Mipui Aw 11.11.2012

MIPUI AW

Vol. XVIII Issue No. 46 Kristian Thalai  Pawl  Saikhamakawn Branch  Pathianni Dt.11.11.2012

VAWIIN CHANG VAWN

Insual bur bura ruaithehna in ai chuan

Inrem taka chaw thing bâr khat eina a tha zawk.

                                Thufing 17:1

KOHHRAN PROGRAMME

11.11. 2012 (Pathianni)

Chawhma S.S inkhawm

Tantu          : Pi Lawiziki

Chawhnu

Thusawitu  : Pi Khawlvuani

Zan Inkhawm

Thusawitu  : Upa R.Lalngena

KTP PROGRAMME

 Dt. 12.11. 12 (Thawhtan zan)

NEIHTHIL THEHKHAWM

Hruaitu : Upa Zonunmawia

Tantu     : Tv Benjamin Lalduhsaka

November thla zai hruaitu turte

Hla hruaitu   : Tv R.Zodinsanga

turte                 Tv P.C.Vanlalhriatpuia

Musician       : Upa Lallawmchhunga

                          Tv. R.Lalzamlova

VAWIIN  TLAI   FELLOWSHIP

A hmun    : S.S Hall

Hruaitu      : Nl Lallawmsangi Hrahsel

Tantu       : Nl Pricilla Lalramsangi

       

KOHHRAN  HMEICHHIE

PROGRAMME (Ni 13.11.2012)

            Kristian Chhungkaw puala hun hman tur a ni.           

           

           

SERMON

I THU ANG ZELIN

             He khawvelah Lal Isua Krista misualte chhandam tura a lokal theihna atana Pathian remrtuatnaah hian mihring ang a lo piangin, mihring nihna famkim amahah belin a awm a. A lo piang chhuak a, he khawvel damlai kawng chhuk chho hi rawn zawh ve in, Chhandamna hna chu a hlen chhuak famkim a ni. He Lal Isua Kristan chhandamna hna a thawh theihna atan Pa Pathian kawng buatsaihah hian mihringte pawh hmanruaah  hmangin, he khawvel dan ang Lal Isua alo pian chhuah theihna tur atan khan hmeichhiain a pai a, a hrinchhuah  a ngai a ni.

            Lal Isua Krista Pathian fapa meuh mahni pumchhungah han pai a, han hring chhuak tur meuh tura Pathianin Mari nula sathial ve mai nia lang a han thlang nalh mai hi a mak hle mai. A hunlai ngaihtuah chuan Mari aia nula dang thlan awm hliah hliaha mihring lam chuan kan ngaihte tam tak an awm ngeiin a rinawm. Hetih hunlai hian Juda te zingah pawh miropui tak tak leh an sakhaw lamah pawha hotu lian tak takte fanu tha tak takte pawh an awm ve ngei ang a. Chutih lai karah Pathian thlan Mari hi Bible-a kan hmuh dan chuan engmah chhungkua leh amah nihna hrim hrimah hian han chhuan em em tur thil ropui tak hi hmuh tur a awm lo a niang. Bible a kan hmuh dan chuan Galili ram khaw pakhat Nazaret khaw nula thianghlim tih a ni ve mai a. Chuta karah mi nupui hual ni lai mek a ni leh nghal. Lal Isua Krista a pianna hmun atan pawh khual buk pawh chang ve lo awm reng a, nun leh chhungkaw khawsakna kawngah pawh a mi ropui tehchiam lo niin a lang a ni.

            Chutiang anih karah chuan eng ngati nge Pathian hian chu nula chu khawvel chhandam tura a fapa Lal Isua Krista pai tura a thlanchhuah nalh mai le? tih hi a ni.

            Mari nun hun hmalam leh an chhungkaw dinhmun hi kan hmu thui lo hle mai. Amaherawhchu, Lal Isua pai tura Vantirhkohin a hnena a thu thlen chungchang a chhan dan han thlir vang vang hian Mari hi Pathian hian a thlang sual loh zia chiang takin kan hmu thei a ni. A hunlai ngaihtuah chuan Nula thianghlim leh mi nupui hual lai mek han rai tak ngawt mai chu ngaihtuah tur a tam hle awm e. A pasal hual te leh an sakhaw dan leh dun te, khawtlang leh chhungkua te thlenga han ngaihtuah chuan thil huphurhawm tak niin a lang. Amaherawhchu Mari hian Pathian thu a nih tawh chuan khang zawng zawng ai kha chuan  I THU ANG ZELIN KA CHUNGAH THLENG RAWH SE tia Pathian hnena inhlan mai kha a nun a ni tlat. Hetiang nun neitu anihna hi a ni Pathian chuan A fapa pai tlakah a ruat nachhan ni. Lalpa bawih a nihna in hre chianga, i thu ang zelin ka chungah thleng rawh se ti thei tute nunah hian Pathian ropuina tarlanin a awm thin. Mari ang hian i thu ang zelin kan chungah thleng rawh se ti theitu nun hi kan neih ve hi keimahniah Pathian inpuanna theihna atana hmanraw pawimawh ber a ni.

                       

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

IN  SIAMREM  THIAM

             Hun leh ni te a lo in her danglam zela, kan hun hman mek pawh hi tun hma kum sawm liam ta atanga tehkhin chuan danglam nasa tak a ni. Kan hun hman mek mila lo in her rem zel hi kan tihtur a ni chutilo chuan mi zingah mawl nih kan hlawh mai dawn a ni.

