Mipui Aw 13.5.2012

MIPUI AW

Vol. XVIII Issue No. 20 Kristian Thalai  Pawl  Saikhamakawn Branch  Pathianni Dt.13.5.2012

VAWIIN CHANG VAWN

          Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan.Khawvel thiam loh chantir turin Pathianin a Fa khawvelah a tir lo, khawvel amah avanga an dam theihna turin a tir a ni zawk e.

KOHHRAN PROGRAMME

13. 5. 2012 (Pathianni)

Chawhma S.S inkhawm

Tantu          : Pi Lalhmangaihi

Chawhnu

Thusawitu  : Upa Zonunmawia

Zan Inkhawm

Thusawitu  : Upa C.Lalmuankima

KTP PROGRAMME

 Dt. 14 .5. 11 (Thawhtan zan)

Neihthil Thehkhawm

A hmun          : S.S. Hall

Hruaitu         : Upa Zonunmawia

Tantu             :Tv.Benjamin Lalduhsaka

            May thla chhunga Inkhawm leh Fellowship zai hruaitu leh musician turte.

Hla hruaitu   : Tv. Pc Vanlalhriatpuia

turte                 Tv. Lalhmangaihzuala

Musician       :Pu Lalduhkima

                          Tv. Zomuanpuia

VAWIIN  TLAI   FELLOWSHIP

A hmun :  S.S Hall

Hruaitu      : Pu Jeff Lalhmingsanga

Tantu       : Tv. C. Lallawmawma

KOHHRAN  HMEICHHIA  PROGRAMME

Ni 15.5.2012  (Thawhleh Zan)

            Kohhran Hmeichhia te Hlimen Bial pumah Kristian chungkaw puala hun hman tur a nih avngin hemi zan hian a hranpain inkhawm a awm lovang.

SERMON

PATHIAN RAM

 (Marka 1:14-15, Luka 17:20-21)                  -Vanlalfala

            Pathian ram chu lo thleng tawh leh thleng mek, la famkim tur leh a vawrtawp la thleng tur a ni a. Tun tumah chuan lo thleng tawh leh thleng mek a nih thu kan sawi dawn a ni.

            Khawvela Isua lokal chhan leh a thu rawn ken ber chu Pathian ram thu a ni a, Pathian ram thu a zirtir a, Pathian ram rawng a bawl thin a ni. Mita hmuh theih ni lo mahse, Isuan a thiltih leh a thusawiah lo thleng tawh leh  thleng mek a ni tih a tilang thin. Ramhuai a hnawhchhuah leh damlo a tihdam te kha Pathian ram alo thleng tih entirtu a ni (Luka 11:20, Mat 12:28). Pathian ram  tih chu Hebrai tawngin Malkuth, Aramiak tawngin Malkutha, Greek tawngin Basileia, Saptawngin Kingdom tih te a ni a. Lalna, Lalzia emaw rorelna tia lehlin theih a ni. Pathian ram chu mihring chhunga Pathianin Lalna leh thuneihna a chan pumhlumna hmun, hmangaihna a rorelna, mihring leh thilsiam dangte pawh lungruala awm ho theihna, mi rethei leh hausate pawn awmho theihna hmun a ni. Pathian miten khawiah pawh Pathianin ti tura a duh an tihna hmun hi a ni a, chu chu midangte rawngbawl sak leh chanchin tha puan darh hi a ni. Pathian ramin a kawh ber chu Pathianin Lalber a nihzia a tarlanna leh Thuneitu sang ber a nihna dinhmun hi a ni.

            Lal Isuan rawng a bawl tantirha; hun chu a thleng ta a tih khan he Pathian ram, hun lawmawm, hun tha leh Mesia hun hi a thleng ta a tihna a ni. Isua hnung kan zui a, A rawng kan bawlna kawngah te, kan nitin khawsakna, kan eizawnna kawngahte leh mihring kan nih phunga kan khawsak honaah te hian kan chhungah ngei hun he Pathian ram hi a thleng em? tih kan in zawh thar theuh ava hun ta em! Kan nunah Pathian aia lal leh thuneitu rawngbawltute ngei pawh hian kan lo kawl fur mai lo maw? Sual leh a thiltih theihna zawng zawng hneh anih tawh lai a, chu sual avanga kan nun bet leh tlawk tlawk mai thin te hi inngaituah chian ava hun ta em.

