangngai a, chhandam fate kan nih avang ngawt hian kan itna te, kan awhna te leh kan chakna te hi a bo bik si lova. Chakna, itna te leh awhna te hi he khawvel miten an neih ang tho hi kan la nei a, kan taksa peng tin mai hian he khawvel mawina leh ropuina te hi a hriat hmaih hauh bik chuang lo.

                Chutiang karah chuan kan nung mek a, kan duhzawng leh it zawng zawng zawng hi nei thei lova, hnualsuat vek tur erawh kan ni lo. He khawvelah kan awm chhung hi chuan kan nun nawmna tur leh kan chak zawng leh it zawng nei thei tur hi chuan theih tawp chhuahin dik tak leh fel tak in kan bei tang tang tur a ni. Amaherawhchu heng kan chak zawng leh it zawng zawng zawng neih tuma kan beihna kawngah hian kan itna leh chakna hi min hruaitu atan kan hmang palh ang tih hi a hlauhawm thin.

                Kan duhzawng leh chak zawng kan zawnna kawngah hian min hruaitu tur hi kan hai hlauh anih chuan, kawng dik lovah kan peng bo mai thin. Heng zawng zawng kan neih theihna tur atana kan beihna kawngah hian Lal Isua hi min hruaitu nise. Lal Isua hruai theih loh khawpa kan duhna leh chakna kan dah lal anih chuan kan tan atha dawn lo.

                Mi thenkhat chu he kan duhna leh kan itna hi kan in hruaitir a, Pathian duhdan pen bosanin an tlan thin a, thiltha lo tiin, fel lo takin an ti thin a ni. He khawvelah chuan nuam tak leh dinhmun awhawm tak pawhin a lang thin a ni mai thei. Chung thil titute avang chuan mahni dinhmun thlir a, awhna leh itnate thinlungah a lo len chang hi chuan lungngaihna khurah min hruai lut thuai thin. Kan Pathian thu chuan chung thiltha lo titute avang chuan inti lungngai lo tur leh fel lo taka ti tute chu awt hek lo turin min ti a ni.

                He khawvelah rei lote chhung atana nawmna kan zawn luatah hian kan chatuan hmun tur kan bosan palh hi thil hlauhawm tak a ni dawn. He khawvel a chakna te chawpa boral mekah hian Lal Isua aia hlu zawk leh pawimawh zawk dang reng reng hi nang leh kei atan hian a awm lo. Hei aia duh leh awh zawk tur dang hi eng nge maw awm le?                                     

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

HRUAI  TU

                        Kum tawp lam kan lo thleng leh ta reng mai a. Pawl hrang hrangte pawhin kum thar lama hruaitu turte kan thlang chho leh tan ta. Hruaitu tha tak kan neih theih nan hian mipuite hian kan mawhphurhna liau liau a ni tih kan hriat a pawimawh hle mai.

            Greek mifing Aristotle leh Plato a te pawhin Ram leh khawtlang in awpdan tur Vision tha tak tak an lo nei hlawm a, mahsela chu pawh chu tih hlawhtlin theih a ni chuang lo. Hruaituin a thlir tur tha ber nia lang chu thil tha tihhlawhtlin hrasa tak ai chuan, tun maia hman tangkai theih zung zung ngaihtuah chhuah thiam pawh hi a tha viau mai awm e, a tih theih. Mahse hun lo kal zel tura chhenfakawm hlawhtling thei ngei tur a neih a ngai bawk a ni.

            Keini vengchhung pawhin 2013 Y.M.A hruaitu tur tha tak Zirtawp zan khan   thlanchhuah a ni a.  Tlawmngai Pawl lian tak hruaitu an nihna angin an tihtur zawn ah thahnemngai tak leh chak taka hma an lak theihna turin huaisenna leh taimakna thar an neih a ngai hle bawk awm e. Tin, pawl hrang hrang hruaitu la ni zel tur te pawhin kan pawl din chhan leh tum hrechiang chunga hma kan lak a pawimawh ber, ‘Kuanglo Nawr’ hi mahni thahnemngaih vangin a kalpui thieh viau a, inven pawh a tul hle a ni.

ARTICLE

A  LANNA  TLANG  DANG  ATANGIN  KA  RAWN  THLIR A

            Hah em em in tlang chhip chu ka thleng chho hlawl mai a, eng tlang nge tih pawh ka hre lem lo, ka thu hnawk a ka thlan fim a tla zawih zawih mai bawk a. Chutah ka hmalam ah hian thingphek chhe tawh tak mawih tawh lam awn thle fahrana dingah hian he thu hi a lo in ziak kulh mai a “ Tan Lam Neih Lohna Tlangah Kan Lo Lawm A Che”. Tichuan ka tho nghal a, chumi intarna dinglama pen a, thui loteah lung tohlawt hi thlanglam zawngin a lo in khawh chhuak luah mai a, ka va pan phei nghal. Chu lungtohlawt atang chuan kan thlir ta a, khawvel hmun hrang hrang ram hrang hrang hi a lo lang pe uarh mai a, ka thlir reng a, engkim mai hi a lang vek nia mawle. Ram ropui tak tak lang ruih mai chu belhchiang chak awm tak ka nih vei nen, Zopa rilru alo chhuak a niang chu kan ram Mizoram ngei mai chu ka thlurbing duhna rilru a lian ta zawk a. Chiang lehzual zawka thlir tur chuan ka thuthmun ka siam rem ta sauh sauh a.