            Nun nghet neih kan ngaisang hle a, nun inthlakthleng thiam lo neih erawh thil thalo ber a ni. Kan hmanlai ngaihdan mawl pui pui nghet taka vawn bur chin te hi nun nget kan tihah hian khung len a har viau mai. Dik leh tha kan tih kawngah tumruh takin kan kal anga mahse kan dikloh na lai miin min rawn sawi chhuah sak a nih chuan thiam takin kan inpawm ngam a tul hle. Ngaihdan thlak harsat lutuk hi thil tha a nih viau laiin thil thalo tak a ni thei bawk.

            Sawi ta zel ila, Kohhran rawngbawltu tan bik ngat phei chuan kan nuna thil lo thleng reng reng hi kan pawm thiam a tul a, chumi chu hmanrua a hman a, nun insiam that nana kan hmanthiam a tul tak meuh meuh a ni. Tin, Bible hriatna kawngah zau taka kan in zir a tul hle a, chu chu kan thlarau nun chawmtu tur pawh a ni ngei mai, hemi rual chian hian khawvel mite hriatna aia hriatna hniam bik kan neih a thiang lo. Khawvel in lumlet dan zawng zawng hi rawngbawltu tha chuan a hre phak ngei tur a ni bawk.

            A tawp berah hei hi hria ila, Lalpa tih hi finna bul a ni tih thu hi. Pathian at na chu mihringte finna ai pawhin a fing zawk tih Bibleah kan hmu, Hawh u Lalpa i tih tlang ang u.

ARTICLE

HMANGAIHNA !!!

Lalhmangaihzuala

            He hringnunah hian eng nge pawimawh ber ang tiin zan khawtairek thleng thak thak beng sika ka ngaihtuah pawh hian hriat a har ka ti hle thin. A chhan chu ngaihtuahna mawlmang tak ka neih vang te pawh a ni mahna le. Mahsela chutia ngun taka zan tin vei bera han neih takah chuan he thu tawite hi ka ngaihtuah chhuak ve ta hlawl mai a. Hemi kawnga gaihtuahna hrang hrang lo hmang tawhte kut hnu pawh hmuh tur a awm nual hlawm reng a. Chu chu Hmangaihna hi a ni. Hmangaihna dawng ngai hauh lova in hriate pawh hian hmangaihna hi an nei tlat lawi si. Kan thil tawn atanga kan hriat leh kan neih a nilo tih chu a lang fiah nghal mai awm e. Pathianin mihringte a siam hian hian he Hmangaihna hlu tak hi chu a lo dah tel ve ngei a ni tih nghet takin a rin theih awm e.

            A nih leh mi i hmagaih a ni tih engtin nge i hriat theih tak ang le. Mi thil chik mi leh fing tak tak te pawhin an lo hrifiah ngeinguai tawh a. Hei hi chu a dik a ni tih theih a awm chuang hauhlo. Mahsela nang leh kei hian hmangaihna awmzia i hriat thiam theih ang ber rilru kha midang chunga i pu a nih ngat chuan chumi chu i hmangaih a ni tiin sawi ila, a dik ngei ang le. Mitin hian hmangaihna kan sawifiah dan leh kan hriatfiah dan a in ang hauh lo. Hmangaihna kan lak urhsun dan pawh a in ang lo ang. Nangman thuk taka i hriat dan ang aia lap takin mipakhat chuan mi ka hmangaih tiin lo sawi ta sela, i ngaihdanah chu a hmangaihna chu tlinglo viau mahsela, chu pa chuan a hriatthiam ang tawk chiaha a hmangaihna rilru a pu a nih chuan a hmangaih hle a ni thung si. A hmangaih lo tiin i sawi thei lovang. Chutiang chiah chuan miin thuk leh ril taka hmangaihna a hriatthiam a, chumi ang tak chu midang chunga a lantir chuan a hmangaih tihna a ni bawk ang. Hmangaihna nasa leh nasa lo hi a awm thei tak tak love, hmangaih tu rilruin hmangaihna a hriatthiam dan tawkah a innghat ta tihna a ni ber awm e. Hmangaihna kan hriatthiam ang tawka mi kan hmangaih chuan kan hmangaih hle tihna a ni.

            Thenkhat chuan chhan neia hmangaihna hi hmangaihna tak a ni lo te an ti fo thin. Mahsela hmangaihna hi chhan nei a lo piang a ni tih hi kei ka ngaihdan a ni. Nu in a fa a hmangaihna chhan chu a rila rah a fa a nih vangin a hmangaih a ni. Tlangvalin nula a hmangaih chhan chu amaha hmangaihna tur chhan lian tak a hmu tihna a ni bawk. Kan Pathian ngei pawh hian mihringte min hmangaih chhan hi zawng ta ngat ila khawilaiah emaw chuan chhan a lo nei mial a rinawm tlat a ni. A ngaihtuah peih chuan Pathianin min hmangaih chhan hi lo chhut ve chhin te reng u.

            Hmangaiha hi hnam fing zawk te chuan chi hrang hrangin a lo sawi thin, mahsela hmangaihna chu chikhat chiah a awm lo maw? Nu le fa in hmangaihna leh nula leh tlangval in hmangaihna te hi thliar hran chi a niin ka hre lo. Mi zawng zawng hi chhan engngemaw vangin kan in hmangaih a, mahse hmangaihna erawh pakhat chauh a ni thung. I pawm ve em le?