            Pathian ram hi mihringin theih tawp a chhuah avanga lo thleng leh thang lian a ni lova, Pathian thawh vek a ni.A hmanrua atan erawh mihringte a hmang thin. Chhunglam a fan chhuak a, pawnlam hmuhtheihah a thang lian a ni. Isua thawhlehnaah te, Pentikos nia thil thlengah te leh Kohhran lo piang chhuak taah te hian hmuh theih Pathian ram chu a lo lang a ni. Isua thawhlehnaah sual dana nung mihringte nun thar Krista kan nei a, kan chak lohnaah te min pui a, min ti thianghlimtu Thlarau Thianghlim neiin, Kohhranah a kotu koh chhan ti hlawhtling turin min awm tir thin. Heng hi kan la changlo anih chuan Pathian ram chang turin Pathian hnenah ngei i kir ang u. A thlen mek laia  kan chan loh chuan a famkimna thlen huna chan thar chi a ni si lo. 

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

                        Tunlai Mizoram chanchin kan chhiar leh kan ngaihthlak chuan thil hriat nuamlo leh rapthlak tak tak kan chhiarin kan hre ta fo mai. A  then in Bible an lo hal thul. Heng chhiatna leh sualna lo pung chho tan ta vak mai hi, enge a chhan ni ang le? Bible in hunhnunga sualna a pun tur thu a sawi te kha a thleng dik chho tan ta mai em ni ang tiin a ngaihtuah theih awm e.

            Naupang rilru thianghlim zawk kan tih te pawhin sualna rapthlak tak tak an khawih tan ta mek zel a. Nu leh pa te thiamloh nge ni ang. A bul thumah chuan inchhung khura inenkawlna a that tawk loh vang chu a ni ngei mai. Tin, tunlai a P.C. Games hrang hranga tharum thawhna lam chi an khelh nasat lutuk vang te pawh a ni ang. Heng ang chiah te hian kan fa te kaihhruai thiam a pawimawh khawp mai.

            Kan tunlai hunah kan hriat loh laia min tichhetu lian tak chu Mobile Phone hi a ni bawk awm e. Kan neih phak baka tha neih kan tum a, naupangte te pawhin mahni pualin an nei fur hlawm a, heng hian zirna kawngah te leh nun kawng diklo zawh turin mihring a hruai awlsam em em ani tih hriat tel a tha bawk awm e.

            Sualna hi a pung zel dawn a, sual thiltihtheihna pung zel mahsela nang leh i chhungkuate Pathianah chuah hruai thei turin chhungkaw hotu leh luberte mawhphurna a sang hle a, Pathian rawn chunga kal a tul hle a ni.

ARTICLE

ENG KAWNG NGE?

            Vartianah ka tho a,  ka mamawh tur zan lama ka peih fel vek tawh chu ka en kual leh that that a. Thingpuisenhang in zawha kal mai chu ka duh a. Ka chhung te pawh chuan min thlah tumin an rawn tho chhuak ve hlawm bawk a. Ka mamawh leh ka tla tawk tur chu alo thahnem ve fe mai lehnghal a. Ipte lian mangkheng puar luah khawpa bek muk chu patling tan pawh a rit ngei mai. Ka kawng zawh tur lam chu ka ngaihtuah a, a thui nangiang mai lehnghal a. Khawvar chian hma deuh chuan Hmehen(Torchlight) tha tawktak nen chuan kan in leh ka chhungte chu ka chhuahsan ta a. Lung chu a leng ve duh phian mai, mahse ka kal na tur lam chuan min hneh a, ka kal chakna chuan min thunun tlat zawk avangin lunglen vanga kir leh chu hnaisailo tak a ni ringawt mai.

            Chhaktiangah ni a lo chhuak a, a mawi hle mai. Rilru ati hlim a. Ka phur em avang chuan hah pawh hrelovin ka kal nghat nghat mai. Nisa tihtham a la nih loh avang nge a boruak a nawm em vang, zing thlifim chuan min rawn chhem heuh heuh a, ka mur sung sung hial a. A vawt lova, a lum hek lo. A  nuam thlawt a ni. Ka sawi tak ang khan ka phur hle ringawt mai a ni.

            Tukthuan ei a lo hun a, tui takin ka eitur pai te chuan ka in hnawhpuar a. Fehrehsan a lo ni leh a, ni pawh a tlangsang tawh fu mai. Khua chu a tha nangiang lehnghal. Chhum hmuh tur a awm lova, sava han thlawk a han chiar nak nak pawh zinglam ang kha chuan hriat tur a awm tawh lo. Ni alo tlangsang zel a, nisa leh thal khaw rorum tak chuan min ti chau ta tan hle mai a. Ka tuihal lutuk chu ka tuipai tlem chu kan in sek a, dangro zualpui chu a fah ve deuh. A chang leh nisa lutuk avang chuan ka tlu leh khut thin a. Kan in nuam tak a haw leh te ka chak rum rum ta mai. Ka phurna a reh zo vek a, mihringin hreawm a tih ang hi chu ka tuar vek niin ka hria. Ka kawng zawng chu zawh tluan loh mai ka chak ta. Mahse mipa in ka tih tawh chu ka ti tlang ang, thih leh thih tiin tumruh leh inti chhel chawpin ka kal leh ta bauh bauh a. A chhuk chho phian lehnghal.