            Chu tlangah chuan engmah hi tan bik leh awn lam a neih theih miau loh avangin  a nihna ang takin ka hmu thei a. Ram chhung political party hrang hrang kan thlir a, Mizoram hmangaihna rilru chu an neih theuh a, mahsela an hmangaih hmasa ber chu anmahni a ni vek nia mawle. Eiruk hlemhletna kawngah lah an tlan nasa em em mai a, diktaka rorel duh tlemte awm ho lah hnathawk thei lo a dahkhawm niawm fahran hian in pakhatah hian a awmkhawm vek a, chuta tang chuan an chhuak thei der si lo, mahse tumah chu zu tan bik ka nei chuang lo, ka thlir liam mai mai hi a ni ber.

            Veng hrang hrang chu kan thlir kual leh a, Pathian kohhran ho chu kan thlir bing leh hlawm a, piangthar tawh ihthlahdah tak leh zawmthaw tak hi a tam hle mai, Pathian tih mi tak tak an awm bawk a. Mahsela a landan tlangpui atanga ka zuk hmuh danah chuan Pathian rawngbawltute hi an inthlahdah hlawm niin a ka hria.

            Chutah Zoram thalai te ka thlir leh a, ruihtheihthil, mipat hmeichhiatna, zu hmun hlimna, leh mahni mipatpui leh hmeichhiatpui inkawp duh thlengin a lo hluar em em mai bawk a. Chumi kawnga kal te chu tam tak an ni. Duh duh dana awm an duh a, hlimna leh lawmna an zawnga chumi kawnga an kal theih nan engmah an pawisa hlawm lo. Chutiang taka an awm nachhana ka hmun chu Ram hruaitu lu ten Pathian tihna tak tak leh ram hmangaih aia an mahni an in hmangaih hmasak zawng vang te, Kohhran tin ten Pathian an dawr tam tawk lo vang niin ka hmu chhuak bawk a. Mahse tumah ka dem thei chuang lo, tan lam pawh ka nei thei chuang lo, tihtur ti tawk  loin an leng thuau thuau mai a ni zawk.

            Ka thu rei ta deuh a ni ang, ka mawng kham lutk chu ka tho hlawl a, ka piah kawrte tui luang ri her her lam chu kan pan phei leh a, chutlang danglam tak maiah chuan enge la awm zel tih hriatbelh chakna chuan ka khat ta tlat a, kal zel turin ka rilru ka siam fel ta a ni.

HRISELNA HUANG

THLAI  LEH  THEI  DAMDAWIA  HMANTHEHTE

1.   Carrot     :  Carotene (Vitamin A insiamna) a awm a, chu chu vitamin-ah a insiam a, taksain vitamin a mamawhnaah a hman theih a ni. Carrot a minerals chi hrang hrang awm hian thisen a tifaiin a ti chak a, a tui hian mit a tivarin vun a ti mam a, a timawi thei a ni. Chaw ei kham veleha Carrot ei hian  ka chhunga natna awmte a that thei a, ha a ti fai a, hahni leh ha fang a ti hrisel a, pum nuam lo tan a tha bawk. Carrot hi a hela ei a tha ber.

3.   Mula        : Calcium, Phosphorous, Iron, Vitamin C leh Vitamin B Complex a pai a. Mula tui hi pile natna leh zun kawng thalo tan damdawi tha tak a ni a.A hnah tui hi thinlianin a ngeih bawk, Mula chi rawt sawm hmaia hnawih hian hmai a ti ngo in a ti fai bawk. Tin, Ringworm tan pawh a tha nia sawi a ni. Taksa mamawh phuhruk kim tur chuan Mula hi a hela ei a tha ber a ni.

4.   Fanghma : Potassium, Sodium, Magnesium, Sulphur, Chlorine leh Silicone te a awm a. Fanghma hian taksa a vawng daiin a ti harh a, chaw pai tawihna kawngah taksa a pui tha hle a, ek khal/tang te tan damdawi tha tak a ni. Pum lam tha lo, Ulcer leh Gastric neite tan Fanghma tui in in pum a ti nuam thin. Thisen sang leh kaih tan a tha a, Fanghma tui leh Carrot tui chawhpawlh hi ruhseh damdawiah pawh hman theih a ni. Fanghma mu leh Dhoi chawhpawlhin zunkawng thalo tan a tha a, arngeng, vunro leh vun chuarin a ngeih hle, vun leh hmai tih mawi nan pawh a tha hle a ni.

           

BIBLE QIUZ NO. 50

iI Lalte  BUNG (7-12)

A Kâr âwl dah khat rawh :

Q1.Chutichuan an tho va, thimhmulah chuan an tlanche ta a, an puan in te, an _______________ te, an _________________ leh an riahhmun chu a awm ngai ngaiin an tlansan a, an tlanche ta chiam a.

Q2.Nimahsela anni chuan an hlau ta êm êm mai a, “Ngai teh u, ______________ pawh khan an chelh tawh lo a ni a, keinin engtinnge kan chelh tehlul ang?” an ti a.