BIAKIN HAWN NI CHUAN E...

(Famtate Pualin)

K.Vanlalruati.

Dt.17.11.2012 alo inherchhuak anga, Saikhamakawn Biakin thar chu hawn ani dawn ta maw!!! Famtate pualin ziah ve alang tlat nia. Biakin lungphum phum ni khan zingkarah pialtlêp chung open-air-ah Kohhran Zaipawl ten hla rem a ni a, ka telvein Contralto ka sa lehnghal. Rei ve tawh asin. Biakin thar sak bul ţana leilaih laite, Electric leh Petromax hnuaia zan hnatlâng kan neih ţhinte, leivûng pawh tawlailir ngatin Ngaizel khâmah kan paih ţhin a nih kha.

            Biakin hawn a ni dawn tih ka hriatin heng mite hi mitthlaah alo lang nghal a.

            T.Upa Vena Cement chawk lai, Rawra leh Balu thiar laite, a hova kan hnatlan zin ziate kha. Upa Denghluma’n taksa chak tawhlo tak chunga Biakin hlui tual zawla Rawra chhut hnatlâng a rawn tlawh kual hrâm hrâmte kha. Upa Lianzinga chalsam hnawk niâia Petromax êng hnuaia thirtianga lei a chhun karh karh laia an lai thûk zeal lei khi chat thûk tak tak lo awm mak ti akan en ho laih laih laite tak kha aw… Upa Lungtiawia’n hnatlâng thingpui lum leh dâl siam a ho taimâk ziate, sawhchiar an siam ţum chuan min suah hnem ţhin asin. Upa Chhuanmawia kha thildang a khawih bâk a, Electric fit ţhat ngai zawng zawgn fit ţha a a pharbuai ţhin ziate. T.Upa Sangzuala’n hnatlâng hming alo ziak ţhin a, “Ruati, heng hnatlâng hming hi kan chhinchhiah zêl anga, Biakin hawn niah chuan kan thasên zâtte kan târchhuak anga, kan la ngai dawn asin” tia phûr taka min hrilh laite. Upa nisi lo lung mize hria Pu Thangtea ţangkai ţhin ziate kha aw… Zak kau pawpa an hlap tawh chuan a vaw chhuak hnem thei ania. Tin, henga hming ziahlan ve loh tha leh zung, sum leh pâi tam tak sêng tute kan zînga awm ve ta lo, mual min liamsan ta zawng zawngte inngaihawm hle mai.

            Kan zîngah in lei taksa chu awm ve tawhlo mahse, nghakhlel taka inlo thlîr ţhin “BIAKIN HAWNNI CHUAN E” in rauthla tal chuan min telpui ngei kan beisei tlat asin. Biakin sak leh hawn awm tawh lohna hmun, kuta sak loh chatuan in mawi atangin puanvar ropui tak sinin min thlir ngei ang.

BIBLE QIUZ NO. 46

i Lalte  BUNG (7-11)

A Kâr âwl dah khat rawh :

Q1.Chu mi chu _______________ hnam hmeithai fa a ni a, a pa chu tûra khuaa mi, dar chher mi a ni         a;  ani chu dar chher kawngah rêng rêng chuan a fingin a hrethiamin a themthiam hle     mai a. Lal Solomona hnênah chuan a kal a, a hna zawng zawng chu a thawhsak vek a.

QTin, biak in hulhliapah chuan bante chu a dintir a: ding lam ban chu a dintir a, a hmingah __________ a vuah a: tin, vei lam ban chu a dintir a, a hmingah ________ a vuah a.

Q3.Aigupta lal Pharaoa  chu a han chho va, _______ khua han la a, a hal a, chu khua a awm

            _________ hote chu a that a, a fanu Solomona nupui chu inthlahna thilpek atân alo pe

            tawh a ni.

Q4.Solomona chuan Zidon-ho pathiannu __________ leh Amon-ho pathian tenawm tak ___________ chu a lo zui ve ta mai a.

Q5___________ tihhreawmna belhchhahin Solomona dam chhûng zawng, Israelte hmêlma a ni      fo thin reng a. Israelte a haw hle mai a, _________ ram chungah ro a rel a.

A bung leh Châng dah rawh :

Q1.Lebanon Ngawpui In sidar ban tlar li, ban chunga sidar thingphel chungah chuan a sa     bawk a; a dung lam chu tang za ani a, a vang lam chu tawng sawmnga a ni a, a san lam           chu tawng sawmthum a ni.

Bung: ...............          Chang: ....................

Q2. Tin, LALPA bâwm leh, inbiakna puan in leh, Puan Ina bungbêl thianghlim zawng          zawngte chu an zawn chho va; chungte chu puithiamte leh Levi chite chuan an zawn chho va.

Bung: ................         Chang: ....................

Hming : ......................................................

Section : .....................................................

BIBLE QUIZ  NO. 45 RESULT

Chhanna lut zawng zawng : 3

Chhang dik vek : 3

Lawmman dawngtu   :Mimi Lalhmachhuani (V.sec)

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni.

PAVALAI  PROGRAMME

A hmun       : LV Ramdinthara  In

A hun          : 25.11.12 (Ningazan)

Hruaitu      :Pu T. Lalrinthanga

Tantu          :Pu Biakvela

Sermon       :  Pu TK Manga

            Tawngtai rual a hun hman tur a ni.