            Zan a lo ni a, thim thuneihna lalpa chuan a tirkohte rawn tirin kawng hrang hrangin kir leh tir min tum ni awm fahran hian, thawm mak pui pui a rawn chhuah a. Ka hlauin ka kimki nangiang mai. Mahse he zan hunah tak hian huaisenna a pawimawh hle mai. Huaisenna nen ka eng neih chhun chu kengin ka hmalam chu ka pan zel a. Hlau chung chunga zawh zel chu ni ila chuan ka kir leh ngei ang. Nimahsela huaisenna avang chauhin chu zan rapthlaktak chu ka paltlang ve leh ta hram a ni.

            Chumi thu ka sawi mek lai chuan ka dinglam a mi chuan “Engkawng nge i zawh a?” tiin min rawn zawt a. Keichuan “Ele, Hlawhtlinna kawng mawle. Kan tum ram thleng tura hlawhtling na kawng a nih hi ka sawi” tiin ka chhang a. Zing lamah khi chuan boruak a nuamin ka la phur em em a, kal pawh ala nuam hle a. Hun alo kal deuh a, ni a lo tlangsanga chumi hunah chuan tawrhchhelna te, tih hram hram peihna te a ngai tan a, kir leh chakna hial pawh a awm nasa  thin. Zan hun a lo thleng leh a chutah chuan mite hlawhchhamna avanga dawih mai lovin huaisenna nen kal a lo ngai leh thin. Heng zawng zawng hi paltlang lo chuan hlawhtlinna hi a awm tak tak theilo a ni tih hi hriat a tha, tiin ka sawi chhunzawm a.

HRISELNA  HUANG

ZU  HIAN  CANCER  THLEN  THEI  EM?

            Zu hian thin lam natna a thlen thei tih chu kan hre theuh tawh awm e. A bikin zunthlum vei leh lunglam thalo te tan zu in hian a nghawng thui thei hle tih pawh kan hre theuh awm e. Amaherawhchu, zu hian cancer natna a thlen ve thei tih erawh tamtak chuan kan hre lo mai thei a ni. Mizo zingah a ni tela cancer vei an pun zel avangin cancer leh zu inzawmna hi kan hriatchian a pawimawh hle a ni.

1.         Mi thiamte zir dan chuan zu in thin ho hian zu in ngai lote aiin cancer an vei awl zawk a. Hnute cancer, chawkawng, ka chhung, hrawk, pumpui leh ril cancer an vei hma bik a ni.

2.         Zirchianna pakhatah chuan meizial zu a, zu in thin bawk tan chuan ka leh lei cancer vei a awl em em a. Zu leh vaihlo kaihhnawih thil hmanpawlh hi cancer thlentu hluar tak a ni.

3.         Zu in thin mite hian meizial an zuk reng rengin a let 15 in cancer an vei awlsam zawk a ni. Meizial khu han hip luh hian ka chhung leh hrawkah meiziala chemical chi hrang hrang kha a bet a, chutah zu an han in leh chiah khan, khang chemical thalo zawng zawngte kha taksa hmun hrang hrangah a lo darh ta thin a ni.

4.         Ngaihruatna pakhatah chuan zu in thinte chu, an thin (liver) hian zu ken tel thil thalo a lo paih char char a, chuvangin an taksaa thil thalo dang (vaihlo leh thildangte) paih chhuak turin hun a neilo tiin an sawi thin a ni.

5.         Zu hian taksaa ralvengtu (immune system) kha a ti chau thin a. Kan immune system chu cancer veilohna tura min humhimtu pawimawh tak a ni.

6.         Zu ngawlveite hian tlakchham (malnutrition) an nei a, protein, mineral leh vitamin te hi an taksain a tlakchham avangin cancer insiamtheihna lakah a inveng zo lo thin a ni.

               

            Hriatreng atana tha chu eng zu pawh nise, cancer vei theihna chance chu a ngai reng a ni. Eng anga thianghlim leh uluka siam pawh nise, a danglam bikna a awm chuang lo a ni.

(Source : Hriselna Huang Monthly Magazine)

BIBLE QIUZ NO. 20

I LALTE BUNG 18-22

A Kâr âwl dah khat rawh :

Q1. Nimahsela Israel ramah hian .................... hmaa la thingthi ngai lo leh, la fawp ngai lo mi ................... ka tan ka hum dâwn a ni,” a ti a.

Q2.Chutichuan ram fan chauh tûr an insem a: ..................... chu amahin kawng danga a kal a, tin,           ......................... chu amahin kawng dangah a kal a.