Q3.Tin, puithiam chuan sipai za hotute chu LALPA ina awm ,  lal ____________  fei leh phawte chu a pe a.

Q4.Ka chhiahhlawh zâwlneite thisen leh LALPA chhiahhlawh zawng zawngte thisen phuba chu Jezebeli laka ka lak theihna tûrin i pu ________________ chhûngte chu i tiboral vek ang a.

A bung leh Châng dah rawh :

Q1.Tin, heti hi a ni a, bâwmah huan tangka a tam ta hle tih an hriatin, lal lehkha ziaktu leh   puithiam lalber chu an han kal a, an fun a, LALPA ina tangka awm chin hu an chiar a.

Bung: ...............          Chang: ....................

Q2.Tin, ani chuan, “Anungin man rawh u,” a ti a. Tichuan anungin an man a, berâm hmul   mehna in khur bulah chuan an that a, mi sawmli leh pahnih zet an ni a; pakhat mah a zuah lo.

Bung: ................         Chang: ....................

Q3. Tin, mi tinin hriamhrei kengin lal chu in hual vêl ang a; tupawh hual chhûnga lo lût apiang chu lo thah zel tûr a ni; tichuan lal chu a lût leh a chhuak chu zui zel rawh u,” tiin thu a pe a.

Bung: ................         Chang: ....................

Q4.Tin, Jorama chuan a kai her a, a tlan a, Ahazia hnênah, “Inbumna a awm anih hi, Ahazi,” a ti a.

Bung: ................         Chang: ....................

Q5.Chutiang ngei chuan a chungah a lo thleng ta a ni; mipuiin kulh kawngka bula chuan an             chil nuai nuai a, a thi ta a ni.

Bung: ................         Chang: ....................

Hming : ......................................................

Section : .....................................................

BIBLE QUIZ  NO. 48 RESULT

Chhanna lut zawng zawng : 3

Chhang dik vek : 3

Lawmman dawngtu   : Lallawmzuala (V.Sec)

Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni.

PAVALAI  PROGRAMME

A hmun       : Vestry

A hun          : 13.12.12 (Ningazan)

Hruaitu      :Pu T.Lalrinthanga

Tantu          :Pu T.K.Manga

            Rilru sawi leh Tawngtai ruala hun hman tur a ni ang.

2013  BRANCH  Y.M.A  HRUAITU  THAR

            Ni 7.12.2012 (Zirtawp zan) dar 6:30 khan  Saikhamakawn YMA hruaitu tur thlanna YMA Community Halla neih a ni a, chung hruaitu thlan thar te chu:-

President      - Pu Lalpianthanga

V. President - Pu C. Vanlalsanga

Secretary      - Pu K. Lalhuliana

Asst. Secy.   - Pu C. Lalengzama

Treasurer      - Pu Khualkunga

Fin. Secy.     -Pu C. Laldawngliana

            Hemi zan hian member kal a tha in, programme nuam tak nena inthlanna hi neih a ni.

ZALEN  SUNDAY  CHANCHINBU  SEM  TUR  DUH  A  NI

                        A lak man thla khatah Rs 40/- (Sunday vawinga pawh nise) zingkar chauh sem.

Hlawh: Copy-1 Rs 10/- kan pe

Copy- 100 ah Rs 1000/-(With Bonus)

Copy- 200 ah Rs 2000/- (With Bonus)

            Mirinawm te tan a sem theih a, sum hnar tha tak a ni. Branch/ section/ Group- YMA/KTP/SAY/ PYD leh mimal tan inhlawhna tha tak a ni.

Contact- 2328226/ 9862363559

BIAKSANGA  BUILDING, NEWS AVENUE, TREASURY  SQUARE.

Sd/- (Lalremruata)

Manager

Zalen Leading Sunday Newspaper

F.THANGMAWIA  MEMORIAL  SCHOOL  KUM 2013  KALPHUNG  THAR

                     F.Thangmawia Memorial School hi kum 2013 atangin keini Home Mission nen hian kan thawk dun dawn tawh a, School inrelbawlna leh a enkawlna zawng zawng Home Mission Principal kutah a awm tawh dawn a ni.

            Tin, zirtirtu turte pawh Home Mission Principal kaihhruaina a lak tur a ni a, zirlai pawh Home Mission School nen a in ang vek dawn a. Kan tum ber chu F. Thangmawia Memorial School hi School tha taka din chhuah a ni a, bul tan that tur a  nih avangin kum 2013 atang chuan KG-1 atanga Grade V thleng chauh kan hawng dawn a, KG-1 tan December ni 15 thleng Admission Form lak theih a ni

Sd/-

Principal

Lalthlamuana Hnamte

Home Mission School

BIAK IN CHEI HNATLANG

            Naktuk ni 10.12.2012 zing kar atang hian KTP ten Biak In leh a vel chei hnatlang neih tan tur a ni a, KTP member te thahnemngai taka hnatlang turin ngen kan ni e.

