Mipui Aw 9.9.2012

MIPUI AW

Vol. XVIII Issue No. 37 Kristian Thalai  Pawl  Saikhamakawn Branch  Pathianni Dt.9.9.2012

VAWIN  CHANGVAWN

      Chutichuan, Krista hnenah kaihthawhin in awm ve tawh chuan chung lam, Pathian ding lama thu Krista awmnaa thil awmte chu zawng rawh u. Chung lama thil awmahte chuan in rilru nghat tlat rawh u, leia thil awmahte chuan nghat lovin. In thi tawh a, in nunna chu Pathianah chuan Krista hnenah thuhrukin a awm si a.Krista kan nunna chu a lo inlar hunah chuan nangni pawh ama hnenah ropui zingah in inlar ve ang.

KOHHRAN PROGRAMME

Chawhma Inkhawm

Tantu  : Pi Lalnunfimi

Chawhnu Inkhawm

Thupui : Lucknow leh Delhi field a rawngbawlna

Thusawitu : Upa R. Lalngena

Zan Inkhawm

Thupui : Mission pawl dangte nena rawngbawlna

Thusawitu : Upa Lalzuiliana

FELLOWSHIP PROGRAMME

A hmun : S.S Hall

Hruaitu : Tv.R.Zodinsanga

Tantu  : Nl.R.Lalremchhungi

SERMON

A  BUL  LEH  TAWP  PATHIAN

        “Kei Alpha leh Omega ka ni,” Lalpa Pathian, awm meka leh awm tawha leh lo la awm tura, Engkimtitheia chuan a ti a ni. Thup. 1: 8

        Tin, ka hnenah, “A lo thleng ta. Kei Alpha leh Omega, a Bul leh a Tawp ka ni.Tuihal apiang hnenah chuan Nunna Tuikhura mi athlawnin ka pe ang.      Thup. 21:6       

        Kei Alpha leh Omega, a Hmasaber leh a Hnuhnungber, a Bul leh a Tawp ka ni.    Thup. 22:13

            Kan Pathian hian engkimah a Bul leh a Tawp a nihzia hi   kan Bible tarlan atang khian a lang chiang hle mai. Hei hian a Pathian zia a ti lang chiang hle bawk awm e. Lal Davida chuan Pathian hnen ata a tlanbo theih loh zia a sawi a, khawiah pawh kal sela chutah chuan Pathian a lo awmz zel si, chu chuan a bul leh a tawp ah Pathian a awmzia a ti lang chiang bawk awm e.

            Mihring kan nih chungin kan chungah engpawh lo thleng thei a ni a. A chang chuan hlimna leh lawmna, hei aia nuam leh hlimawm ka nun hman tawhah  ka la tawng ngai lo tih hial khawpa hun hlimawm kan hman chang a awm thin. Ngun taka ngaihtuah chuan engvanga khatiang hun nuam leh hlimawm hmang thei nge ka nih? ka tih chuan Pathian venna leh awmpui na kan chan vanga hmang thei chauh a ni tih kan hre chhuak leh thin, a bul chu Pathian a ni tih kan hrechhuak leh thin a ni.

            Lungngaihna, thihna ruam zawha manganga kan rum vawng vawng lai te hian Pathian awmpuina kan mamawh em em thin, mahse a reh tlat ni a hriat chang a awm fo. Mahsela Pathian thu lovin engmah a thleng ngai si lo. Mangan na tawpkhawk kan chungah a thlen a, belh tur kan neih tawh hauh loh hunah pawh Pathian chu kan tan a lo la ding reng thin. A tawpkhawkah pawh Pathian hi kan auh leh biak theihin a lo awm leh thin si a. A bul leh tawp ka ni ti tu kan Pathian hian a nihna a tlin a, a daw ngai si lo.

            Hetiang anih avang hian eng kawng pawh zawh ila Pathian kan hriat reng a pawimawh hle. Kan hlim ni leh lawm lai ni te, kan hrisel that lai te hian Pathian kan hre lo fo thin, mahse heng zawng zawng kan neih theihna bul chu Pahthian a ni tih i hre thar ang u. Tin, kan mihring pui te chungah beiseina pakhatmah kan neih tawh loh hunah Pathian chu kan tan a tawpah a min tanpui turin a lo ding reng thin a ni.

                       

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

            TANLAK  NGAI

            Tunlai kan Zoram chanchin ngun takin han thlir ila, kan nitin chanchinbu ah te hian a lang tam ber chu rinawmlohna lam sualna te, chhiatna hrang hrang mihring ten kan thlen ngei te a tam hle. Tin, kan ram hruaitu te , an dikloh na lai hai lanna ang chi pawh hmuh tur a tam hle bawk. Heng zawng zawng hi ringtu inti rama thil thleng vek a ni si. A rapthlak ti pawhin sawi ila kan tawng sual hauh lovang. Heng zawng zawng siam tha a, Zoram kulh tluchhe mek siamtha tur hian ringtute tan kan lak a ngai hle mai. Pathian hnenah chakna dila Zoram tana nasa taka kan tawngtai a tul takzet ta, ringtu piangthar te mawhphurhna sanzia hi i hre thar mawlh ang u.