Q3. Tin, .............................. a hnêna mi a tir leh a, “Ka hnung zuitute zawng zawng hian Samari khaw vaivut vei khat theuh pawh an hmuh theih dâwn chuan pathianten an ti tihin mi ti sela, chu aia nasa pawhin,” a ti a.

Q4.Tin, ani chuan, ........................ zawng zawngte chu vêngtu nei lo ....................... angintlângahte an darh vek ka hmu a; LALPAN, ‘Hengho hian hotu an nei ta lo va, mi tin, mahni in lamah thlamuang takin haw dial mai rawh se,’ a ti a ni,” a ti a.

A bung leh Châng dah rawh :

Q1.Tichuan Elijan mipuite hnênah chuan, “LALPA zâwlnei la awm chu keimah chauh hi ka ni a; Baala zâwlneite eaw chu mi 450 an ni a.

Bung: ...............          Chang: ....................

Q2. Tin, Ahaban Nabotha a thi ta tih a hriatin heti hi a ni a, Jezreel mi Nabotha grêp huan nei tûra thawk thla tûrin Ahaba chu a tho ta a.

Bung: ................         Chang: ....................

Q3. Tin, ngai teh, zâwlnei pakhat hian Israel lal Ahaba a va hnaih a, “LALPAN  heti hian a ti: ‘Heng mipui tam tak hi i hmu em? Ngai teh, vawiinah hian i kutah ka pe dâwn a ni; tichuan kei hi LALPA chu ka ni ti i hria ang,’ tiin,” a ti a.

Bung: ................         Chang: ...................

Q4.Tin, ani chuan, “Va chhuak la, tlângah sawn LALPA hmaah va ding rawh,” a ti a. Tin, ngai teh, LALPA a lo kal a, thlipui na takin tlangte chu LALPA hmaan chuan a rawn chem khi a, lungpuite ch a phel rem rum a; nimahsela thli-ah chuan LALPA ch a awm lo: tin thli tleh zawng chuan lir a lo nghing a; nimahsela lirnghinga chuan lalpa chu a awm lo.

Bung: ................         Chang: ....................

Hming : ......................................................

Section : .....................................................

BIBLE QUIZ  NO. 19 RESULT

Chhanna lut zawng zawng              : 0

Chhang dik vek                                : 0

Lawmman dawngtu                          : Awm lo.

            Bible Quiz  leh lawmman hi Cir. Manager Pu.C Lalnunsanga hnenah thehluh a, lam thin tur a ni

KRISTIAN CHHUNGKAW ZAN HMANG DAWN

            Bial inkhawmpui thurel bawh zuiin ni 15.5.2012 (thawhleh) zan dar 7-8 inkarah Hlimen Pastor chhunga Kohhran hrang hrangah Kristian Chhungkaw zan hman tur a ni a. Tualchhung Kohhran chhungtinte he hun hi hlawk taka hman tum theuh nise. He hun hman chhung hian tumah inlen pawh a, mobile hmanga inbe pawp lo tura ngen kan ni. Chhungkuain kan hlawk pui thei dan tur ang bera hman tur a ni e.

LAWMTHU SAWINA

            Kan fapa te dt. 4.5.2012 a Saikhamakawn daia motor (Alto)-a accident an tawh chungchangah Saikhamakawn vengchhung mipuiten min buaipuina zawng zawngah lawmthu kan sawi a. Mimal tinte hnenah lawmthu kan sawi seng lova. Hei hi kan lawmthu sawinaah min lo pawmsak turin kan ngen a che u.

Muanpuia te nupa

Thakthingtlang, Aizawl

OPEN SCHOOL CENTER THARjb

            Govt. of India Ministry of Human Resource Development hnuaia NIOS chuan study Center thar No. 300018 leh Exam Centre nihna min pe a, Class X leh XII admission a tih theih nghal e, HSLC/ HSSLC fail-te tan October, 2012 exam turin a in admit theih bawk e.

Class:-

GEORGE MEMORIAL SCHOOL

KULIKAWN BIAK IN BUL. (Morning )

Ph 9862095669

Sd/

Co-ordinator

PAVALAI  PROGRAMME

A hmun : Senior Hall

A hun : 17.5.2012 (Ninga Zan)

Hruaitu : Pu Lalchhuansanga

Tantu : Pu Rinngaihzuala

            Tawngtai rual leh rilru sawia hun hman tur a ni.

THLALAK CHI HRANG HRANG DUH TAN

            Upa Denghluma Group chuan group inhlawh nan thlalak chi hrang hrang passport size atanga chhungkaw thlalak thlengin an siam thei reng a, hetiang tiduh kan awm anih chuan ahnuaia mite hnenah hian inhriattir theih a ni e.