LEPROSY RAWNGBAWLNA CHUNGCHANG

            Leprosy Mission rawngbawlna hnuaia donation hrang hrang lakkhawmte thehluh a hun tawh a. Leprosy Mission ten rawngbawlna an rawn neih tuma donation hrang hrang pe thei tura in tiam a ding zingah la pe lo kan la awm nual niin a lang a, la pe lo te chuan Upa Lalzama, Upa C. Lalmuankima, Upa Zonunmawia leh Upa Lallawmchhunga te hnenah a pek theih reng e.

Tualchhung

,Zothansangi d/o Pu B. Lalrinzauva (Ch.Sec) chu damlohna vanga Aizawl Civil Hospitalah enkawl mek a ni.

N.P.S.S  CHRISTMAS  CAROL  SERVICE

            Ni 14.12.2012 (Zirtawpni) zan Dar 7:00 khian Saikhamakawn naupang Sunday School te chuan Christmas Carol Service a hmang dawn a. Programmee hlimawm tak tak hman a nih mai dawn bakah ei leh in tui hnai tak a awm bawk dawn a ni.

            Nu leh pa ten kan fate tawiawm na lamah in thlahrung lo turin kan in hriattir nghal bawk a ni.

K.T.P  ADVANCE  CHRISTMAS  LEH   HRUAITU  THLAN

            Saikhamakawn KTP chuan ni 13. 12.2012 (Ningazan) dar 7:00 ah Sunday School Hall ah Advance Christmas a hmang dawn a.Hetah hian kum 2013 chhunga branch hruaitu tur thlan nghal tur a ni a. Memberte a tam thei ang ber kal turin kan in hriattir a ni.

            Hemi zan hian Gift Exchange neih leh tur a ni a, mi pakhatin Rs.50 man aia tlawm lo thun theuh nise, tin, hei bakah hian programme hilimawm tak tak leh refreshment tui tak a awm bawk ang.

LUNGPHUN SAWMNA

      Dt.14.12.2012(Zirtawpni) Dar 11:00AM hian New Eden, Kelsih Keimahni huanah kan nu duhtak leh kan hmangaih em em VANLALSAWMI hriatrengna lung phun kan tum a. A puala hun hnuhnung kan hman turah hian ka bial chhunga Saikhamakawn mipui zawng zawng lo tel ngei turin kan sawm a che u. He hunah hian tumah inthlahrung lova in lo tel ngei ka beisei. In ei turin ruai pawh kan buatsaih bawk e. Chhun leh zan thlengin programme duan a ni bawk.

      Hemi ni hian zing dar 10:00 ah Biak in thlang atangin Bus a chhuak ang.

                                    K.S.Thanga leh a fate

                                    Venghlui, Aizawl.

           

ZANIN  EPL  KHEL  TUR

Man.City         Vs  Man.Utd  (7:00)

Everton          Vs Tottenham   (8:30)

W.Ham           Vs Liverpool   (9:30)

THU  ROTLI NG

Khawvel hi suangtuah tu tan chuan thawnthu nuihzat thlak tak ang a ni a, thinlunga tuartu tan chuan thawnthu lungchhiat tak ang a ni thung. Horace Wolpole

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300

Mipui Aw 2.12.2012

MIPUI AW

Vol. XVIII Issue No. 49 Kristian Thalai  Pawl  Saikhamakawn Branch  Pathianni Dt.2.12.2012

KOHHRAN PROGRAMME

2.12. 2012 (Pathianni)

BIBLE SUNDAY

Chawhma Suday School

Tantu           : Pi Zothanpuii

Chawhnu

Baptisma Sakramen

Thupui        : Pathian thu chu a nung             reng ang.

Thusawitu   : Pastor G.Chhunthuama

Zan Inkhawm

Thupui        : Pathian thu chuan thil a  ti thei.

Thusawitu   : Upa Lalzama

KTP PROGRAMME

 Dt. 3.12. 12 (Thawhtan zan)

Hruaitu           : Pu Lalduhkima

Tantu              : Nl Lalrinhlui

Short Sermon : Nl Lallawmsangi Hrahsel

                          Nl Briggite Zonunmawii

Thilpek  : Nl Lucy Zohmunmawii

LakhawmtuteNl R.Lalremchhungi

Dec. thla zai hruaitu turte

Hla hruaitu    : Pu Lalremruata

turte                  Tv Lalhmangaiha

Musician         : Pu Lalchhandama

                          Tv Malsawmzuala

VAWIIN  TLAI   FELLOWSHIP

A hmun          : Sunday School Hall

Hruaitu           : Pu Jeff Lalhmingsanga

Tantu              : Nl P.C.Lalrinmawii

Thupui           : Work Ethics

Hawngtu        : Tv R.Zodinsanga

KOHHRAN HMEICHHIA (Ni 4.12.2012)

Ramthim zin a hun hman tur a ni.