            Tin, Pathiana piantharna la nei lemlo te pawhin kan mihring nuna thil pawimawh tak tak kan hloh mek niin a lang. Sap pa chuan sum a hlohin engmah hloh ah a in chiar lo, a hriselna a lo chhiat chuan thil tlem hloh angin a in ngai, a tawp berah chuan mihringin nun a hloh chuan engkim he khawvelah hian a hloh zo vek a ni tiin an sawi thin. Pathian thu lam atanga thlir loh pawh hian kan nun hi kan hloh nasa ta hle mai. Rinawmna kan tlachham a, dikna aiin mi tih dan kan thlir a, thawhrim na aiin awlsam te sum tam tak hmuh theihna kawng kan zawng bawk. Rinawmna, taimakna, dikna leh awmdan mawi hringnun zemawi tak kan hloh mek hi nei let leh turin mitin ten tan lak a va ngai nasa tehlul em! kan mawhphurhna a ni bawk.

ARTICLE

PAWAN HANS

-Dinga Fanai

            Pawan Hans Helicopters Limited (PHHL) chu kan ram Mizoramah ngei mai alo Service ve dawn ta reng mai, a chanchin hi kan hmuh theih ang angte leh Mizorama a Service Rate-te lo zir chiang dawn chhin ila.

            Pawan Hans Helicopters Limited (PHHL) hi helicopter service company Noida, Uttar Pradesh-a hmunpui nei an ni a, India ram chhûnga ISO 9001 : 2000 certified hmasa ber a ni. Octoberni ni 15, 1985 khân Helicopter Corporation of India (HCI)an in ziak lût a, Oil & Natural Gas Corporation (ONGC) te tuipuia oil laih chhuahna hmun ţhenkhat ah te leh India ram hmun hrang hrangah an Service ţhin a, an hmanna tlângpuite chu:

1. Tuichunga ONGC ho oil lakchhuahna hmunpuiah.

2. Thliarkâr (island) kalpawh nân.

3. Lirthei thlen theihlohna hmuh kal nân.

4. Damlo leh chhanchhuah ngâite phurh nân.

5. ‘Hire’ atân.

6. Film shooting leh boruak aţanga thlâ lâk nân leh adangte.

            Pawan Hans hi alo chesual zeuh zeuh tawh a, ţhenkhat han sawi ila:

* Ni 22 September 2004 khan Meghalaya Com.&R.D. Minister Cyprian Sangma, MLA pahnih leh Deputy Speaker hluite Pawan Hans helicopter-a an chuanna chu Shillong bulah tlâin an thi vek.

* Ni 6 August 2010 khân Pawan Hans hnuaia thawk te feet 10,000-a sang aţangin helicopter in an lo tla hlum tawh.

* Ni 18 Dec. 2010 ah Pawan Hans helicopter chu Chandigarh airport ah chesualin pilot in hliam na tak a tuar.

* Ni 19 April 2011 khan Pawan Hans helicopter LGB Airport, Guwahati aţanga thlâwk chhuak chu Tawang, Arunachal Pradesh a ţum tûr chu chesualin mi 23 chuang zîngah mi 17 te chuan a hmunah an thi nghal a, damchhuak mi 6 te zînga 2 chuan an hliam tuar lovin a hnuah an thi ve leh.

* Ni 29 April 2011ah pawh Arunachal Pradesh Chief Minister, Dorjee Khandu leh mi pali te chuanna Pawan Hans helicopter AS350 B-3 ni 4 a bo hnuah, May ni 4, 2011 khan Lobthang khaw bulah a chesual tih hmuhchhuah a ni a. An vâi hian an thi vek bawk a ni.

An service na hmun te chu Arunachal Pradesh, Tripura, Sikkim, Nagaland leh Assam.

1. Arunachal Pradesh:             * Itanagar (Helicopter)

* Naharlagun (Helicopter)      * Tawang (Helicopter)

2. Assam:                    * Guwahati (LGB International Airport)

3. Jammu and Kashmir:          * Katra (Helicopter)

* Vaishno Devi (Helicopter)

4. Maharashtra:

* Mumbai - Juhu (tuialhthei laichhuahna hmunah)

5. Meghalaya ah chuan an service te hi suspend rih a ni.

            Alo chetsual tawh avang hian a hlauhawm ta em em tihna lam a ni kher chuang lo ania... Mizoramah alo Service ve dawn ta a, ilo chuang ve duh anih chuan a chuan man chu hetiang hi a ni e:

Aizawl atangin:

Lunglei           `1500/-     

Hnahthial        `1500/-

Serchhip          `1000/-     

Lawngtlai       `2500/-

Saiha               `2500/-     

Chawngte       `2250/-           

Khawzawl      `1000/-     

Champhai       `1250/-

Kolasib           `750/-

            Pawan Hans Helicopter  Ltd. chu  kum khat chhûng zet  chawltir a nih hnuin northeast-ah Service ţan tir leh a nit a. Hetah hian an Flying Machine chu Modern Technology-a thuam ţhat niin tlangrama chêtsualna laka a him theih nan stringent safety pawh hman a ni bawk. 

            “Passenger-te an him theih nân fimkhur theih tâwp kan chhuah ang. Hei hi kan ngaihtuah hmasak ber a ni” tiin PHHL Chairman-cum-Managing Director Anil Srivastava chuan Reporter-te a hrilh bawk.

(Source : Wikipedia & http://www.business-standard.com/generalnews/news/pawan-hans-equips-copterslatest-technology/37049/)

HRISELNA HUANG (ELAICHI)

Damdawia hman theihte: A mu.