Pu C.Lalnunsanga

9612413287

Tv. Malsawmzuala

9612151984

WALLET BO

            Pu C.Zakhuma in (C.P.Road) leh Tlangnuam Field inkarah ka wallet ka ti bova, alo hmu leh chhar kan awm anih chuan khawngaihtakin a hnuaia Phone Number-ah hian min rawn hriattir thei ula ka lawm hle ang.

9612413287

VAWIIN KHAWCHIN

A lum lai berin : 320 C

A vawh lai berin : 210 C

   Zing lamah khua atha anga, chawhnu lamah ruah 6mm a tla ang a, zan lamah 10mm a tla bawk ang.

Source : Weatherforecast.com

Mipui Aw lam atanga ngaihdam dilna

* Mipui Aw chanchinbu herna Cyclostyle a chiangkuan loh avangin Mipui Aw chhuak hmasa lam leh vawiin Issue a fiah thei lova, khawngaiha min lo hrethiam turin mipuite kan inngen e. Cyclostyle hi siam tir tum mek a ni e.

TUALCHHUNG

,Pi Lalthanzami w/o P.Vanlalruata (Ch.sec) chu damlohna avangin Synod Hospital, Durtlangah enkawl anih hnuin alo chhuak.

,Nl.K.lalmuanpuii d/o Kapliana (T.Sec) chu damlohna avangin Synod Hospital, Durtlangah enkawl  a nih hnuin  a lo chhuak.

,Pu Zohmangaiha h/o Chhungi (Ch.sec) te chuan khawi ilo vahvel nan Bike (R-15) thar an lei.

TUALCHHUNG  ATANGA H.S.S.L.C.  PASS  THAR KAN HRIAT BELHTE

1.Jony M.S.Zela        - II

S/o C.Hualhnuna

2.Lalnunmawii          - III

D/o F.Lalhmachhuana

Zanin inkhel turte (EPL):

Chelsea Vs Blackburn

Everton Vs N.Castle

Man.City Vs QPR

Norwitch Vs Aston Villa

Stoke Vs Bolton

Sunderland Vs Man.Utd

Swansea Vs Liverpool

Tottenham Vs Fulham

West Brom Vs Arsenal

Wigan Vs Wolve

Table:            P    Gd   Pts

Man.City        37   63   86

Man.Utd         37   55   86

Arsenal          37   24   67

Tottenham     37   23   66

N.Castle         37   7     65

Religation zone:

QPR                37  -22  37

Bolton                        37  -31  35

Blackburn      37  -29  31

Wolve                        37  -41  25

            Zanin hi English Premier League Season khelh tawp zan a ni a, a rualin zan dar 7:30-ah khelh vek a ni ang.

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300

Mipui Aw 6.5.2012

MIPUI AW

Vol. XVIII Issue No. 19 Kristian Thalai  Pawl  Saikhamakawn Branch  Pathianni Dt.6.5.2012

VAWIIN CHANG VAWN

            Chutichuan, Krista hnenah kaihthawhin in awm ve tawh chuan chung lam, Pathian ding lama thu Krista awmnaa thil awmte chu zawng rawh u. Chung lama thil awmahte chuan in rilru nghat tlat rawh u, leia thil awmahte chuan nghat lovin.

KOHHRAN PROGRAMME

6. 5. 2012 (Pathianni)

Chawhma S.S inkhawm

Tantu          : Pi Zothanmawii

Chawhnu

Thusawitu  : Upa Zairemthanga

Zan Inkhawm

Thusawitu  : Pu Siamliana

KTP PROGRAMME

 Dt. 7 .5. 11 (Thawhtan zan)

Short Sermon Inkhawm

Hruaitu         : Nl.V.Lalrindiki

Tantu             : Nl.Lalrinliani

Thu sawitu    :Tv. F.Laldingliana

turte               Nl. Zohmingmawii

Thilpek lakk            :Nl. Lalnunpuii Hrahsel

hawmtu turte Nl. C.Zoduhawmi

            February thla chhunga Inkhawm leh Fellowship zai hruaitu leh musician turte.

Hla hruaitu   : Tv. Pc Vanlalhriatpuia

turte                 Tv. Lalhmangaihzuala

Musician       :Pu Lalduhkima

                          Tv. Zomuanpuia

VAWIIN  TLAI   FELLOWSHIP

A hmun    : S.S Hall

Hruaitu      : Nl. CVL Biakzuali

Tantu       : Nl. Pinky Lalparmawii

KOHHRAN  HMEICHHIA  PROGRAMME

Ni 8.5.2012  (Thawhleh Zan)

            Kohhran Hmeichhia te Kristian chungkaw puala hun hman tur a ni.