A hmun          : S.S.Hall

Hruaitu           : Pi C.Lalparmawii

Tantu              : Pi Lalchhuanawmi

           

SERMON

PATHIAN HRIATNA

              He khawvelah hian hnam hrang hrang kan cheng a, kan khawsak dan leh nunphung pawh hrang thluah ni mah ila. He khawvelah hian nun thlamuanna leh innghahna tur hi kan zawng deuh vek mai. Chu nun innghahna leh thlamuanna tur kan zawnna kawngah chuan kan chunga roreltu Pathian hi awm ngeia hriatna kan nei deuh vek hlawm bawk. Kan thih hnu lam khawvel pawh hi kan thlir thin tlangpui a. Chu kan thih hnu hun atan chuan kan inbuatsaihnaah pawh hian he khawvela thil tih that leh that loh hian kawngro tam tak su tur a ngaihna pawh sakhaw vuan tu tamtak hian an nei a. He khawvelah hian thiltha tih hi kan inzirtirna laimu atan pawh sakhaw tam tak chuan an hmang mek bawk.

            Sakhaw tam tak hi chu Pathian an hriat dan hian amah an biaknaah a kaihruaitu ber a ni a. An Pathian biak hian a duhdan leh ngaihdan turte an suangtuahna atang hian a a biak dan tur kalphung pawh hi an duang deuh ber bawk thin. Chuvangin khawvela sakhaw tinte hi an biak pathian an hriat dan ang ang hian mahni zawnah theuh an kal mai thin. A duhdan tur leh ngaihdan nia an hriat hmangin kan bia a, a lawm zawng ni a an hriat hmangin tih lawm tumin an tlawn a, an thih hnu hun atan a tha tur ni a an hriat hmangin he khawvelah hian an nung a, a malsawmna dawn beiseiin an tlawn a, hlimna leh thlamuanna chan beiseina avangin a duhdan nia an hriat hmangin he khawvelah hian nun an tum thin.

            Keini Kristiante chuan lei leh van leh a chhunga thil awm zawng zawng siamtu Pathian nung kan biak a. Min chhandam a, min thlamuan a, malsawmna tam taka min vur thei tu leh hlimna leh lawmna chuai thei ngailo min pe theitu kan bia a. Keimahni rin dan leh hriat dan mai ni lo, Amah Pathian ngei mai kan hnenah a inpuang chhuak a, a duhdan leh amah kan biak dan tur zawng zawng pawh min kawhhmuh a., min hruai thin a. He khawvel leh thih hnu hunah chatuan atana chhandamna famkim min pe theitu tur Pathian chu kan biak Pathian hi a ni.Hei tak hi a ni keini ringtute kan danlamna chu.

            He kan Pathian ropui tak kan hriat dan pawh hi amah ringtute theuh theuh pawh hi a in thlau thei viau awm e. Then khat chuan kan Pathian hi thihpui tham Pathian niin an hria a, Amah avanga channa leh tawrhna lo thleng tur zawng zawng pawh tawrh an huam a, tawrh chhan tlak Pathian niin an hria a. Retheih pui tlak Pathian niin an hria a, hlimpui tham lawmpui tham Pathian niin an hria a, Engkim chan leh tawrh huama zui tlak Pathian nia an hriat avangin an zui thin. Min chhandam theitu leh nun zawng zawng innghahna tlak Pathian a nih zia an hriat avangin a mahah an in nghat tlat thin. Paula chuan ‘A ni tak meuh mai, ka Lalpa Krista Isua hriatna ropui bikzia avangin thil engkim pawh channaah ka ruat a ni; amah avangin thil zawng zawng ka chan ta,’ a ti a ni. Eng ang tak zui phu Pathian nge ni ve a i hriat le?

                       

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

KRISTIANTE  MAWH

                       

            Kristian Ram kan in ti chamchi a, mahsela Kristian ramah hian Kristian rama thleng tur awmlo tak tak a thleng fo a ni tih hi tu te pawh hian kan pha hauh lovang. Chutiang thlen tir tu chu a chhunga cheng Kristian inti te kan ni fo bawk tih pawh zep theih a ni hek lo. Kan Kristianna hian kan nunah kawngro a su vak lo niin a lang. Mahni in tihmawi nan leh mite zahkai nan Kristianna hi kan hmang a ni mai lo maw? tih hi zawhna lian tak a ni ta reng mai.

            Kan ram Kristian nun hian siamthat a mamawh ta niin a lang. A nih leh siamthatu tur tunge ni ta ang le? Kan ramah Kohhran tam tak a awm a, heng ho kutah hian nasa takin a innghat. Pathian atang lo chuan kan ram chhiatna lai hi siamthat a har tawh mai thei a ni. Pathian engkimtithei chuan a bul atangin a siamtha leh thei vek a ni tih hi kohhran ho ten kan hriat nawn fo a tul hle mai. Tin, kohhrana kan in hman nachhan te hi kan in zawh nawn fo a tul hle bawk a ni. Kan hmaa tihtur a awm vang ringawt a in hmang kan nih chuan kan tisual viau ang. Pathian hmangaihna avang leh a tan chauh a nung tur kan ni tih inhriatna zawn atang a chhe lai siamtha tu nih a va tul em.

ARTICLE

THE 16 MISTIRI’s

                                                                                                Mawitei pa

            Miin Work Camp kal a hlawk thlak zia leh a zawng chhang thlak zia kal pel a, kohhran pangchang, ringtu sawngnawi, midanga innghat ringawt ringtu leh kohhran hrin teuh an hlauhthawn tan tawh zawk lai leh sap ho pawn Work Camp an rawn neih kan hre ngai lo an tih laiin, a vawikhat nan Work Camp-ah kan kal ve chu a nia!! Mahse, ka zak lem lo, ka hlawk tlat, kan hnathawhna hmunte pawh an lawm em mai!!