KTP  HRIATTIRNA

            Ni 13.11.2012 (Thawhlehni) nileng hian Biakin leh a vel tifaia hnatlang neih tur a ni a. Biakin hawn te a hnaih tawh avangin Biakin leh a vel tihfai ngai tam tak a awm a KTP memberte thahnemngai taka tawhchhuah vek i tum ang u.Chaw fun tur a ni a, chawhmeh erawh ken a ngai lovang. Member te thahnemngai taka thawkchhuak turin inbuatsaih theuh ang u.

LAWMTHU  SAWINA

            Kan fapa Lalmuanpuia ni 31.10.2012 ah min boralsan chungchanga min lainata min khawngaihtu te zawng zawng chungah lawmthu kan sawi a. A nat chhung zawnga in lamah leh damdawiin lamah te min buaipui tute zawng zawng chungah lawmthu kan sawi bawk a ni. Tin, a boral ni a in lama tul leh buaipui ngai min buaipui naah zawng zawngte keini chuan engtikahmah kan rul let thei dawn lo che u a, Pathianin a let tam takin a rul let ang che u tih hi kan duhthusam leh kan tawngtaina pawh a ni e.

            Tin, he chanchinbu kal tlanga kan lawmthu sawina hi min tin hnena kan lawmthu sawinaa min lo pawmsak turin kan ngen bawk che u a ni.

In khawngaihna dawngtute

Pc Lalawmpuia (T.Sec)

te chhungkua

ENDIK  MEK

            Tunlai hian Motor Liscence, Road Tax leh Insurance fel leh fello check mek a ni a, vengchhung lirthei nei ten i hre theuh ang u.

IN  LUAH  TUR  AWM

            Community Hall Choka hi kum rei tak chhung man lova luahtir thin a ni a. Nakum 2013 atang hian man chawia luah turin Committee chuan a rel a, a luah duh tur chuan November 25. 2012 aia tlai lovah Branch YMA secretary hnenah dilna lehkha ziaka thehluh tur a ni e. In luah diltu chu vengchhung mi ngei an ni tur a ni. Luah man hi Rs.800/- a ni anga, electric bill an chawi bawk ang.

YMA  PROPERTY  HAWH CHUNGCHANG:

            YMA Bungruate hi mi tupawhin hawh theih a ni a, Bungrua te hi Branch-in kawl lovin Section kutah dah a ni a. Chuvangin Bungraw hawh duhte chuan Section  hruaitute hnenah dilna lehkha siama hawh tur a ni e.

A hawh man hetiangin :

1. Dekchi pakhat (ni khatah)                                                   =  Rs.20/-

2. Thutthlengsei (Sawmnga chin)                                           =  Rs.50/-

3. Gas Stove pakhat (ni khatah)                                              =  Rs.50/-

4. Portable Mike (ni khatah)                                                   = Rs.100/- (hei hi erawhchu Chairman, Light & Sound Sub-Committee hnenah dil thin tur a ni e)

            Bungraw hawh reng reng a hawhtuten fel takin a kawltu hnenah an dah leh ngei tur a ni a. Tin, Bungruate hi tihbo leh tih chhiat palh theih a ni a, tihbo emaw tih chhiat emaw a nih chuan a hmangtuten an tih bo/chhiat ang hu an chawi tur a ni ang.

Sd/- Secretary,

Branch YMA

AIENG  TUI  LEI  DUH  TAN

            Aieng tui fir tha tak duh tan engtik lai pawhin leitur ka nei reng e. Bottol khat Rs 70 a ni e.

Pi Biakdiki (V.Sec)

Phn No. 8974215715

Tualchhung

,Pu Lalhmangaihzuala h/o Pi Lalnunneihi (T.Sec) chuan tul leh mamawha hman atan bike (Bullet) thar a lei.

,Pu C.Lalhmunngheta h/o Pi Thankhumi (T.Sec) chu Synod Hospital Durtlanga zai a nih hnuin dam takin a lo chhuak.

,Lalrawngbawli d/o Pu Zodinliana(V.Sec) chu damlohna avangin Civil Hospitalah enkawl mek a ni

ZANIN  EPL  KHEL  TUR

Man city    Vs   Tottenham   (7:00)

N.Castle    Vs   W. Ham     (8:30)

Chelsea     Vs   Liverpool     (9:30)

NU  LEH  PA  TAN

            Kum 1 vel atang khan high school kal lai Hmeichhe naupang ho hian, Nap 10, cataspa, spasmolar, pacitane, Alprazolam vel hi class kal don hian hmon zeuh2 an uar lutuk, Govt Higher Secondary naupang ti ru an tam lutuk, meng pangngai deuh si hian a mit hi han en chiang ula, an mitnaute hi a lian(expand) nasa bik hle, chuan a then hi chu, nunnem deuh ni om tak hian , zawi tete hian an kal dem dem bawk nen, chumai bakah, dang ro hmel tok, thil harsa tawk lem tur ang hian an hmel ah hian a lang chiang em em a, a bak chu danglamna vak an neilo, a vun hi a ro mam pial bok.

     Nakin hnu zel ah psychological distress/disorder an nei don ani. Chumi hnu ah chuan pangngai a nun hi har ti tawh thin. Ka period lai a nih vangin ka ei a, an ti a. Mahse thudik an hriat chhuh meuh chuan, enkawl a hautak khop mai, awm pangngai in nuam an ti toh silo a, damdawi rui a stress deuh a awm kha nuam an ti zawk leh bawk si. School vel ah hian han vai tak sela, an pai kher loh pawhin , a ei thin hi chhinchhiah a tanpui hial an tul a ni.