SERMON

THLARAU TUIPUI

            Tin, chumi chuan tehna hrui kengin chhak lam hawia kalin tawng sângkhat a teh a; tin, tui chu mi dai kaitîr a, kheimit thleng a ni a. Tin, tawng sângkhat a teh leh a, tui chu mi dai kaitîr leh a, tui chu khup thleng a ni a, tin, tawng sângkhat a teh leh a, mi dai kaitîr leh a, tui chu kawng thleng a ni a. Tin, tawng sângkhat a teh leh a, tin, ka dai kai rual loh, luipui a lo ni ta a, tui chu a lo sâng zel a, a dai a dai kai rual loh, ahleuha hleuh tham luipui a lo ni ta si a.                                                     Ezekiela 47 2:5

            Tirhkoh Paula chuan ringtute chu kan thlen chin atanga hma sawn zel tur kan nih thu min hrilh a, amaherawhchu hma kan sawnna kawngah hian kan ke pen chin leh kan thlen chin zelah hian kan dinhmun hi kan inchhut fo a tul awm e.

            Kan pianthar tirh chuan thil reng reng mai hi a nuamin ka tui thin a, mahse hun alo rei deuh a, hrehawmnain min han tlakbuak tan a, kan thlarau dai chin chu khup thleng vel alo nih chuan klan la paltlang thei a, kan ke pen erawhchu a sak tan tawh thin. He hunah hi chuan mihring kan muangchang a, mahse kan tih tur leh rawngbawlna kan la hlen tha khawp mai.

            Hun alo rei leh deuh a, chu thlarau tuipui chu kawng thlenga dai alo ngai ta a, thil tih reng reng hi hmalam pan a har em em vek mai hi alo ni a, nun te hi alo beidawngin khawi lam nge a thuk lohna lai? luipui daikai awlsamna lai tiin kan van ruai a, daikai turin hun pawh kan duh rei a, a chhan chu thil awlsam kan zawn thin vang a ni. Amaherawhchu a awlsam alo awm lova, kan dai kai tho alo ngai thin.

            Chumi zawhah chuan daikai rual loh thlarau luipui tak takah chuan kan luh alo ngai a, hetah hi chuan inpumpekna tak tak alo ngai ta, a pumpuia inpe tan lo chuan daikai rual a ni tawh lo. He mi piah lamah hian chu tuipui chu i hmuh thei rengin alo sang zel ang a, a hleuha i hleuh hial alo ngai ta! Tin, he tuipui hleuh ngaiah hian i zuang luh tawh chuan kir leh pawh harsa tak a ni. Chumai bakah he hmun hi chu tlakhlum theihna a ni a, ringtu tam tak pawh an lo tlahlum fo tawh thin. Luipui len avang chuan i thla lo phang mahse, hlauhnain tuam vel che mahse i tlakhlum loh nana chak tak leh huai takin, chhel takin i awm a ngai a, rinna nghet tak nena hmalampanin, hah leh chauh pawh sawi thei tawh lovin, tirhkoh Paula sawi angin i ban i phar anga, i duh loh lamah chuan kaihin i awm tawh ang. Chumi hunah chuan Lalpa chakna hmachhuan chung zelin Pathian ram lo thleng tur chu hnunglam thilte theihnghlihin hmalam pan zel a tul tawh thin.  Aw, ringtu i kawng kha chhut ngun rawh. Engchinahnge i tan le?

EDITORIAL  BOARD

              (

Editor :

Tv.PC.Vanlalhriatpuia         - 9862732381

Jt.Editor:

Pu R. Lalmuanpuia               - 9612159842

News Editors :

Tv.RLalzamlova                   - 9612413196

Tv.R.Zodinsanga                  - 8974743073

Tv.F.Laldingliana                 - 9862378567

Tv.Lalhmangaihzuala          - 9862846345

Circulation Manager:

Pu.C.Lalnunsanga                - 9612413287

Editorial.........?

            Kum 2012 chu Pathian kaihhruaina hnuaiah tluang takin kan hmang cho ve zel a, kan vengchhungah ngei pawh harsatna em em awm lovin tluang takin hun kan hmang te hi Pathian awmpui na leh kaihhruaina liau liau a ni.

            Tunlai Mizoram sukthlek han thlir vang vang chuan chhiatna rapthlak lo thleng mai tur leh Pathian lo kal lehna pawh a hnai hle tawh a; reilo teah alo thleng mai dawn nia rinna pawh awm hial niin a lang thei awm e. Tunlaia hriat hlawh tak leh ngaihven ruk hlawh tak chu Maya Calendar hi a ni awm e. An ni ho thir dan atang chuan kumin kum tawp lam December Ni 21 bak chu hun lo la awm tur a hmu thiam tawh meuh lo. Hemi avang hian khawvel hian chhiatna rapthlak engemaw tak hmachhawn tur anga ngaihna pawh a lian hle mai.