            Nia, kan kohhran atangin mi 16 kan kal a, Bunghmuna zirtirtu hnathawk Nl. Ruatpuii a rawn tel ve bawk a, kan vaiin 17 kan ni. Nikum lamah Work Camp leh Krismas hmanpuiin Ka pa (RIP) hovin boruak an lo zuk siam tawh a, chung zinga tel ve Pu Rina (Driver), Pu Kama leh Pu Chhuansangate chu Bus kan chuan tirh atangin an in ti thu nghal hle ringawt a, sawi tur hre ve tawkin Pu Dennis-an Sumo a lo service thin ve tawh bawk nen, dawt nge an sawi thutak pawh hre lovin an titi kotlangah kan dak thla hlawm a. Zai lam erawh kan tlachham tlang hle, kan hotupa Pu Zaa hovin kan han bei ngial thin a, tu thlarau mah kan zai harh zo lo chu a ni e.

            A hmun kan thleng a, Upa Laia hovin min lo hmuak a, kan ngampa sa nghal ringawt a, kan riahna khawmna tur in pakhat an lo tiruak a, leng si hek lo i, nikum lama lo kal tawh 3 te kha chuan thlenin kan nei sa an ti a, intithei takin an in pu lut nghal a, an riahna chhakah Pu Jeffrey-a, Tv. Hmangaihsanga leh Tv. Hmangaiha te an in pu lut a, a bak zawng Pu Zaa hovin, Pute Zochama, Lalhruaia, Dennisa, Mawitea, Sangtea, Tv. ABA leh Hruaitluanga leh kei chu in an lo tih ruahah chuan kan riak tlang ta a ni. E! taka, Pu Dingtea a la awm, a ni hi Pu Chhuansangate ho bula thleng turin a in pu lut vek tawh a,  a nawm zawk a ring nge ni, Upa Laia te  inah a sawn leh a, kan zinga thlenin sawn awmchhun a ni ta a ni. Kan thlen tlai hian kan in bual peih hlawm lova, mahse, fai ngaina deuh Pu Jeffrey-a leh Tv. Hmangaihsangate tuikhura zuk inbual tur chu Pawih thingzai emaw an lo ti ! Pu Chhuansanga inbual tur tlu palh, a tluk zawngin ‘Awk’ a tia, a thawh leh pahin ‘E’ a ti tia an sawisa zuite kha a va hlimawm em! Awkechanchin sawi chuan a hna thawh lai a chawl zel mai pawh a! Chumai bakah Tv. Hruaitluanga kha Ruatpuiin a nau Tlangdinga zawk emaw a lo ti a, zaithiam sawiin an lo sawi a, a ni lah insawifiah tum lem lovin zaithiam hawiin a lo hawi ve mai bawk si, chutah, inkhawmnaah zai tura sawm an tum thu an sawi ta si! a mangang hmel kha a va khawngaihthlak teh lul em, a in sawifel ta hram a, kan thaw tlang huai mai. An nula pahnihin thawmhnaw min suk sak a ro hman si lo! inkhawm a ngai bawk si, Pu Kama’n kekawr hak tur dang a lo keng si lo, a kekawr hlui an thlenin pa a pek fel thlap tawh, a rawn hak chhuah sak leh te kha min tihlim zualtu an va ni em. Ani hi a pension hunah zuk parawl a tum nghe nghe a ni awm e.

            Kan thlen tuk ni 20 (Thawhlehni) zing atangin hna kan tan a, Pu Lalhruaian a Mistiri bungrua chikim a rawn keng a, midangin kan neih ang ang kan keng bawk a, mahni tih tur ang theuh nia kan hriatah kan bung nghal vek a, tumah awl kan awm lo. Hall hi a liang an lo hlang tawh a, Pu Mawitea, Hmangaihsanga leh Hmangaiha te inchung lamah an bur nghal a, Pute Lalhruaia, Dennisa leh Sangtea ten Chokut lam an buaipui , Pu Chhuansanga leh kei duh duh a tirhah kan lo awm a, Pute Dingtea, Kama, Chama, Jeffrey leh Rina ten tile rawnghnawih lam, ABA leh Hruaia ten rawngbawl an lo pui a, Hotupa Pu Zaa’n  min lo vil reng bawk. Mahni hna theuh kan hriat tlan em vang a niang, SS.Hall 24x15 Feet a lian, a hulhliap feet 15x5 chu rawnghnawih nghal vekin ni 2 ah kan zo der mai!! Mahse, nikhat naa inthlahrung taka mistiri bungrua lam melh pawh melh ngam lote kan ngampa tan deuh a, ni hnihnaah chuan hum loh tur kan hum tan a, Pu Mawitean Kraws tar tur a nihna ang thlapa a siam tawh Pu Dingtea hum loh tur humin a duh anga a lo tan tawi ta mai te, Pu Dennisan uluk em em a a thil ziah sa Pu Chhuansanga nge Pu Dingtea an lo khawih pherh duai maite khan min va tihlim teh lul em!