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300

Mipui Aw 4.11.2012

MIPUI AW

Vol. XVIII Issue No. 45 Kristian Thalai  Pawl  Saikhamakawn Branch  Pathianni Dt.4.11.2012

KOHHRAN PROGRAMME

3.11. 2012 (Pathianni)

Khawvel suday School Ni Programme hman tur a ni.

Tantu          : Pi Hmingthanzuali

Thupui        : Jonathan Edward-a chanchin - I

Sawitu         : Pu Siamliana

Chawhnu

Thupui        : Jonathan Edward-a chanchin - II

Sawitu         : Pu R.Zohmingliana

Zan Inkhawm

Thusawitu  : Upa Lalrindika

KTP PROGRAMME

 Dt. 4.11. 12 (Thawhtan zan)

Hruaitu         : Pu Lalremruata

Tantu             : Nl Lalrinliani

Short Sermon : Tv R.Zodinsanga

                             Nl C.V.L.Biakzuali

Thilpek          :Nl P.C.Lalrinmawii

lakhawmtu   Nl Laltanpuii

November thla zai hruaitu turte

Hla hruaitu   : Tv R.Zodinsanga

turte                 Tv P.C.Vanlalhriatpuia

Musician       : Upa Lallawmchhunga

                          Tv. R.Lalzamlova

VAWIIN  TLAI   FELLOWSHIP

A hmun          :S.S Hall

Hruaitu           :NlLallawmsangi Hrahsel

Tantu             :Nl Pricilla Lalramsangi

KOHHRAN  HMEICHHIA PROGRAMME (Ni 5.11.2012)
Ramthim zin

A hmun         : S.S.Hall

Hruaitu        : Pi Lalmuankimi

Tantu     : Pi Pi lalzuali          

           

           

SERMON

KHUAL ZIN

              Khawvel nunphung leh hun inher mek zel hian mihring nun nasa takin a sawi danglam zel a. Thiamna leh hmasawnna thang zel hian mihring nun nasa takin a nghawng a. Mihring nun hi awlsam zawkna leh nawmsakna tamtak min chhawp chhuah sak mawlh mawlh a. In leh lo ropui tak tak leh a chhungah mihringin kan hriat leh kan beisei aia nasa zawk mahin, he khawvela kan dam chhung atan kan nawmsak theihna tur kawng kan hriat ang angin kan thuam a, kan inchhawp rei rui a. Kan theih tawk leh kan phakbak thleng thlengin kan tlan suau suau mek zel a. Heng mai hi duhtawk lovin a theih ang tawk tawkah dik leh mawi pawh thlu lovin sum leh pai hausakna kawngah nasa tak in kan intlansiak bawk a.

            He khawvel nawmsakna kawng hrang hrangte hi chu; he khawvel anih chhung hi chuan a awm reng dawn. Hmasawnna kawng hrang hrang hian mihringte tana nun awlsam zawkna leh nawmna tam tak a rawn hring zel dawn a. Vawiina kan hmuh ngai loh leh kan hriat ngailoh thil chi dang dang hian he kan nun hi a chim reng dawn a ni. Chung chuan he khawvel a mihring damlaite zelah, a hunlai ang zelin  kawng hrang hrangin hmasawnna leh nun nawmna leh awlsam zawkna a pe zel dawn a ni.

            Heng kan sawi tak zawng zawng, he khawvel thil nawmsakna, hausakna, ropuina leh a mawina zawng zawngte hi umin, duhin, chakin phe phe in, nei thin mah ila. He kan nun hian tlin loh chin ala nei dawn, heng khawvel thilte hi chu awm reng mahse, he khawvel thil nawmna leh mawina leh ropuina te hi kan chen theih loh hun leh kan nunah hian awmzia a neih loh hun hi ala thleng dawn, Chu chu mihring zawng zawng tawh vek tur a ni. He khawvela hausa leh nun nuam tak tak leh ropui tak takte pawh hi heng an hausaknate leh an neih hi chuan tlin em em mahsela, khang zawng zawng khan an nun ah awmzia aneih theih miah loh hun THIHNA hian a nun a nanchin hun a thleng thin.

            He khawvelah hian cham hlen tur tumah kan awm lo. He khawvelah hian kan damchhung ni hi chhiar thin mah ila, engtik hunah emaw chuan he khawvel hi kan chhuahsan anga, kan chatuan hmun tur hi kan la pan dawn. chuvangin he khawvela kan damchhung nun hi chu kan KHUAL ZIN KAWNG zawh mai kan ni. Kan chatuan hmun tur ngaihtuah chuan, he khawvela kan damchhung hun hi chu a rei lote chauh  a ni. Chuvangin khualzin mai kan ni tih hi kan hriat reng a pawimawh. He khawvel nawmna leh mawinate hi chu kan khualzin chhung mai atan a ni a, kan duh lutuk leh kan zawn nasat lutukna lamah hian kan hmun hlun tur lam thlir lo lek hian kan tlan palh ang tih a hluhawm hle mai. Haw leh tur kan nih inhre rengin kan damchhung nite hi kan chhiar thiam a pawimawh  a ni.