            Engpawh nisela kan hmalam hun chu Pathian thu thu a ni a. Eng chhiatna pawh lo thleng sela Kristaah nun thuhruk nei tlat tu ni thei turin Krista Isua rinna kawngah in sawh nghet sauh sauh a tul awm e. Khawvel hun lo thlengin a tihdanglam leh sawinghin theihloh nun neitu Kristian kan ni a tul takzet a ni.

ARTICLE

ZAHAWMNA  HI

- P.C.Hriata

            Zahawm han tih chuan a kawh ber chu, vantlang nun aia chungnung deuh, mite pawhin an fiam bawrh bawrh ngam loh, kawng engkimah ti ila kan sawi sual deuh mai thei e, mi nawlpui in tlukloh en a en deuh te hi mi zahawm anga kan ngaih chu an ni awm e. A dik chiah mai, ei leh bar leh chhungkaw enkawl na chungchangah pawh mi vantlang aiin an chungnun a, an nunah midang te zah an kai miau chuan mi zahawm chu an ni chiah reng mai. Amaherawhchu hemi tlang atang ringawt atang tlir chuan a dik ber lo thei a, tin, mi zahawm tia han sawi fak tur pawh an vang viau ta ve ang le. Eng atang chiahin nge zahawmna hi kan teh anga, eng tehfung nge kan chelek ber ang tih hi hriatfuh a ngai a, chumi kan hriatfuh chuan mi zahawm hi kan awm fur mai awm asin.

            Pathianin mihring min siam dan han ngaihtuah a, beng sika han chhut vang vang chuan tupawh mai hi kan in angkhat tlang put mai awm e. Mihring ten zahawmna kan teh dan leh tehfunga kan hman tlanglawn ber han thlir dawn ila. Khawtlang leh ram ang pawha mi zahkai te chu thiamna sang tak nei te, sum leh paia hausa te, sawrkar lu leh sawrkar hnathawk lian te hi a tlangpui chuan zah chu an kai hle a, a dik pawh a dik chiah reng a ni. Amaherawhchu kha dinhmuna a din avanga zahkai an nih si chuan, kha an dinhmun chiah ah khan mirethei berh tak leh daikil kara mi; vantlang leh khawtlang ang pawha kan zah vak lo te kha han awm ve ta se, thawklehkhatah zah an kai nghal ngei ang le. He tehfung hmang thin tute chuan mihring zahawmna lam chu an hre hauh lo tihna a ang hle mai. Hnialtu thenkhat te tana hnialna awm thei chu; kha dinhmuna ding thei ngei tura an beihna leh an thawhrimna kha a ropuiin mi zahawm nihna chu a ni ngei mai a, mahsela an ni ang tho a thawkrim leh bei nasa, engemaw harsatna vanga thlengphak ve theilo te erawh chu vaivut pal khuk ang mai mai a pal zut theih dinhmunah an ding ve thei lawi si. Thawhrim dan leh hah dan inang theuh theuh vanduai vang maiin khawtlang zah a kai pha dawn ta lo, a pamhmai deuh lo maw le.

            Nihna leh thiamna tehfung atanga zahawmna kan teh thin a nih chuan thil diklo tak a awm thei dawn niin a lang. Heng tehfung kan sawi tak zawng zawng hi awmlo ta vek sela chuan tupawh hi ang khat vek kan ni ngei ang. Pathianin mihringte hi Thlarau nei leh Ama anpui ngeia siamte kan ni vek a, hei vang hian mihring reng reng hian hlutna leh zahawmna in angkhat tlang vek kan nei, chu chu kan sawi tak ang khian Pathian anpui vek kan nihna hi a ni, hemi atang hian mihring te hi in dawrin in zahthiam zawk ta ila; chu chuan kan nun hona pawh a ti nuam zawk ngei ang. Zahawmna hi  nihna atanga teh chu ni mahsela, Pathian in min siam dan leh a bul thum atanga ngaihtuah chuan zahawmna kan neih hi a inangkhat tlang a ni mai lo maw?

LAWMTHU SAWINA

            Ni 5.5.2012(Inrinni) khan Upa R.Lungtiawia Group KTP, Saikhamakawn chuan Kawmawl (Blanket-te) leh thosilen suk hnatlang neih a ni a, Group Member hnatlanga thawkchhuak zawng zawngte chungah lawmthu kan sawi tak meuh meuh a, tin, kan group inhlawhna atana kawmawl leh thosilen min suk tirtu Pu M.S.Dawngkima chungah lawmthu kan sawi tak meuh meuh  bawk e.