            Insak lam kan zova, hmanrua a awm sa vek bawk a, zunin min siam leh thei hram em? an tia, Karandi hum thei kan awm leh suau mai,Chairman thutna tur chair siam a ngai a, Pu Mawitean awlsam leh nalh takin an siam mai a, khawl leh TV chhia an han sawi a, Pu Dennis an meter nen lam a lo keng thlap bawk sia, NREGS hnuaia an dawn bawngtuthlawh tahna thlengin Pu Lalhruaian a lo keng bawk si, Saikhamakawn ho chu thiam loh pawh in nei lo a nih hi min ti hial reng a ni. Chuvangin 16 Mistiri tih tlak kan niin ka hre ve tlat a ni. Pu Lalhruaia phei chuan bawngtuthlawh a tah manah buh a hlawh teuh a, a inbualna tur tui an la chawi zui bawk maw le!

            An kohhran hruaitute leh mipui inpekna a fakawm hle, zing atangin an rawn chhuak a, rawngbawl, tuichawi mai bakah a theih ang angin an hna thulh thakin hna thawhna min pui a, an fakawm hle. Inkhawmna lamah nise, Lalpa tan zah an nei lo, an zawng zawng an hlan tak meuh avangin inkhawm boruak a nuam, mihlim tawngkam takin thlarau a zalen a ni.Vawi hnih kan inkhawm a, a khamawm loh hle a ni.

            Ramsa lam nise, Pu Khaia te thian zaho han chhuah thla ila, an nuam tih dan tur kha titi a tling nia! Current lah an hnianghnar chhun leh zan pawh an sawi lo, a eng reng ringawt mai a ni, a chak em em leh nghal!

            Work Camp neihna khua hi West Bunghmun a ni a, Presbyterian Kohhran pahnih  W.Bunghmun kohhran leh N. Bunghmun kohhran an awm a,N. Bunghmun zawk hi kan zu kalna chu a ni. Kawrtethawveng Pastor Bial chhung a awm an ni.Nakum Bial KTP Conf. an thlen dawn avangin Kohhran Hmeichhia ten thawmhnaw hlui min kentir pawh KTP ten sum tuak nan an lo hmang nghe nghe a ni.

            A tawp berah kohhran pangchang leh ringtu sawngnawi midang neiha innghat ringawt hrin teuh a hlauhawm a ni tih hre reng chunga fimkhur tak siin kohhran pachhia leh nei lo zawkte tana luanchhuah na lamah tan kan laka, theihtawp kan chhuah zel chu a tul hle mai, Lalpa duhdan pawh niin a lang e.

           

BIBLE QIUZ NO. 49

iI Lalte  BUNG (1-6)

A Kâr âwl dah khat rawh :

Q1.Tin, Israel lal chu kulh tlânga a kal lai hmeiche pakhat hian, “......................., ka pu, min pui rawh,” tiin a lo au va.

Q2.TichuanLALPA vântirhkoh chuan ............hnênah, “A rual hian chuk raw, amah chu hlau suh,” a ti a. Tin, a tho va, lal hnênah an chuk dun ta a.

Q3.Tin, Israel lal chuan, “E khai aw! LALPAN lal pathumte hi ................-ho kuta pêk tûrin min hruai khâwm ani ngei mai le,” a ti a

Q4.Chutichuan ..................... phar khan a man ang chia, kumkhuain i thlahte pawh a man zel ang,” a ti a. Tichuan a hnên ata chu vûr anga vâra phârin a kal chhuak ta a.

Q5................... thiltih chanchin dangte chu Israel lalte lal lai thu ziakna buah a chuang a ni lâwm ni?

A bung leh Châng dah rawh :

Q1.Tin, Jeriko khuaa a la cham lai chuan a hnênah an lo kir leh a; ani chuan an hnênah, “In hnênah khan, ‘Kal suh u,’ ka ti che u a ni lâwm ni?” a ti a.

Bung: ...............          Chang: ....................

Q2.Tin, a chho va, Pathian mi khumah chuan a han mut a, kawng a kharkhum a,a chhuak ta a.

Bung: ................         Chang: ....................

Q3. Tin, a hnênah sipai sawmnga hotu dang, a hote sawmnga nen a ti r leh a. Ani chuan a    han chang a, a nenah, “Nang Pathian mi, lalin, ‘Lo chhuk thuai rawh,’ a ti e,” a ti a.

Bung: ................         Chang: ....................

Q4.Tin, a tan zahthlâk khawpa an ngen hnu chuan, “Kaltir ta che u,” a ti ta a. Chutichuan mi sawmnga an tir a; ni thum an zawng a, nimahsela an hmu zo ta lo va.

Bung: ................         Chang: ....................

Q5.Tin, Jehosaphata chuan, “A hnêna chuan LALPA thu a awm mai chu,” a ti a. Chutichuan Israel lal leh Jehosaphata leh Edom lal chu a hnênah an zuk kal ta a.

Bung: ................         Chang: ....................

Hming : ......................................................

Section : .....................................................

BIBLE QUIZ  NO. 48 RESULT

Chhanna lut zawng zawng : 2

Chhang dik vek : 2

Lawmman dawngtu   :Laldampuii (V.Sec)

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni.