                       

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

MIZO  KRISTIAN  &  hNAMDANG

             Tun hnai lawkah kan Mizo pui hnamdang miin rawng takin a that a ni tih kan hria a. A that te khawtlang pawh nasa takin an thinrim a nih kha. Heng zawng zawng hi engvanga lo thleng nge, Kristian na hian hnamdang te kan huangtau tir nia ngaihna pawh a awm lian sawt hle, mahse kawng dangin han ngaihtuah ta ila.

            Kan Kristianna hian Mizote hi taimakna ah min hruai ta sela chuan hnamdang mi hnathawka chhawr a ngai tawh lo mai ang. Chu chuan heng kan thil tawn thin tamtak hi a ti tawp ngeiin a rinawm. Hnathawh ngaisang a, taima tur chuan Mizo te hian kan rilru kan thlak a pawimawh hle bawk. Hnathawh hi kan ngaisang tlat lo a ni. Kut hnathawk leh sawrkar hnathawk sum inlakluh zat in ang reng ah hian sawrkar hnathawk kan dahsang zawk tlat, hei hian hnathawh aiin sawrkar a awlthawng taka sum lakluh chhakna min siam a, chu chuan kut hnathawh min hnualsuat tir a tih theih awm e. Tin, kohhran ho hian tun ai hian kut hnathawh hi ngaisang lehzual ta se,  chu chuan nasa takin kut hnathawh a chawisang ngei ang.

            Heng zawng zawng hi Kristianna vanga Mizo ten kan neih tur a nih lai hian kan nei tlat lova, hnathawktu tur kan in hmuhzawh miau loh avangin hnamdang mi an lo lut ta ruih ruih mai a nih hi. Chung mi te chuan a changin pawi an khawih palh ve mai thin zawk a ni lo maw. Tu nge dik lo zawk nge ni ta le? Kan Kristianna hian tlakchham a nei a ni mai lo maw.

ARTICLE

KA NGAI THIN CHE ASIN!

                                                                   R. Zodingsanga  

            Hun leh ni te a lo vei a, kumpuisul lo vei te chuan a ni hnen atangin chuan min hruai hla tulh a ni tih ka hriat chhuah a ka ngaihtuah chhuah chang apiangin ka thin a rim thin, mahse siamtu in a tah tawl te te a kan hun hmandan tur min relfel sak na te, ramri min khamsak vek na chu tukhaw han dan rual a ni si lo, hlim takin nitin hun kan hmang reng emaw ka tih laiin, zawi zawiin ka lo kalsan a ni tih erawh ka hrechhuak tlai si, a va pawi tak em!! ka bul hnaia a awmlai te kha ka ngai vawng vawng thin. Ka hmangaih thu ka hrilh tawh em tih ka ngaihtuah let a, ka lo hrilh ngai miah lo tih ka hrechuak chuan min tihreawm a, kum sangkhat pawh he leiah hian damchhung ni chhiar mah ila, ka tawng leh tawh dawn lo a ni tih ka hrechhuak leh zel a, chu chuan min ti hreawmin ka biangah mittui a luantir fo thin, ka awrawl hre phalo mahla, ka ngai che a, ka hmangaih che a sin.

            Tlaitla eng mawi tak mai chu mitinreng hmuh theih turin kawlkil thlang lamah chuan hringfa te chawlhhahdamna hun min siamsak a tum tih hriat fahran hian a tawlh thla ruai ruai mai, a mawiin Siamtu themthiam zia hi hringfa awrawl hian a hrilhfiah zo dawn lo tih hi phat rual a ni lo, chutia ka thlir vung vung laia chungleng sava ten an duhna ber thingzar an chang hman lovang tih hlau niawm taka van boruak thiang dumpaw ruih maia an in um kual zak zak ten nun chhungril min chhawk dan te kha aw... a man zawngin chhut dawn ila a va han to dawn tak em!!! Hmalam hun lo kal turin min tibuai lova, enghelh engmah a awm na hek lo, kha tih lai te khan ka bulah mai nilo ka nunah ngei a awm reng vanga hlim leh nuam ti ka ni tih kha ka in hre mawlh lo, kohkir theih nise zawng min kalsan hnua ka lunglen zia leh ka ngaih thin zia hi bianga mittui luang zawih zawih chungin ka hrilh ngei ang le.

            Fur chhia lo in herchhuak thin te, Thal nunrawng tak te, Favang hun nuam leh thengthaw nuam em em mai te chuan hringnun min nuai vel a, chutia hun lo inher karah chuan a ni aiin ka hmalam huna mite phak ve tura ka inbuatsaihna te chuan a ni aiin ka nunah hmun a lo chang tam ta nge? A ni aia vei ka ngah lutuk avang te pawh a ni mahna le, ka hriatloh laiin min lo kiansan ta daih mai, a tawpah ka rilu hah leh ka nun chhungril buaina chuan a ni chu min hriatchhuahtir a, a ni nen a ka nun a hlim thin zia te, ka nuna a awmlai a tudang ka ngaihloh  zia te leh ka tun hun hman laiah hlimna vawrtawp min thlenpui thin zia te kha ka theihnghilh thei tawh ngai lo, ka va ngai thin tak em,  mahse hun leh kum te chuan hla takah min lo then hrang tawh si. Aw ka ngai che asin PANLAI NUN hlimawm, min kiansan hnu atanga ka nun buai thin zia te, rlru hah ngawih ngawih a ka awm lai te hian ka ngai ngawih ngawih che asin, ka tawna i vullai hun a chuai ta si, kumtluang atan mangtha le.