Damdawia hmannate: Alaichi nu naupai tan erawh chuan ei tam a hlauhawmin nau tlakna hial pawh a thlen thei.

Lung tha lo: A mu leh thing hmarcha sei chi (long pepper) 1gms ve ve densawm pawlha bawnghnute ghee thirfiante khat nen ei thin tur.

Lu hai: A mu densawm 10gms leh palm candy (tum thing atanga kurtai siam) 25gms chawhpawlha tui 150ml-in mei na vak lovah 5mins chhum hnuin a chhumna tui in tur a ni.

Thia luak: A mu rawt dip leh thakthing pil densawm chhumna tui hrawk thuah nana hman a tha.

Hmeichhe serh atanga thil var chhuak: A mu rawt dip 1gm leh butter thifiante khat chawhpawlha ni 15 chhung nitin vawi 3 zelin ei tur.

Zung thei lo, zung harsat: A mu 1gm leh mai mu 2gms densawma khawizu thirfiante khat nen ni 3 chhung nitin zing leh tlaiah ei tur a ni.

Mit tha lo: A mu densawm 1gm, bawnghnute ghee thirfiante khat chawhpawlha ni 15 chhung nitin vawi 1 ei thin tur.

Taksa chaklo, thil ei tui lo, chaw pai nuam lo: A mu rawt dip 1gm leh khawizu thirfiante khat chawhpawlha ni 1ah vawi 3 ei tur.

Taksa lum dan a thunun: Alaichi hian taksa lum dan a thunun thei a, ka rimchhia tihreh nan a tha bawk. Zunkawng thalo leh thin tha lo tan pawh tha tak a ni.

Zung thei lo: A mu densawm 1gm leh brandy emaw whisky emaw 30ml chawhpawlha in tur, vawi 1 inin a dam hmiah thei.

Zun nei tlem lutuk: A mu rawt sawm 1gm thingpui no khatah pawlha in a tha.

Luakchhuak, pumpui chak lo, thil ei tui lo: A mu densawm 1/2gm leh khawizu thirfiaante khat chawhpawlha ni 1ah vawi 3 ei tur. (emaw)

A mu densawm 1/2gm leh coconut rah chhunga tui no khat chawhpawlha in a tha.

Awmna: A mu rawt dip leh khawizu chawhpawlh tlemte ei a tha.

Taksa chau: A mu densawm thirfiante khat, tui no 2 in mei na vak lovah a tui chanve a so kang thlengin chhumna tui leh kurtai chawhpawlh in a tha.

Nau neih zawh hlima taksa chaklo: A mu densawm chhumna tui in tur, naupai lai erawh chuan in hauh loh tur a ni.

BIBLE QIUZ NO. 37

I SAMUELA BUNG 16-20

A Kâr âwl dah khat rawh :

Q1.Tin, inthawinaah chuan Jesaia chu ko la, tin, i tih tûr chu ka hrilh ang chia; tin, a hming ka hrilh tûra che chu ................. min thihsak ang che.” a tia

Q2.Tin, Philistia mite chu tlang pangah an awm a, tin, Israel mite chu a lehlam tlang pangah an awm a, an inkarah chuan .................. a awm a.

Q3.Chutichuan Jonathana leh ............... chuan thu an thlung a, ama nunna ang chiaha a hmangaih avângin.

Q4.tin, ka kal chhuak ang a, i awmna phulah ka pa kiangah ka va ................. ang a, i chungchang thu-ah ka pa ka bia ang a; tin, eng emaw ka hriat chuan ka hrilh ang che,” a tia .

Q5.Tin, Davida chuan, “I pa chuan i mi khawngiah dan hi a hre chiang hle kmai si a; ‘Jonathana chuan hei chu hre kher suh se, chutilozawng a lungngai dawn em mai e,’ a ti a ni ang: amaherawhchu ......................... nunna leh i nunna chhalin ka sawi e, thihna nena kan inkar chu pen khat chauh a ni,” tiin a sawi uar leh a.

A bung leh Châng dah rawh :

Q1. Tin, heti hi a ni a, an lo kal chuan Eliaba chu a lo en a, “LALPA hriak thiha chu a hmaa awma hi a ni ngei mai,” a ti a.

Bung: ...............          Chang: ....................

Q2. A fei ngul chu themkawl ang hi a ni a; tin, a fei lu chu thir sekel zaruka rit a ni a: tin, a phaw kengtu chu ahmaah a kal a.

Bung: ................         Chang: ....................

Q3. Chutichuan Saula chu a thinur ta viau mai a, chung thu chuan a tilawm lo hle mai a; “Davida chu a singa sing thatah an ngai a, kei erawh chu a sânga sâng chauh thatah min ngai a; ram tih ngawt loh chu aneih tûr dang engnge awm tawh?” at ia .

Bung: ................         Chang: ...................

Q4.Tin, Saula chu a ina fei kenga thut laiin LALPA tirh ramhuai a chungah a lo thleng a; tin, Davida chuan tingtang a tum a.

Bung: ................         Chang: ...................

Q5.Chutichuan Davida chuan Jonathana hnênah, “I pain bung takin lo chhang ta hlauh ang che sela tuin nge min hrilh ang?’ a ti a.

Bung: ................         Chang: ....................

Hming : ......................................................

Section : .....................................................