PAVALAI  PROGRAMME

A hmun       : Vestry

A hun          : 06.12.12 (Ningazan)

Hruaitu      :Pu V. L. Zidinga Sailo

Tantu          :Pu R. Lalsangliana

Thuhriltu   :Pu C. Zakhuma

            Tawngtai ruala hun hman tur a ni.

BRANCH  Y.M.A  INTHLAN

            Ni 6.12.2012 (Ningazan) dar 6:30 hian Saikhamakawn YMA hruaitu tur thlanna neih tur a ni a. A hmunah YMA Community Hall a ni ang. Memberte a tam thei ang ber kal i tum theuh ang u. Refreshment tuihnai tak a awm bawk ang. Hemi zana Section te mawhphurhna turte:-

V.  Section- Light & Sound

T.  Section- Seat arrangement

Ch.Section- Refreshment

Sd/- Secretary

ZALEN  SUNDAY  CHANCHINBU  SEM  TUR  DUH  A  NI

                        A lak man thla khatah Rs 40/- (Sunday vawinga pawh nise) zingkar chauh sem.

Hlawh: Copy-1 Rs 10/- kan pe

Copy- 100 ah Rs 1000/-(With Bonus)

Copy- 200 ah Rs 2000/- (With Bonus)

            Mirinawm te tan a sem theih a, sum hnar tha tak a ni. Branch/ section/ Group- YMA/KTP/SAY/ PYD leh mimal tan inhlawhna tha tak a ni.

Contact- 2328226/ 9862363559

BIAKSANGA  BUILDING, NEWS AVENUE, TREASURY  SQUARE.

Sd/- (Lalremruata)

Manager

Zalen Leading Sunday Newspaper

F.THANGMAWIA  MEMORIAL  SCHOOL  KUM 2013  KALPHUNG  THAR

                     F.Thangmawia Memorial School hi kum 2013 atangin keini Home Mission nen hian kan thawk dun dawn tawh a, School inrelbawlna leh a enkawlna zawng zawng Home Mission Principal kutah a awm tawh dawn a ni.

            Tin, zirtirtu turte pawh Home Mission Principal kaihhruaina a lak tur a ni a, zirlai pawh Home Mission School nen a in ang vek dawn a. Kan tum ber chu F. Thangmawia Memorial School hi School tha taka din chhuah a ni a, bul tan that tur a  nih avangin kum 2013 atang chuan KG-1 atanga Grade V thleng chauh kan hawng dawn a, KG-1 tan December ni 15 thleng Admission Form lak theih a ni

Sd/-

Principal

Lalthlamuana Hnamte

Home Mission School

HRIATTIRNA

            *Ramri lui humhalh tu pawl committee leh Local Council Saikhamakawn tangkawpte hmalakna in Ramri luiah sangha chi dah (Chhuah) a ni a, mi tumah in eng hmang mah a luisa reng reng man loh tur a ni.  Thuawih lova tilui te chu hetiang hian hrem an ni ang.

1. Ramri lui Tur (chemical) hmanga sangha hrai hriat chhuah a man an nih chuan Rs 5000/- (Cheng sangnga) chawitir an ni anga, chawitur neilo/ chawi duhlo chu thuneitu te hnenah pek an ni ang.

2. Chinai, Carbide, Mizoru a sangha vua man an nih chuan Rs 1000/- (cheng sangkhat) chawitir an ni anga, chawi duhlo/ chawitur neilo te chu Ramri lui humhalhtu pawl committee in an chungchang a ngaihtuah ang.

3. Ramri luiah Len, Hawlhrawk, Lenkhang, tui thehkang etc. in luisa engpawh man phal a ni lova, a tilui chu Rs 500/- (cheng zanga) chawitir an ni ang a, chawitur neilo/ chawi duhlo te chu Ramri lui humhalhtu pawl committee in tha a tih angin an chungchang a rel ang.

            Hriatloh vanga thil tihsual inngaihhnathiamna a awm lovang.

Sd/- Secretary

Ramrilui Humhalhtu Pawl

Tualchhung

,Zothansangi d/o Pu B. Lalrinzauva (Ch.Sec) chu damlohna vanga damdawiin ah rei tak enkawl a nih hnuin a lo chhuak.

,Pi Parteii d/o Pi zuimawii (V.Sec) chuan  khawilo vahvel nan Scooty thar an lei.

HNATLANG  NEI

            Nimin ni 1.12.2012 (Inrinni) zingkar khan Faina Beihpui thlak pualin Vengchhung YMA Section tin te mahni section huamchhung theuhah vengchhung tifaia hnatlang neih a ni a. Member te pawh an chhuak tha hle hetiangin:-

V.Sec atangin - Member 31

T.Sec atangin - Member 28

Ch.Sec atangin            - Member 40

            Tin, vengchhung vawnfai kawngah mipuite kan mawhphurhna theuh a ni tih hre thar leh ila, kan vengchhung a lo fai zel theih nan mitin te tan i la thar theuh ang u.

ZANIN  EPL  KHEL  TUR

Norwich    Vs  Sunderland  (9:30)

N.Castle    Vs  Wigan         (1:30)

THU  ROTLI NG

            Thlemna tawk ngai lo mi chuan a rinawm lohzia a hre lo a ni.          -Josh Billings

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300