HRISELNA HUANG

ARJUNA THING

A chanchin tlangpui:

Arjuna thing hi thing lian tak a ni a, India ram hmun tinah Mizoram telin hmuh tur a awm. A kung puitling hi meter 20 vela sang a ni tlangpui a, thlasik laiin a hnah a tlakawlh ve thin. A thing hi thingzai atan an hmang thin a, a pil hi damdawi atan an hmang thin thung. Auyveda damdawi danah chuan arjuna thing hi lung thalo damdawi atan bik an hmang thin a, lunga tihrawl awmte a tichak thei. A pil hian calcium leh magnesium tam tak a pai a ni.

Damdawia hman theihte: A pil.

Damdawia hmannate:

Lung tha lo: A pil 60gms densawma tui liter khatin meina vak lovah a chhumna tui 250ml anih thlengin chhum a 60ml zelin nitin zing leh tlaiah, ni 14 chhung in tur a ni.

Emaw

A pil phoro thirfian khat (tablespoon) leh bawnghnute no khat chhum pawlh a, nitin zing leh tlaiah ei thin tur a ni.

Emaw

A pil phoro densawm thifiante khat leh khawizu thirfiante khat, nitin zing leh tlaiah ei thin a tha.

Emaw

A pil thenkhat midum pangpar pathum vel tuiin chhuma a chhumna tui chu nitin in thin tur a ni.

Ha na, hahni na: A pil phoro hnuah tihdip a, ha hnawh nana hman thin a tha.

Ruh tliak: A pil densawm diaka ruh tliakah bel tur; chubakah a pil phoro tihdip 5gms leh khawizu thirfiante khat chawhpawlha nitin vawi hnih ei bawk tur a ni.

ARTUKKHUAN

A chanchin tlangpui:

Artukkhuan hi hrelo kan tlem hle awm e. A par hi a tlangpuiin a sen leh a eng ani deuh ber a, rawng dang pawh a awm ve thei tho bawk. A zung hi bulbawk ang deuh hian leiah hian a bawk ve nalh a ni. August thla leh October thlaah a par thin.

Damdawia hman theihte: A hnah, a bul bawk.

Damdawia hmannate:

Zunthlum: A bul bawk 60gms, silfaiin mei na vak lovah chhuma a chhumna tui 250ml a nih hunah thlit chhuah a 60ml zelin nitn zing leh tlaiah, karkhat chhung in tur a ni.

Khawihli: A hnah rawtsawma meia hem lum deuh hnuin khawihliah bel a tha.

Hmeichhe serh atanga thil var chhuak nasa: A bul bawk fai taka silfai hnuah pan te tea zailep a bawnghnute Ghee-in kan tur a ni; 5gms zelin nitin zingkarah leh zan mut dawnah ei thin tur a ni.

Panchhia: A bul bawk rawtsawm diak a, panah bel a tha.

BIBLE QIUZ NO. 45

i Lalte  BUNG 1-6

A Kâr âwl dah khat rawh :

Q1.Ngai teh, hei ____________________  a lal ta reng mai: nang ka pu lalpa lah hian i hre ve si lo va: bâwngpa te, ran chawm thau te, berâmte a talh teuh va, lal fapa zawng zawngte leh, puithiam _________________ leh, sipai hotu Joaba te a sawm a: i chhiahhlawh solomona erawh chu a sawm ve lo.

Q2._____________________chu in chhûng lam hotu ani a; Abda fapa Adonirama chu hnathawka rawih luihte hotu a ni.

Q3.Gilead mi _____________________ fate chungah erawh chhuan khawngaihna lantir langin, i dawhkana chaw kiltuah teltir ve ang che: i unau Absaloma laka ka tlanbo lai khan ka hnênah an lo kal si a.

Q4.Pindan laita berte kawngka chu chu mi in ding lampangah chuan a awm a: a laitaah  chuan rahka __________________ an lawn chho va, tin, a laita atang chuan a ______________________ .

Q5.Tin, in satuho _____________________ mite leh Hirama mite leh Gebal mite chuan lungte chu an chher          a, in sakna tûr chuan thing leh lungte chu an buatsaih a.

A bung leh Châng dah rawh :

Q1.Tin, Israel-ho zawng zawng chuan chu thua lal rel dan chu an lo hria a; lal chu an tih ta hle mai a: rorêlna tûrin Pathianin finna chu amahah chuan a awm tih an hre ta si a.

Bung: ...............          Chang: ....................

Q2. Chu nula chu a hmêl a tha hle mai a; lal chu a enkawl a, a rawng a bâwlsak thin a; nimahsela lal chuan a pâwl lo.

Bung: ................         Chang: ....................

Q3. Tin, Israela thlahte zingah hian ka cheng ang a, ka mi Israel-hote hi ka thlahthlam lo      vang,” tiin.

Bung: ................         Chang: ...................

Q4.Aruboth ramah Ben-heseda; ani chuan Sok leh Hepher ram zawng zawng a chang tel      a:

Bung: ................         Chang: ...................

Hming : ......................................................

Section : .....................................................

BIBLE QUIZ  NO. 44 RESULT

Chhanna lut zawng zawng : 3

Chhang dik vek : 3

Lawmman dawngtu   : Lalthlamuanpuii (Ch.sec)

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni.

PAVALAI  PROGRAMME

A hmun       : Vestry

A hun          : 8.11.12 (Ningazan)

Hruaitu      :Pu Chhuansanga

Tantu          :Pu Rinngaihzuala

            Tawngtai rual leh rilru sawia hun hman tur a ni.