BIBLE QUIZ  NO. 35 RESULT

Chhanna lut zawng zawng : 0

Chhang dik vek : 0

Lawmman dawngtu   : Awmlo

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni 

SENIOR  INKHAWMPUI

Hlimen Pastor Bial Senior Inkhawmpui chu Melthum Kohhranah neih mek a ni a, vawiin programme chu, hetiangin:

Chawhma  inkhawm (10:00)

Chairman: Upa Lalrindika (Bial)

Tantu: Pi C. Kapchhungi (Vengthar)

Thupui: Thuawihna I

            Chhungkuaah

Sawitu: Upa C. Lalengzauva

Chawhnu  inkhawm (1:00)

Chairman: Upa Lalrindika (Bial)

Tantu: Nl.R. Lalawmpuii (Damveng)

Thupui: Thuawihna II

            Kohhranah

Sawitu: Upa Lallawmchhunga

Zan  inkhawm (6:30)

Chairman: Upa Lalrindika (Bial)

Thuchah: Pastor G.Chhunthuama

CHATUAN  RAM  LAMAH

            Pu Lalbiakkima f/o Lalduhsaka (V.Sec) chuan ni 2.9.2012 (Pathianni) khan natna leh hreawmna ram he khawvel a lo chhuahsan ta a. A kalsan tak a fate, a unau te, a chhungkhat laina te leh he thihna avanga lungngai zawng zawng te Mipui Aw editorial board chuan kan tuarpui takzet a, Pathian thlamuanna leh awmpuina an dawn zel kan duhsakin an tan kan tawngtai na pawh a ni e.

TIAM  TLAT  E

            Lalhmangaihsanga s/o Lalthangliana (Ch.sec) leh Lalramhluni d/o Thangdailova Thingsulthliah te chu ni 13. 9. 2012 (Nilaini) khian a nuam ah pawh a hreawmah pawh Thingsualthilah Kohhranah tiam tlat e an ti dawn.

            Kristian chhungkaw tha tak dina fanau maltluan chawia damchhung ni te chhiar dun turin Mipui Aw editorial lam chuan duhsakna kan hlan e.

TUALCHHUNG

,Tv. Lalremsiama s/o Pu Lalchungnunga (V.sec) chu accident avanga Civil Hospital a enkawl a nih hnuin a lo chhuak.

,Pi Lalfakmawii w/o Pu F. Lalrinmawia (V.sec) te nupa chuan a pakhatna atan Civil Hospital ah fanu duhawm tak an nei.

B.A  PASS

            Tv. Lalhmingliana Singson  s/o T.K.Manga (V.sec) chu B.A (English) tha takin a pass.

M.A  PASS

            Nl. Pc. Vanlalruati d/o C. Lalparmawii (V.sec) chu M.A (Psychology) 2nd Division ah a pass.

BO  CHHAR

Rangkachak Bengbeh khing lehlam ka chhar a, a neitu chuan a awmdan dik tak sawiin a hnuaia phone number ah hian ngaihven theih a ni e.

Phn: 9089532274

NPSS  INKHAWMPUI  RESULT

            Pathiani hmasa Ni 2.9.2012 khan Hlimen Bial NPSS department hrang hrangte inkhawmpui neiin intihsiakna an nei a, heng a hnuaia kan tarlan te hi department tin a pakhatna la tute veng an ni.

Beginner         - Hlimen Damveng

Primary          -  Hlimen Damveng

Junior             - Hlimen

Inter & Sac    - Hlimen Damveng

***

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300

Mipui Aw 2.9.2012

MIPUI AW

Vol. XVIII Issue No. 36 Kristian Thalai  Pawl  Saikhamakawn Branch  Pathianni Dt.2.9.2012

KOHHRAN PROGRAMME

Hlimen Pastor Bial Naupang Sunday School Beginner Department Inkhawmpui

Chawhma Inkhawm

Tan hun: Dar 10:00am

Chairman: Pu R. Lalrinawma

Tantu: Nl. C. Lalrempuii, Saikhamakawn

Intihsiakna:

1. Chang - Matthaia 7 : 7&8

2. Thu inchhang - Part I 5:1-10

3. Hla - NPHB No. 8 “Lawmthu kan hrilh che”

4. Solo - NPHB No. 9 “Aw Pathian ropui”

5. Recitation - Sam 148 : 1 - 3

Chawhnu Inkhawm

Tan hun: Dar 1:00pm

Chairman: Pu R. Lalrinawma

Thuchahtawi: Upa Lalremsanga,

                           Bial Secy (Sr.)

Result puan leh lawmman sem: Pu R. Lalrinawma

Zan Inkhawm

Thupui : Chanchin Tha hril tul na

Sawitu : Pu Khawlhmingliana.

FELLOWSHIP PROGRAMME

            Naupang Sunday School Inkhawmpui a nih avangin vawin tlai fellowship a awm lovang

            Kristian Thalai Pawl, Kohhran Hmeichhia leh Pavalai te beihrual thla a nih avangin a hranpa a inkhawmna hun hman a ni dawn lo.

SERMON

THLARAU RAH

                        Tirhkoh Paulan Galatia Bung 5 thuah Thlarau rah chi hrang hrang 9 min hrilh a. Heng Thlarau rah chi hrang hrang 9 min hrilhte hi Ringtu, Thlarau Thianghlimin a chenchilh te nunah hmuh theihin a rah chhuak ang nga, tisa chu, a sual ngaihtuahna te leh a chakna te chawpin chu Ringtu nunah chuan khenbehin a awm tawh zawk a ni tih min hrilh a. Hei hi ringtu Thlarau lam nun sawifiah na tha tak a ni.Chuvangin vawiin a kan ringtu nun Thlarau Thianghlim chang sang in ti tak tak te nun hian eng nge ka rah chhuah dan ti a kan in enfiah a tul hle mai.