Secretary

Upa R.Lungtiawia Group

LAWMTHU SAWINA

            Keini Upa R.Lianzinga Group te chuan sumtuak nan a blanket min suktirtute zawng zawng leh member hnatlanga thawkchhuak zawng zawngte chungah lawmthu  kan sawi a. Tin, phal taka tui min hman tirtu Pu Dawngkima te leh pipe min hawh tirtu Pu Zirsangliana te chungah lawmthu kan sawi tak meuh meuh a ni.

Secretary

Upa R. Lianzinga Group

Letter  To  Editor

(Editor ngaihdan a ni vek kher lo)

Subj:- Street Light & Current hniam chungchang.

            Ka pu he thu hmang hian mi thahnemngai tamtak ten an ngaidan leh duhdan an lo sawi chhuak tawh thin a. Tum tumah pawh hian ka han sawi ve teh ang.                  Vengchhung Street light zawng zawng tih theih hi zan lamah a eng thei lova, siam that vat theih nise, tin current hniam vang hian ka khawl man to tak pawh a chhe hial tawh bawk. Hruaitute harhchhuak vat se ka va ti em!!                         - Quiet Man

KHAWTLANG  IN  ENSAN

            Lalbiakhlua s/o Lalringaii chuan vantlang huat zawng a; zu zuarin vawi thum lai man a nih tak avangin Joint Action Plan angin tiamchin awm lova ensan a ni.

Secretary

Joint Action Committee

LEHKHABU  KAWM  SIAM  DAWN

            Upa Denghluma Group te chuan Bible, hlabu leh lehkhabu kawm engpawh; man chawiin a siam tir leh dawn a. A siamtir duh chuan heng mite hnenah hian in report tur a ni e.

1. Pu C. Lalnunsanga (V.sec)

2. Tv. Malsawmzuala (T.Sec)

3. Nl. Laltanpuii ( Ch.sec)

            A siamtirna man chu hetiangin:-

1.Holy Bible(Zipper awm)- `200

2.Holy Bible(Zipper awmlo)- `150

            A hrechiang duh chuan a chunga kan tarlan mi pathum te hnenah emaw a hnuaia Contact no.-ah emaw hian zawhfiah theih reng a ni e.

Phn. No. 9612413287

Nizan  inkhel  result (EPL)

Arsenal 3-3 Norwich City

Zanin inkhel turte:

Newcastle Vs Man. City (6:00)

Aston Villa VsTottenham(6:30)

Bolton Vs West Brom (6:30)

Fulham Vs Sunderland (6:30)

QPR Vs Stoke City (6:30)

Wolve Vs Everton (6:30)

Man. Utd. Vs Swansea (8:30)

Mon, May 7, 2012

Blackburn Vs Wigan (12:30)

Tue, May 8,2012

Liverpool Vs Chelsea (12:15)

English FA Cup Final:

Chelsea 2-1 Liverpool

TUALCHHUNG

,Lalthanzami w/o Vanlalruata (Ch.sec) chu damlona avangin Presbyterian Hospital Durtlangah enkawl mek a ni.

,Pu L.V. Ramdinthara h/o Lalruaipuii (T.sec) te chhungkua chuan khawilo vahvel nan Santro an lei thar.

TUALCHHUNG  ATANGA H.S.S.L.C.  PASS  THARTE

1.Samson Lalhmangaihzuala s/o Tanpuii  - 1st (Letter in Eng. Mizo, Bio.)

2.Lalrinfeli d/o F. Lalrinpuia -1st (Letter in Geography)

3.Lalbiakdika s/o Zuimawii- 2nd

4.Laldawngliani d/o Vanlalhriata - 2nd

5.Lalngaihawmi Ralte d/o R. Lalzuala - 3rd

6.Lalremsangi d/o C.Zohmangaiha - 3rd

7.Lalhriatzuala s/o Upa C.Lalmuankima- 3rd

8.Lallawmawma s/o Thantluangi- 3rd

9.Lalsawmliani d/o Zohmingthangi-  3rd

10.Pc. Lalrinmawii d/o Lalparmawii- 3rd

            Vengchhung atanga hetiang zat H.S.S.L.C. pass thar kan nei hi a lawmawm tak zet a, tun aia nasa zawka tan la thar sauh sauh turin zirlai te pawhin rilru siam ila a lawmawm lehzual ang.

            H.S.S.L.C. pass thar zawng zawngte Mipui Aw Editorial Board chuan kan lawmpui a, an kal zel na turah  tha taka an tih zel theih nan duhsakna sang ber kan hlan e.

Mpui Aw Quiz No. 18 na result

Chhan lut- 3  Dik vek- 3

Lawmmandawngtu: Malsawmkimi (V. Sec)

            Lawmman hi Circulation Manager Pu C. Lalnunsanga hnenah lam tur a ni e.

PUBLISHED BY LITERATURE SUB. COMMITTEE KTP SAIKHAMAKAWN  BRANCH, COPIES : 300