MIPUITE HRIATTIRNA

            MLA/MP Roll ennawn a, siamthat hna thawh mek chu sawrkar lamin a hun an pawtsei leh a, November ni 20 thleng hun hawn belh a ni. Hemi hun chhung hian vengchhung mipui ten mahni ID fel leh fel loh te enfiah theuh ila, hun hawn laia tihfel ngaite tihfel a nih loh chuan inthlan dawnah tamtakin buaina kan tawk fo thin, hemi hi a thlen loh nan hun hawn lai hian mahni ID a fel leh felloh te, tihfel ngai te a awm pawha tifel turin i ngaihven ang u.

LAWMTHU  SAWINA

            Ni 29.12.2012 (Thawhtan) ni a Mel 5 kawnga kan Accident na  a min buaipuitu; veng hrang hrang mi te leh vengchhung mipui te, damdawiin lam thlenga a tul ang zawng zawng min buaipui tute zawng zawng chungah lawmthu kan sawi takzet a.

            Keini chuan engtikah mah kan rul let theih dawn lo che u a, he chanchinbu kal tlanga lawmthu kan sawina hi kan lawmthu sawinaah min lo pawmsak turin kan ngen nghal che u a ni.

In khawngaihna dawngtute

Pu Lalrinliana te chhungkua

CHATUAN  RAM  LAMAH

            Lalmuanpuia s/o Pc Lalawmpuia chu ni 31.10.2012 zinglamah natna leh hreawmna awm tawhlohna hmun chantuan ram min lo pan san ta a.

            Mipui Aw Editorial Board chuan a kalsan tak a nu leh pa te leh he thihna avanga lungngai zawng zawng te Pathian thlamuanna leh awmpui na a dawn a, hun lo kal zel turah Pathian awmpuina leh thlamuanna an dawn zel kan duhsak in, chu chu an tan kan tawngtaina pawh a ni e.

Y.M.A  CONFERENCE 

REPORT

            YMA General Conference vawi 67na Ni 23-25. 10. 2012 chhunga Kawrtethawveng khua a neih chu a lo tiak ta a, he Conference ah hian kan branch atangin Palai mi 16 lai kan kal thei a, a lawmawm hle mai.He rampum huap Conference ah hian Palai mi 2240 vel kal a report a ni a, a tawp ni chuan mi 4500 vel kan ni.

            A thlengtu Kawrtethawveng khaw mipui te an tangin an in pekna a ropui hle mai.

            Conference chhung zawnga tluang taka hun kan hman theih nan leh kal lem leh haw lamte, tin, tluang taka kan thlen leh theih nana min lo tawngtai saktu kohhran mipuite chungah lawmthu kan sawi a, tin, branch aiawh a Palai kal zawng zawngte chungah Branch Y.M.A chuan lawmthu a sawi e.

Sd/-

Secretary

Branchu Y.M.A

NPSS  KHAWVEL  SUNDAY  SCHOOL  NI  PROGRAMME

            Naupang Sunday School te khawvel sunday school ni hi a hrana hman tur a ni a. Beginner atanga Senior department te a huhoa hman tur a ni. Thilpek lakkhawm tur a ni bawk. Thupui ah  Helen Keller-i chanchin zir ho a ni ang a, thupui hi then hniha then niin chawhma leh chawhnu hun hman tur a ni ang.

Chawhma thupui sawitu tur: Tv. Malsawmzuala (Beginner dept. Zirtirtu)

Chawhnu thupui sawitu tur: Nl. Lalhmunsiami   (Senior dept. zirtirtu)

Tualchhung

,Pi Lalzawmliani d/o Pi Lalhmingthangi (Ch.Sec) chuan a pakrukna atan fapa duhawm tak an nei.

,Zothansangi d/o B. Lalrinzaua (Ch.Sec) chu damlohna avangin Zemabawk Cancer Hospitalah enkawl mek a ni.

LAWMTHU  SAWINA

            Ni 29.10.2012 a motor a ka chetsualnaah kan khawtlang leh veng hrang hrang a min buaipuitete chungah lawmthu sawisen loh kan ba a, mi,al tin hnenah lawmthu kan sawi seng lova, chanchuinbu a kan lawmthu sawi hi mimal tin hnena lawmthu sawia min pawmsak turin kan ngen a che u.

In khawngaihna dawngtu

C. Lalrinawma te nupa

ZANIN  EPL  KHEL  TUR

Q.P.R       Vs Reading (7:00)

Liverpool  Vs N.castle  (9:30)

LETTER  TO  EDITOR

     Pu Editor kawngaiha ka thu ziah te min chhuah sak turin ka ngen a che..

     Sunj: Ramri lui chungchang

     Kan hriat tlan theuh angin tun hnai khan kan veng ramri luiah sangha a fuan a ni tih kan theuh a. Vengchhung hruaitu te pawhin humhalhna thu a puangchhuak nghal a, a lawmawm hle mai. Hetih lai hian a lo ti lui palh kan awm ang tih a hlauhawm hle mai. Nakin zelah kan vengchhung tan ngei pawh a la tha zawk dawn a ni tih hria a, mipui te pawhin kan humhalh that a tul hle a ni.

     Chutih rual chuan veng dang lakah pawh kan thikthu tihchhiat a tha hle awm e. Kan humhalhna kawngah vengdangte tan pawha tihluih ngam loh khawpa chetlak a tul hle awm e.

Nungchahumhlahtua

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300