                        Paulan heng Thlarau rah chi 9 a sawi te hi he kan ringtu nunah hian tha tak leh duhawm takin a rah chhuah theih nan Lal Isua Kristah-ah siam kan ni tawh a. Tin, tisa a sual ngaihtuahna te leh a chakna te chawpa kan khenbeh theih nan Krista-ah  buatsaih fel diam kan ni tawh bawk. Chuvangin Pathian chuan he nun hi duhawm taka rah chhuak tur hian keimah niah chuan a tihtur zawng zawng chu a hlen chhuak famkim tawh. Rah chhuah nun i neih leh neih loh chu nangmahah engkim a in nghat tawh a ni. 

                        Mi, Thlarau Thianghlimin a chenchilh nun neitu, rah duhawm tak taka rah thin te nunah chuan miten chawlhna an hmu thin. A nihna takah chuan heng thlarau rah chi 9 te hi mahni in haivur a kan hlimna tur leh kan lawmna tur ringawt atan chuan rah chhhuah tir theih a ni lo. Chu chu kan Pathian tum dan leh ruahman dan pawh niin a lang lo. Midang te tan a Malsawmna kan lo nih theih nan a rah chhuah tur kan ni. Heng Thlarau rah Hmangaihna te, hlimna te, remna te, dawhtheihna te, ngilneihna te, thatna te, rinawmna te, thuhnuairawlhna te leh insumtheihna te hi a rah chhuahna hmunah midang ten an hmu a, malsawmna a chang thin. Mite an hlim a,  remna te a awm theih nan, insumtheih te, thuhnuairawlh hram hram a tul hun a awm ang. Chutiang hunah chuan keimahni lam nawmna tur pawh ni lo mah se, hrehawm ti tak chung pawhin Thlarau mite chu rah  tur kan ni tawh si a.Chutiang zelin midangte tan malsawmna ni tur in  Thlarau rah chi 9 te hi keimahniah rahchhuah tir chat chat tur a famkima thuam kan ni tawh. Rah chhuah hun a rah chhuah tir thei lo thin tu Tisa erawh chu thil ti thei lo tur a khengbet zel tur kan ni.

                        Kan Lal Isua  chuan “Thing tha a piang a rah tha a,thing chhia apiang a rah chhe thin” a ti a. Chuvangin vawiin a kan ringtu nun hi eng nge ka rah chhuah dan ti a kan in enfiah  a tul hle mai. Kan ngaihdan leh ni a kan rin dan atanga thlir mai lovin; heng Thlarau rah chi 9 te hi ‘A’ nunah duhawm tak leh tha takin  a rah chhuak em? tih hi a pawimawh zawk tak chu a ni. Thing tha a piang a rah tha thin si a. Mihring hlui thihna Kraws

            “Heng hi hria ila, kan mihring hlui chu a hnenah khenbehin a awm ve ta, sual pu taksa chu tih borala a awm theih nan, tun a chinah sual bawiha kan awm lohna turin”Rom 6:6-7

            “Chutichuan mi pakhat avangin sual khawvelah alut a, sual avangin thihna alut bawk a, chutiang bawkin mi zawng zawngin thil an lo tih sual avangin thihnain mi zawng zawng a fan chhuak ta a”                                Rom 5:12

            “Lei chi in ni e, nimahsela chi hi a dak tawh chunan enginnge an tih al leh ang? Chutachinah chuan paih chhuaha, mihringte rah mai mai chauhah lo chuan engatanmah a tlak tlai lo”                                       Matthaia 5:13

            Engnge Mihring hlui tak chu? Mihring hlui ka hriat fiah phawt loh chuan a thih thu hriatfiah a har thin, Hmana ilo sual tawhna kawng hrang hrang - zuin, drugs leh ruihhlo chi hrang hrang leh nulat tlangvalna ilo tih/chen thinte kha em ni ang? Nilo, mihring thil tih hlui ani zawk. Chuvangin mihring hlui tak chu hei hi a ni, Lapan mihring a siam laiin mihring hlui a siam tel lova bawhchhiat - thing rah ei nia, mihringa setan chi lo lut ( Rom 5:12 ) hi mihring hlui chu a ni. Paula chuan a changin tisa dante a ti a, a changin sual bet tlatte a ti a, a chang leh dan danglam awm tih tein a sawi a ( Matthaia 5:13 ). He mihringa setan chi hmeichhia leh mipa duhzawnga hrin ( Tisana ) hi a piangthar thei lo, tha thei hek lo anih avangin Lalpan a khenbeh nan KRAWS alo buatsaih tawh a ni zawk. Chu kan mihring hlui sual phur bo tur chuan Lalpan kan inhlan thinna aiah a fapa min hlan zawk a ni.

            Thi chu phumin a zui thin  mihring thite, ran thite kan phum thin ang hian KRAWS a thi tawhte hi a hnenah phum vein kan awm ta. Phum tawh reng reng an lang tawh ngailo angin, Kriataa phum ini tawh. Tin, i nunah lang tut tawh suh, phum i nih tawh kha.

                       

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

            In  FUIH  TAWN

            Bible chuan ringtu te hi infuih tawn turin min chah a. Mihring te hi rilru thlak danglam mai mai thin kan ni tih hi Pathian hian a hre chiang  viau a, chumi avang pawh chu a ni a nge, ringtute infuih thar zel turin min chah reng a ni.

            Tunlai khawvel han thlir ila, khawvel finna than chak zia te, thalai te tan tunlai khawvelah Isua aia thlan tur leh a hnungzui aia nawm hmel zawk tam tak a awm a. Heitih lai hian kan zui Lal Isua duh dan leh pawmdan hi a danglam ve chuang lova, hmana a thupek kha tunah pawh a la pangngai reng si. Changkang na kawng nasa tak zawh a finna kawng tin reng zawh chunga ‘Lal Isua nen’ tih ngawt hi kan zui Isua hi a lungawi chuang hauh in a rinawm loh. Tirhkoh Paula ngei pawh mi fing leh miril nisi Isua a hmuh dawn meuh chuan a finna kawng atangin Pathian a inpuang hauh lo, a tawpah phei chuan thuhril atthlak lam a ni a buaipui tak ni. Khawvel mifing te pawh Lal Isua an hmuh dawn meuh chuan thuhril atthlak hmangin a ni, Lal Isuan a chhandam leh tho ni.

            Kan tunlai khawvel pawh hi thlir ila, thiamna leh finna san tawh zia te kan hre theuh awm e, khawvel tukverh lamah han dak ila Isua ngaihsak theih loh khawpa nuam a ni zel si a. Ringtu te kan thih ni thlenga rinawm taka Lal Isua hnung kan zui theih nan nitin a infuih thar hi kan mamawh tak zet zet tawh a. Ringtu chaklo dueh tan phei chuan khawvel nawmna lama tlan a chakawm thin si, ringtute nitin infuih thar ang u.

ARTICLE

BEIHRUAL

R.Zohmingliana

            Beihrual thla kan lo thleng leh ta reng mai a. He Beihrual kan hmanna ah hian a lo chhuah tan dan kan ngaihtuah lo thei lova. Beihrual leh Harhna tih pawh hi thil hrang daih nimahse inzawmna thuk tak an nei in, Beihrual hian a tum ber chu Harhna thlentir hi a ni awm e. Mizorama harhna ropui leh tuam zau ber kum 1919 a lo thleng pawh hi Beihrual hman zui zel rawtna leh a thiltumte tihhlawhtling tura lo thleng liau liau a ni a tih theih hial a ni.

            Mizoram hi Presbytery pakhat a kan awm lai chuan kum khatah Presbytery inkhawmpui vawihnih hman thin a ni a. Kum 1918 a inkhawmpui hmasa zawk March thla a, Aizawla neih chuan June thla a Beihrual neih a rawt angin hemi thla hian thla chawhma lam chuan mahni intih chakna atan leh thla chawhnu lam chuan ringlo te ringtu a siam turin hma an la a. Tin, hemi kum vek October thla a Champhai Hmunhmeltha a Presbytery inkhawmpui neih leh chuan Beihrual chu 1919 September thla a hman zui leh an rel thlu leh ta a ni. A thupui atan chuan Mizo zawng zawng kum 10 chhunga Kristian a siam vek tura hmalak nise tih an relthlu ta a ni. He an Beihrual hman chhan tur hi Pathian malsawm tlak PROJECT a lo ni a ni ang chu- a tihlawhtling tur hiah Harhna tum thumna chu kum 1919 ah Hmunhmeltha atang a rawn in tan chhuakin a lo thleng ta nghal a. Hemi tum a Harhna chang te hian Zoram pum pui chu he harhna hian a chilchhuak ngei dawnin an hria a, an hmanhmawh em em mai a. A zan a zanin khaw thenawmte an chil nghal zel mai a. Pawl ang a awm in FANGRUAL an lo in din chhuak a, khuang nen khaw hrang hrang an fang a. An kalna apiangah harhna chu lo thleng nghal zelin an hlim em em zel mai thin a ni. Hetah tang hian Biak In ah khuang an hmang tan ta nghal a ni. He harhna avang hian Kristian pawh an lo pung chak ta em em mai a ni. Tin, hla phuah thiam an lo chhuak in Kalvari tuarna lam leh Vanram ngaih hla tam tak an rawn phuah chhuah phah ta a ni.

            Hei le kan ramah pawh Beihrual chu kan lo hmang leh tan ta in kan kohhranah pawh thupui siamsa angin kan lo hmang chho leh dawn a ni a. He kan hman dan tur hi i han in ngaihtuah chiang teh ang. Beihrual thupui Synod rawn ruahmante tlingtlakna atan mai nge kan hman dawn Beihrual thupui hlawhtlinna atan thinlung leh tihtakzeta Pathian Thlarau Thianghlim tanpuina nen a hman kan tum tih hi mahni theuhah in enfiah a va pawimawh em!!

            He Beihrual thupui hlawhtlinna atan hian mahni in phatin, thinlung leh tihtakzet in leh Thlarau Thianghlim tanpuina beisei reng chungin hman tum tlang theuh ila chuan a hlawhtlinna turin Harhna chu kan chang ngei ngei ang a, Biakinah pawh hlim takin kan inkhawmin, phur takin kan fehchhuak ang a, mahni inchhung theuhah Kristian chhungkua kan din thar theih phah hial in a rinawm a ni.

           Chuvangin kan thiltih kawng hrang hrang te hi Pathian malsawm tlak in kan ruahman em tih hi in enfiah fo ila. Harhna te pawh hi Biakin leh lenkhawmna a hlim taka  min lamtirtu tur atan chauh a hmang lovin kawng dik min zawh tir tur leh midangte tan a min nun tirtu tur atan a hman i tum tawh zawk ang u.

RIMAWI (Music)

GOSPEL  MUSIC  IN  TAN  DAN.

            Gospel Music danglamna nia an sawi chu a  ri a ngaihnawmna leh mawina piah lamah ngaithlatute thinlung a khawih dan mak tak mai hi a ni. Zaipawl mawi tak mai an nghing dual dual emaw mi pali, pathum, pakhat zai chauh pawh ni se, gospel music chu ngaihthlak tur leh a thlarau hmuh tur a awm tlat hi a music danglam a nihna chu a ni.

            Thomas A. Dorsey hi Pastor fapa a ni a, talent nei tha em em mai niin a lo pian lai vel a Blues singer lar em em mai Bessie Smith leh Ma Rainey te pianoist niin blues music ropui tak tak a rawn phuah chhuak a. A hla style danglam tak avang chuan Biak In a kal a thulh ngai lova, a Pathian rinna kawngah a ti chaklo phah chuang hauh lo. Tumkhat chu a inkhawm na a Charles Albert Tindley, Methodist Pastor hla phuah an sak chuan a rilru a hneh hle mai a. Heta tang hian Dorsey a chuan Pathian hla lam a phuah tan ta a ni. Music style hrang hrang in a hlaphuah chu an chawhpawlh kual vel ta a, chutah Kohhran hruaitu lam chuan ‘Setana Music’ tiin an ngaihhlut sak ta vak lo tlat mai. Kohhran ho chuan ngaihthlak serh ah hial an lo nei ta. Kum 1970 bawr chho vel khan rock music Kristian music a seng luh lam an lo intan chho ta a. A hun laia mite chuan an duh vak lo mai bakah mite chuan an hlut ngam chiah lo bawk a, mahsela hun a lo kal zel a Gospel music bul fuk taka lo in tanna “Father of gospel music” tiin hriat reng a hlawh zui ta zawk a ni. Kum 1993 khan kum 60 mi niin a Lalpa hnenah musician ropui lehzual ni turin a chawl ta a ni. Hla ropui tak tak 400 chuang lai a phuah a. Mizo ten kan hriat awlsam theih dan tur chu, Kristian Hla Bu No. 146-na  “A hmangaihna fakin i zai ang” tih hi a kutchhuak zinga mi a ni nghe nghe.

MUSIC  CHI  HRANG  HRANG

1. Folk Music              2. Classical Music

3. Jazz music               4. Ragtime

5. Calypso                   6. Country music leh Hill-Billy music ( Kum 1930 hmalam chuan country music hi Hill-Billy music an ti thin.

7. Bluegrass music      8. Blues music

9. Soul music               10. R & B (Rhythm and Blues)

11. Funk                      12. Reggae

13. Rock ‘N’ Roll leh Rock music: He music ah hian style chi hrang 14 aia tam mah a awm awm e.

14.Hip Hop                 15. Dance music

16. New wave music   17. Rap

18. Grime       

            Hengte hi khawvel a music style hrang hrang tlanglawn deuh deuh te a ni a. Music hi art a nih avangin music style thar pawh a piang reng thei tih hriat a tha awm e.

BIBLE QIUZ NO. 36

I SAMUELA BUNG 11-15

A Kâr âwl dah khat rawh :

Q1.Chutichuan an mi tirhte chuan Saula awmna khua ................. chu an lo thleng a, mipuite beng hriatah chuan chung thu chu an sawi a; tin, mipuite chuan an aw an chhuah a,

an tap a,

Q2.Tin, anni chuan, “Min  bum ngai lo va, min tiduhdah ngai hek lo, tuma kut atangin ................. awm loh i la ngai hek lo,” an ti a.

Q3. Tin, Israel-ho zawng zawngte chuan, Saula chuan Philistia ral vengtu sipaihote a bei tih leh Israel-hote pawh ................................... mite huat an phur ani tih thute an lo hre ta a.

Q4.Hei hi a chungchâng thu LALPAN a sawi chu a ni: ...................... fanu nula chuan a hmusit chia, a nuihzatbur che; Jerusalem fanu chuan a lu a thin khum che.

A bung leh Châng dah rawh :

Q1.Tin, Samuela chuan mpui hnênah chuan, “Mosia leh Arona ruattu leh Aigupta ram ata in pute hruai chhuaktu LALPA chu a ni asin.

Bung: ...............          Chang: ....................

Q2. Hebrai mi thenkhatte chu Jorda ralah Gad leh Gilead ramahte an tlan a; Saula erawh chu Gilgal-ah a la awm reng a, mipuite chuan khur zawih zawih chungin an zui a.

Bung: ................         Chang: ....................

Q3. Chutichuan Jonathana chuan, “hawh teh, an hneah sawn kan va kal kai ang a, kan va inlan ang a.

Bung: ................         Chang: ...................

Q4.Tin, Amalek mite lal Agaga chu a nungin a man a, mipui zawng zawngte chu khandaihin a sat hlum vek a.

Bung: ................         Chang: ....................

Hming : ......................................................

Section : .....................................................

BIBLE QUIZ  NO. 35 RESULT

Chhanna lut zawng zawng : 0

Chhang dik vek : 0

Lawmman dawngtu : Awmlo

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni

HLIMEN  PASTOR  BIAL

NPSS  INKHAWMPUI  PROGRAMME

            Primary, Junior leh Intermediate & Sacrament depatrment te hi bus a kal a ngaih dawn avangin zing dar 9:00am ah Sunday School hall ah kim vek tur a ni a. Nu leh pa ten kan fa te lo hriatpui ila a tha ang nge.

A hun: Sept. 2, 2012

Primary Dept.: Hlimen Kohhran Biak In

Chairman: Upa Lalsangzuala

Tantu: Pu Zolianchhunga, Hlimen

Chawhnu Inkhawm Dar 1:00

Chairman: Upa Lalsangzuala

Thuchah tawi: Upa Lalzuiliana,Skk

Result puan leh lawmman sem: Upa Lalsangzuala

Junior Dept.: Hlimen Vengthar Kohhran Biak In

Chairman: T.Upa K.Lalnunthanga

Tantu: Pi Nunfeldiki, Vengthar

Chawhnu Inkhawm Dar 1:00

Chairman: T.Upa K.Lalnunthanga

Thuchah tawi: Upa C. Zothanliana, Bial Treasurer.

Result puan leh lawmman sem: T.Upa K.Lalnunthanga

Inter & Sacrament Dept.: Hlimen Damveng Kohhran Biak In

Chairman: Upa Zairemthanga

Tantu: Nl. Lalmuanpuii, Damveng

Chawhnu Inkhawm Dar 1:00

Chairman: Upa Zairemthanga

Thuchah tawi: Upa H. Vanlalrenga

Result puan leh lawmman sem: Upa Zairemthanga

TAWNGTAI  TLAIVAR

            Ni 27.8.2012 (Thawhtan) zan khan kan veng KTP te chuan tawngtai tlaivar na hun an hmang a. Mi 30 chuangin he hun hi an hmang a. Mahni inhlanthar na te, sual thupha chawina te nei in hemi hun hmang ten an hlawkpui hle a ni.

            He hun hi CKTP lam in Programme an rawn duang a, kan veng  KTP chuan an rawn duan sa ang thlap lo deuh in Session li ah then in tawngtaina hun hi hman a ni.

LOCAL  COUNCIL  ATANGA  HRIATTIRNA

            Kan veng chhuah lam Pu Liantluanga (V.sec) te kawmthlang atanga hnai te ah Zawng maltla a awm a, a hrechiang deuh phei chuan a tet lai atanga awm tawh niin an sawi nghe nghe. Vengchhung mipui te a ti na zawng leh a hnawt bo zawnga che lova humhalh zawk tura hriattir kan ni e. Lo kap emaw ti hlum emaw an awm chuan dan anga hrem tur an ni ang.

MI  CHHUANAWM

            Tunlai lehkhabu ngaihnawm  leh hralh tla tak “Mizo Mi Chak Te” tih lehkhabu K.C Vanlalruata a ziah ah kan veng pa Sub. Zahlira chu a chanchin tarlan a ni a. Amah in mual min liamsan tawh mahsela hetiang mi, Zoram hriat khawp Saikhamakawn in kan nei hi a chhuanawm takzet a ni.

            Tam zawkin kan hriat theih dan tur chuan Pu C.Vanlalsanga (V.Sec) pa hi a ni a. He lehkhabu hi lei ve ngei tum theuh ila a tha awm e.

THU  ROTLING

** Inhmangaihna hi chhungkuaah a in tan a, dikna erawh chu thenawmteah.

Charlies Dickens

TUALCHHUNG

,Pu Lalbiakkima f/o Lalduhsaka (V.sec) chu damlohna avangin Hospeace, Durtlangah enkawl mek a ni.

,Pi Chuauziki w/o Pu Sangpuia (Ch.sec) chu damlona avangin Synod Hospital ah enkawl mek a ni.

,Pi Darringaia w/o Pu Nunsanga (V.sec) chu damlohna avangin Civil Hospital ah enkawl mek a ni.

,Lalhriatpuia s/o Lalramnghaki (Ch.sec) chu damlohna avanga Civil Hospital a enkawl a nih hnuin dam takin a lo chhuak ta.

KEIMAHNI  LAM

            Kan Cyclostyle a chhiat avang  leh a part a lo la thlen mai theih loh avangin Offset thin  a ni a. Offiset a kan tih hian Zirtawpni zanah chhut a ngai a, hei vang hian kan tualchhung news thenkhat diklo palh a awm theih ta thin, chhiartu lam te in mi hriatthiam na kan ngen e.

            Mipui Aw la ve si, regular taka hmu lo te kan lo awm palh thei a, hetiang hi kan awm a nih chuan Editorial hnenah emaw, KTP hruaitu te hnenah in hriattir nise a lawmawm ngawt ang.

            Vengchhung mipui te kan vengchhung tana tangkai leh mahni lunglen zawng thu te, hriatzauna lam thil (General Knowledge) te, thuthar kan hriat tlan atana pawimawh leh midangte tangkaipui theih tur thu rawn thawh turin kan in chahin kan in sawm a ni e.

ZANIN  EPL  INKHEL TURTE

Liverpool     Vrs       Arsenal 6:00

Newcastle        Vrs       A. Villa 8:30

Southmapton   Vrs      Man.Utd 8:30

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300